អេសាយ ៥០–៥៧ ៖ មេរៀនទី ១២៥
អេសាយ ៥៤
« យើងអាណិតអាសូរដល់ឯងដោយសេចក្តីសប្បុរស »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
មនុស្សអាចមានអារម្មណ៍ថាត្រូវគេបោះបង់ចោល ហើយនៅម្នាក់ឯងពេលខ្លះ ។ ដោយសារវង្សនៃអ៊ីស្រាអែលបានបំពានលើសេចក្ដីសញ្ញាដែលពួកគេបានធ្វើជាមួយនឹងព្រះយេហូវ៉ា នោះពួកគេត្រូវបានខ្ចាត់ខ្ចាយ ។ ពួកគេប្រហែលជាមានអារម្មណ៍ថាព្រះបានបោះបង់ចោលពួកគេហើយ ។ ទោះជាយ៉ាងណាក៏ដោយ តាមរយៈព្យាការីអេសាយ ព្រះអម្ចាស់បានរំឭកដល់រាស្ត្រក្នុងសេចក្ដីសញ្ញារបស់ទ្រង់ទាំងនៅពេលនោះ និងឥឡូវនេះថា ទ្រង់នឹងទទួលពួកគេដោយសេចក្ដីមេត្តាករុណាជាខ្លាំង ហើយប្រទានឲ្យពួកគេនូវសេចក្ដីសុខសាន្ដ ។ មេរៀននេះអាចជួយអ្នកឲ្យទទួលអារម្មណ៍នៃសេចក្តីស្រឡាញ់របស់ព្រះអង្គសង្គ្រោះសម្រាប់អ្នក និងការតាំងចិត្តរបស់ទ្រង់ចំពោះអ្នក ។
សិក្សាព្រះគម្ពីរ
គេនិយាយថា រូបភាពមួយមានអត្ថន័យស្មើមួយពាន់ពាក្យ ។ នេះមានន័យថា ការអាចមើលឃើញ ឬការស្រមៃឃើញអ្វីមួយអាចជួយអ្នកឲ្យយល់ពីវាបាន ។ សូមគិតអំពីផ្លែឈើដែលអ្នកចូលចិត្ត ។ សូមបិទភ្នែករបស់អ្នក ហើយស្រមៃពីវា ។ ដោយមានរូបភាពមួយក្នុងចិត្ត សូមគិតពីរបៀបដែលអ្នកនឹងពិពណ៌នាវាទៅកាន់នរណាម្នាក់ ។
អេសាយបានប្រើការស្រមៃឃើញ និងរូបភាព ដើម្បីចែកចាយព្រះបន្ទូលរបស់ព្រះអម្ចាស់ ។ ការយល់ដឹងពីរូបភាពទាំងនេះអាចជួយអ្នកឲ្យស្គាល់ព្រះអម្ចាស់ និងការបង្រៀនរបស់ទ្រង់កាន់តែច្បាស់ ។ សូមមើលរូបភាពអំពីកូនចៅអ៊ីស្រាអែល ។ សូមចំណាយពេលពីរបីនាទីមើលរូបភាពខាងក្រោមនេះអំពីនគរអ៊ីស្រាអែល និងនគរយូដា ហើយកត់សម្គាល់ពីទីតាំងរបស់អេសាយ ។
នៅពេលអ្នកសិក្សា អេសាយ ៥៤ សូមស្តាប់រកការបំផុសគំនិតមកពីព្រះវិញ្ញាណបរិសុទ្ធ ដើម្បីជួយអ្នកឲ្យដឹងពីអារម្មណ៍របស់ព្រះយេស៊ូវគ្រីស្ទអំពីអ្នក ។
សូមហាត់ស្វែងរក និងយល់ពីរូបភាពមួយចំនួនដែលអេសាយបានចែកចាយ ។
សូមអាន អេសាយ ៥៤:១–៤ ។ កាលអ្នកហាត់ធ្វើការណ៍នេះ សូមគូររូបភាពសាមញ្ញមួយនៅក្នុងសៀវភៅកត់ចំណាំរបស់អ្នក អំពីអ្វីដែលអេសាយបានពិពណ៌នា ។ វាអាចមើលទៅដូចនេះ ៖
សូមគិតអំពីអ្វីដែលផ្នែកទាំងឡាយនៃតង់នេះអាចតំណាងឲ្យ ។ សូមពិចារណាពីសំណួរខាងក្រោមនេះ ហើយសរសេរចម្លើយមួយចំនួនរបស់អ្នកដាក់នៅក្នុងកំណត់ចំណាំមួយនៅជាប់នឹង ខទី ២ ៖
-
តើអ្នកគិតថា សាសនាចក្ររបស់ព្រះអង្គសង្គ្រោះគឺដូចជាត្រសាលយ៉ាងដូចម្ដេច ?
-
តើបង្គោលចម្រឹងទប់នឹងត្រសាលដោយរបៀបណា ? តើការណ៍នេះអាចបង្រៀនយើងអ្វីខ្លះ អំពីតួនាទីនៃបង្គោលចម្រឹងនៃក្រុងស៊ីយ៉ូននៅក្នុងសាសនាចក្រដែលបានស្ដារឡើងវិញរបស់ព្រះអង្គសង្គ្រោះ ?
-
តើអ្នកមើលឃើញត្រសាលពង្រីកនៅសម័យយើងដោយរបៀបណា ?
ប្រសិនបើមាន សូមមើលវីដេអូ « Angels in the Mirror » ( ៥:៤៧ ) ដើម្បីមើលឧទាហរណ៍មួយអំពីរបៀបដែលសាសនាចក្រដូចជាត្រសាលមួយ ។
ឥឡូវនេះ សូមស្វែងរករូបភាពមួយចំនួនថែមទៀត ។ កាលអ្នកស្វែងរក សូមចាំថា វាមិនអីទេ បើអ្នកមិនល្អឥតខ្ចោះក្នុងការធ្វើការណ៍នេះនោះ ។ ការអនុវត្តអាចជួយអ្នកឲ្យយល់កាន់តែច្បាស់ ។ សូមអាន អេសាយ ៥៤:៥–៨ ហើយគូររូបភាពសាមញ្ញមួយអំពីប្តី និងប្រពន្ធ ។ សូមគូសសម្គាល់បុគ្គលដែលតំណាងឲ្យព្រះយេស៊ូវ និងបុគ្គលដែលអាចតំណាងឲ្យអ្នក ។ សូមកត់ត្រារបៀបដែលការណ៍នេះពិពណ៌នាអំពីទំនាក់ទំនងរបស់អ្នកជាមួយព្រះយេស៊ូវគ្រីស្ទ ។ តើការប្រៀបធៀបនេះជួយអ្នកឲ្យយល់ពីអារម្មណ៍របស់ព្រះយេស៊ូវគ្រីស្ទអំពីអ្នកយ៉ាងដូចម្ដេច ?
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើអេសាយបង្រៀនខ្ញុំអ្វីខ្លះអំពីព្រះយេស៊ូវគ្រីស្ទ ?
អេសាយបានប្រើព្រះនាម និងព្រះបរមងារជាច្រើន នៅពេលថ្លែងអំពីព្រះយេស៊ូវគ្រីស្ទ ។
សូមអាន អេសាយ ៥៤:៥ ។ សូមគូសសម្គាល់ព្រះនាមដែលអ្នករកឃើញ ។
សូមរកមើលអត្ថន័យនៃព្រះនាមទាំងនេះ ។ អ្នកអាចប្រើសេចក្ដីណែនាំដល់បទគម្ពីរទាំងឡាយ ប្រធានបទ និងសំណួរ ឬវចនានុក្រម ។ តាមគំនិតរបស់អ្នក តើព្រះនាមទាំងនេះសមនឹងព្រះអង្គសង្គ្រោះយ៉ាងដូចម្តេច ?
សូមសរសេរកំណត់ចំណាំមួយនៅក្បែរ ខទី ៥ ដែលមាននូវរបៀបដែលព្រះនាមទាំងនេះរបស់ព្រះអង្គសង្គ្រោះ ជួយអ្នកឲ្យទទួលអារម្មណ៍នៃសេចក្តីស្រឡាញ់ និងការប្តេជ្ញាចិត្តរបស់ទ្រង់ចំពោះអ្នក ។
ជម្រើស ខ
តើខ្ញុំអាចមើលឃើញព្រះអង្គសង្គ្រោះបានកាន់តែប្រសើរយ៉ាងដូចម្ដេច ?
អេសាយមានភាពច្នៃប្រឌិត ហើយបានប្រើរូបភាព និងដំណើររឿងប្រៀបធៀប ដើម្បីជួយយើងឲ្យយល់ពីព្រះអង្គសង្គ្រោះ និងដំណឹងល្អរបស់ទ្រង់ ។ ឥឡូវនេះដល់វេនរបស់អ្នក ដើម្បីបង្កើតដំណើររឿងប្រៀបធៀប ឬរូបភាពផ្ទាល់ខ្លួនរបស់អ្នក ដើម្បីពិពណ៌នាអំពីព្រះអង្គសង្គ្រោះហើយ ។
សូមអាន អេសាយ ៥៤:១៣, ១៧ ។ សូមបង្កើតដំណើររឿងប្រៀបធៀប ឬរូបភាពមួយចេញពីអ្វីដែលអ្នករៀនអំពីទ្រង់—បុគ្គលិកលក្ខណៈ ឬគុណលក្ខណៈរបស់ទ្រង់ ។ អ្នកអាចបង្កើតជាកំណាព្យមួយ ដំណើររឿងមួយ គំនូរមួយ ឬអ្វីមួយផ្សេងទៀត ។
ចែកចាយគំនិតរបស់អ្នក
គោលបំណងមេរៀន ៖ មេរៀននេះអាចជួយអ្នកឲ្យទទួលអារម្មណ៍នៃសេចក្តីស្រឡាញ់របស់ព្រះអង្គសង្គ្រោះ និងការតាំងចិត្តរបស់ទ្រង់ចំពោះអ្នក ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
គំនូររបស់អ្នក រួមទាំងការពន្យល់ខ្លីមួយអំពីរបៀបដែលវាតំណាងឲ្យព្រះយេស៊ូវគ្រីស្ទ ។
-
រូបភាព ឬដំណើររឿងប្រៀបធៀបដែលអ្នកបានបង្កើតអំពីព្រះយេស៊ូវគ្រីស្ទ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?