Founga ʻe Lava ke Vahevahe ai ʻe he Ngaahi Fāmilí ʻa e Ongoongoleleí
“Naʻe fokotuʻu ʻe Sīsū Kalaisi ʻa Hono Siasí ke lava ʻa e fakafoʻituituí mo e ngaahi fāmilí ʻo tokoni ki he ʻOtuá ʻi hono fakahoko ʻEne ngāue ki he fakamoʻuí mo e hakeakiʻí” (Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 1.3, Gospel Library). Ko hono vahevahe ʻo e ongoongoleleí ko ha konga mahuʻinga ia ʻo e ngāue maʻongoʻonga ko iá. “Ko e tokolahi ʻo e kakaí ni ʻoku nau fekumi ki ha taumuʻa ʻi he moʻuí. ʻOku nau hohaʻa ki honau kahaʻú mo e kahaʻu honau ngaahi fāmilí” (Malanga ʻAki ʻEku Ongoongoleleí: Ko ha Fakahinohino ki Hono Vahevahe ʻo e Ongoongolelei ʻo Sīsū Kalaisí [2023], 1).
Ngaahi Founga ke Vahevahe ai ʻe he Ngaahi Fāmilí ʻa e Ongoongoleleí
-
Fakaafeʻi ha fāmili ke nau efiafi fakafāmili, maʻu meʻatokoni efiafi, mo vaʻinga mo koe.
-
Fakaafeʻi ha fāmili ke mou ʻalu fakataha ki he lotú.
-
ʻAhiʻahi vahevahe fakafāmili ʻa e ongoongoleleí ʻi ha fokotuʻutuʻu fakatulama.
-
Ako fakataha fakafāmili ʻa e Malangaʻaki ʻEku Ongoongoleleí, pea ngāueʻi ʻa hono ngaahi akonakí.
-
Tokoniʻi ha fāmili ʻoku fiemaʻu tokoni, pe fakaafeʻi ha fāmili ke nau kau fakataha mo koe ki ha ngāue ʻofa kuo fokotuʻutuʻu.
-
Tokoniʻi ha fāmili ke nau fehokotaki mo ʻenau ngaahi kuí.
-
Fakaafeʻi ha fāmili ke nau ʻalu mo koe ki he ʻekitivitī faka-Siasí pe paati.
-
Fakaafeʻi ha fāmili ke nau ʻalu ki ha ʻoupeni hausi ʻa e temipalé, pea fakamatalaʻi ange ʻa e founga ʻoku fakatahatahaʻi ai ʻe he temipalé ʻa e ngaahi fāmilí ʻo taʻengata ʻo fakafou ʻia Sīsū Kalaisi.
-
Fakaafeʻi ha kau mēmipa ʻo e fāmilí ke nau kau atu ki ha kalasi moʻui fakafalala pē kiate kita pe ko ha kalasi EnglishConnect.
Ngaahi Maʻuʻanga Tokoni ʻe Lava ke Vahevahe ʻe he Ngaahi Fāmilí mo ha Ngaahi Kaungāmeʻa
-
Vahevahe ʻa e Ngaahi ʻEkitivitī Fakauōtí
Akonaki Fakaepalōfitá
Lotu fakataha ko ha fāmili ke tokoni atu ʻa e Tamai Hēvaní ke mou vahevahe ʻa e ongoongoleleí mo e kakai ʻoku mou feohí. Mou fevahevaheʻaki hoʻomou ngaahi ongó mo e ngaahi fakakaukaú kau ki he founga te mou lava ai ʻo vahevahe fakafāmili ʻa e ongoongoleleí ʻaki hono ngāueʻi ʻa e ngaahi tefitoʻi moʻoni ʻo e “ʻofá, vahevahé, mo e fakaafé.” Hangē ko e fānau ʻa e ʻOtuá ʻi he ʻAlamā 6:6, te mou lava ʻo “kau fakataha ʻi he ʻaukai pea mo e lotu lahi koeʻuhi ko e lelei ʻa e laumālie ʻo kinautolu ʻa ia naʻe ʻikai ʻiloʻi ʻa e ʻOtuá.”
Muimui ki he ngaahi ueʻi ʻo e Laumālie Māʻoniʻoní pea mou fepoupouʻaki ʻi hoʻomou ngaahi ngāué. ʻI hono vahevahe ʻe hoʻo fāmilí ʻa e ongoongoleleí, te mou maʻu ʻa e ngaahi tāpuaki ʻa e Tamai Hēvaní mo ongoʻi ha fiefia lahi. “ʻI he taimi ʻoku tau ofo moʻoni ai ʻia Sīsū Kalaisi mo ʻEne ongoongoleleí, ʻoku tau fiefia ange, loto-vēkeveke ange ki he ngāue ʻa e ʻOtuá” (Ulisses Soares, “Ofo ʻia Kalaisi mo ʻEne Ongoongoleleí,” Liahona, Mē 2022, 115).