Digital Lamang: Mga Young Adult
Mibati og Kalahi sa Mga Tawo sa Imong Palibot? Tingali Higayon na Kini sa Pagpakigbahin sa Imong Kahayag
Ang tagsulat nagpuyo sa Argentina.
Ang pagkalahi tingali lisod, apan makahatag usab kini kanato og mga oportunidad sa pagpahayag sa kalibotan.
Isip usa ka miyembro sa Ang Simbahan ni Jesukristo sa mga Santos sa Ulahing mga Adlaw, tingali mobati ka nga lahi sa mga tawo sa imong palibot.
Ug kana mahimong malisod usahay. Kon ikaw ra ang miyembro sa Simbahan sa inyong dapit, tingali mobati ka nga wala malakip kon ang imong mga higala o mga sakop sa pamilya moapil sa nagkalain-laing mga kalihokan. Tingali ikaw mobati pa nga katingad-an o bakikaw kon mosulay ka og pasabot sa imong tinuohan.
Apan dili kinahanglan nga ingon kini niini. Adunay tinuod nga gahom sa pagka, “dili maulaw sa Maayong Balita” (Mga Taga-Roma 1:16). Akong nakat-onan nga ang pagkahimong komportable sa pagkalahi makatabang kanato nga mobati nga adunay kasegurohan sa atong balaang pagkatawo ug mopakigbahin sa ebanghelyo—ug sa Kahayag ni Kristo—nga natural lang kaayo.
Ania ang pipila ka butang bahin kanako nga “lahi” ug usab nakapasayon gayod sa pagpakigbahin sa akong pagtuo ug kahayag:
1. Ako Nagtuo sa Dios—ug sa Siyensya
Ako usa ka estudyante sa engineering, mao nga naggahin ko og panahon sa daghang tawo nga nagtuo sa siyensya ug math apan walay pagtuo sa Dios.
Samtang kini nga kalahian dili kinahanglang mopadulong sa relihiyosong mga diskusyon sa tunga-tunga sa klase, aduna akoy kahigayonan nga mahimong “panig-ingnan sa mga tumutuo” (1 Timoteo 4:12). Ang akong mga higala gikan sa unibersidad makabantay kon dili ko mogawas ug makig-party uban kanila ma-Dominggo. Kon gusto silang mahibalo asa ko moadto, mohisgot ko sa akong pasalig sa pag-adto sa simbahan ug pakit-on sila nga ang akong edukasyon ug kahibalo dili makapugong kanako sa pagtuo sa Dios.
2. Ako Nagtuman sa Balaod sa Kaputli
Kon ang mga tawo makahibalo nga ang akong uyab ug ako nagtuman sa balaod sa kaputli ug wala magpuyo, daghan sila og pangutana. Ug kon mangutana sila kon giunsa namo pagkakita ug moingon ko nga didto kadto sa templo, samot og kadaghan ang ilang mga pangutana!
Ang kalibotan nagsugod sa pagtan-aw sa kaminyoon nga kinaraan na. Mao nga daghang tawo sa akong henerasyon nagtan-aw niini nga talagsaon nga nagpuyo ko og ingon niini. Apan kini nga kalahian naghatag kanako og kahigayonan sa pagpakigbahin sa akong pagpamatuod sa katahom sa mahangtoron nga kaminyoon ug sa unsang paagi ang balaod sa kaputli nagpanalangin sa akong kinabuhi.
3. Nag-istorya Ko bahin sa Akong Igsoon nga Babaye nga Nagserbisyo og Misyon
Ang akong manghod nga babaye nagserbisyo karon og misyon sa Chile, mao nga kon ang akong mga higala mangutana bahin sa akong pamilya, sayon ra ang pag-istorya bahin kaniya ug maghisgot sa akong pagtuo. Imbes maninguha sa pag-ambak sa hilisgotan o sal-angan kini, mosulti ko sa mga tawo nga nagtudlo siya bahin ni Jesukristo. Akong ipasabot ang akong gugma ug suporta alang kaniya ug sa buluhaton nga iyang gihimo.
Dili ko kinahanglang mosulti og bisan unsang dako o kulbahinam—nagmatinuoron lang ko. Apan nakatabang kini sa mga tawo nga makakita kon unsay bili sa Simbahan ngari kanako ug sa akong manghod.
4. Nagtuman Ko sa Pulong sa Kaalam
Usa sa akong personal nga mga tumong sa kinabuhi mao ang pagpakita sa mga tawo nga makalingaw-lingaw ko bisan dili moinom og alkohol—bisan og maghunahuna sila nga imposible kana!
Apan kon pangutan-on ko og mga pangutana bahin sa pagbalibad og ilimnon—nga kanunay gayod, tungod kay ang alkohol kabahin na gayod kaayo sa sosyal nga mga kalihokan—mopakigbahin ko nga malipayon ko ug nalingaw sa kinabuhi kon unsa ako. Makapadan-ag ko sa Kahayag ni Kristo pinaagi kanako ug ipakita sa mga tawo nga ang pagpuyo sa Pulong sa Kaalam nagtabang kanako sa paghimo og maayo nga mga desisyon ug naghatag kanako og hingpit nga kalipay.
Pagpakigbahin og Kahayag
Kasagaran niining mga panig-ingnan adunay usa ka butang nga komon: pagkahimong “usa ka panig-ingnan sa mga tumutuo, sa pulong, sa sinultihan, sa paggawi, sa espiritu, sa pagtuo, sa kaputli” (1 Timoteo 4:12). Wala gayod magkinahanglan og daghang kabatid ang yanong pagpuyo og matinud-anong kinabuhi ug pagpakigbahin sa kahayag sa Manluluwas sa kalibotan (tan-awa sa 3 Nephi 18:24). Ug alang kanako, mao gayod kana ang tanang gikinahanglan aron makabuhat sa akong bahin sa pagpadan-ag sa kalibotan—magpuyo nga usa ka ehemplo ni Jesukristo.
Sama sa gitudlo ni Presidente Thomas S. Monson (1927–2018): “Matag usa kanato mianhi sa yuta nga gihatagan sa Kahayag ni Kristo. Sa atong pagsunod sa ehemplo sa Manluluwas ug magpuyo sama sa Iyang pagpuyo ug sa Iyang pagtudlo, kana nga kahayag mosanag diha sa atong kaugalingon ug modan-ag sa dalan alang sa uban.”
Bisan kon ang inyong paningkamot sa pagpakigbahin sa inyong pagtuo dili mokabig sa mga tawo ngadto sa ebanghelyo, ang pagpakigbahin sa unsay anaa sa inyong kasingkasing bililhon gihapon. Ang pagpuyo nga matinuoron sa inyong mga tinuohan mopanalangin sa inyong kinabuhi ug molig-on sa inyong pagpamatuod. Kon magpraktis og maayo sa pagpakigbahin sa inyong kahayag, mas daghang kahayag ang inyong madala ngadto sa mga kinabuhi sa uban, bisan pa og unsay ilang pilion.
Ug sa tinuod, kinsa ang wala magkinahanglan og dugang nga gamay nga kahayag sa ilang kinabuhi?