ការស្ថាបនាភាពខ្លួនទីពឹងខ្លួន
ការគ្រប់គ្រងធនធានហិរញ្ញវត្ថុដោយឆ្លាតវៃ
ការប្រើគោលការណ៍របស់ព្រះអម្ចាស់ដើម្បីធ្វើការសម្រេចចិត្តផ្នែកហិរញ្ញវត្ថុ
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
សូមអានដូចខាងក្រោមមកពីអែលឌើរ ម៉ាក អ៊ី ភីធើរសិន ( ឆ្នាំ១៩០០–១៩៨៤ ) ដែលនៅពេលនោះនៅក្នុងកូរ៉ុមនៃពួកសាវកដប់ពីរនាក់ ៖
នៅលើផ្លូវទល់មុខផ្ទះខ្ញុំគឺមានដើមកៅឡាក់ដុះជាជួរ ។ …
នៅរដូវស្លឹកឈើជ្រុះ គ្រាប់ធ្លាក់ចុះលើដី ។ នៅពេលគ្រាប់ជ្រុះធ្លាក់មក សត្វកំប្រុកចេញមកពីណាក៏មិនដឹង ។ ពួកវាអង្គុយលើចិញ្ចើមផ្លូវ ខាំសំបកចេញ រួចរត់ចេញយ៉ាងលឿនដោយយកគ្រាប់នីមួយៗទុកសម្រាប់ជាចំណីនៅរដូវរងា ។
ពួកវាជាសត្វតូចមានប្រាជ្ញា ហើយពួកវាជាសត្វឧស្សាហ៍។ … ពួកវាគួរឲ្យចាប់អារម្មណ៍យ៉ាងខ្លាំង ដោយគ្រាន់តែមើលវាធ្វើការដើម្បីមានចំណីតាមរបៀបដែលពួកវាធ្វើនោះ ។
ពួកវាមិនទុកឲ្យគ្រាប់កៅឡាក់ខ្ជះខ្ជាយចោលទេ សូម្បីតែមួយគ្រាប់ក៏ដោយ ។ ពួកវាដឹងថា ជីវិតរបស់ពួកវាត្រូវតែពឹងផ្អែកលើគ្រាប់ទាំងនោះនៅអំឡុងពេលរដូវរងា និងគ្មានផលិតភាព នៅពេលដែលដើមកៅឡាក់គ្មានផ្លែ ។
ពួកវាមិនពឹងលើនរណាផ្សេងទៀតឲ្យប្រមូលគ្រាប់ទាំងនោះឲ្យពួកវានោះទេ ។ ពួកវាពឹងផ្អែកលើខ្លួនឯងទាំងស្រុង ។ ព្រះអម្ចាស់ប្រទានឲ្យពួកវានូវភោជផល ប៉ុន្តែពួកវាត្រូវតែច្រូតកាត់ » ។ ( « Blessings in Self-Reliance » Ensign ខែឧសភា ឆ្នាំ១៩៨១ ទំព័រ ៦១ )
ប្រាក់កាស ការងារ
ដូចជាសត្វកំប្រុកប្រមូល និងរក្សាទុកគ្រាប់កៅឡាក់សម្រាប់រដូវរងាដែរ នោះអ្នកអាចមានអារម្មណ៍ថាបានត្រៀមខ្លួនក្នុងគ្រានៃភាពមិនប្រាកដប្រជា នៅពេលដែលអ្នកគ្រប់គ្រងធនធានហិរញ្ញវត្ថុរបស់អ្នកដោយឆ្លាតវៃ ។
គោលបំណងមេរៀន ៖ ដើម្បីជួយអ្នកឲ្យប្រើគោលការណ៍ដែលបានបំផុសគំនិត ដើម្បីគ្រប់គ្រងការសម្រេចចិត្តផ្នែកហិរញ្ញវត្ថុតាមរបៀបរបស់ព្រះអម្ចាស់ ។
រៀនអំពីរបៀបធ្វើ
ការធ្វើការសម្រេចចិត្តផ្នែកហិរញ្ញវត្ថុតាមរបៀបរបស់ព្រះអម្ចាស់
ព្រះវរបិតាសួគ៌ និងព្រះយេស៊ូវគ្រីស្ទចង់ដឹកនាំយើងក្នុងគ្រប់ទិដ្ឋភាពនៃជីវិតរបស់យើង ។ ការណ៍នេះរួមបញ្ចូលទាំងការសម្រេចចិត្តផ្នែកហិរញ្ញវត្ថុរបស់យើងផងដែរ ។ ទ្រង់ទាំងទ្វេបានប្រទានការណែនាំដល់យើងនៅក្នុងព្រះគម្ពីរ ដែលអាចជួយយើងឲ្យធ្វើការសម្រេចចិត្តផ្នែកហិរញ្ញវត្ថុប្រកបដោយប្រាជ្ញា ។
សូមអាន សេចក្តីយោងបទគម្ពីរនីមួយៗ នៅខាងក្រោមនេះ ។ សូមដាក់ស្លាកវគ្គបទគម្ពីរនីមួយៗថា « ប្រាក់កាស » ហើយបន្ថែមស្លាកទីពីរដែលពិពណ៌នាអំពីអ្វីដែលវគ្គបទគម្ពីរនេះកំពុងលើកឡើង ។ ឧទាហរណ៍ អ្នកអាចដាក់ស្លាក គោលលទ្ធិ និងសេចក្តីសញ្ញា ១០៤:៧៨ ថា « ប្រាក់កាស » និង « បំណុល » ។
-
លោកុប្បត្តិ ៤១:៤៦–៤៩, ៥៣–៥៧ ( ផារ៉ោនបានតែងតាំងយ៉ូសែបឲ្យមើលការខុសត្រូវលើការផលិតគ្រាប់ធញ្ញជាតិនៅស្រុកអេស៊ីព្ទក្នុងអំឡុងពេលច្រូតកាត់ដ៏ច្រើនសន្ធឹកសន្ធាប់ ដើម្បីរៀបចំសម្រាប់ឆ្នាំដែលមានអំណត់ ដែលបានព្យាករ ) ។
-
ចោទិយកថា ១៥:៧–៨ ( ម៉ូសេបានណែនាំពួកសាសន៍អ៊ីស្រាអែលអំពីការមើលថែដល់អ្នកទ័លក្រ ) ។
-
ទំនុដំកើង ២៤:១ ( ដាវីឌថ្លែងទីបន្ទាល់អំពីព្រះចេស្ដារបស់ព្រះ ) ។
-
ម៉ាឡាគី ៣:៨–១១ ( ម៉ាឡាគីបានបង្រៀនពីសារៈសំខាន់នៃការថ្វាយដង្វាយមួយភាគក្នុងដប់) ។
-
យ៉ាកុប ២:១៨–១៩ ( យ៉ាកុបបានបង្រៀនពីរបៀបដើម្បីទទួល និងប្រើប្រាស់ទ្រព្យសម្បត្តិ ) ។
-
គោលលទ្ធិ និងសេចក្តីសញ្ញា ១០៤:៧៨ ( ព្រះអម្ចាស់បានប្រទានដំបូន្មានទាក់ទងនឹងបំណុល ) ។
តើអ្វីដែលអ្នករៀនមកពីព្រះគម្ពីរ អាចជួយអ្នកឲ្យធ្វើការសម្រេចចិត្តផ្នែកហិរញ្ញវត្ថុតាមរបៀបរបស់ព្រះអម្ចាស់យ៉ាងដូចម្ដេច ?
ដាក់អាទិភាពលើការចំណាយរបស់យើង
គន្លឹះមួយក្នុងការគ្រប់គ្រងហិរញ្ញវត្ថុរបស់អ្នកតាមរបៀបរបស់ព្រះអម្ចាស់គឺការរៀនដាក់អាទិភាពលើការចំណាយ ។
វគ្គសិក្សាផ្នែកហិរញ្ញវត្ថុផ្ទាល់ខ្លួនរបស់សាសនាចក្រសម្រាប់ភាពខ្លួនទីពឹងខ្លួន បង្រៀនឲ្យដាក់អាទិភាពលើការចំណាយតាមរបៀបដូចខាងក្រោម ៖
-
ថ្វាយដង្វាយមួយភាគក្នុងដប់ និងដង្វាយនានា ។
-
ការពារក្រុមគ្រួសាររបស់អ្នកពីការលំបាក ។
-
លុបបំបាត់បំណុល ។
-
សន្សំប្រាក់ និងវិនិយោគសម្រាប់ពេលអនាគត ។
-
បន្តផ្តល់ឲ្យ និងផ្តល់ពរដល់មនុស្សដទៃ ។
សូមដាក់ស្លាកបញ្ជីខាងលើថា « ប្រាក់កាស » និង « អាទិភាព » ឬសរសេរជាបញ្ជីដែលអ្នកអាចរកវាឃើញយ៉ាងងាយស្រួល នៅពេលអ្នកត្រូវការធ្វើការសម្រេចចិត្តនៅពេលអនាគត ។
សូមហាត់ដាក់អាទិភាពលើការចំណាយដោយប្រើឧទាហរណ៍ខាងក្រោម ៖
ណារី រស់នៅជាមួយកូនស្រីរបស់នាងដែលមានឈ្មោះថា ម៉ីងជី ក្នុងទីក្រុងសេអ៊ូល ប្រទេសកូរ៉េខាងត្បូង ។ គាត់បានធ្វើការយ៉ាងលំបាកតាំងពីគាត់នៅក្មេង ប៉ុន្តែទើបតែថ្មីៗនេះ គាត់បានចាប់ផ្តើមពិចារណាពីរបៀបដែលគាត់គ្រប់គ្រងប្រាក់កាសរបស់គាត់ ។ បន្ទាប់ពីបានរាយបញ្ជីការចំណាយសំខាន់ៗរបស់គាត់រួចហើយ ណារី បានដាក់អាទិភាពលើការចំណាយដូចខាងក្រោម ៖
-
គ្រឿងទេស
-
ជួល/ប្រាក់កម្ចី
-
ដង្វាយមួយភាគក្នុងដប់/ដង្វាយផ្សេងៗ
-
មធ្យោបាយធ្វើដំណើរ
-
ទូរសព្ទដៃ
-
ការកម្សាន្ត
-
អំណោយសម្រាប់ ម៉ីងជី
-
ប្រាក់សន្សំ
ដោយផ្អែកលើអ្វីដែលអ្នកបានរៀន តើអ្នកនឹងណែនាំ ណារី ឲ្យធ្វើការផ្លាស់ប្តូរអ្វីខ្លះចំពោះអាទិភាពរបស់គាត់ ? តើខគម្ពីរមួយណាដែលអ្នកនឹងបង្ហាញគាត់ ដើម្បីជួយគាំទ្រការផ្លាស់ប្ដូរដែលអ្នកបានស្នើនេះ ?
ការសិក្សាស៊ីជម្រៅ ៖ សូមប៉ាន់ស្មានថា តើវត្ថុទាំងនេះនីមួយៗមានតម្លៃប៉ុន្មាននៅក្នុងតំបន់របស់អ្នក ។ បន្ទាប់មក សូមឲ្យឪពុកម្តាយ ឬមជ្ឈិមវ័យម្នាក់ឲ្យជួយវិភាគការប៉ាន់ស្មានរបស់អ្នក ។ អ្នកក៏អាចប្រាប់អ៊ីនធឺណិតឲ្យបង្ហាញអ្នកនូវថវិកាទូទៅមួយរបស់នរណាម្នាក់ ដែលមានអាយុស្របាលអ្នកនៅក្នុងតំបន់របស់អ្នក ។ ( សូមមើល មីឃីណា វ៉ឺនស៍ « Tithing First » New Era ខែមករា ឆ្នាំ២០១១ ទំព័រ ៣៥ ) ។
ការឲ្យព្រះអម្ចាស់មានចំណែកនៅក្នុងការសម្រេចចិត្តផ្នែកហិរញ្ញវត្ថុរបស់ខ្ញុំ
ប៊ីស្សព អិល ថត បាជច៍ ទីប្រឹក្សាទីពីរនៅក្នុងគណៈប៊ីស្សពជាអធិបតី បានចែកចាយ ៖
អ្វីដែលខ្ញុំបានរកឃើញក្នុងជីវិតរបស់ខ្ញុំផ្ទាល់គឺថា ខ្ញុំអាចអធិស្ឋានអំពីកិច្ចការខាងសាច់ឈាមរបស់ខ្ញុំផងដែរ ។ ខ្ញុំអាចអធិស្ឋានអំពីហិរញ្ញវត្ថុរបស់ខ្ញុំ ។ … យើងគួរតែឲ្យព្រះអម្ចាស់មានចំណែកមិនត្រឹមតែផ្នែកខាងវិញ្ញាណនៃជីវិតរបស់យើងប៉ុណ្ណោះទេ ប៉ុន្តែក៏នៅក្នុងកិច្ចការខាងសាច់ឈាមនៃជីវិតរបស់យើងផងដែរ ។ ( « 4 Principles We Can Learn from the Way the Presiding Bishopric Works » Liahona ខែកុម្ភៈ ឆ្នាំ២០២៤ ទំព័រ ១៤ )
សូមគិតអំពីការសម្រេចចិត្តផ្នែកហិរញ្ញវត្ថុដែលអ្នកត្រូវធ្វើឥឡូវនេះ ឬនាពេលអនាគត ។ សូមយាងអញ្ជើញព្រះវិញ្ញាណបរិសុទ្ធឲ្យជួយអ្នកឆ្លើយសំណួរខាងក្រោមនៅក្នុងសៀវភៅកត់ចំណាំរបស់អ្នក ៖
-
តើមានគោលការណ៍អ្វីខ្លះ ដែលអាចជួយអ្នកឲ្យធ្វើការសម្រេចចិត្តផ្នែកហិរញ្ញវត្ថុទាំងនេះតាមរបៀបរបស់ព្រះអម្ចាស់ ?
-
តើការអនុវត្តគោលការណ៍ហិរញ្ញវត្ថុទាំងនេះអាចរៀបចំអ្នកឲ្យបម្រើព្រះ និងអ្នកដទៃយ៉ាងដូចម្ដេច ?
ការសិក្សាស៊ីជម្រៅ ៖ សូមអានដំណើររឿងរបស់ប្រធាន រ័សុល អិម ណិលសុន អំពីការថ្វាយដង្វាយមួយភាគក្នុងដប់ដោយស្មោះត្រង់ ( « គិតដល់សេឡេស្ទាល ! » លីអាហូណា ខែវិច្ឆិកា ឆ្នាំ២០២៣ ) ។ សូមសិក្សាសុន្ទរកថា « The Lord’s Richest Blessings » ដោយអែលឌើរ ខល ប៊ី ប្រាត្ត នៃពួកចិតសិបនាក់ ( Liahona ខែឧសភា ឆ្នាំ២០១១ ទំព័រ ១០១ ) ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យប្រើគោលការណ៍ដែលបានបំផុសគំនិត ដើម្បីគ្រប់គ្រងការសម្រេចចិត្តផ្នែកហិរញ្ញវត្ថុតាមរបៀបរបស់ព្រះអម្ចាស់ ។
សូមចែកចាយ អ្វីដូចខាងក្រោមនេះជាមួយនឹងគ្រូបង្រៀន ឬថ្នាក់របស់អ្នក ៖
-
យោបល់ណែនាំឲ្យណារីផ្លាស់ប្ដូរអាទិភាព និងយ៉ាងហោចណាស់បទគម្ពីរមួយដើម្បីជួយគាំទ្រដល់ការផ្លាស់ប្តូរនោះ ។