របាក្សត្រ ទី២ ១៤–២០; ២៦; ៣០ ៖ មេរៀនទី ៩០
របាក្សត្រ ទី២ ១៤–១៦
« បើអ្នករាល់គ្នាស្វែងរកទ្រង់ នោះនឹងរកឃើញ »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
មនុស្សខ្លះអាចស្វែងរកព្រះវរបិតាសួគ៌ និងព្រះយេស៊ូវគ្រីស្ទ តែនៅពេលដែលអ្វីៗដំណើរការល្អប៉ុណ្ណោះ ។ អ្នកផ្សេងទៀតអាចអំពាវនាវរកជំនួយរបស់ទ្រង់ទាំងទ្វេ តែនៅពេលពួកគេមានទុក្ខលំបាកប៉ុណ្ណោះ ។ តើអ្នកស្វែងរកព្រះនៅពេលណា ? អេសា ស្តេចនៃស្រុកយូដា បានគូសបញ្ជាក់ពីសារៈសំខាន់នៃការស្វែងរកព្រះ នៅពេលយើងជួបនឹងការលំបាក—និងសូម្បីតែនៅពេលយើងមានភាពស្ងប់សុខក៏ដោយ ។ មេរៀននេះអាចជួយអ្នកឲ្យដាក់ផែនការដើម្បីស្វែងរកព្រះអម្ចាស់ ។
សិក្សាព្រះគម្ពីរ
តើអ្នកគិតដល់អ្វីខ្លះ នៅពេលអ្នកគិតអំពីការស្វែងរក ?
អែលឌើរ ហូសេ អេ តិក្សសៃរ៉ា នៃពួកចិតសិបនាក់ បានចែកចាយ ៖
ព្រះអម្ចាស់បានមានបន្ទូលថា « [ ស្វែងរក ] យើង ដោយនូវគ្រប់ទាំងគំនិត ចូរកុំសង្ស័យ កុំខ្លាចឡើយ » [ គោលលទ្ធិ និងសេចក្តីសញ្ញា ៦:៣៦ ] ។ ការស្វែងរកព្រះអម្ចាស់ និងការដឹងពីវត្តមានទ្រង់ គឺជាការព្យាយាមប្រចាំថ្ងៃ ជាកិច្ចខិតខំដ៏មានតម្លៃមួយ ។ ( « Seeking the Lord » Liahona ខែឧសភា ឆ្នាំ២០១៥ ទំព័រ ៩៦ )
តើការស្វែងរកព្រះអម្ចាស់ និងការដឹងពីវត្តមានរបស់ទ្រង់អាចជា « ការព្យាយាមប្រចាំថ្ងៃ » យ៉ាងដូចម្ដេច ? នៅពេលអ្នកសិក្សាថ្ងៃនេះ សូមរកមើលរបៀបដែលអ្នកអាចស្វែងរកព្រះអម្ចាស់ ។ សូមសរសេរគំនិត ឬអារម្មណ៍ណាមួយពីព្រះវិញ្ញាណបរិសុទ្ធដែលចូលមកក្នងគំនិតអ្នក ។
គម្ពីររបាក្សត្រ និងពង្សាវតារក្សត្រគ្របដណ្តប់ប្រហែលរយៈពេលដូចគ្នា ។ នៅក្នុង របាក្សត្រ ទី២ ១៤–១៦ និង ពង្សាវតារក្សត្រ ទី១ ១៥ យើងបានអានដំណើររឿងរបស់ស្តេចអេសា ជាស្ដេចទីបីនៃស្រុកយូដា ។ ដូចជាអេសាដែរ យើងអាចស្វែងរកព្រះអម្ចាស់ក្នុងអំឡុងពេលមានសេចក្តីសុខសាន្ត និងអំឡុងពេលមានទុក្ខលំបាក ។
សូមជ្រើសយកសេចក្ដីពិតមួយ នៅខាងក្រោម ហើយអានខគម្ពីរដែលភ្ជាប់មកជាមួយ ។ សូមគូសសម្គាល់របៀបដែលអេសា និងប្រជារាស្ដ្ររបស់ទ្រង់បានស្វែងរកព្រះអម្ចាស់ដោយពណ៌មួយ ។ សូមគូសសម្គាល់របៀបដែលព្រះបានប្រទានពរដល់ពួកគេដោយពណ៌មួយទៀត ។
នៅពេលខ្ញុំស្វែងរកព្រះអម្ចាស់ដោយអស់ពីដួងចិត្ត នោះទ្រង់នឹងប្រទានឲ្យខ្ញុំនូវសេចក្ដីសម្រាក ។
-
របាក្សត្រ ទី២ ១៤:៣–៧—ក្នុងអំឡុងពេលមានសេចក្តីស្រាកស្រាន្ត
-
របាក្សត្រ ទី២ ១៥:១០–១២; ១៥—ក្នុងអំឡុងពេលមានសេចក្តីស្រាកស្រាន្ត
ប្រសិនបើខ្ញុំស្វែងរកព្រះអម្ចាស់ នោះខ្ញុំនឹងរកឃើញទ្រង់ ។
-
របាក្សត្រ ទី២ ១៤:៩–១៣—នៅពេលពួកសាសន៍អេធីអូពីបានវាយប្រហារ
-
របាក្សត្រ ទី២ ១៥:១–៩—ក្នុងអំឡុងពេលមានសេចក្តីសុខ
Balm of Gilead [ ប្រទាលមុខសះនៅស្រុកកាឡាត ] ដោយ អានី ហ៊ែនរី ណាឌើរ
សូមសរសេរកំណត់ចំណាំនៅជាប់នឹងខគម្ពីរមួយ ដែលអ្នកបានសិក្សាជាមួយនឹងសេចក្ដីពិតដែលមានអក្សរដិត ដែលវាបង្រៀន ។ បន្ទាប់មក សូមឆ្លើយសំណួរខាងក្រោមនេះ មួយ ឬច្រើន នៅក្នុងកំណត់ចំណាំ ឬនៅក្នុងសៀវភៅកត់ចំណាំរបស់អ្នក ៖
-
តើអ្នកបានរៀនអ្វីខ្លះ ចេញពីបទពិសោធន៍របស់អេសា និងប្រជារាស្រ្តរបស់ទ្រង់ ?
-
តើអ្នកគិតថា វាមានន័យយ៉ាងណាដើម្បីរកឃើញព្រះអម្ចាស់ ?
-
តើការដែលព្រះអម្ចាស់ប្រទានដល់យើងនូវសេចក្ដីសម្រាក អាចមានលក្ខណៈដូចម្តេច ?
ប្រសិនបើមាន សូមសិក្សាធនធានមួយ ក្នុងចំណោមធនធានខាងក្រោមនេះ ហើយធ្វើបញ្ជីមួយអំពីរបៀបដែលអ្នកអាចស្វែងរកព្រះអម្ចាស់ ។
-
ប្រធាន រ័សុល អិម ណិលសុន « Make Time for the Lord » ចាប់ពីនាទីទី ១:០០ ដល់នាទីទី ៣:២៩ ៖
5:49 -
ផ្នែក « ការអញ្ជើញ » នៃផ្នែកសំខាន់ៗនីមួយៗនៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ឆ្នាំ២០២២ ) ។ ផ្នែកសំខាន់ៗរួមមាន « ព្រះយេស៊ូវគ្រីស្ទនឹងជួយអ្នក » និង « ស្រឡាញ់ព្រះ ស្រឡាញ់អ្នកជិតខាងរបស់អ្នក » ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។ បន្ទាប់មក សូមបញ្ចប់ផ្នែក « ឥឡូវត្រូវធ្វើដូចម្តេចទៀត ? » នៅចុងបញ្ចប់នៃមេរៀននេះ ។
ជម្រើស ក
តើអាចមានអ្វីកើតឡើង នៅពេលខ្ញុំជ្រើសរើសមិនពឹងផ្អែកលើព្រះ ?
ក្រោយមកនៅក្នុងព្រះជន្មទ្រង់ អេសាបានជ្រើសរើសពឹងផ្អែកលើរឿងផ្សេងទៀត ជាជាងងាកទៅរកព្រះអម្ចាស់ ។ ឧទាហរណ៍ ជំនួសឲ្យការទុកចិត្តលើព្រះដើម្បីជួយដល់ទ្រង់ អេសាបានលួចប្រាក់ និងមាសពីព្រះវិហារបរិសុទ្ធ ដើម្បីទិញជំនួយរបស់ស្រុកស៊ីរី ដើម្បីយកឈ្នះលើសត្រូវរបស់ទ្រង់ ( សូមមើល របាក្សត្រ ទី២ ១៦:១–៦ ) ។
សូមអាន របាក្សត្រ ទី២ ១៦:៧–១២ ។ សូមរកមើលឧទាហរណ៍មួយទៀតនៃរបៀបដែលអេសាបានជ្រើសរើសមិនពឹងផ្អែកលើព្រះ ។ សូមគូសសម្គាល់ឃ្លានានា ដែលបង្ហាញពីអ្វីដែលអេសាបានពឹងផ្អែក ជំនួសឲ្យពឹងផ្អែកលើព្រះ ។
កំហុសរបស់អេសាមិនមែនជាការស្វែងរកជំនួយមកពីគ្រូពេទ្យនោះទេ ។ វាគឺជា ការមិន ស្វែងរកជំនួយពីព្រះអម្ចាស់ ។ សម្រាប់ព័ត៌មានបន្ថែមអំពីតួនាទីនៃសេចក្តីជំនឿ និងឱសថក្នុងការព្យាបាល សូមមើល ដាល្លិន អេក អូក « Healing the Sick » Liahona ខែឧសភា ឆ្នាំ២០២០ ទំព័រ ៤៧ ។
នៅក្នុងសៀវភៅកត់ចំណាំរបស់អ្នក សូមសរសេរសេចក្ដីពិតមួយដែលអាចជួយអ្នក ឬអ្នកដទៃឲ្យយល់ពីរបៀបធ្វើឲ្យមានតុល្យភាពរវាងការស្វែងរកជំនួយមកពីប្រភពផ្សេងទៀត និងការស្វែងរកជំនួយមកពីព្រះ ។
ជម្រើស ខ
តើខ្ញុំអាចដាក់ព្រះជាមេទ័ពនៃជីវិតរបស់ខ្ញុំដោយរបៀបណា ?
តើអ្នកគិតថា ការមានព្រះជាមេទ័ពរបស់យើងមានន័យដូចម្តេច ? នៅក្នុង របាក្សត្រ ទី២ ១៣ យើងរៀនអំពីអ័ប៊ីយ៉ា ដែលជាព្រះបិតារបស់អេសា ។ ពួកសាសន៍អ៊ីស្រាអែលបានបែកបាក់ទៅជាពីរនគរ ៖ នគរអ៊ីស្រាអែលខាងជើង និងនគរយូដាខាងត្បូង ។ សង្គ្រាមមួយបានកើតឡើងរវាងអ៊ីស្រាអែល ដែលដឹកនាំដោយស្តេចយេរ៉ូបោម និងយូដា ដែលដឹកនាំដោយស្តេចអ័ប៊ីយ៉ា ។
សូមអាន របាក្សត្រ ទី២ ១៣:១០–១២ ។ សូមគូសសម្គាល់ឃ្លាដែលបង្ហាញពីអ្វីដែលអ័ប៊ីយ៉ា និងប្រជារាស្រ្ដរបស់ទ្រង់បានងាកទៅរក ។ ( ចំណាំ ៖ ការដុតយញ្ញបូជា និងសកម្មភាពផ្សេងទៀតនៅក្នុងខទី ១១ គឺជាផ្នែកមួយនៃកាតព្វកិច្ចរបស់ពួកសង្ឃសម្រាប់ការថ្វាយបង្គំនៅក្នុងព្រះវិហារបរិសុទ្ធ ) ។
សូមអាន និងដាក់តំណភ្ជាប់ ហេព្រើរ ២:១០ ទៅនឹង របាក្សត្រ ទី២ ១៣:១២ ។ អ្នកក៏អាចសរសេរកំណត់ចំណាំមួយដែលមានសេចក្ដីពិតថា ព្រះគឺជាមេទ័ពរបស់យើង បានផងដែរ ។ សូមរួមបញ្ចូលនៅក្នុងកំណត់ចំណាំរបស់អ្នក នូវអ្វីដែលអ្នកបានជួបប្រទះដើម្បីជួយអ្នកឲ្យដឹងថា ព្រះគឺជាមេទ័ពដ៏ល្អឥតខ្ចោះ ឬអ្វីដែលអ្នកដឹងអំពីព្រះ ដែលធ្វើឲ្យទ្រង់គឺជាមេទ័ពដ៏ល្អឥតខ្ចោះ ។
សូមអាន របាក្សត្រ ទី២ ១៣:១៣–១៨ ។ សូមរកមើលអ្វីដែលបានកើតឡើង ដោយសារអ័ប៊ីយ៉ា និងប្រជារាស្រ្តរបស់ទ្រង់ពឹងផ្អែកលើព្រះ ជាមេទ័ពរបស់ពួកគេ ។
ឥឡូវត្រូវធ្វើដូចម្តេចទៀត ?
សូមជ្រើសរើសរឿងមួយ ដែលអ្នកអាចធ្វើបាន ដើម្បីស្វែងរកព្រះអម្ចាស់ ។ សូមដាក់ផែនការពីរបៀបដែលអ្នកអាចបញ្ចូលសកម្មភាពនេះនៅក្នុងជីវិតរបស់អ្នក ។ ការឆ្លើយសំណួរខាងក្រោមនេះអាចជួយដល់ផែនការរបស់អ្នកបាន ។
-
តើអ្នកគិតថា ហេតុអ្វីសកម្មភាពនេះអាចជួយអ្នករកឃើញព្រះអម្ចាស់បន្ថែមទៀតក្នុងជីវិតរបស់អ្នក ?
-
តើមានឧបសគ្គអ្វីខ្លះដែលអ្នកអាចប្រឈមមុខបាន នៅពេលអ្នកខិតខំធ្វើកិច្ចការនេះ ?
-
តើជំហានជាក់លាក់អ្វីខ្លះដែលអ្នកអាចធ្វើវាបាន ទោះបីមានឧបសគ្គទាំងនេះក៏ដោយ ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យដាក់ផែនការដើម្បីស្វែងរកព្រះអម្ចាស់ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
ផែនការរបស់អ្នកដើម្បីស្វែងរកព្រះអម្ចាស់កាន់តែខ្លាំងជាងមុននៅក្នុងជីវិតរបស់អ្នក
-
អ្វីដែលអ្នកដឹងអំពីព្រះ ដែលអាចជួយនរណាម្នាក់ឲ្យពឹងផ្អែកលើទ្រង់នៅក្នុងស្ថានភាពលំបាក
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?