“Asa Modangop alang sa Paglaom, Kalinaw, ug Katuyoan Kon ang Kinabuhi Mausab,” Liahona, Dec. 2024.
Mga Young Adult
Asa Modangop alang sa Paglaom, Kalinaw, ug Katuyoan Kon ang Kinabuhi Mausab
Ang kahibalo sa ebanghelyo ug ang Pag-ula ni Jesukristo magdala og paglaom, kalinaw, ug katuyoan niining panahon sa Pasko.
Paghulagway pinaagi ni Benedetta C. Vialli
Panahon sa atong mortal nga panaw, mag-atubang kitang tanan og mga kasinatian nga makatabang nato nga mahimong mas maayo nga mga disipulo ni Jesukristo. Pero, ang mga sirkumstasiya sa atong kinabuhi kasagaran mausab, ug nga kinahanglan nga atong usbon ang atong pamaagi sa pagpakabuhi.
Bisan pa niana, adunay paglaom alang niadtong kinsa “[naghunahuna ngadto] ni [Kristo] sa matag hunahuna” (Doktrina ug mga Pakigsaad 6:36), ug adunay “[paglaom] alang sa maayo nga kalibotan” ug usa ka mas maayo nga kaugmaon alang niadtong kinsa motuo sa Dios (Ether 12:4).
Ang mga kasulatan nagtudlo, nagdasig, ug nagpakita kanato kon sa unsa nga paagi nga kadtong milabay nga panahon—sa wala pa, panahon sa, ug human sa mortal nga pangalagad ug misyon ni Kristo—mitubag sa ilang mga sirkumstansiya. Pananglitan, si propeta Lehi sa Basahon ni Mormon gisugo sa Ginoo sa pagbiya sa iyang panimalay ug sa iyang tanang mga kabtangan, sa pag-adto sa kamingawan uban sa iyang pamilya, ug mopadulong ngadto sa wala mahibaloi nga destinasyon. Atol sa biyahe, miatubang si Lehi og oposisyon, konsimisyon, kabalaka, kasakit, ug kasagmuyo. Kini nga mga kasinatian miandam kaniya ug sa iyang pamilya sa gisaad nga yuta.
Kadaghanan kanato nag-atubang og mga hagit sama ni Lehi. Ang uban tingali nabalaka mahitungod sa ilang pamilya, kaminyoon, edukasyon, o panarbaho. Ang uban tingali mobati nga layo gikan sa Langitnong Amahan ug sa Manluluwas nga si Jesukristo tungod sa dili maayong mga pagpili o tingali mobati nga nag-inusara tungod sa pagbalhin ngadto sa laing lungsod o eskwelahan.
Kining panahon sa Pasko naghatag nato og espesyal nga oportunidad sa pagtutok sa kalinaw nga gitanyag ni Jesukristo kanato. Bisan unsa pa ang inyong mga pagbati, mga sirkumstansiya, o nahimutangan, hinumdomi nga ang mga milagro mahitabo kon kamo “mopadayon sa unahan uban ang pagkamakanunayon kang Kristo” (2 Nephi 31:20).
Usa ka Panahon sa Walay Kaseguroan ug Kaguliyang
Samtang nagserbisyo isip usa ka misyonaryo sa Côte d’Ivoire Abidjan Mission niadtong 1998, nakadungog ko mahitungod sa kaguliyang sa politika ug sosyal nga sitwasyon sa akong nasod, ang Democratic Republic of the Congo. Kada adlaw, mogawas ko uban sa akong kompanyon aron mangita og katudloan. Sa dihang mopaila ko sa akong kaugalingon ug mohisgot nga ako gikan sa DR Congo, ang mga tawo mosulti nako sa ka grabe sa unsay nahitabo tali sa gobyerno ug sa mga grupo sa rebelde didto—ilabi na sa Kinshasa, ang kapital nga siyudad, diin nagpuyo ang akong pamilya. Naguol ko nga nakadungog nga ang mga tawo sa akong nasod nagutman ug nga daghang tawo ang nangamatay.
Nangayo ko og tabang sa akong mapinanggaon ug mabalak-on nga presidente sa misyon sa pagsusi kon duna pa ba siyay nahibaloan kabahin sa sitwasyon o kon nakadawat ba siya og bisan unsa nga impormasyon mahitungod sa akong pamilya. Gibati nako ang kawalay paglaom ug mihilak og dugay. Gusto ko nga moundang. Gibati nako nga ang Ginoo nakalimot sa akong pamilya ug kanako.
Ang akong kompanyon ug ang ubang mga misyonaryo mitanyag og suporta ug pag-atiman atol niining higayona. Sa dihang hapit na ako mohunong, si Elder Joseph Wheeler, usa ka maayo nakong higala, mipakigbahin og usa ka kasulatan nga dili gayod nako malimtan.
Niadtong 1830 si Propeta Joseph Smith nakadawat og pagpadayag alang ni Thomas B. Marsh. Si Thomas bag-o lang nabunyagan ug na-orden nga usa ka elder sa Simbahan. Siya usab gitawag sa pagsangyaw sa ebanghelyo. Nianang higayona, si Thomas nagkinahanglan og kaseguroan. Ang Ginoo misulti ni Thomas pinaagi sa Propeta:
“Thomas, akong anak, bulahan ikaw tungod sa imong hugot nga pagtuo sa akong buhat.
“Tan-awa, ikaw adunay daghan nga mga pag-antos tungod sa imong banay; bisan pa niana, Ako manalangin kanimo ug sa imong banay, oo, sa imong gagmay nga mga anak; ug ang adlaw moabot nga sila motuo ug masayod sa kamatuoran ug magkahiusa uban kanimo diha sa akong simbahan.
“Ipataas ang imong kasingkasing ug pagmaya, kay ang takna sa imong misyon miabot; ug ang imong dila makasulti, ug ikaw magpahayag sa maayo nga mga balita sa dako nga kalipay ngadto niini nga kaliwatan. …
“Busa, igalab ang imong sanggot uban sa imong tibuok nga kasingkasing, ug ang imong mga sala mapasaylo diha kanimo, ug ikaw magpas-an og binugkos diha sa imong likod, kay ang mamumuo takos sa iyang suhol. Busa, ang imong banay mabuhi” (Doktrina ug mga Pakigsaad 31:1–3, 5).
Mao kini ang tubag nga akong gipangita. Naghimo ko sa buhat sa Ginoo, ug ang kahibalo ug ang kamatuoran sa ebanghelyo ug Pag-ula ni Jesukristo nakahatag og paglaom ug katuyoan sa akong kinabuhi atol nianang panahon sa walay kaseguroan.
Upat ka Baroganan sa Pagkaplag og Kalinaw
Ang mosunod nga upat ka baroganan makatabang kaninyo kon kamo wala makahibalo asa modangop alang sa paglaom, kalinaw, ug katuyoan sa inyong kinabuhi:
1. Tuhoi nga adunay paglaom ug solusyon sa kahaw-ang o kahigawad nga inyong gibati. Ang paglaom makita diha kang Jesukristo, sa Iyang Pag-ula, ug sa Iyang ebanghelyo. Ang Manluluwas miingon, “Ako mianhi aron sila makabaton og kinabuhi, ug sa pagkabaton niini sa madagayaon gayod” (Juan 10:10). Uban Kaniya, kamo adunay paglaom kanunay alang nianang buhong nga kinabuhi.
2. Pagmalipayon bisan pa sa mga sirkumstansiya o mga hagit sa inyong kinabuhi. Ang atong minahal nga propeta, si Presidente Russell M. Nelson, mitudlo:
“Ang kalipay nga atong gibati dili kaayo konektado sa mga sirkumstansiya sa atong kinabuhi ug apan ang tanan konektado kaayo sa gitutokan sa atong kinabuhi.
“Kon ang sentro sa atong kinabuhi anaa sa plano sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya.”
Bisan kon “maghilak kamo ug magminatay, … malipay ang kalibotan” tungod ni Jesukristo, ug “mahimong kalipay ang inyong kaguol. … Kalipay nga walay makaagaw gikan kaninyo” (Juan 16:20, 22).
3. Pagmaluluy-on ug serbisyohi ang uban. Ang Manluluwas nga si Jesukristo “naghimog mga maayong butang” (Mga Buhat 10:38). Pag-ampo alang sa kalig-on nga mahimong tubag sa pag-ampo sa usa ka tawo. Pahiyom, pakigsulti ug pakigkuyog niadtong anaa sa imong palibot. Paminaw kanila ug paggahin og panahon alang kanila. Pagdasig, pakigbahin unsay inyong nahibaloan nga tinuod, ug pasayloa ang uban. Kining yanong mga buhat adunay dakong epekto kaninyo ug sa uban.
4. Paghinulsol ug paningkamot sa pagtuman sa inyong mga pakigsaad. Si Presidente Nelson mitudlo:
“Tungod sa Manluluwas, pinaagi sa Iyang walay kinutoban nga Pag-ula, mitubos sa matag usa nato gikan sa kahuyang, mga sayop, ug sala, ug tungod kay Siya nakasinati sa matag sakit, kabalaka, ug palas-anon nga inyong nasinati sukad, nan, samtang kamo tinud-anay nga maghinulsol ug mangayo sa Iyang panabang, kamo makabuntog sa mga hagit sa walay kasegurohan nga kalibotan karon. …
“Bisan pa sa mga makalibog dili eksakto nga mga kamatuoran nga anaa sa atong palibot, kamo makakita og tinuod nga kapahulayan—nagpasabot nga kahupayan ug kalinaw—bisan taliwala sa inyong labing makahasol nga mga problema.”
Kon kamo maghinulsol ug maningkamot sa pagtuman sa mga pakigsaad kada adlaw nga inyong gihimo ngadto sa inyong Langitnong Amahan ug ni Jesukristo diha sa bunyag ug sa templo, si Presidente Nelson mitudlo nga kamo “nakapadugang og agianan ngadto sa gahom ni Jesukristo.” Ang Iyang gahom “makapalig-on nato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan.”
Kamo anak nga lalaki ug anak nga babaye sa usa ka mahigugmaon ug mapinanggaon nga Langitnong Amahan. Siya nagtinguha nga kamo mouswag ug magmalipayon, nga posible lamang pinaagi sa Iyang Anak, nga si Jesukristo, nga atong gipaningkamotan nga hinumdoman kanunay atol niining panahon sa Pasko—ug sa matag panahon human niana. Nasayod ko nga ang ebanghelyo ni Jesukristo ug ang Iyang Pag-ula makahatag og paglaom, kalinaw, ug katuyoan sa inyong kinabuhi.