Mosunod ni Propeta Joseph Smith: Magtinguha og Personal nga Pagpadayag

Mibati ba kamo nga murag wala kamo makadawat og tubag sa inyong mga pangutana nga nakapabug-at kaninyo?

Kamo wala mag-inusara.

Nanglimbasog ko sa mga pangutana ug mga kabalaka sulod sa katuigan ug midangop ngadto sa Dios alang sa mga tubag. Apan usahay bation nako nga murag sirado ang kalangitan alang nako. Samtang nagpadayon ko sa pakigbisog sa mga pangutana sa kinabuhi, wala nako madawat kanunay ang klaro nga mga tubag. Apan modangop lang gihapon ko ngadto sa Dios.

Ang rason yano: mao kana ang gibuhat ni Propeta Joseph Smith.

Sa batan-on pa, si Joseph Smith nagbasa sa Biblia kon kamo nakulangan sa kaalam, mangutana kamo sa Dios alang sa mga tubag (tan-awa sa Santiago 1:5). Unya miadto siya sa kakahoyan, nag-ampo, ug nakadawat og tubag sa porma sa usa ka langitnong panan-awon (tan-awa sa Joseph Smith—Kasaysayan 1:15–20). Kini tingali kon tan-awon murag nadawat dayon niya ang pagpadayag, apan ania ang importante nga bahin niini nga istorya: si Joseph nabalaka ug nagsige og hunahuna mahitungod sa tinuohan ug relihiyon sa wala pa mangita og tubag.

Sa 1832 nga asoy sa Unang Panan-awon, si Joseph mga 12 anyos sa dihang hilabihan ang iyang paghunahuna “sa tanang importante nga mga kabalaka alang sa kaayohan sa [iyang] imortal nga kalag.”

Nakigbisog siya niini nga mga pagbati diha sa iyang kasingkasing ug hunahuna sulod sa duha o labaw pa nga katuigan, nangita og mga tubag, nagtambong sa lainlaing simbahan, ug nagbasa sa Biblia (tan-awa sa Joseph Smith—Kasaysayan 1:3–10). Dayon nakadesisyon siya nga mangita og tubag pinaagi sa pag-ampo.

Sa dihang gibuhat niya kini, sa edad nga 14, ang Langitnong Amahan ug si Jesukristo mipakita, ug si Joseph nangutana: “Hain sa tanan nga [mga simbahan] ang tinuod”? (Joseph Smith—Kasaysayan 1:18). Ang iyang tubag gikan sa Ginoo mao nga dili moapil sa bisan unsa nga simbahan (tan-awa sa Joseph Smith—Kasaysayan 1:19).

Kini nga pagpangita dili talagsaon nga kasinatian. Human nga gitubag sa Dios ang iyang pag-ampo, si Joseph nangayo na og tubag gikan sa Ginoo sa tibuok niya nga kinabuhi, ug nadawat niya kini. Daghan niini ang nahisulat diha sa Doktrina ug mga Pakigsaad sa Simbahan isip sagrado nga kasulatan.

Si Presidente Russell M. Nelson miingon: “Usa sa mga butang nga gibalik-balik sa Espiritu og sil-sil sa akong hunahuna … mao ang pagkaandam sa Ginoo nga mopadayag sa Iyang hunahuna ug kabubut-on. Ang pribilehiyo sa pagdawat og pagpadayag usa sa labing mahinungdanon nga mga gasa sa Dios ngadto sa Iyang mga anak.”

Akong gibutang sa kasingkasing kana nga mensahe, ug ang ehemplo ni Joseph. Makahimo usab kamo. Ayaw pagpakawala sa paglaom kon kamo mobati nga murag wala makadawat sa mga tubag nga inyong gikinahanglan. Ang Ginoo misaad nga kon kita mangita, kita makakaplag (tan-awa sa Mateo 7:7). Padayon lang sa pagpangita ug, sama ni Joseph Smith, ang Dios mopadayag sa mga tubag nganha kaninyo.