របាក្សត្រ ទី២ ១៤–២០; ២៦; ៣០ ៖ មេរៀនទី ៩១
របាក្សត្រ ទី២ ១៧–២០
ការស្វែងរកគោលការណ៍នៅក្នុងបទគម្ពីរ
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
តើអ្នកធ្លាប់ឆ្ងល់ទេថា តើមានអ្វីខ្លះដែលអ្នកអាចធ្វើបាន ដើម្បីចូលទៅកាន់តែជិតព្រះយេស៊ូវគ្រីស្ទ ? ស្ដេចយ៉ូសាផាតក្នុងព្រះគម្ពីរសញ្ញាចាស់ គឺជាគំរូដ៏អស្ចារ្យមួយក្នុងការធ្វើដូច្នេះ ។ រាស្ដ្ររបស់ទ្រង់បានឃ្លាតឆ្ងាយពីព្រះ ហើយចូលរួមក្នុងការថ្វាយបង្គំរូបព្រះ ។ យ៉ូសាផាតបានជ្រើសរើសធ្វើតាមព្រះយេហូវ៉ា ហើយបានជួយរាស្ដ្ររបស់ទ្រង់ឲ្យធ្វើដូចគ្នា ។ មេរៀននេះអាចជួយអ្នកឲ្យរៀនស្គាល់គោលការណ៍នៃដំណឹងល្អពីក្នុងបទគម្ពីរ ។
សិក្សាព្រះគម្ពីរ
នៅចុងសតវត្សរ៍ឆ្នាំ១៨០០ អ្នកសាងសង់នាវាន័រវែសមួយក្រុមបានចូលរួមក្នុងសាសនាចក្រ ហើយផ្លាស់ទៅរដ្ឋយូថាហ៍ ។ នៅពេលពួកគេបានមកដល់ ពួកគេត្រូវបានចាត់តាំងឲ្យរចនា និងសាងសង់ដំបូលព្រះវិហារបរិសុទ្ធ ម៉ានតៃ យូថាហ៍ ។ ដោយគ្មានបទពិសោធន៍សាងសង់ដំបូល បុរសទាំងនេះមិនសូវប្រាកដថាត្រូវបន្តយ៉ាងដូចម្តេចនោះទេ ។
អែលឌើរ អិល ថម ភែរី ( ឆ្នាំ១៩២២–២០១៥ ) បានពន្យល់ពីរបៀបដែលពួកគេដោះស្រាយបញ្ហានេះ ។
បន្ទាប់មក ពួកគេទទួលបានគំនិតមួយ ៖ « ហេតុអ្វីពួកគេមិនសាងសង់នាវាមួយទៅ ? ក្រោយមក ដោយសារនាវាដែលសាងសង់បានល្អគឺមាំ និងមានសុវត្ថិភាព ប្រសិនបើយើងបង្វិលគ្រោងនោះបញ្ច្រាសឡើងលើ យើងនឹងមានដំបូលដែលមានសុវត្ថិភាពមួយ » ។ ពួកគេបានរៀបចំផែនការដើម្បីសាងសង់នាវា ហើយនៅពេលសង់ចប់ហើយ ពួកគេបានបង្វិលគ្រោងនោះបញ្ច្រាសឡើងលើ ហើយវាក្លាយជាគ្រោងសម្រាប់ដំបូលព្រះវិហារបរិសុទ្ធ ម៉ានតៃ យូថាហ៍ ។
នៅក្នុងករណីនេះ ពួកគេបានប្រើមេរៀនមកពីបទពិសោធន៍កាលពីអតីតកាលរបស់ពួកគេ—គោលការណ៍ក្នុងការសាងសង់នាវា—ដើម្បីជួយពួកគេដោះស្រាយបញ្ហាប្រឈម ។ … អ្វីដែលសំខាន់បំផុត គឺត្រូវមានចំណេះដឹងការងារអំពីគោលការណ៍មូលដ្ឋាន ដែលចាំបាច់ដើម្បីសាងសង់រចនាសម្ព័ន្ធទាំងឡាយ ដែលសាងសង់ឲ្យមានភាពធន់រយៈពេលយូរ » ។ ( « The Past Way of Facing the Future » Liahona ខែតុលា ឆ្នាំ២០០៩ ទំព័រ ៧៤ )
ព្រះគម្ពីរអាចធ្វើជាគ្រឹះសម្រាប់អ្នក ដូចជាចំណេះដឹងអំពីការសាងសង់នាវាជាគ្រឹះសម្រាប់អ្នកសាងសង់ព្រះវិហារបរិសុទ្ធ ម៉ានតៃ ផងដែរ ។ ការស្គាល់ និងការអនុវត្តតាមគោលការណ៍ក្នុងព្រះគម្ពីរ អាចជួយអ្នកឲ្យដោះស្រាយស្ទើរតែគ្រប់បញ្ហាទាំងអស់ ។
នៅពេលអ្នកសិក្សាមេរៀននេះអំពីជីវិតរបស់យ៉ូសាផាត សូមស្វែងរកជំនួយពីព្រះវិញ្ញាណបរិសុទ្ធ ដើម្បីស្គាល់គោលការណ៍នៃសេចក្តីពិតដែលអាចជួយអ្នក ។
នៅពេលយ៉ូសាផាតឡើងកាន់អំណាច ប្រជារាស្រ្តរបស់ទ្រង់បានក្បត់សាសនា ។ យ៉ូសាផាតបានធ្វើការខិតខំប្រឹងប្រែងជាច្រើននៅទូទាំងនគររបស់ទ្រង់ ដើម្បីជួយរាស្ដ្ររបស់ទ្រង់ឲ្យដើរតាមព្រះយេហូវ៉ា ( ព្រះយេស៊ូវគ្រីស្ទ ) ។ ក្នុងគ្រានោះ ពួកខ្មាំងសត្រូវរបស់យ៉ូសាផាតបានឡើងមកច្បាំងនឹងប្រជារាស្ត្ររបស់ទ្រង់ ។ អ្វីដែលបានកើតឡើងនៅក្នុងកាលៈទេសៈទាំងនេះបង្ហាញពីគោលការណ៍ផ្សេងៗគ្នា ។
របៀបមួយដើម្បីស្គាល់គោលការណ៍មួយគឺការរកមើលថា តើកិច្ចការពីរទាក់ទងគ្នាយ៉ាងដូចម្តេច ។ ឧទាហរណ៍ ៖ ដោយសារ ក នោះ ខ កើតឡើង ។ ឬដោយសារបុគ្គលម្នាក់ធ្វើរឿង ក នោះព្រះអម្ចាស់សន្យា ឬប្រទានរឿង ខ ។
សូមរៀនរកមើលគោលការណ៍នៅក្នុងខគម្ពីរខាងក្រោមនេះ ដែលអាចជួយអ្នកឲ្យដោះស្រាយបញ្ហាប្រឈមបាន ។
សូមអាន របាក្សត្រ ទី២ ១៧:៦ ។ សូមគូសសម្គាល់អារម្មណ៍របស់យ៉ូសាផាតដោយពណ៌មួយ ។ សូមគូសសម្គាល់អ្វីដែលទ្រង់បានធ្វើ ដោយសារតែអារម្មណ៍ដែលទ្រង់មាននោះដោយពណ៌មួយទៀត ។ ( ចំណាំ ៖ ទីខ្ពស់ និងរូបព្រះគឺជាកន្លែងថ្វាយបង្គំព្រះក្លែងក្លាយ ) ។
តាមរយៈការភ្ជាប់គំនូសទាំងពីរនេះ យើងរៀនថា នៅពេលយើងផ្ដោតជីវិតរបស់យើងទៅលើព្រះ នោះយើងនឹងមានបំណងប្រាថ្នាដើម្បីដកអ្វីដែលអាក្រក់ចេញពីជីវិតរបស់យើង ។
សូមអាន របាក្សត្រ ទី២ ១៩:៣ ។ លើកនេះ សូមគូសសម្គាល់អ្វីដែលយ៉ូសាផាតបានធ្វើដោយពណ៌មួយ និងលទ្ធផលដោយពណ៌មួយទៀត ។
តាមរយៈការភ្ជាប់គំនូសទាំងពីរនេះ យើងរៀនថា ការដកអ្វីដែលអាក្រក់ចេញពីជីវិតរបស់យើង រៀបចំយើងឲ្យស្វែងរកព្រះ ។
ឥឡូវនេះ អ្នកបានអនុវត្តហើយ សូមអាន របាក្សត្រ ទី២ ២០:១–៩, ១៤–១៧, ២០–២២ ។ កាលអ្នកអាន សូមរកមើលគោលការណ៍ ពីរ ឬច្រើន នៅក្នុងដំណើររឿងរបស់យ៉ូសាផាត ។ បន្ទាប់មក សូមចំណាយពេលសរសេរគោលការណ៍ទាំងនោះដោយប្រុងប្រយ័ត្ននៅក្នុងកំណត់ចំណាំនៅក្នុងព្រះគម្ពីររបស់អ្នក ។
គោលការណ៍ បើ-នោះ ។ ជាញឹកញាប់ ព្រះគម្ពីរប្រើពាក្យ បើ និង នោះ ដើម្បីបង្ហាញពីទំនាក់ទំនងរវាងប្រយោគពីរ ។ ឧទាហរណ៍មួយនៃគោលការណ៍បើ-នោះ មាននៅក្នុង របាក្សត្រ ទី២ ២០:៩ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើខ្ញុំអាចយល់ដឹងបានកាន់តែស៊ីជម្រៅ អំពីគោលការណ៍ដែលខ្ញុំរកឃើញដោយរបៀបណា ?
សូមជ្រើសរើសគោលការណ៍មួយ ដែលអ្នកចង់ស្វែងយល់បន្ថែមទៀត ។ សូមរៀបចំការនិយាយមួយ ដែលមានរយៈពេលពីរនាទីអំពីសេចក្តីពិតនេះ ដែលរួមមានចំណុចដូចខាងក្រោម ៖
-
ខគម្ពីរមួយ ឬខគម្ពីរជាច្រើនដែលអ្នកអាននៅក្នុង របាក្សត្រ ទី២ អំពីគោលការណ៍នេះ និងមូលហេតុដែលអ្នកបានជ្រើសរើសយកវា
-
បទគម្ពីរ ឬប្រសាសន៍របស់ព្យាការីផ្សេងទៀត ដែលជួយអ្នកឲ្យយល់ពីគោលការណ៍នេះ
-
គ្រាមួយនៅពេលព្រះអង្គសង្គ្រោះ ឬអ្នកផ្សេងទៀតនៅក្នុងបទគម្ពីរ ឬប្រវត្តិសាសនាចក្របានធ្វើជាគំរូដល់គោលការណ៍នេះ
-
របៀបដែលអ្នកមានអារម្មណ៍ថា គោលការណ៍នេះមកពីព្រះអម្ចាស់អាចជួយយើង ឬរក្សាយើងឲ្យមានសុវត្ថិភាព
-
បទពិសោធន៍មួយនៅពេលអ្នក ឬនរណាម្នាក់ដែលអ្នកស្គាល់បានប្រព្រឹត្តតាមគោលការណ៍នេះ និងពរជ័យណាមួយមកពីព្រះអម្ចាស់ដែលបានកើតមាន ដែលជាលទ្ធផលនៃការធ្វើតាម
សូមចែកចាយការនិយាយរបស់អ្នកជាមួយមិត្តភក្តិ ឬសមាជិកគ្រួសារ ។
ជម្រើស ខ
តើខ្ញុំអាចធ្វើអ្វីទៀត ដើម្បីយល់ពីសេចក្ដីពិតនៅក្នុងព្រះគម្ពីរ ?
របៀបមួយទៀតដើម្បីធ្វើឲ្យការអានបទគម្ពីររបស់អ្នកកាន់តែស៊ីជម្រៅ គឺការបង្កើតស្លាក ។
នៅពេលអ្នកកំពុងសិក្សា ការបង្កើតស្លាកអាចជួយអ្នកឲ្យយល់ពីអ្វីដែលត្រូវបានបង្រៀន ។ ក្រោយពីអ្នកបានសិក្សាចប់ហើយ សា្លកទាំងឡាយអាចជួយអ្នកឲ្យងាយត្រឡប់ទៅរកវគ្គបទគម្ពីរបាន ។
ខណៈដែលជាញឹកញាប់ គោលការណ៍ត្រូវបានសរសេរជាទម្រង់ប្រយោគ នោះជាទូទៅ ស្លាកគ្រាន់តែជាពាក្យមួយ ឬពីរម៉ាត់ប៉ុណ្ណោះ ។ ឧទាហរណ៍ អ្នកអាចដាក់ស្លាក របាក្សត្រ ទី២ ១៧:៦ និង ១៩:៣ ថា « ដួងចិត្ត » « បំណងប្រាថ្នា » ឬ « ការប្រែចិត្ត » ។ ខណៈដែលស្លាកអាចជាពាក្យមួយម៉ាត់មកពីខគម្ពីរនោះ តែវាមិនចាំបាច់នោះទេ ។ គន្លឹះគឺការរកពាក្យមួយម៉ាត់ ដែលសង្ខេបអ្វីដែលត្រូវបានបង្រៀន ។ ដើម្បីស្វែងយល់បន្ថែមទៀតអំពីការដាក់ស្លាកនៅក្នុងព្រះគម្ពីរទាំងជាឌីជីថល និងព្រះគម្ពីរបោះពុម្ព សូមមើល « ការគូសសម្គាល់បទគម្ពីររបស់អ្នក » ។
សូមរៀនបង្កើតស្លាក ដោយការអានឡើងវិញក្នុង របាក្សត្រ ទី២ ២០:១–៩, ១៤–១៧, ២០–២២ ហើយដាក់ស្លាកយ៉ាងហោចណាស់លើខគម្ពីរចំនួនបី ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យរៀនស្គាល់គោលការណ៍នៃដំណឹងល្អពីក្នុងបទគម្ពីរ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ការនិយាយពីរនាទីដែលអ្នកបានរៀបចំ ។
-
វគ្គបទគម្ពីរដែលអ្នកបានដាក់ស្លាក និងឈ្មោះដែលអ្នកបានដាក់ឲ្យវគ្គបទគម្ពីរនោះ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?