Ua Na’o Tusiga Faatekinolosi: Talavou Matutua
Auala e 4 e Maua ai le Filemu Pe a Feagai ma Faamasinoga Amioletonu i le Lotu
Pe a tatou taulai atu ia Iesu Keriso, e mafai ona tatou lagonaina le olioli ma le filemu o le talalelei i o tatou olaga.
O le Ekalesia toefuataiina a Iesu Keriso o se nofoaga o le olioli, faamoemoe, ma le auai. O se nuu e mafai ona tatou faapotopoto ai o ni soo o Keriso e faaali atu lo tatou alofa mo Ia ma mo le tasi ma le isi, ma o se nofoaga e toatele tagata e maua ai ni aafiaga matagofie. Ae i le avea ai ma tagata lē atoatoa i se lalolagi lē atoatoa, o nisi taimi tatou te faatusatusa ai i tatou lava i o tatou uso pe faamasinoina le tonu foi e le tasi le isi.
Atonu ua e oo i le faamasinoina ona o le ese o lou manatu. Atonu na e feagai ma le lē taliaina mo le faia o se mea sese. Pe atonu foi o loo e aafia i vesiga po o tala ae e le o sou sese. E ui lava e mafai ona tiga le oo i faitioga mai isi, ae maise lava mai isi tagata o le Ekalesia, ae ua ofoina mai e Iesu Keriso ia i tatou le faamoemoe ma le faamalologa. Afai o loo e tauivi e lagona le taliaina i le lotu, o mea nei e fa e mafai ona fesoasoani ia te oe e maua ai le filemu e ala ia Keriso.
1. Manatua le Auala e Silasila ai le Alii ia te Oe
O se mea masani le manao ia manatu maualuga isi ia i tatou. Afai o loo e tauivi ma le mamafa o manatu o isi, e taua le manatua o loo silasila mai le Tama Faalelagi ma Iesu Keriso ia te oe ma alolofa atoatoa ia te oe.
Roma 8:39 ua faitauina, “[E le mafaia e ia mea] ona faate’aeseina i tatou mai le alofa o le Atua, o loo ia Keriso Iesu lo tatou Alii.” Pe a tatou manatua o le Tagata e sili ona malosi i le atulaulau e alofa ia i tatou ma e manao i le mea sili mo i tatou, e le afaina tele manatu o isi. O Lona Alo, o Iesu Keriso, o lo tatou Faaola ma uo, ma ua Ia silafia atoatoa i tatou. Pe a tatou mulimuli i poloaiga ma fusia i tatou lava ia i Laua e ala i feagaiga, o le a tatou maua le malosi e taulima ai luitau tatou te feagai. Ma e aofia ai le malosi e tetee atu ai i faamasinoga ma le le agalelei o isi.
I le faaaliga a Liae, o i latou o e na faalogo i tagata i le fale tele ma le ateatea na pauu ese mai le ai uamea ma iu ai lava ina o ese mai le laau o le ola (tagai 1 Nifae 8:31–34). Ae e pei o tagata o e sa le faalogo ia i latou o i totonu o le fale tele ma le ateatea ma pipiimau i le ai uamea, a o tatou taulai atu pea o tatou loto i le afioga a le Atua ma Lona alofa tumau faavavau, o le a mafai ona tatou le amanaiaina leo faatiga o isi.
2. Maua le Filemu i le Salamo
Afai o loo faitioina oe mo se agasala po o se mea sese na e faia, ia faamanatu ia te oe lava e na o le Alii lava e silafia atoatoa lou loto ma faamoemoega. Afai e tatau ai, e mafai e lou epikopo po o le peresitene o le paranesi ona feutagai ma oe a o e saili e salamo. A o e salamo faamaoni i au agasala ma taumafai e faatoilalo ou vaivaiga, o le a e lagonaina le filemu patino ma le mautinoa lea e na o le Alii e mafai ona tuuina mai.
Sa faasoa mai e Elder K. Brett Nattress o le Fitugafulu se tala i se alii talavou sa ia iloaina o lē na faatoilaloina se vaisū ogaoga o fualaau faasaina. E ui lava ina ua uma ona salamo ma auauna atu i se misiona, ae sa popole lava lenei alii talavou ina nei le faamagaloina o ia i ana mea sese ua tuanai.
Sa fai atu Elder Nattress ia te ia, “Ioe ua faamagaloina oe! E ese lou lelei! O le mea la e tatau ona e faia nei o le agai i luma i lou olaga. Aua le toe tepa i tua! Tulimatai atu i luma ma le faatuatua i le isi sauniga.”
Afai o loo taulai atu tagata o loo siomia oe i au agasala ua tuanai, vaai i upu a Isaia:
“O loo faapea mai Ieova, o mai ia, ina tatou filifili ia, e ui lava ina pei o ofu mūmū a outou agasala, e sisina ia e pei o le kiona; e ui lava ina mūmū ia e pei o le ie ulaula, e avea e pei o fulufulu mamoe.
“Afai tou te gauai ma outou faalogo, tou te aai ai mea lelei o le laueleele” (Isaia 1:18–19).
Ia faatuatua i le moni o le taulaga togiola a Keriso. Na maliu o Ia mo oe ona sa finagalo o Ia ia e salamo ma toe foi atu ia te Ia. A o e saili e suia ma faaogatusa lou olaga ma le Tama Faalelagi ma Iesu Keriso, e mafai ona e maua le filemu o se lotofuatiaifo mamā.
3. Iloa E Mafai Ona Faamagaloina
Afai o loo faamasinoina oe e tagata i le amioletonu, e faigofie lava ona atiina ae ni lagona o le ita. Ae o le teuina o le ita po o faalogona leaga e na o le faateleina ai o le lē fiafia.
I le Mataupu Faavae ma Feagaiga 64, na aoao mai ai Iesu Keriso:
“E tatau ona outou faamagalo i le tasi …
“O a’u o le Alii, ou te faamagalo i le o lē a Ou faamagaloina, ae o outou ua poloaiina ia faamagalo atu i tagata uma” (fuaiupu 9–10).
Afai o loo faigata ia te oe ona faamagalo atu, ole atu i le Tama Faalelagi e fesoasoani ia te oe e mulimuli i le fautuaga a le Faaola i le Feagaiga Fou: “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44).
Atonu e te lagona e sili mo oe le le tumau pea ona vavalalata ma se uo po o se tagata o le uarota o loo faamasinoina oe—ma e le afaina lena mea. E tusa lava pe e te filifili e te manaomia sina taumamao mai lenei tagata, e mafai lava ona fesoasoani le Atua ia te oe e faamalolo ma faamagalo atu.
4. Atiina A’e ni Faauoga Lelei
Ua aoao mai e le Feagaiga Tuai le taua o faauoga lelei: “E sili ona lelei o le toalua i le toatasi; …aua afai e pau le tasi e faatuina o ia i luga e le la te toalua” (Failauga 4:9–10). E mafai e uo lelei ona faamalosiauina i tatou pe a tatou le fiafia ma faamalosia la tatou faaiuga e alualu i luma.
Afai e te lagona le tuuatoatasi po o le faaesea, e mafai ona e vaavaai mo avanoa e fausia ai ni faauoga ma tagata o e mananao i le mea sili mo oe. A o e sailia ni uo, o le mataupu faavae lona sefulutolu o le faatuatua e mafai ona maua ai ni taiala aoga. Vaavaai mo tagata o loo taumafai ia “faamaoni, amiotonu, nofomama, agalelei, amiomama, ma … faia mea lelei i tagata uma.”
O Le a Le Tuulafoaia Lava Oe e Iesu Keriso
Ua tele taimi ua faia ai lenei tala, ae o se upumoni taua e manatua—o le Ekalesia e faia mai i tagata lē atoatoa. Ma e ui lava o loo tatou taumafai i le mea sili tatou te mafaia e mulimuli ai i le faataitaiga a le Faaola, ae o le a tatou faia uma lava ni mea sese. Ae a o tatou liliu atu ia Iesu Keriso, e mafai ona tatou maua le meaalofa o le alofa mama ma le faamalologa moni pe a tatou tiga ma musuia e ole atu mo se faamagaloga mai ia i latou ua tatou faatiga i ai.
Pe a foliga mai e tetee isi ia te oe, o Ia o lē e atoatoa o le a le tuulafoaia lava oe.