សាំយូអែល ទី២ ១១–១២; ពង្សាវតារក្សត្រ ទី១ ៣; ៦–៩; ១១ ៖ មេរៀនទី ៧៨
ពង្សាវតារក្សត្រ ទី១ ៣
ព្រះអម្ចាស់ប្រទានពរដល់យើងឲ្យសម្រេចកិច្ចការរបស់ទ្រង់
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
តើអ្នកធ្លាប់ពិចារណាអំពីរបៀបដែលពរជ័យដែលអ្នកទទួលបានពីព្រះវរបិតាសួគ៌ជួយអ្នកឲ្យសម្រេចកិច្ចការរបស់ទ្រង់ដែរឬទេ ? សាឡូម៉ូនត្រូវបានព្រះអម្ចាស់តែងតាំងឲ្យធ្វើជាស្ដេចថ្មីនៃអ៊ីស្រាអែល ក្រោយពីការសុគតរបស់ដាវីឌ ជាបិតារបស់ទ្រង់ ។ ដោយចង់គោរពព្រះអម្ចាស់ សាឡូម៉ូនបានស្វែងរកពរជ័យដោយរាបទាបដែលនឹងបង្កើនសមត្ថភាពរបស់ទ្រង់ដើម្បីបម្រើព្រះអម្ចាស់ និងប្រជាជនអ៊ីស្រាអែលដោយសុចរិត ។ មេរៀននេះអាចជួយអ្នកឲ្យយល់ថា ព្រះអម្ចាស់នឹងប្រទានពរដល់អ្នកនូវសមត្ថភាពដើម្បីសម្រេចកិច្ចការរបស់ទ្រង់ ។
សិក្សាព្រះគម្ពីរ
សូមគូរ និងដាក់ស្លាករូបភាពខាងក្រោមនៅក្នុងសៀវភៅកត់ចំណាំរបស់អ្នក ។ អ្នកនឹងបន្តបន្ថែមទៅនឹងរូបគំនូររបស់អ្នកពេញមួយមេរៀនបន្ថែមទៀត ។
នៅជ្រុងខាងស្តាំនៃរូបគំនូររបស់អ្នក សូមសរសេរនូវរបៀបមួយចំនួនដែលព្រះអម្ចាស់អញ្ជើញមនុស្សឲ្យចូលរួមក្នុងកិច្ចការរបស់ទ្រង់ ។
នៅផ្នែកខាងឆ្វេងនៃរូបគំនូររបស់អ្នក សូមសរសេរនូវរបៀបមួយចំនួនដែលមនុស្សអាចមានអារម្មណ៍ថាមិនមានសមត្ថភាពដើម្បីបម្រើព្រះអម្ចាស់ ។
នៅពេលស្តេចដាវីឌសុគត ព្រះរាជបុត្ររបស់ទ្រង់គឺសាឡូម៉ូន ត្រូវបានព្រះអម្ចាស់ជ្រើសរើសឲ្យគ្រងរាជ្យជាស្តេចអ៊ីស្រាអែល ( សូមមើល ពង្សាវតារក្សត្រ ទី១ ១:១១–១៣ ) ។ សាឡូម៉ូនស្រឡាញ់ព្រះអម្ចាស់ ហើយចង់ធ្វើជាស្ដេចដ៏សុចរិត ( សូមមើល ពង្សាវតារក្សត្រ ទី១ ៣:៣ ) ។ ប៉ុន្តែ សូម្បីតែសាឡូម៉ូនក៏មានការព្រួយបារម្ភខ្លះៗអំពីការរស់នៅឲ្យត្រូវតាមទំនួលខុសត្រូវរបស់ទ្រង់ផងដែរ ។ នៅល្ងាចមួយ ព្រះអម្ចាស់បានលេចមកឯសាឡូម៉ូន ហើយបានសួរអំពីអ្វីដែលសាឡូម៉ូនចង់បាន ( សូមមើល ពង្សាវតារក្សត្រ ទី១ ៣:៥ ) ។
សូមអាន ពង្សាវតារក្សត្រ ទី១ ៣:៦–៩ ។ សូមគូសចំណាំពាក្យ ឬឃ្លាដែលបង្ហាញពីអាកប្បកិរិយារបស់សាឡូម៉ូន ពេលកំពុងទូលទៅកាន់ព្រះអម្ចាស់ ។
សូមប្រៀបធៀបបទគម្ពីរទៅនឹងជីវិតរបស់អ្នក ។ ទោះបីជាដំណើររឿងពីរផ្សេងគ្នាមិនលម្អិតដូចគ្នាបេះបិទទាំងអស់ក្តី ក៏ព្រះអម្ចាស់អាចបង្រៀនអ្នកពីរបៀបធ្វើតាម ដោយជួយអ្នកឲ្យមើលឃើញពីរបៀបដែលអ្នកដទៃប្រព្រឹត្តផងដែរ ។ សូមគិតអំពីរបៀបដែលសាឡូម៉ូនបានទូលទៅកាន់ព្រះអម្ចាស់ ។ តើអ្នកអាចធ្វើសកម្មភាពដោយសេចក្ដីជំនឿដូចទ្រង់បានយ៉ាងដូចម្ដេច ?
សូមអាន ពង្សាវតារក្សត្រ ទី១ ៣:១០–១៤ ដើម្បីមើលពីរបៀបដែលព្រះអម្ចាស់បានឆ្លើយតបទៅនឹងបំណងប្រាថ្នារបស់សាឡូម៉ូន ។
អ្នកអាចបន្ថែមកំណត់ចំណាំនៅជាប់នឹងឃ្លា « ចិត្តប្រកបដោយប្រាជ្ញា និងយោបល់ » ។ នៅក្នុងកំណត់ចំណាំ សូមសរសេរអ្វីដែលអ្នកគិតថាឃ្លានេះមានអត្ថន័យ ។ អ្នកក៏អាចបន្ថែមការឆ្លើយតបរបស់អ្នកទៅនឹងសំណួរដូចខាងក្រោមផងដែរ ៖
-
តើ « មានចិត្តប្រកបដោយប្រាជ្ញា និងយោបល់ » ( ខទី ១២ ) និង « ទ្រព្យសម្បត្តិនឹងកេរ្តិ៍ឈ្មោះ » ( ខទី ១៣ ) បង្កើនសមត្ថភាពរបស់សាឡូម៉ូនដើម្បីបម្រើព្រះអម្ចាស់ដោយសុចរិតដោយរបៀបណា ?
សេចក្តីពិតមួយដែលយើងរៀនមកពីការប្រាស្រ័យទាក់ទងរបស់ព្រះអម្ចាស់ជាមួយសាឡូម៉ូនគឺ នៅពេលយើងស្គាល់ភាពទន់ខ្សោយរបស់យើងដោយរាបទាប ហើយស្វែងរកជំនួយរបស់ព្រះអម្ចាស់ ដើម្បីផ្ដល់ពរដល់អ្នកដទៃ នោះទ្រង់នឹងបង្កើនសមត្ថភាពរបស់យើង ដើម្បីសម្រេចកិច្ចការរបស់ទ្រង់ ។
ស្តេចសាឡូម៉ូនបានប្រើអ្វីដែលព្រះអម្ចាស់ប្រទានពរដល់ទ្រង់ដើម្បីធ្វើជាស្តេចដ៏ល្អមួយអង្គ ។ សូមអានឧទាហរណ៍មួយ នៃឧទាហរណ៍ខាងក្រោមអំពីរបៀបដែលទ្រង់បានប្រើអំណោយទានទាំងនេះដើម្បីប្រទានពរដល់អ្នកដទៃ ៖
-
ពង្សាវតារក្សត្រ ទី១ ៣:១៦–២៨ ។ ស្ត្រីពីរនាក់ប្រកែកគ្នាថានរណាជាម្តាយរបស់ទារក ។
-
ពង្សាវតារក្សត្រ ទី១ ៤:២៤–២៥, ២៩–៣២, ៣៤ ។ លទ្ធផលនៃរជ្ជកាលរបស់សាឡូម៉ូន ។
សូមអានសេចក្តីថ្លែងការណ៍ខាងក្រោមនេះដោយប្រធាន ថូម៉ាស អេស ម៉នសុន ( ឆ្នាំ១៩២៧–២០១៨ ) ដោយរកមើលសេចក្តីសន្យាដែលបានផ្ដល់ឲ្យមនុស្សទាំងអស់ដែលស្ម័គ្រចិត្តចូលរួមនៅក្នុងកិច្ចការរបស់ព្រះអម្ចាស់ ៖
ឥឡូវនេះ ពួកអ្នកមួយចំនួនអាចអៀនខ្មាសពីធម្មជាតិ ឬគិតថាខ្លួនឯងខ្វះសមត្ថភាពដើម្បីឆ្លើយតបដោយវិជ្ជមានទៅនឹងការហៅបម្រើ [ ព្រះអម្ចាស់ ] ។ ចូរចាំថា កិច្ចការនេះពុំគ្រាន់តែជារបស់អ្នក និងខ្ញុំតែប៉ុណ្ណោះនោះទេ ។ វាជាកិច្ចការរបស់ព្រះអម្ចាស់ ហើយពេលយើងស្ថិតនៅក្នុងកិច្ចការរបស់ព្រះអម្ចាស់ នោះយើងនឹងទទួលបានជំនួយពីព្រះអម្ចាស់ ។ សូមចងចាំថា ព្រះអម្ចាស់នឹងរៀបចំ ដើម្បីជួយទទួលបន្ទុកដែលបានដាក់លើកិច្ចការនេះ ។ ( « To Learn, to Do, to Be » Liahona ខែវិច្ឆិកា ឆ្នាំ២០០៨ ទំព័រ ៦២ )
-
តើការបង្រៀនរបស់ប្រធាន ម៉នសុន អាចជួយនរណាម្នាក់ដែលបារម្ភអំពីសមត្ថភាពរបស់ពួកគេក្នុងការបម្រើព្រះអម្ចាស់យ៉ាងដូចម្ដេច ?
សូមបន្ថែមស្ពានទៅក្នុងរូបភាពរបស់អ្នក ដែលមានចំណងជើងថា « ជំនួយរបស់ព្រះអម្ចាស់ » ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើការស្គាល់ភាពទន់ខ្សោយរបស់ខ្ញុំអាចរៀបចំខ្ញុំឲ្យធ្វើកិច្ចការរបស់ព្រះអម្ចាស់បានដោយរបៀបណា ?
ព្រះអម្ចាស់អាចជួយអ្នកឲ្យស្គាល់ភាពទន់ខ្សោយរបស់អ្នក ។ សូមអានវគ្គបទគម្ពីរខាងក្រោមនេះ និងសារលិខិតសន្និសីទ ។ សូមដាក់តំណភ្ជាប់វគ្គបទគម្ពីរ ។
អែលឌើរ លែរី អរ ឡរិន នៃពួកចិតសិបនាក់ បានបង្រៀន ៖
ខ្ញុំសូមផ្ដល់យោបល់ឲ្យអ្នកចូលរួម ធ្វើលំហាត់ខាងវិញ្ញាណមួយនៅពេលណាមួយឆាប់ៗនេះ អាចជាយប់នេះអំឡុងពេលអ្នកអធិស្ឋាន ។ សូមទូលសួរព្រះអម្ចាស់ដោយរាបសានូវសំណួរដូចតទៅនេះ ៖ « តើមានអ្វីកំពុងរារាំងទូលបង្គំមិនឲ្យរីកចម្រើនបាន ? » ឬសំណួរម្យ៉ាងទៀត ៖ « តើនៅខ្វះអ្វីទៀត ? » បន្ទាប់មក សូមរង់ចាំចម្លើយដោយស្ងប់ស្ងៀម ។ បើអ្នកសួរដោយស្មោះ ចម្លើយនឹងផ្ដល់ឲ្យយ៉ាងច្បាស់ក្នុងពេលឆាប់ៗ ។ វានឹងជាវិវរណៈដែលបម្រុងទុកសម្រាប់អ្នក ។ ( « What Lack I Yet? » Liahona ខែវិច្ឆិកា ឆ្នាំ២០១៥ ទំព័រ ៣៥ )
សូមចំណាយពេលពីរបីនាទី ដើម្បីធ្វើសកម្មភាពតាមការណែនាំរបស់អែលឌើរ ឡរិន ។ នៅលើរូបភាពរបស់អ្នក សូមកត់ត្រាចំណាប់អារម្មណ៍អំពីរបៀបដែលអ្នកអាចធ្វើសកម្មភាពដោយសេចក្តីជំនឿ ដើម្បីយកឈ្នះលើភាពទន់ខ្សោយរបស់អ្នកដោយមានជំនួយរបស់ព្រះអម្ចាស់ ។
ជម្រើស ខ
តើខ្ញុំអាចទទួលបានព្រះចេស្ដារបស់ព្រះដើម្បីបង្កើនសមត្ថភាពរបស់ខ្ញុំក្នុងការសម្រេចកិច្ចការរបស់ទ្រង់ដោយរបៀបណា ?
សូមដាក់តំណភ្ជាប់វគ្គបទគម្ពីរខាងក្រោម និងសារលិខិតរបស់អែលឌើរ ឌៀថើរ អេហ្វ អុជដូហ្វ បន្ទាប់ពីបានអានវារួច ។
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់ បានពន្យល់ ៖
ព្រះមិនត្រូវការឲ្យយើងល្អដាច់គេនោះទេ កុំថាឡើយដល់ភាពល្អឥតខ្ចោះនោះ ។
ទ្រង់នឹងចាប់យកទេពកោសល្យ និងសមត្ថភាពរបស់អ្នក ហើយបង្កើននូវការណ៍ទាំងនេះ ។ … ប្រសិនបើអ្នកទុកចិត្ដលើទ្រង់ ហើយស្មោះត្រង់ ទ្រង់នឹងតម្កើងពាក្យសម្ដី និងសកម្មភាពរបស់អ្នក ហើយប្រើប្រាស់ការណ៍ទាំងនេះដើម្បីប្រទានពរ និងបម្រើទៅដល់បណ្តាជន !
ព្រះមិនត្រូវការមនុស្សដែលល្អឥតខ្ចោះទេ ។
ទ្រង់ស្វែងរកអស់អ្នកដែលនឹងផ្តល់ចិត្ត និងគំនិតដែលស្ម័គ្រតាម ( សូមមើល គោលលទ្ធិ និងសេចក្តីសញ្ញា ៦៤:៣១–៣៤ ) ហើយទ្រង់នឹងធ្វើឲ្យពួកគេបានល្អឥតខ្ចោះនៅក្នុងព្រះគ្រីស្ទ ( សូមមើល មរ៉ូណៃ ១០:៣២–៣៣ ) ។ ( « Five Messages We All Need to Hear » Liahona ខែសីហា ឆ្នាំ២០២២ មានតែឌីជីថលប៉ុណ្ណោះ )
នៅក្រោមស្ពាននៅក្នុងរូបភាពរបស់អ្នក សូមបន្ថែមចម្លើយរបស់អ្នកទៅនឹងសំណួរខាងក្រោម ៖
-
តើមានពរជ័យអ្វីខ្លះដែលយើងអាចទទួលបាន ដែលអាចជួយយើងចូលរួមក្នុងកិច្ចការរបស់ព្រះអម្ចាស់ ?
-
តើអ្នកដឹងដោយរបៀបណាថាអ្នក ឬនរណាម្នាក់ដែលអ្នកស្គាល់ បានទទួលពរជ័យដើម្បីឲ្យសម្រេចបាននូវកិច្ចការរបស់ព្រះអម្ចាស់ ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកយល់ថា ព្រះអម្ចាស់នឹងប្រទានពរដល់អ្នកនូវសមត្ថភាពដើម្បីសម្រេចកិច្ចការរបស់ទ្រង់ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
រូបគំនូរដែលអ្នកបានបង្កើត ។
-
ទីបន្ទាល់របស់អ្នកអំពីសមត្ថភាពរបស់ព្រះអម្ចាស់ដើម្បីជួយអ្នកឲ្យសម្រេចកិច្ចការរបស់ទ្រង់ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?