យេរេមា ១–៣; ៧; ១៦–១៨; ២០ ៖ មេរៀនទី ១៣២
យេរេមា ១៦
« យើងនឹងនាំគេឲ្យវិលមកក្នុងស្រុករបស់គេ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ព្រះអង្គសង្គ្រោះបង្គាប់យើងឲ្យចូលរួមក្នុងកិច្ចការដ៏អស្ចារ្យបំផុតនៅលើផែនដីនាសព្វថ្ងៃនេះ ៖ គឺការប្រមូលសាសន៍អ៊ីស្រាអែល ដែលរួមមានការចែកចាយដំណឹងល្អរបស់ទ្រង់ ។ ការប្រមូលសាសន៍អ៊ីស្រាអែលគឺមានសារៈសំខាន់ណាស់ ដែលព្រះអង្គសង្គ្រោះបានបំផុសគំនិតព្យាការីពីបុរាណដូចជា យេរេមាឲ្យព្យាករអំពីការណ៍នេះកាលពីរាប់ពាន់ឆ្នាំមុន ។ មេរៀននេះអាចជួយឲ្យអ្នកចូលរួមក្នុងការប្រមូលសាសន៍អ៊ីស្រាអែលដោយការចែកចាយដំណឹងល្អនៃព្រះយេស៊ូវគ្រីស្ទ ។
សិក្សាព្រះគម្ពីរ
ប្រសិនបើនរណាម្នាក់សុំឲ្យអ្នកពិពណ៌នាអំពីឧទាហរណ៍នៃព្រះចេស្ដារបស់ព្រះ តើអ្នកនឹងប្រើឧទាហរណ៍អ្វី ?
នៅក្នុងអព្ភូតហេតុដ៏អស្ចារ្យមួយនៃព្រះគម្ពីរសញ្ញាចាស់ ម៉ូសេបានញែកសមុទ្រក្រហមដោយព្រះចេស្ដារបស់ព្រះ ។ តើអ្នកអាចស្រមៃឃើញអព្ភូតហេតុនេះដែរឬទេ ? អស់ជាច្រើនសតវត្សរ៍ក្រោយមក មនុស្សបានយោងទៅអព្ភូតហេតុនេះ នៅពេលបង្រៀនអំពីព្រះចេស្ដាដ៏អស្ចារ្យរបស់ព្រះអង្គសង្គ្រោះ ( សូមមើល ហេព្រើរ ១១:២៩; នីហ្វៃទី១ ៤:២; ហេលេមិន ៨:១១ ) ។
សូមគិតអំពីអព្ភូតហេតុដ៏អស្ចារ្យដែលព្រះបានធ្វើកាលពីអតីតកាល នៅពេលអ្នកអានសេចក្ដីថ្លែងការណ៍ខាងក្រោមដោយប្រធាន រ័សុល អិម ណិលសុន ៖
មានរឿងដ៏អស្ចារ្យជាច្រើននាពេលខាងមុខ ។ នៅពេលដ៏ខ្លីខាងមុខនេះ យើងនឹងឃើញការបើកសម្តែង ដ៏មហិមា អំពីព្រះចេស្តារបស់ព្រះអង្គសង្គ្រោះដែលលោកិយនេះមិន ធ្លាប់ បានឃើញពីមុនមក ។ ( « ឈ្នះលោកិយ ហើយបានសេចក្តីសម្រាក » លីអាហូណា ខែវិច្ឆិកា ឆ្នាំ២០២២ ទំព័រ ៩៥ )
សូមអាន យេរេមា ១៦:១៤–១៥ ។ សូមគូសសម្គាល់អ្វីដែលព្រះអង្គសង្គ្រោះនឹងធ្វើនៅថ្ងៃចុងក្រោយ ដែលគួរឲ្យចងចាំជាងការញែកសមុទ្រក្រហមទៅទៀត ។
តើអ្នកអាចយល់ពីអ្វីដែលយេរេមាកំពុងតែនិយាយដែរឬទេ ? លោកបានសំដៅទៅលើព្រះអម្ចាស់ដែលបានប្រមូលសាសន៍អ៊ីស្រាអែលនៅថ្ងៃចុងក្រោយបង្អស់ គឺជាសម័យរបស់យើង ។
សូមកត់ចំណាំនៅជាប់នឹងខគម្ពីរទាំងនេះ ដែលពន្យល់ពីមូលហេតុដែលអព្ភូតហេតុនៅសម័យទំនើបនេះមានសារៈសំខាន់ ដូចដែលព្រះអម្ចាស់បានប្រកាសទៅកាន់យេរេមាអ៊ីចឹង ។
ដូចដែលទ្រង់បានធ្វើតាមរយៈម៉ូសេដែរ ព្រះអង្គសង្គ្រោះអាចបង្ហាញព្រះចេស្តា អព្ភូតហេតុរបស់ទ្រង់តាមរយៈអ្នក នៅពេលអ្នកចូលរួមក្នុងការប្រមូលសាសន៍អ៊ីស្រាអែល ។ សូមជញ្ជឹងគិតពីរបៀបដែលព្រះអង្គសង្គ្រោះអាចប្រើអ្នកនៅក្នុងការប្រមូលសាសន៍ដ៏អស្ចារ្យនេះ ។
នៅក្នុង យេរេមា ១៦:១០–១៨ ព្រះអម្ចាស់បានបំផុសគំនិតយេរេមាឲ្យព្យាករអំពីការបំផ្លិចបំផ្លាញរបស់សាសន៍អ៊ីស្រាអែល ដែលបានកើតឡើងដោយសារការបះបោររបស់ពួកគេ ។ ព្រះអម្ចាស់បានបង្រៀនពួកគេថា « អំពើទុច្ចរិតរបស់គេ ក៏មិន[ ត្រូវ ]បិទបាំងពីភ្នែក[ ទ្រង់ ] » ដែរ ( ខទី ១៧ ) ហើយថាទ្រង់នឹងចាត់ទណ្ឌកម្មដ៏ត្រឹមត្រូវមួយឲ្យធ្លាក់លើពួកគេ ប្រសិនបើពួកគេបន្តបះបោរ ។ ប៉ុន្តែនៅទីបំផុត ដោយសារសេចក្ដីស្រឡាញ់ និងសេចក្ដីមេត្តាករុណារបស់ទ្រង់ ព្រះអម្ចាស់នឹងប្រមូលពួកគេមកជាមួយគ្នាម្ដងទៀត ។
ប្រធាន រ័សុល អិម ណិលសុន បានពន្យល់ពីសារៈសំខាន់នៃការប្រមូលផ្ដុំនេះ ៖
ប្អូនៗត្រូវបានបញ្ជូនមកកាន់ផែនដីនៅគ្រាដ៏ជាក់នេះ … ដើម្បីជួយប្រមូលវង្សអ៊ីស្រាអែល ។ គ្មានអ្វី កើតឡើងនៅលើផែនដីនេះក្នុងពេលនេះ ដែលសំខាន់ជាងកិច្ចការនេះទេ ។ …
ការប្រមូលផ្តុំនេះគួរតែមានអត្ថន័យ ទាំងស្រុង ចំពោះក្មួយៗ ។ ( រ័សុល អិម ណិលសុន និង វេនឌី ដ័បុលយូ ណិលសុន « Hope of Israel » [ ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី៣ ខែមិថុនា ឆ្នាំ២០១៨ ] នៅលើបណ្ណាល័យដំណឹងល្អ )
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
តើខ្ញុំអាចចូលរួមក្នុងការប្រមូលសាសន៍អ៊ីស្រាអែលដោយរបៀបណា ?
ខណៈការប្រមូលសាសន៍អ៊ីស្រាអែលរួមមាននូវការជួយមនុស្សនៅទាំងសងខាងវាំងនន នោះផ្នែកនៃមេរៀននេះនឹងផ្តោតលើការប្រមូលសាសន៍អ៊ីស្រាអែលពីក្នុងចំណោមអ្នកដែលនៅរស់ ។
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានធ្វើសេចក្ដីថ្លែងការណ៍ដូចខាងក្រោម ក្នុងអំឡុងសម័យប្រជុំបព្វជិតភាពនៃសន្និសីទទូទៅ ។ ប៉ុន្តែសមាជិកទាំងអស់អាចទទួលបានអត្ថប្រយោជន៍ពីការផ្ដល់យោបល់របស់លោក ។ ប្រសិនបើមាន សូមមើលវីដេអូ « Called to the Work » ចាប់ពីនាទីទី ១៣:០៨ ដល់ ១៣:៣៩ ។
ប្អូនម្នាក់ៗគឺជាអ្នកផ្សព្វផ្សាយសាសនាឥឡូវនេះ ។ មនុស្សទាំងអស់នៅជុំវិញប្អូនៗ ជារៀងរាល់ថ្ងៃ ដែលជាមិត្តភក្ដិ និងជាអ្នកជិតខាង « ជាពួកអ្នកដែលលាក់ពីសេចក្ដីពិត ពីព្រោះពួកគេមិនដឹងជាទៅរកសេចក្ដីពិតឯណាទេ » ។ នៅពេលប្អូនៗត្រូវបានដឹកនាំដោយព្រះវិញ្ញាណ ប្អូនៗអាចចែកចាយគំនិត ការអញ្ជើញ សារជាអក្សរ ឬសារធ្វីត ដែលនឹងណែនាំដល់មិត្តរបស់ប្អូនទៅកាន់សេចក្ដីពិតនៃដំណឹងល្អដែលបានស្ដារឡើងវិញ ។ ប្អូនៗពុំចាំបាច់ ហើយពុំគួររង់ចាំការហៅជាផ្លូវការដើម្បីចូលរួមយ៉ាងសកម្មនៅក្នុងកិច្ចការផ្សព្វផ្សាយសាសនានោះទេ ។ ( « Called to the Work » Liahona ខែឧសភា ឆ្នាំ២០១៧ ទំព័រ ៧០ )
សូមបំពេញសកម្មភាពមួយ ឬច្រើន នៅខាងក្រោមនេះដើម្បីរៀនបន្ថែមទៀតអំពីរបៀបដែលព្រះអម្ចាស់ប្រមូលសាសន៍អ៊ីស្រាអែល ។
-
សូមអាន « ស្រឡាញ់ ចែកចាយ អញ្ជើញ » មកពីអែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់ ។
-
សូមស្រាវជ្រាវក្នុងគេហទំព័ររបស់សាសនាចក្ររកមើលពាក្យដូចជា « ការប្រមូលសាសន៍អ៊ីស្រាអែល » « ស្រឡាញ់ » « ចែកចាយ » « អញ្ជើញ » និង « ចែកចាយដំណឹងល្អ » ។
-
សូមនិយាយជាមួយនរណាម្នាក់ដែលអ្នកស្គាល់ ។ សូមសួរពួកអ្នកផ្សព្វផ្សាយសាសនា អ្នកដឹកនាំសាសនាចក្រ ឬឪពុក ឬម្តាយពីរបៀបដែលអ្នកអាចជួយប្រមូលសាសន៍អ៊ីស្រាអែល ។
ជម្រើស ខ
តើខ្ញុំជួយប្រមូលសាសន៍អ៊ីស្រាអែលដោយរបៀបណាទៅ បើវាពិបាក ឬបើខ្ញុំខ្លាចនោះ ?
ប្រសិនបើអ្នកមានអារម្មណ៍ភ័យខ្លាច ឬមានអារម្មណ៍ថាមិនមានលក្ខណៈសម្បត្តិគ្រប់គ្រាន់ក្នុងការចែកចាយដំណឹងល្អ នោះមិនថ្វីទេ ។ ពួកព្យាការីជាច្រើននាក់នៅក្នុងព្រះគម្ពីរក៏មានអារម្មណ៍បែបនេះដែរ ។
សូមសិក្សាវគ្គបទគម្ពីរពីរ ឬច្រើន នៅខាងក្រោមនេះដើម្បីរៀនពីរបៀបដែលអ្នកអាចយកឈ្នះលើកង្វល់របស់អ្នក ។ សូមគូសសម្គាល់ឃ្លាដែលអាចបំផុសគំនិតអ្នក នៅពេលអ្នកមានអារម្មណ៍ភ័យខ្លាច ឬនៅពេលវាពិបាកក្នុងការចែកចាយដំណឹងល្អ ។ សូមធ្វើការកត់ចំណាំនៅជាប់នឹងឃ្លាដែលអ្នកបានគូសសម្គាល់ ។ នៅក្នុងកំណត់ចំណាំនីមួយៗ សូមពន្យល់ពីអ្វីដែលឃ្លានោះបង្រៀនអ្នកអំពីព្រះអង្គសង្គ្រោះ និងពីរបៀបដែលទ្រង់អាចជួយអ្នកឲ្យមានភាពក្លាហានក្នុងការចែកចាយដំណឹងល្អ ។
-
សូមអាន យេរេមា ១:៦–៩ ហើយរកមើលអ្វីដែលព្រះអម្ចាស់បានមានបន្ទូល នៅពេលទ្រង់បានហៅយេរេមាឲ្យចែកចាយដំណឹងល្អ ។
-
សូមអាន គោលលទ្ធិ និងសេចក្ដីសញ្ញា ១២៣:១២, ១៦–១៧ ហើយរកមើលអ្វីដែល យ៉ូសែប ស្ម៊ីធ បានបង្រៀនពួកបរិសុទ្ធថ្ងៃចុងក្រោយសម័យមុន ទាក់ទងនឹងការចែកចាយដំណឹងល្អ ។
-
សូមអាន ម៉ូសេ ៦:៣២–៣៤ ហើយរកមើលអ្វីដែលព្រះអម្ចាស់បានមានព្រះបន្ទូល នៅពេលទ្រង់បានហៅហេណុកឲ្យចែកចាយដំណឹងល្អ ។
ឥឡូវត្រូវធ្វើដូចម្តេចទៀត ?
ប្រសិនបើមាន សូមមើលវីដេអូ « Simple Ways to Love, Share, and Invite for Youth » ( ២:៥២ ) ។
ប្រធាន រ័សុល អិម ណិលសុន បានផ្ដល់ការអញ្ជើញដូចខាងក្រោមនេះ ៖
ចំពោះទ្រង់ គ្មានអ្វីកើតឡើងនៅលើផែនដីនេះសំខាន់ជាងការប្រមូលផ្ដុំនៃអ៊ីស្រាអែលឡើយ ។ ចូរអនុញ្ញាតឲ្យព្រះវរបិតាសួគ៌របស់ក្មួយៗដឹងថា ក្មួយៗចង់ជួយ ។ ចូរសូមឲ្យទ្រង់ដាក់ក្មួយៗឲ្យទៅធ្វើការនៅក្នុងបុព្វហេតុដ៏រុងរឿងនេះ ។ ( « ការជ្រើសរើសដែលជះឥទ្ធិពលលើភាពអស់កល្បជានិច្ច » [ ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី១៥ ខែឧសភា ឆ្នាំ២០២២ ] នៅលើបណ្ណាល័យដំណឹងល្អ )
នៅក្នុងសៀវភៅកត់ចំណាំរបស់អ្នក សូមធ្វើផែនការផ្ទាល់ខ្លួនមួយសម្រាប់ការចែកចាយដំណឹងល្អរបស់ព្រះអង្គសង្គ្រោះជាមួយអ្នកដទៃ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយឲ្យអ្នកចូលរួមក្នុងការប្រមូលសាសន៍អ៊ីស្រាអែលដោយការចែកចាយដំណឹងល្អនៃព្រះយេស៊ូវគ្រីស្ទ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ផែនការដែលអ្នកបានធ្វើដើម្បីជួយប្រមូលសាសន៍អ៊ីស្រាអែល ។
-
អ្វីមួយដែលអ្នកបានរៀនដើម្បីជួយអ្នកឲ្យយកឈ្នះលើកង្វល់អំពីការចែកចាយដំណឹងល្អ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?