Hain sa Langitnong mga Gasa ang Espesyal nganha Kanimo?

“Ang labing makahuloganon nga gasa nga akong nadawat gikan sa akong Langitnong Amahan ug sa Iyang Anak nga si Jesukristo mao ang Pag-ula ni Jesukristo. Walay bisan unsa sa tibuok kahangtoran nga mas makahuloganon kay sa sakripisyo sa atong Manluluwas. Nasayod ko uban ang kaseguradohan nga ang mga kasakit ug mga kaguol nga akong naagian niini nga kinabuhi Iyang gibati sa wala pa kini nako naangkon. Para kanako ang Iyang mahigugmaong sakripisyo maoy labing mahinungdanon sa tanan nga anaa sa kalibotan.”

Grace N.

“Alang kanako, ang gasa sa mahangtorong mga pamilya labi ka makahuloganon. Ang pagkahibalo nga makauban nako ang akong pamilya sa kahangtoran naghimo nako nga mobati og gamay nga bahin sa gugma sa Langitnong Amahan ug ni Jesukristo kada adlaw. Gimahal nako ang akong yutan-ong pamilya—sila ang labing dakong panalangin sa akong kinabuhi ug ang akong labing lig-ong pangpadasig nga magpabilin sa dalan sa ebanghelyo. Mapasalamaton kaayo ko nga makauban nako sila sa tibuok kahangtoran.”

Olivia W.

“Ang labing espesyal nga gasa ngari kanako mao ang gasa sa kinabuhing dayon. Tungod kay ang atong Langitnong Amahan nahigugma kanato pag-ayo, Siya mihatag kanato sa dalan sa pagbuntog sa kamatayon ug sala (nga usa ka butang nga dili nato mahimo nga mag-inusara). Gusto Niya nga kita mopuyo uban Kaniya sa kahangtoran ug mihatag og paagi nga kita mabuhi sa kahangtoran, uban sa atong mga pamilya. Alang kanako, kini nga gasa espesyal tungod kay naghatag kini kanako og paglaom sa lisod nga mga panahon ug nagtugot kanako sa paghinumdom kanunay sa Iyang hingpit nga plano ug walay kinutoban nga gugma.”

Sara S.

“Usa sa labing makahuloganon nga mga gasa nga gihatag sa Langitnong Amahan ug ni Jesukristo kanako mao ang abilidad nga makauban kadtong akong gihigugma sa kahangtoran. Gihunahuna ko kini apan wala ko mibati nga natandog pag-ayo ug sa personal nga paagi hangtod sa pipila ka tuig ang milabay, nawad-an ako og usa ka suod nga higalang babaye. Ako karon nagpabilin niini nga kahibalo ug nasayod nga bisan unsa pa ang mahitabo niini nga kinabuhi, ang tanan ma-OK ra tungod kay kita adunay mahigugmaon nga Langitnong Amahan kinsa gusto nga kita mobalik ngadto Kaniya.”

Kaitlyn S.

“Ako mapasalamaton sa gasa sa pagpahiuli sa pagkapari. Mibati ko og kompirmasyon sa katinuod sa pagpahiuli sa gahom sa pagkapari sa dihang ang takos nga mga kaigsoonan mihatag kanako og mga panalangin. Ang pagpahiuli sa pagkapari talagsaon tungod kay nagtugot kini sa mga ordinansa sa templo, sa tinuod nga organisasyon sa Simbahan, mga propeta, ug uban pang mga butang nga nakaapekto sa akong kinabuhi.”

Jared P.

“Sa akong hunahuna ang labing espesyal nga regalo nga gihatag kanato mao ang gugma. Kita adunay hingpit nga gugma gikan sa langit, ug kita usab mahigugma (ug higugmaon) sa mga tawo dinhi sa yuta. Sa akong hunahuna nindot kaayo nga kon mas mailhan ninyo ang usa ka tawo, mas dili ninyo kapugngan nga higugmaon sila! Adunay mga higayon sa akong kinabuhi nga gibati nako nga nakita nako ang mga tawo pinaagi sa mga mata sa Dios ug gibati nako unsa kadako ang paghigugma Niya ngadto kanila. Kining langitnong gasa sa gugma gamhanan kaayo!”

Nicole S.

“Ang butang nga kanunay nakong giluhod sa pagpasalamat mao ang akong kabubut-on. Mapasalamaton ko sa Langitnong Amahan kinsa mitugot kanako nga makigbisog ug mahunahunaon nga mohimo og desisyon nga mahimong mas maayo og gamay matag adlaw. Para nako, ang kabubut-on may kalabotan sa Pag-ula ni Jesukristo. Ang gasa sa kabubut-on nagtugot kanako sa pagluhod diha sa akong labing lawom nga mga gutlo sa kahuyang ug sa pagdangop ngadto sa akong Langitnong Amahan ug ni Jesukristo.”

Jake L.

“Ang labing makahuloganon nga gasa ngari kanako mao ang kabubut-on. Ang Langitnong Amahan nahigugma kanako pag-ayo nga andam Siya nga motugot kanako nga mosunod Kaniya. Gihatag niya ang tanan aron kita makapili Kaniya, apan gitugotan Niya kita nga magdesisyon. Makahuloganon kaayo kana kanako ug nakapabati kanako nga gihigugma ug nadasig sa pagsunod Kaniya.”

Dallin H.

“Ganahan kong maghunahuna bahin sa tanang espirituhanong mga gasa nga anaa ug sa unsang paagi kitang tanan gihatagan ug lain-laing mga gasa gikan sa Diyos. Matag usa kanato adunay mga kalig-on ug mga talento, ug magamit nato kini sa paghigugma, pagserbisyo, ug pagbayaw sa mga tawo sa atong palibot. Makaila kita sa espirituhanong mga gasa nga gihatag kanato ug magamit kini sa pagtabang niadtong anaa sa atong palibot, ingon man usab sa pag-ila sa mga gasa nga gihatag sa Dios sa uban ug makita kon giunsa nila pagserbisyo ang uban sa ilang kaugalingong talagsaon nga mga paagi.”

Brooke S.

“Tungod sa Langitnong Amahan ug ni Jesukristo, nasayod ko nga mausab ko aron mahimong mas maayo. Kon wala Sila, nasayod ako nga ang akong mga problema ug mga kakulangan sa kinabuhi mahimong bug-at kaayo. Apan tungod kay ako nasayod nga ako adunay usa ka mahigugmaong Langitnong Amahan ug usa ka Manluluwas kinsa mihatag sa Iyang kinabuhi alang kanako, ako makabuntog ug makabiya sa bisan unsa nga sayop nga akong mahimo ug sa kataposan mahimong ang labing maayo nga bersiyon sa akong kaugalingon. Bisag kapila ko makahimo og sayop, makabalik ra gihapon ko.”

Hyrum W.

Ang mga kasulatan nagtudlo kanato nga ang matag maayo nga gasa nagagikan ni Kristo (tan-awa sa Moroni 10:18). Ganahan kong maghunahuna sa tanang maayong butang sa akong kinabuhi isip gasa gikan sa Langitnong Amahan ug ni Jesukristo. Importante nga mamalandong sa atong langitnong mga gasa aron atong mailhan ang tanan nga gihatag kanato!

Si Elder Dale G. Renlund sa Korum sa Napulog Duha ka Apostoles mitudlo: “Ang atong Langitnong Amahan gusto nga kita mahinumdom sa Iyang pagkamaayo ug sa Iyang Hinigugmang Anak, dili alang sa Ilang kaugalingon nga katagbawan apan sa impluwensya niana nga paghinumdom diri kanato. Pinaagi sa pagkonsiderar sa Ilang pagkamabination, milapad ang atong panglantaw ug panabot. Pinaagi sa pagpamalandong sa Ilang kamanggiluy-on, mas mapaubsanon na kita, mainampoon, ug makanunayon.”

Wala ko kahibalo bahin ninyo, pero ganahan ko nga mahimong mas mapaubsanon, mainampoon, ug makanunayon! Ug kon ang pag-ila sa kaayo sa Langitnong Amahan sa akong kinabuhi makatabang nako nga mahimong sama niana, mas malipayon ko sa pagbuhat niini.

Samtang kita mamalandong ug makaila sa mga butang nga gihatag kanato, kita adunay oportunidad sa pagpasalamat sa Langitnong Amahan sa tanan nga Iyang nabuhat. Ang atong pagkamapasalamaton mahimong usa ka pagpahayag sa atong gugma alang Kaniya!

Karong panahon sa Pasko, dapiton ko kamo sa pagpamalandong, pag-ila, ug pagpasalamat sa daghang langitnong mga gasa sa inyong kinabuhi. Samtang “[Iphon] ninyo ang panalangin” ug “tagsa-tagsa inyong hinganlan,” matingala lang kamo nga makita ang tanan nga nahimo sa Ginoo.