Ko Hono Fakaʻaongaʻi ʻo e Ngaahi Akonaki ʻa e Kau Taki ʻo e Siasí ke Mahino ʻa e Folofolá

Fakamatalaʻi ange ʻoku maʻu ʻe he kau palōfita ʻa e ʻEikí ʻa e fatongia pau ke fakamahinoʻi ʻa e folofolá mo e tokāteliné (vakai, 1 Nīfai 22:1–2; Tokāteline mo e Ngaahi Fuakava 24:5). ʻOku tokoni foki ʻa e kau palōfitá mo e kau taki kehe ʻo e Siasí ke tau “fakatatau” mo fakaʻaongaʻi ʻa e folofolá ki heʻetau moʻuí (1 Nīfai 19:23).

ʻE lava ke tokoniʻi kitautolu ʻe he ngaahi maʻuʻanga tokoni ko ʻení ke tau maʻu ha ngaahi akonaki mei he kau taki ʻo e Siasí fekauʻaki mo ha ngaahi potufolofola pau:

• Scripture Citation Index—Ko ha meʻangāue ʻeni ʻi he ʻinitanetí ʻoku maʻu ʻi he scriptures.byu.edu. ʻOku toe maʻu atu foki mo ha polokalama ki he telefoni toʻotoʻó maʻá e Android mo e iOS. Fili ʻa e tohi folofolá, vahé pe kongá, pea toki hoko atu ki he vēsí.

• Gospel Library (telefoni toʻotoʻó)—Fakaʻaongaʻi ʻa e founga fekumí ke kumi ʻaki ʻa e fakamoʻoni folofolá pe ngaahi foʻi lea mahuʻingá. Te ke lava foki ʻo fakaʻilongaʻi ha kupuʻi lea ʻi ha veesi folofola. ʻI he taimi ʻe ʻasi mai ai ʻa e toolbar, lomiʻi ʻi he Search. Ke fakasiʻisiʻi ʻa e fekumí, te ke lava ʻo fakaʻaongaʻi ʻa e foʻi tao ʻoku tuhu ki laló ʻi he “Collections” pea fili ʻa e Konifelenisi Lahí pe Ngaahi Makasiní. Hili iá pea vakai ki he ngaahi ola ʻo e ngaahi akonaki fekauʻaki mo e potufolofola ko iá.

• Gospel Library (uepisaití)—Fakaʻaongaʻi ʻa e fekumí ʻi ha feituʻu pē ʻi he ChurchofJesusChrist.org ke fekumi ʻo fakatatau mo e fakamoʻoni folofolá pe ngaahi foʻi lea mahuʻingá. Hili iá pea fakaʻaongaʻi ʻa e meʻangāue Filter ke fakangatangata pē hoʻo fekumí ki he “Konifelenisi Lahí” pe ko ha ʻū tohi kehe.

Fakamahinoʻi ange ko e taimi ʻoku fakaʻaongaʻi ai ʻa e Scripture Citation Index pe fekumi ʻi he Gospel Library, ʻe ala tokoni ke ʻuluaki lau ʻa e ngaahi palakalafi kimuʻá pea ʻi he hili ʻa e fakamatalá ʻoku fakakau mai ʻi he ngaahi ola ʻo e fekumí. ʻE lava foki ke ʻomai ʻe hano ako ha ngaahi fakamatala kehekehe ʻa e kau taki ʻo e Siasí fekauʻaki mo ha potufolofola pau ha ʻilo lahi ange ki hono ʻuhingá. ʻE lava ke ke ʻiloʻi ʻoku ʻaonga ke nofotaha ʻi he ngaahi akonaki kimuí ni mei he kau kau taki ʻo e Siasí.

Fili ha potufolofola kuo toutou lau mo fakaʻaongaʻi ʻe he kau taki ʻo e Siasí ʻi heʻenau ngaahi akonakí. Ko ha sīpinga ʻe taha ko e Mōsese 7:18. Fakaʻaongaʻi ʻa e ngaahi fakahinohino ʻoku ʻoatu ʻi ʻolungá ke fakatātaaʻi ʻa e founga ke fakaʻaongaʻi ai ʻa e Scriture Citation Index ʻi he Gospel Library ke kumi ʻa e ngaahi ʻakonaki mei he kau taki ʻo e Siasí fekauʻaki mo e potufolofola ko ʻení. Vahevahe ha fakamatala ʻokú ne fakamatalaʻi pe tokoni ke fakamahinoʻi ʻa e ʻuhinga ʻo e vēsí. Hangē ko ʻení, ʻe ala kau ʻi hoʻo fekumí ʻa e akonaki ko ʻeni meia ʻEletā D. Toti Kulisitofasoni, ʻa ia ʻoku fakamatalaʻi ai ʻa e founga te tau lava ai ʻo “loto-taha pē mo fakakaukau tahá” (Mōsese 7:18):

Te tau hoko ʻo loto-taha mo fakakaukau taha ʻi heʻetau takitaha fakatefito ʻetau moʻuí ʻi he Fakamoʻuí pea tau muimui ki he kakai kuó Ne fakamafaiʻi mai ke nau tataki kitautolú. (D. Todd Christofferson, “Haʻu ki Saione,” Liahona, Nōvema 2008, 38)

Fili ha potufolofola mei he ako folofola ʻo e uike ní, pe ko haʻo fakaʻaongaʻi ha taha ʻo e ngaahi potufolofola ʻoku hiki atu ʻi laló. Te mou lava ʻo lau fakakalasi ʻa e potufolofolá. Hili iá pea fakaafeʻi ʻa e kau akó ke nau ngāue ʻaki ʻa e ngaahi maʻuʻanga tokoni naʻe fakafeʻiloaki atu ʻi he konga “Fakaʻuhingaʻí” ke kumi ʻa e ngaahi akonaki mei he kau palōfitá mo e kau taki kehe ʻo e Siasí ʻoku fekauʻaki mo e potufolofola ko iá. Fakaafeʻi ʻa e kau akó ke nau fevahevaheʻaki mo hanau hoa, pe ʻi ha fanga kiʻi kulupu tokosiʻi, pe fakakalasi ʻa e (1) akonaki pe fakamatala ne nau maʻú mo e (2) founga ʻokú ne tokoni ai ke fakamahinoʻi pe fakaloloto ʻenau mahino ki he potufolofolá.

Ngaahi potufolofola lahi ange ki hono fakaangaanga ʻa e taukei ko ʻení:

• Siope19:25–26

• Mātiu 11:28–30

• Tokāteline mo e Ngaahi Fuakava 18:10

• ʻAlamā 7:11–13

Fakaafeʻi ʻa e kau akó ke nau fakaʻaongaʻi ʻa e ngaahi akonaki ʻa e kau taki ʻo e Siasí ke fakatupulaki ʻenau ako folofola fakatāutahá. Kole ki he kau akó ke nau ʻomi ki he kalasi hokó ha akonaki mei ha taki ʻo e Siasí ʻoku tokoni ke mahino lelei ange kiate kinautolu ha potufolofola. Manatuʻi ke toe vakaiʻi pea tuku ha taimi ʻi hoʻomou fakataha hokó ke vahevahe ai ʻe he kau akó ʻa e meʻa naʻa nau maʻú. Te ke lava ʻo toe vakaiʻi ʻi he lolotonga ʻo e uiké.