ការយាងមកជាលើកទីពីរ ដោយ ហារី អាន់ឌើរសិន
អេសាយ ៤០–៤៩ ៖ មេរៀនទី ១២០
អេសាយ ៤៤–៤៧
« ក្រៅពីយើងគ្មានព្រះណាទៀតឡើយ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ជារៀងរាល់ថ្ងៃ យើងជួបនឹងឥទ្ធិពលដែលសាកល្បងការប្ដេជ្ញាចិត្តរបស់យើងចំពោះព្រះវរបិតាសួគ៌ និងព្រះយេស៊ូវគ្រីស្ទ ។ នៅជំនាន់របស់អេសាយ ពួកសាសន៍អ៊ីស្រាអែលមួយចំនួនងាកទៅថ្វាយបង្គំព្រះផ្សេងទៀត ។ ជាការឆ្លើយតប ព្រះអម្ចាស់បានព្រមានពួកគេដោយសេចក្តីស្រឡាញ់ ប៉ុន្តែយ៉ាងមុតមាំប្រឆាំងនឹងការថ្វាយបង្គំក្លែងក្លាយ ។ មេរៀននេះអាចលើកទឹកចិត្តអ្នកឲ្យផ្តោតលើព្រះ លើសពីអ្វីផ្សេងទៀតទាំងអស់នៅក្នុងជីវិតរបស់អ្នក ។
សិក្សាព្រះគម្ពីរ
ប្រសិនបើអ្នកត្រូវសួរក្មេងវ័យជំទង់នៅក្នុងតំបន់របស់អ្នកថា តើវីរបុរសរបស់ពួកគេជានរណា តើអ្នកគិតថាពួកគេអាចរួមបញ្ចូលនរណាខ្លះ ? សូមបង្កើតបញ្ជីវីរបុរសផ្ទាល់ខ្លួនរបស់អ្នក ។ សូមដាក់ផ្កាយមួយនៅក្បែរអ្នកដែលហាក់ដូចជាមានឥទ្ធិពលខ្លាំងបំផុតក្នុងជីវិតរបស់អ្នក ។
ប៊ីស្សព ដបុលយូ គ្រីស្តូហ្វើរ វ៉តឌែល នៃគណៈប៊ីស្សពជាអធិបតី បានចែកចាយដំបូន្មានដូចខាងក្រោមអំពីវីរបុរសរបស់យើង ៖
កាលខ្ញុំនៅក្មេង វីរបុរសដំបូងរបស់ខ្ញុំគឺក្រុមអត្តពលិក ។ … ទោះជាយើងកោតសរសើរ និងគោរពដល់វីរភាពរបស់បុរស និងស្ត្រីដែលមានទេពកោសល្យ និងមានសមត្ថភាព និងការរួមចំណែកដ៏អស្ចារ្យក្តី ក៏កម្រិតនៃការសាទរពួកគេនោះបើជ្រុលហួសហេតុពេក វាអាចប្រៀបដូចជាកូនចៅអ៊ីស្រាអែល ដែលថ្វាយបង្គំរូបគោមាសនៅវាលខ្សាច់នៃភ្នំស៊ីណាយអ៊ីចឹងដែរ ។ …
វីរបុរស—វីរបុរសដ៏អង់អាចរបស់យើងក្នុងពេលបច្ចុប្បន្ន និងជារៀងរហូត—គឺជាព្រះយេស៊ូវគ្រីស្ទ ហើយអ្វីមួយ ឬនរណាម្នាក់ ដែលបង្វែរយើងចេញពីការបង្រៀនរបស់ទ្រង់ ដូចមានក្នុងព្រះគម្ពីរ និងតាមរយៈពាក្យសម្ដីរបស់ព្យាការីនៅរស់ វាអាចជះឥទ្ធិពលអវិជ្ជមានដល់ការរីកចម្រើនរបស់យើងនៅលើផ្លូវនៃសេចក្ដីសញ្ញា ។ ( « លើសពីវីរបុរសធម្មតា » លីអាហូណា ខែវិច្ឆិកា ឆ្នាំ២០២៣ ទំព័រ ៩០ )
សូមគិតអំពីបុគ្គលនៅក្នុងបញ្ជីរបស់អ្នក នៅពេលអ្នកជញ្ជឹងគិតពីសំណួរខាងក្រោមនេះ ៖
-
តើមានវីរបុរសណាម្នាក់នៅក្នុងបញ្ជីរបស់អ្នក ដែលបង្អាក់អ្នកពីការថ្វាយបង្គំព្រះវរបិតាសួគ៌ និងព្រះយេស៊ូវគ្រីស្ទដែរឬទេ ?
-
តើមានចំណាប់អារម្មណ៍ សកម្មភាព ឬវត្ថុណាមួយដែលអាចរំខានអ្នកពីការថ្វាយបង្គំទ្រង់ទាំងទ្វេដែរឬទេ ?
កូនចៅអ៊ីស្រាអែលនៅសម័យអេសាយពិបាកនឹងដាក់ព្រះអម្ចាស់ជាអាទិភាពទីមួយនៅក្នុងជីវិតរបស់ពួកគេ ។ ផ្ទុយទៅវិញ ពួកគេបែរទៅរកព្រះក្លែងក្លាយដូចជារូបព្រះជាដើម ដើម្បីសុំជំនួយ ។ នៅក្នុង អេសាយ ៤៤–៤៦ ព្រះអម្ចាស់ពិពណ៌នាអំពីការថ្វាយបង្គំព្រះក្លែងក្លាយរបស់ពួកសាសន៍អ៊ីស្រាអែល ។ ទ្រង់រំឭកប្រជាជនថា ពួកគេបានបង្កើត ថ្វាយបង្គំ និងអធិស្ឋានដល់រូបព្រះ ដែលធ្វើពីឈើដូចគ្នានឹងឈើដែលពួកគេធ្លាប់ប្រើដើម្បីបង្កាត់ភ្លើង និងចម្អិនម្ហូបអាហារដែរ ។
សូមអាន អេសាយ ៤៤:៦, ៨ និង ៤៦:៩ ។ សូមគូសសម្គាល់អ្វីដែលព្រះអម្ចាស់ចង់ឲ្យកូនចៅអ៊ីស្រាអែលយល់ ទាក់ទងនឹងការផ្តោតចិត្តក្នុងការថ្វាយបង្គំរបស់ពួកគេ ។
ប្រធាន រ័សុល អិម ណិលសុន បានបង្រៀន ៖
ខ្ញុំសូមបញ្ជាក់ឡើងវិញអំពីការបង្រៀនដ៏ជ្រាលជ្រៅរបស់ប្រធាន អ៊ែសរ៉ា ថាហ្វ ប៊ែនសឹន ៖ « បុរសស្ត្រីដែលបង្វែរជីវិតរបស់ខ្លួនទៅរកព្រះនឹងរកឃើញថា ទ្រង់អាចធ្វើឲ្យជីវិតរបស់ពួកគេទទួលប្រយោជន៍ច្រើនជាងដែលពួកគេធ្វើដោយខ្លួនឯង ។ ទ្រង់នឹងធ្វើឲ្យពួកគេកាន់តែមានអំណរ បង្កើនទស្សនវិស័យ បំភ្លឺគំនិត … លើកស្ទួយវិញ្ញាណ ចម្រើនពរជ័យ បង្កើនឱកាស លួងលោមព្រលឹង ប្រទានមិត្តភក្តិ និងចាក់ស្រោចភាពសុខសាន្តដល់ពួកគេ ។
សូមគិតពីរបៀបដែលសេចក្ដីពិតទាំងនេះអាចជួយអ្នកឲ្យដាក់ព្រះជាអាទិភាពទីមួយនៅក្នុងជីវិតរបស់អ្នក ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
តើខ្ញុំអាចបង្កើនទំនុកចិត្តរបស់ខ្ញុំលើព្រះយេស៊ូវគ្រីស្ទដោយរបៀបណា ?
សូមសិក្សាវគ្គបទគម្ពីរពីរ ឬច្រើន នៅខាងក្រោមនេះ ។ នៅពេលអ្នកអានខគម្ពីរទាំងនេះយឺតៗ និងដោយប្រុងប្រយ័ត្ន សូមរកមើលអ្វីដែលយើងអាចរៀនអំពីព្រះយេស៊ូវគ្រីស្ទ ដែលផ្តល់ឲ្យយើងនូវទំនុកចិត្តដើម្បីដាក់ទ្រង់ជាអាទិភាពនៅក្នុងជីវិតរបស់យើង ។ សូមដាក់ស្លាកសេចក្ដីពិតដែលធ្វើឲ្យអ្នកមានទំនុកចិត្តលើទ្រង់ថា « ទំនុកចិត្ត » « ព្រះយេស៊ូវគ្រីស្ទ » ឬប្រើស្លាកផ្សេងទៀតដែលអ្នកបានជ្រើសរើស ។
-
អេសាយ ៤៤:១–៤
-
អេសាយ ៤៤:២១–២៣
-
អេសាយ ៤៤:២៤–២៥
-
អេសាយ ៤៥:២០–២២
-
អេសាយ ៤៦:៣–៥
សូមពិភាក្សាជាមួយសមាជិកគ្រួសារ ឬមិត្តភក្តិអំពីអ្វីដែលអ្នកបានរៀនអំពីព្រះអង្គសង្គ្រោះ ដែលផ្តល់ឲ្យអ្នកនូវទំនុកចិត្តលើទ្រង់ ។ សូមចែកចាយពីរបៀបដែលការយល់ពីសេចក្តីពិតទាំងនេះអំពីព្រះយេស៊ូវគ្រីស្ទ អាចជួយនរណាម្នាក់ដែលពិបាកដាក់ទ្រង់ជាអាទិភាពទីមួយក្នុងជីវិតរបស់ពួកគេ ។ អ្នកក៏អាចនិយាយអំពីអ្វីដែលជួយអ្នកឲ្យដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពទីមួយក្នុងជីវិតរបស់អ្នកបានផងដែរ ។
ជម្រើស ខ
តើខ្ញុំអាចរៀនដាក់ព្រះជាអាទិភាពទីមួយនៅក្នុងជីវិតរបស់ខ្ញុំយ៉ាងដូចម្ដេច ?
ដើម្បីជួយអ្នកឲ្យរៀនដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពទីមួយ សូមជ្រើសរើសសាច់រឿងមួយ ក្នុងចំណោមសាច់រឿងខាងក្រោម ៖
អាណា ចូលចិត្តផ្នែកច្នៃម៉ូដសម្លៀកបំពាក់ ។ នាងចំណាយពេលទំនេររបស់នាងដើម្បីសិក្សាពីទំនោរថ្មីៗបំផុត ហើយធ្វើការភាគច្រើននៅពេលយប់ និងចុងសប្តាហ៍ ដើម្បីរកប្រាក់ទិញរបស់របរបន្ថែម ។ ជារឿយៗ អាណា នឿយហត់ជាខ្លាំង រហូតដល់មិនអាចធ្វើការអធិស្ឋាន ឬការសិក្សាព្រះគម្ពីរបាន ហើយពេលខ្លះខកមិនបានទៅព្រះវិហារទៀត ដើម្បីបានទៅធ្វើការ ឬគេង ។
ជារឿយៗ យ៉ារ៉ុន ពិភាក្សាអំពីទស្សនៈសាសនាផ្សេងៗជាមួយមិត្តភក្តិ ដែលគាត់ឲ្យតម្លៃដល់ទស្សនៈទាំងនោះ ។ ជួនកាល មិត្តភក្តិរបស់គាត់មិនយល់ស្របនឹងការបង្រៀនរបស់ព្យាការី និងសាវករបស់ព្រះទេ ។ យ៉ារ៉ុន ចាប់ផ្តើមឆ្ងល់ថាតើការបង្រៀនរបស់ព្យាការីមួយណា ដែលគាត់គួរតែទទួលយក ហើយធ្វើតាម ។
នៅក្នុងសៀវភៅកត់ចំណាំរបស់អ្នក សូមឆ្លើយសំណួរដូចខាងក្រោមនេះ ៖
-
តើអ្វីទៅដែលអាចនឹងធ្វើឲ្យបុគ្គលរូបនេះពិបាកដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពទីមួយនៅក្នុងជីវិតរបស់ពួកគេ ?
-
តើអ្វីអាចជាជំហានដំបូងដ៏ល្អដែលបុគ្គលរូបនេះអាចធ្វើបាន ដើម្បីដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពទីមួយក្នុងជីវិតរបស់ពួកគេ ?
ឥឡូវត្រូវធ្វើដូចម្តេចទៀត ?
សូមរៀបចំផែនការ ដើម្បីដាក់ព្រះវរបិតាសួគ៌ និងព្រះយេស៊ូវគ្រីស្ទជាអាទិភាពទីមួយនៅក្នុងជីវិតរបស់អ្នក ។ អ្នកអាចបំពេញឯកសារខាងក្រោមនេះ ដែលមានចំណងជើងថា « ការដាក់ផែនការ » ឬប្រើជំហានដែលវាណែនាំនៅក្នុងផែនការរបស់អ្នក ។ សូមស្តាប់រកចំណាប់អារម្មណ៍ពីព្រះវិញ្ញាណបរិសុទ្ធ នៅពេលអ្នកកំណត់នូវអ្វីដែលអ្នកចង់ធ្វើ ដើម្បីសម្រេចគោលដៅរបស់អ្នក ។
ចែកចាយគំនិតរបស់អ្នក
គោលបំណងមេរៀន ៖ ដើម្បីលើកទឹកចិត្តអ្នកឲ្យផ្តោតលើព្រះ លើសពីអ្វីផ្សេងទៀតទាំងអស់នៅក្នុងជីវិតរបស់អ្នក ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
របៀបដែលសេចក្ដីពិតទាំងឡាយដែលអ្នកបានរកឃើញនៅក្នុងគម្ពីរអេសាយ អាចជួយនរណាម្នាក់ឲ្យមានទំនុកចិត្តលើព្រះយេស៊ូវគ្រីស្ទ ។
-
ផែនការរបស់អ្នកដើម្បីដាក់ព្រះជាអាទិភាពទីមួយនៅក្នុងជីវិតរបស់អ្នក ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?