Digital Lamang: Mga Young Adult
Sa Unsang paagi nga ang Akong Pagtuo sa Dios Nahulma pinaagi sa Pagpamatuod ni Joseph Smith
Nawala ang akong pagtuo sa Dios. O aduna ba ko?
Pipila ka tuig ang milabay, atheist gyod ko.
Natawo ko nga Katoliko, apan gikan sa katuigan sa akong pagka-ten-edyer hangtod sa nag-edad ko og 25, mibati ko nga murag adunay espirituwal nga kahaw-ang sa akong kahiladman. Misulay ko sa pagtambong sa lainlaing simbahan, apan walay usa niini ang nakahulip sa kahaw-ang. Human niana nakadesisyon ko nga mas sayon nga mohunong na lang sa pagtuo sa Dios kaysa magsige og paningkamot sa pagpangita sa tinuod nga simbahan.
Una nakong nakat-onan ang mahitungod sa Basahon ni Mormon ug ni Joseph Smith gikan sa usa ka programa sa TV bahin sa mga tawo nga namaligya og mga karaan [antique] ug ubang mahalon nga mga koleksiyon. Ang usa ka tawo nga anaa sa salida nga akong gitan-aw nagdala og karaan kaayo nga kopya sa Basahon ni Mormon aron ibaligya.
Samtang ang eksperto mipasabot kon unsay nakabililhon sa basahon, misulti siya og gamay mahitungod sa kasaysayan sa Simbahan ug sa basahon. Ang eksperto misulti sa host, “Kini mao pa sukad ang labing bililhon nga basahon nga imong gipa-ebalwar nako.”
Nakadayeg ko sa basahon ug sa istorya, mao nga nakadesisyon ko sa pagkat-on pa og dugang.
Gigiyahan ngadto sa Kamatuoran
Naghimo ko og pipila ka pagsiksik, ug sa dihang mas nagkat-on ko mahitungod ni Joseph Smith, mas milambo ang akong pagtahod ngadto kaniya.
Ako usab nangita sa kamatuoran ug wala masayod kon asa kini pangitaa.
Ako usab mitambong sa daghang simbahan sa pagpangita sa tinuod ug wala makakaplag niini.
Unya, samtang nag-scroll sa Facebook, adunay ad nga migawas alang sa pahina nga gitawag og “Come unto Christ [Duol ngadto ni Kristo].” Wala kaayo ko maghunahuna niini. Hinuon, adunay nakakuha sa akong pagtagad, ug dayon akong nakita ang akong kaugalingon nga mibutang sa akong numero sa telepono diha sa site.
Pipila ka bulan ang milabay, nakadawat ko og tawag sa telepono gikan sa Ang Simbahan ni Jesukristo sa mga Santos sa Ulahing mga Adlaw.
Wala ko motubag.
Human sa paspas nga pagpangita sa Google, nakadesisiyon ko nga tawagan og balik ang numero. Ang mga misyonaryo nga mitubag mipasabot nga nakuha nila ang akong impormasyon gikan sa Come unto Christ nga website, ug sa kalit lang klaro na ang tanan. Mituyo ko sa pag-sign up alang sa impormasyon gikan mismo sa Simbahan nga akong gitun-an.
Kataposang Pamatuod
Misugod ko sa pakigkita sa mga misyonaryo ug nagkat-on og dugang pa. Ang espirituwal nga kahaw-ang misugod sa pagkapuno. Dihang miabot ang higayon nga midesisyon ko nga magpabunyag, pipila sa Kristiyano nga mga higala midapit nako ngadto sa ilang mga kamping sa simbahan.
Atol sa panapos nga wali sa kataposang adlaw sa kamping, nag-ampo ko nga ang Dios mopamatuod nako nga ang Basahon ni Mormon tinuod. Sa eksakto nga higayon, ang usa ka estudyante nga nagtuon aron mahimong pastor mibira sa Basahon ni Mormon ug miingon, “Nganong dili man kita mobasa gikan niini nga basahon? Kini nga basahon mahitungod kang Jesukristo ug nahisubay sa Biblia.” Ang pundok sa katawhan nahilom. Nakumbinser ko nga mao kini ang tubag sa akong pag-ampo.
Human sa pagkadungog gikan niana nga estudyante, gibati nako ang Espiritu nga nagpamatuod kanako nga kini nga basahon mao ang lain nga tugon ni Jesukristo. Wala madugay nabunyagan ko.
Akong Gimahal Kini nga Simbahan
Sukad sa pagpasakop sa Simbahan, ang espirituwal nga kahaw-ang sa akong kahiladman napuno, ug ang akong pagpamatuod ni Propeta Joseph Smith ug sa Basahon ni Mormon nagpadayon lamang sa paglambo.
Ang Langitnong Amahan mitabang nako nga masayod, pinaagi sa pag-ampo ug sa Iyang Espiritu, nga mao kini ang Simbahan ni Jesukristo. Sa pagkatinuod, nangandoy ko nga unta akong nahibaloan ang Simbahan niadtong batan-on pa ko. Akong gimahal kini nga Simbahan. Mao gayod kini ang Simbahan ni Jesukristo dinhi sa yuta karon.