Founga ʻe Lava ke Vahevahe ai ʻe he Toʻu Tupú ʻa e Ongoongoleleí

• Fakafanongo ki ha taha ʻi he taimi ʻoku ʻikai ke nau maʻu ai ha ʻaho leleí.

• Fakavave ke tokoniʻi e niʻihi kehé.

• Taukaveʻi e meʻa ʻoku totonú.

• Kole ki he Tamai Hēvaní ke tokoni atu ke ke vahevahe ʻa e ongoongoleleí.

• Vahevahe ha post mei ha ʻakauni mītia fakasōsiale ʻa e Siasí.

• Vahevahe ʻa e hiva ʻa e toʻu tupú.

• ʻI he fehuʻi atu ha kaungāmeʻa fekauʻaki mo hoʻo fakaʻosinga ʻo e uiké, talanoa fekauʻaki mo hoʻo ʻalu ki he lotú pe ko hoʻo kau atu ki ha ngaahi ʻekitivitī ʻa e Siasí.

• Fakaafeʻi ha kaungāmeʻa ki ha konifelenisi Ki Hono Fakamālohia ʻo e Toʻu Tupú (KFT)

• Fakakau ha tokotaha foʻou ʻi hoʻo kulupu kaungāmeʻá.

• Fakaafeʻi haʻo kaungāmeʻa ki he seminelí pe ko ha ʻekitivitī ʻa e toʻu tupú.

• Strive to Be YouTube channel

• Strive to Be Instagram

• Young Women Worldwide Instagram

• Young Men Worldwide Instagram

• Makasini Ki Hono Fakamālohia ʻo e Toʻu Tupú

• Hiva ʻa e toʻu tupú

• Seminelí

• App ki he Tohi ʻa Molomoná

Lotua ha tokoni ke vakai ki he kakaí ʻi he founga ʻoku vakai ʻaki ʻe he ʻOtuá kiate kinautolú pea ke maʻu ha loto-toʻa ke talanoa kiate kinautolu fekauʻaki mo Sīsū Kalaisi mo ʻEne ongoongoleleí. Falala te Ne tokoniʻi koe ke ke ʻilo ʻa e founga ke tokoniʻi ʻaki hoʻo ngaahi kaungāmeʻá ke nau fanongo kiate Ia mo ongoʻi ʻEne ʻofá. “Fakaafeʻi ʻa e kakaí ʻi hano fakahinohino ʻe he Laumālié, ke nau fai ha ngaahi tukupā ʻe tokoni ke nau tupulaki fakalaumālie mo ongoʻi ʻa e ivi tākiekina ʻo e Laumālie Māʻoniʻoní ʻi heʻenau moʻuí” (Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí [2023], 202). ʻI hoʻo fai iá, te ke ʻiloʻi ai ʻoku ʻomi ʻe he ʻofá, vahevahé mo e fakaafé, ʻa e fiefia ki hoʻo moʻuí mo tokoni ke ke teuteu ke ngāue fakafaifekau taimi kakato.

Falala ʻe fakahinohinoʻi mo fakamālohia koe ʻe he Tamai Hēvaní. Te ke lava ʻo fakaongo e ngaahi lea ʻa ʻAlamaá: “Ko hono ʻuhinga ʻeni ʻo ʻeku vīkivikí, ke u lava ʻa pē ʻo hoko ko ha meʻangāue ʻi he toʻukupu ʻo e ʻOtuá ke ʻomi ha taha ki he fakatomalá; pea ko ʻeku fiefiá ʻeni” (ʻAlamā 29:9; tānaki atu ʻa hono fakamamafá).

Te ke lava ʻo fakamoʻoniʻi “ko ʻEne ongoongoleleí pē ʻa e solovaʻanga tuʻuloa ki he melinó. Ko ʻEne ongoongoleleí ko ha pōpoaki ia ʻo e melinó.” ʻOku ʻi ai hoʻo meʻafoaki makehe mo e malava ke vahevahe ʻa e ongoongoleleí—ʻi he taimí ni pea mo e kahaʻú fakatouʻosi, ko ha faifekau taimi kakato. “ʻOku mou mahuʻinga kotoa ki he ʻEikí. Naʻá Ne tuku fakatatali kimoutolu ki he taimí ni ke tokoni ki hono tānaki ʻo ʻIsilelí. Ko hoʻo fili ko ia ke ngāue fakafaifekaú, neongo pe ko ha ngāue fakafaifekau malanga pe faifekau tokoni, ʻe tāpuekina ai koe mo e niʻihi kehé” (Russell M. Nelson, “Malangaʻi e Ongoongolelei ʻo e Melinó,” Liahona, Mē 2022, 6).