Ko e Fakafekauʻaki Lelei mo e Kau Faifekaú
ʻOku taki muʻa ʻa e kau palesitenisī ʻo e Kau Mātuʻá mo e Fineʻofá ʻi he tokoni ke ueʻi e kāingalotú ke nau ʻofa ki he fānau ʻa e ʻOtuá, vahevahe ʻa e ongoongoleleí, mo fakaafeʻi e niʻihi kehé ke nau maʻu ʻa e ngaahi tāpuaki ʻa e Fakamoʻuí (vakai Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 23.5.2, Gospel Library). ʻI he hoko ko ia ko e kau takí, ʻiloʻi ʻoku matuʻaki mahuʻinga hoʻo ngaahi ngāué ʻi he taimi ʻoku fakafehokotaki ai ʻe he kāingalotú mo e kau faifekaú ʻenau ngaahi ngāué ke ʻomi e kakaí kia Kalaisí.
Ko e taha ʻo e ngaahi founga lelei taha ke fakafenāpasi ai ʻa e ngaahi ngāue ke ʻomi e niʻihi kehé kia Kalaisí, ko hono fakahoko ʻa e ngaahi fakataha nounou fakauiké ʻa ia “fakafekauʻaki ai [ʻa e] kau taki fakalotofonuá [mo e kau faifekaú ʻi he] ngaahi feinga ke vahevahe ʻa e ongoongoleleí mo fakamālohia ʻa e kāingalotu foʻoú mo e foki maí” (Malanga ʻAki ʻEku Ongoongoleleí: Ko ha Fakahinohino ki hono Vahevahe ʻo e Ongoongolelei ʻo Sīsū Kalaisí [2023], 221).
ʻOku totonu ke tokanga taha ʻa e ngaahi fakataha fekauʻaki fakauiké ʻi he niʻihi fakafoʻituituí pea aleaʻi ʻa e ngaahi fehuʻi ʻe fā ko ʻeni mei he Malanga ʻAki ʻEku Ongoongoleleí:
-
Te tau lava fēfē ke tokoniʻi ʻa e ngaahi meʻa ʻoku akoʻí?
-
Te tau tokoniʻi fēfē ʻa kinautolu naʻe toki papitaisó?
-
Te tau tokoni fēfē ki he kāingalotu foki maí?
-
Te tau maʻu fēfē ha kakai tokolahi ange ke akoʻi?
Ko e ngaahi fakataha fekauʻaki fakauiké ko ha taimi lelei ia ke fakakaukau ai ki he ngaahi fiemaʻu fakakolo ʻa ia ʻe lava e ngaahi maʻuʻanga tokoni ʻa e Siasí ʻo tokoni ki aí. Ko e ngaahi fakataha ko ʻení, ko ha taimi foki ia ke fakatupulaki ai e ngaahi founga ʻoku lolotonga fakaʻaongaʻi ʻe he kāingalotú ke vahevahe ʻaki ʻa e ongoongoleleí, mo feinga ke ʻiloʻi ʻa e ngaahi ʻekitivitī fakauooti pe fakasiteiki ʻe lava ai ʻe he kāingalotú ʻo fakaafeʻi e ngaahi kaungāmeʻá mo e kakai ʻi he koló ke nau kau ki aí.