Ngaahi Fakakaukau ki he Lēsoni ʻo e Sāpate hono Nimá
ʻOku ʻomi ʻe he ngaahi lēsoni ʻo e Sāpate Nimá ha ngaahi faingamālie ke fakalotolahiʻi ʻaki ʻa e kāingalotú ke nau moʻui ʻaki ʻa e ngaahi tefitoʻi moʻoni ʻo e “ʻofá, vahevahé, mo e fakaafé” pea fakatokangaʻi ʻa e fiefia mo e ngaahi tāpuaki ʻoku maʻu mei hono vahevahe ʻo e ongoongolelei ʻo Sīsū Kalaisí. Ko e taha ʻo e ngaahi taumuʻa ʻo ha lēsoni ʻo e Sāpate Nimá, ke tokoniʻi ʻa e mēmipa takitaha ke vahevahe ʻa e ongoongolelei ʻo Sīsū Kalaisí ʻi ha ngaahi founga angamaheni mo fakanatula ʻaki hono ngāueʻi ʻa e ngaahi tefitoʻi moʻoni ʻo e “ʻofá, vahevahé, mo e fakaafé.”
Muimui ki he fakahinohino ʻa e Laumālié ʻi hoʻo teuteú. Faiako ʻi ha founga te ne poupouʻi ai e kāingalotu homou uōtí pe koló, tautautefito ki he toʻu tupú, ke nau kau ʻi he fealēleaʻakí. ʻE lava ke tokoni ʻa e ngaahi fakakaukau mo e ngaahi maʻuʻanga tokoni ko ʻení ʻi hoʻomou ngaahi ngāué.
Ngaahi Fakakaukau ʻe Ala Ngāue ʻAki
ʻOku ʻatā kiate kitautolu takitaha ʻa e ngaahi tāpuaki mo e fiefia ʻo hono vahevahe ʻo e ongoongoleleí. ʻOku tāpuekina e kāingalotu kotoa pē ʻo e Siasí ʻi heʻetau ʻofa ki he ʻOtuá mo hotau kaungāʻapí; vahevahe ʻa e ongoongoleleí ko ha konga pē ia ʻo ʻetau moʻui fakatāutahá, fakafāmilí, mo e siasí; pea fakaafeʻi ʻa e niʻihi kehé ke nau omi ʻo mamata, omi ʻo tokoni, pea nau omi ʻo kau.
ʻOku ʻomi ʻe hono vahevahe ʻo e ongoongoleleí ʻa e fiefia kiate kitautolu, ki he ʻEikí, pea mo e niʻihi kehé. ʻOkú ne ʻomi foki ʻa e Laumālié mo e mālohi lahi ʻa e ʻOtuá ki heʻetau moʻuí (vakai Mōsaia 18:10; Sione 15:4–5), maluʻi kitautolu mei he ʻahiʻahí (vakai 3 Nīfai 18:24–25), mo ʻomi ʻa e fakamoʻuí mo e fakamolemole ʻo e ngaahi angahalá (vakai Tokāteline mo e Ngaahi Fuakava 62:3).
Ko Hono Vahevahe ʻo e Ngaahi Maʻuʻanga Tokoni ʻo e Ongoongoleleí
ʻE lava ke tokoni atu ʻa e ngaahi maʻuʻanga tokoni ʻoku lisi atu ʻi laló ke mou maʻu ʻa e mahino ki he ngaahi founga ke tokoniʻi ʻa e kāingalotu ʻo e Siasí ke vahevahe ʻa e ongoongoleleí ʻaki hoʻomou ngāueʻi ʻa e ngaahi tefitoʻi moʻoni ʻo e “ʻofá, vahevahé, mo e fakaafé.”
-
Gary E. Stevenson, “ʻOfa, Vahevahe, Fakaafe,” Liahona, Mē 2022, 84–87
-
Marcus B. Nash, “Hiki Hake Hoʻomou Māmá,” Liahona, Nōvema 2021, 71–73
-
Ko Hono Vahevahe ʻo e Ongoongoleleí: Ngaahi Tefitoʻi Moʻoni ʻo e ʻOfá, Vahevahé, mo e Fakaafé
-
Founga ke Kamata Ai Hono Vahevahe ʻo e Ngaahi Maʻuʻanga Tokoni ʻa e Siasí
-
Ngaahi Meʻa Lalahi ʻi he Fakamafola ʻo Hono Vahevahe ʻo e Ongoongoleleí
-
2022 Vahevahe ʻo e Ongoongoleleí: Ko ha Fakamafola maʻá e kau Takí
Ngaahi Fehuʻi ʻe Ala Aleaʻí
-
ʻOku ʻomi fēfē kitautolu ʻe hono vahevahe ʻo e ongoongoleleí ke tau ofi ange kia Sīsū Kalaisí?
-
Te tau fakakau fēfē nai ʻa e niʻihi kehé ki heʻetau moʻui fakatefito ʻia Kalaisí ʻi ha founga angamaheni mo fakanatula?
-
Ko e hā ha ngaahi founga ʻoku tau vahevahe fakanatula ai ʻa e ongoongoleleí? Te tau fakatupulaki fēfē nai ʻa e ngaahi ngāue ko iá?
-
ʻE faʻu fēfē nai ʻe hotau uōtí ha ʻātakai ʻe faingofua ai ʻa e ʻofá, vahevahé mo e fakaafé?
-
Te tau kamata fēfē nai hono vahevahe ʻa e ngaahi maʻuʻanga tokoni ʻa e Siasí?