Unsaon Nako sa Pagserbisyo sa Ginoo Kon ang Akong Pamilya Nagkinahanglan Nako?

Mabati nako ang Espiritu nga naggiya nako sa pagserbisyo og misyon, apan wala nako masabti ang mga sitwasyon. Nag-ampo ko sa Langitnong Amahan sa unsang paagi Siya nagpaabot nako nga moserbisyo nga nagkinahanglan man kini nga mobiya ko sa akong pamilya ug mohunong sa akong pinansyal nga suporta.

Apan wala ko makadawat og bisan unsa nga direksyon ug mibati nga napakyas.

Dayon nakahinumdom ko sa usa ka pagtulun-an gikan ni Elder Robert D. Hales (1932–2017) sa Korum sa Napulog Duha ka Apostoles. Miingon siya: “Kon kamo wala makadungog sa Iyang tingog [sa Espiritu] nga misulti karong bag-o pa, balik ngadto sa mga kasulatan nga morag primero pang nakakita ug morag primero pang nakadungog. Sila mao ang atong espirituwal nga sumpay sa kinabuhi.”

Nakaamgo ko nga ako nagtuon sa akong mga kasulatan ug nag-ampo nga adunay pagduhaduha, kahadlok, ug walay kaseguroan sa akong hunahuna. Kon gusto og tubag, kinahanglan kong mag-ampo ug magtuon inubanan sa hugot nga pagtuo diha sa Langitnong Amahan.

Uban niining bag-ong panglantaw sa hugot nga pagtuo imbes sa kahadlok, miabli ko sa Doktrina ug mga Pakigsaad 31, nga naglangkob sa pagpadayag nga nadawat ni Thomas B. Marsh sa dihang gitawag siya sa usa ka misyon. Ang Ginoo mihupay niya, mihatag niya og kaseguroan nga ang iyang pamilya OK ra samtang wala siya (tan-awa sa Doktrina ug mga Pakigsaad 31:5).

Nahingangha ko kon unsa ka susama ang iyang sitwasyon sa akoa. Ug mibati ko og kahupayan sa dihang nagbasa ko sa mahigugmaong mga saad sa Ginoo ngadto ni Thomas:

• “Panalanginan ka nako ug ang imong pamilya” (bersikulo 2).

• “Ipadayag kini kanimo pinaagi sa Maghuhupay kon unsa ang imong buhaton ug kon asa ka moadto.” (bersikulo 11).

• “Pagmatinud-anon ngadto sa kataposan, ug tan-awa, Ako mag-uban kanimo. Kini nga mga pulong dili gikan sa tawo ni gikan sa mga tawo, apan gikan kanako, gani si Jesukristo, nga imong Manunubos, pinaagi sa kabubut-on sa Amahan.” (bersikulo 13).

Gibati nako nga ang Ginoo direkta nga namulong kanako.

Nasayod ko nga kon ako mosalig Kaniya, ang akong pamilya ug ako mapanalanginan. Mao nga, uban sa suporta sa akong pamilya, gisumiter nako ang akong mga papeles sa misyon ug gitawag nga moserbisyo og misyon sa California, USA.

Ang pagsalig sa Langitnong Amahan sa mga ideya sa kalibotan mao ang usa ka pagpili nga atong himoon kada adlaw.

Si Elder Paul B. Pieper sa Seventy karong bag-o mitudlo: “Kon ang atong kaalam ug pagsabot magkulang, natural lang nga magtinguha kita og tabang gikan sa ubang mga tinubdan. Dinhi sa napuno sa impormasyon nga kalibotan, dili kita makulangan sa mga tinubdan nga mopasigarbo sa ilang mga solusyon sa atong mga kalisod. Hinuon, … Ang Mga Panultihon naghatag og labing maayong tambag: ‘Salig sa Ginoo sa bug-os mong kasingkasing’ [Mga Panultihon 3:5]. Mapakita nato ang atong pagsalig sa Dios pinaagi sa pagdangop og una ngadto Kaniya kon mag-atubang og mga hagit.”

Sayon kaayo nga mahadlok niini nga kalibotan nga puno kaayo sa daghang hagit. Nasayop ko sa pagtugot sa akong mga kahadlok nga nagpahuyang sa akong hugot nga pagtuo ug sa pagtugot sa akong mga kabalaka sa kalibotanong mga butang nga mo hakgom kanako. Apan human niini nga kasinatian, nasayod ako nga kita makasalig kanunay sa mga saad sa Langitnong Amahan.

Ang akong pamilya nag-uswag sukad nagsugod ko sa pagserbisyo, ug mapasalamaton kaayo ko tungod niana. Ang mga panalangin nga akong nadawat mas importante sa akong mga kabalaka.

Kon mopadayon kita sa pag-ampo, pagsiksik sa atong mga kasulatan, pagtuman sa atong mga pakigsaad, ug pagsunod sa Manluluwas inubanan sa hugot nga pagtuo imbes sa pagduhaduha makita nato nga kita adunay matag rason sa pagsalig Kaniya ug sa Langitnong Amahan kay sa kalibotan.