Mibati nga Nabug-atan? OK ra nga Mohinayhinay

1. Matag buntag, pag-ampo alang sa Espiritu nga motabang ninyo nga magpabilin sa karon, madasig, ug mohimo sa maalamong paagi sa inyong panahon matag adlaw. Sa tibuok adlaw, makamatikod kamo og mga higayon diin ang inyong mga pag-ampo gitubag!

2. Isulat ang tanan nga kinahanglan ninyong buhaton kada adlaw, ug dayon iprayoridad unsa nga mga butang ang labing importante. Kompletoha pag-una ang labing importante nga mga butang.

3. Paggahin og panahon sa Ginoo kada adlaw. Kon inyong buhaton, ang ubang tanang butang sa kasagaran masulbad ra sa iyang kaugalingon. Bisan asa kamo sa inyong espirituwal nga panaw, paningkamoti nga kanunay nga mouswag sa unahan matag adlaw.

4. Atimana ang inyong kaugalingon sa pisikal ug sa mental nga paagi. Kon inyong unahon ang inyong pisikal ug mental nga kahimsog, kamo adunay kalagsik sa paghimo sa ubang butang. Paminaw sa inyong lawas ug sa inyong mga panginahanglan.

5. Buhata ang mga butang sa tinagsa matag higayon. Sa sunod nga higayon nga kamo mibati nga nabug-atan, sultihi ang inyong kaugalingon, “Ang bugtong butang nga kinahanglan nakong buhaton niining gutloa mao ang X.” Human ninyo makompleto kana nga buluhaton, sulayi kini pag-usab sa sunod nga butang.

Samtang kamo magbansay niini nga mga sugyot, makita ninyo ang inyong kaugalingon nga nag-establisar og klaro nga mga prayoridad sa inyong kinabuhi, maggahin og panahon nga dili konektado gikan sa teknolohiya, o mohatag sa inyong kaugalingon og pahulay ug maulian.

Ang pagpuyo og mabungahon nga kinabuhi dili daotan. Nindot nga mobati nga nagmalamposon ug nahuman ang mga buluhaton! Pero, dili kinahanglan nga butangan ninyo ang inyong kaugalingon og daghang palas-anon o mogamit sa inyong kalamposan isip sukod sa bili sa inyong kaugalingon.

Si Elder Dieter F. Uchtdorf Korum sa Napulog Duha ka Apostoles mipasabot niini sa labing maayo: “Ingon og sayon ra nga mahimong busy. Kitang tanan makahunahuna og labihan ka daghang buluhaton nga mohurot sa atong eskedyul. Ang uban gani tingali magtuo nga ang ilang bili sa kaugalingon mag-agad sa kataas sa lista sa ilang buhatunon. … Tungod kay ilang giproblema ang dili angay nga mga butang sa ilang kinabuhi, sagad nila nga bation ang nagkadugang nga kapakyas, nagkawala nga kalipay, ug gamay ra kaayong pagbati sa kahulugan sa ilang kinabuhi.”

Hinuon, si Elder Uchtdorf miawhag nato nga “maghinay-hinay kita og gamay, magpadayon sa pinakamaayong gipaspason alang sa atong mga kahimtang, mag-focus sa mahinungdanon, ipataas ang atong mga panan-aw, ug tinuoray nga makakita sa mga butang nga labing mahinungdanon.”

Alang nako, ang paggamit niini mao ang pagpili sa pagbilin sa akong telepono sa balay sa sunod higayon nga ako maglakawlakaw. Dayon sa tinud-anay malingaw ko sa akong palibot ug mamalandong sa akong adlaw!

Ang pagpakunhod sa atong lakang sa kinabuhi makatabang nato sa pagwagtang sa wala kinahanglan nga palas-anon ug makakaplag og dugang hingpit nga kalipay.

Si Elder Vern P. Stanfill sa Seventy mitudlo: “Kinahanglan natong hinumdoman nga bisan unsa ang atong labing maayo apan dili hingpit nga halad, ang Manluluwas makahimo niini nga hingpit. Bisan unsa ka daw dili mahinungdanon ang atong mga paningkamot, kinahanglan dili nato ipakaubos ang gahom sa Manluluwas.”

Kon mobati ko nga nabug-atan sa mga buluhaton, nahingawa sa akong umaabot, o nabalaka nga wala ko maabot ang akong potensyal, misalig ko sa kamatuoran nga ang Manluluwas makapahingpit sa akong gamay—apan matinguhaon—nga mga paningkamot.

Gibutang nako ang akong pagsalig sa samang Dios nga midala og kalinaw ug kahupayan sa Iyang mga anak sulod sa liboan ka tuig. Mitabang siya nako, ug nasayod ko nga Siya motabang usab ninyo.

OK ra nga mohinayhinay. Ang Dios nakahibalo bahin kaninyo ug sa inyong mga sirkumstansiya.

Nahigugma Siya kaninyo!