Ang Kagawasan sa Pagpili kang Kristo

Ni Yevheniia (Ginger) Zinchenko

Ang relihiyon kanunayng mura og nagpugong nako gikan sa pagpili sa kaugalingon nakong mga pagpili.

Sa masuso pa ko, nabunyagan ko sa Orthodox nga Simbahan sa Ukraine. Sa akong pagdako, ang tinuod nga dili gayod ako ang mihimo sa pagpili nga magpabunyag nagsamok kanako. Nagsugod ko sa paghunahuna nga ang relihiyon wala maghatag kanako og kagawasan nga makapili alang sa akong kaugalingon.

Mao nga sa kadugayan mihunong ko sa pagtuo sa Dios o sa bisan unsang espirituhanon.

Usa ka adlaw, nakigsulti ko sa akong higala nga didto sa Czechia nga naghimo og usa ka programa sa pagtuon nga konektado sa Ang Simbahan ni Jesukristo sa mga Santos sa Ulahing mga Adlaw. Gidapit niya ako sa paghimo usab sa programa. Sa sinugdanan dili ko interesado, apan sa kadugayan, mihukom ko nga akong susihon.

Ganahan ko sa kapositibo sa tanang mensahe, mao nga naminaw ko og gigamit kini.

Apan walay koy interes sa programa nga nagtutok kang Jesukristo.

O maoy akong gidahomam.

Mibati og Kalibog

Kini nga eskwelahan naghimo nako sa pagpakabuhi nga lahi kay sa akong naandan. Una, nakat-onan nako nga dili ko mahimo nga moinom og kape sulod sa kampus!

Ingon og nagkawala koy kagawasan.

Dugang pa niana, ang matag buntag kinahanglan gyod sugdan og debosyonal. Sa kadaghang higayon makatulog ko atol niini kay dili ko interesado. Naa lang ko didto aron magkat-on ug dayon magkapabuhi sigon sa akong gusto.

Apan sa kadugayan, nabantayan nako ang mga tawo sa akong palibot seryoso kaayo sa pagdawat sa mga pagtulun-an ni Jesukristo. Sa Ukraine, daghang mga tawo mosimba lamang og pipila ka higayon sa usa ka tuig, apan dinhi, ang tanan maghisgot kanunay mahitungod ni Kristo. Mabination sila, mga buotan, ug positibo mahitungod sa kinabuhi.

Nagsugod ko sa paghunahuna kon unsa kaha ang akong kinabuhi kon ako usab motuo Kaniya. Usahay mabantayan nako ang akong kaugalingon nga maghunahuna, “Unsa kaha ang panglantaw ni Jesus?”

Tinuod Ba Gayod Kini?

Naglibog ko. Gisultihan nako ang usa sa akong mga higala sa eskwelahan mahitungod sa akong gibati nga hagit. Gidapit ko niya nga sulayan ang pag-ampo mahitungod sa akong mga gibati.

Usa ka gabonon nga buntag, mihukom ko nga mangita og hilom nga dapit aron makapamalandong sa gawas. Wala ko mahibalo unsay miabot kanako, apan imbis mamalandong, gipili nako nga mosalig sa Dios bisan sa akong pagduhaduha. Miingon ko, “OK, mag-istorya ta.”

Ug akong gilitok ang kinatas-ang pag-ampo sa akong kinabuhi.

Gusto lang kong masayod kon ang Dios ug si Jesukristo tinuod ba.

Samtang nag-ampo ko, ang hayag sa adlaw milapos sa gabon. Akong gibati ang kainit sa akong panit ug kainit diha sa akong kasingkasing. Akong gibati nga dunay naggunit sa akong abaga, nag-ingon kanako nga Sila anaa ra gayod karon kauban nako.

Ang mensahe tin-aw: Tinuod gayod Sila. Nakaila sila kanako.

Duna pa gyod koy lahi pang namatngonan.

Nagtan-aw niadtong mga nanagpakabuhi sa ebanghelyo ni Jesukristo, wala koy nakita ni bisan kinsa nila nga gipugos sa pagbuhat og mga butang nga dili nila gustong buhaton o pagbati nga gipugngan sa ilang tinuohan. Nakita nako sila nga nagpili nga magpakabuhi sama ni Jesukristo kay maoy ilang gusto.

Diha sa Basahon ni Mormon, si propeta Moroni mihatag sa iyang saad pinaagi sa pagdapit, dili sa usa ka mando: “Kon kamo mangutana sa kinasingkasing, uban sa tinuod nga katuyoan, nga may hugot nga pagtuo kang Kristo, siya mopakita sa kamatuoran niini nganha kaninyo, pinaagi sa gahom sa Espiritu Santo” (Moroni 10:4).

Nakaamgo ko nga gusto usab akong mopili Kaniya.

Dili Hingpit nga Pagkadisipulo

Sukad niadto, giseryoso nako ang pagkat-on mahitungod ni Jesukristo. Midawat ko og mga leksiyon sa misyonaryo. Gitun-an nako ang Basahon ni Mormon. Nag-ampo ko kada adlaw. Nabunyagan pa g’yod ko! (Ang akong pagpili niining higayona!) Tanan kini bag-o alang nako, apan mibati ko nga nagkausab ang akong kasingkasing.

Daghan pa gihapon ko og angay kat-onan, ug dili gayod ako perpekto, apan kanunay kong moingon sa akong kaugalingon, “Paningkamotan lang nato nga mahimong sama ni Kristo karong adlawa. Padayon lang sa paningkamot.”

Si Elder Joaquin E. Costa sa Seventy sa matahom nga paagi mitudlo: “Usahay, ang pagbaton og hugot nga pagtuo diha ni Jesukristo daw imposible, ingon og dili makab-ot. Makahunahuna kita nga ang pagduol ngadto kang Kristo nagkinahanglan og kalig-on, gahom, ug kahingpitan nga wala kanato, ug wala lang gyod tay kalagsik sa pagbuhat niining tanan. Apan … ang pagtuo diha ni Jesukristo ang nakahatag kanato og kalagsik sa pagsugod sa panaw.”

Si Jesukristo makausab kanato kon hatagan nato Siya og higayon ug padayon nga mosulay. Wala siya maglimita sa atong kagawasan. Kon dili, nagtanyag Siya kanato og mas daghan pa pinaagi sa Iyang Pag-ula: kalipay, pagkaayo, ug paglaom.

Aduna kitay kagawasan sa pagpili Kaniya matag adlaw, ug mapasalamaton ako sa mga milagro nga nahitabo sa akong kinabuhi gumikan sa akong pagpili sa pagsunod Kaniya.

Ang tagsulat gikan sa Kyiv, Ukraine.