ដាវីឌសម្លាប់កូលីយ៉ាត [ David Slays Goliath ] ដោយ ហ្គែរី អិល ខាប
សាំយូអែល ទី១ ១៧–១៨; ២៤–២៦; សាំយូអែល ទី២ ៥–៧ ៖ មេរៀនទី ៧៤
សាំយូអែល ទី១ ១៧
« ដាវីឌ និង កូលីយ៉ាត »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ពេលដាវីឌចេញទៅច្បាំងនឹងកូលីយ៉ាត កាលនោះដាវីឌ « នៅក្មេងណាស់ » លោកបានប្រឈមមុខនឹងកូលីយ៉ាត « ជាមនុស្សស្ទាត់ចំបាំងតាំងតែពីក្មេង » ( សាំយូអែល ទី១ ១៧:៣៣ ) ។ ទោះជាយ៉ាងណា ដាវីឌបានដឹងថា ព្រះអម្ចាស់គង់ជាមួយលោក ដែលផ្លាស់ប្ដូរអ្វីៗគ្រប់យ៉ាង ។ នៅសព្វថ្ងៃនេះ យើងអាចរកឃើញកម្លាំងនៅក្នុងបញ្ហាប្រឈមរបស់យើងបាន នៅពេលយើងប្រឈមមុខនឹងឧបសគ្គទាំងនោះជាមួយនឹងព្រះយេស៊ូវគ្រីស្ទ ។ មេរៀននេះអាចជួយអ្នកឲ្យពឹងផ្អែកលើព្រះអម្ចាស់ នៅពេលអ្នកប្រឈមមុខនឹងឧបសគ្គរបស់អ្នក ។
សិក្សាព្រះគម្ពីរ
តើអ្នកធ្លាប់ប្រឈមមុខនឹងបញ្ហាដែលហាក់ធំពេកមិនអាចយកឈ្នះបានដែរឬទេ ? អ៊ីស្រាអែលកំពុងធ្វើសង្គ្រាមជាមួយពួកភីលីស្ទីន ។ អ្នកចម្បាំងភីលីស្ទីនម្នាក់ ឈ្មោះកូលីយ៉ាត បានបបួលធ្វើការប្រកួតមួយ ។ គាត់បាននិយាយថា ប្រសិនបើពួកសាសន៏អ៊ីស្រាអែលណាម្នាក់យកឈ្នះគាត់ក្នុងការប្រយុទ្ធតែមួយលើក នោះពួកភីលីស្ទីននឹងចុះចាញ់ ហើយធ្វើជាពួកអ្នកបម្រើរបស់សាសន៍អ៊ីស្រាអែល ។
ទោះជាយ៉ាងណា កូលីយ៉ាតមិនមែនជាទាហានធម្មតានោះទេ ។
សាំយូអែល ទី១ ១៧:៤ រាយការណ៍ពីកម្ពស់របស់ កូលីយ៉ាត ។ សូមធ្វើការកត់ចំណាំនៅជិតនឹង ខទី ៤ ដែលពន្យល់ថា « កម្ពស់៦ហត្ថ១ចំអាម » គឺកម្ពស់ជិតបីម៉ែត្រ ឬប្រាំបួនហ្វីត ប្រាំបួនអ៊ិញ ។
ជារៀងរាល់ថ្ងៃអស់រយៈពេល៤០ថ្ងៃ កូលីយ៉ាតបានបបួលធ្វើការប្រកួត ។ ស្ដេចសូល និងកងទ័ពរបស់អ៊ីស្រាអែលភ័យខ្លាច ប៉ុន្តែដាវីឌបានមើលឃើញអ្វីៗខុសគ្នា ។
មុននឹងអានចម្លើយរបស់ដាវីឌ សូមជញ្ជឹងគិតពីឧបសគ្គក្នុងជីវិតរបស់អ្នក ។ សូមជ្រើសរើសបញ្ហាប្រឈមមួយ ដើម្បីផ្តោតលើនៅថ្ងៃនេះ ។
សូមប្រើសេចក្តីណែនាំខាងក្រោមដើម្បីសិក្សាដំណើររឿងរបស់ដាវីឌ និងកូលីយ៉ាត ហើយគូសចំណាំអ្វីដែលអ្នករកឃើញ ៖
-
សូមអាន សាំយូអែល ទី១ ១៧:២៦ ហើយរកមើលពីរបៀបដែលដាវីឌបានឆ្លើយតប នៅពេលលោកបានឮកូលីយ៉ាតផ្គើននឹងកងទ័ពអ៊ីស្រាអែល ។
-
សូមអាន សាំយូអែល ទី១ ១៧:៣១–៣៧ ហើយរកមើលថាហេតុអ្វីបានជាដាវីឌមានទំនុកចិត្តយ៉ាងខ្លាំងទៅលើ « ព្រះដ៏មានព្រះជន្មរស់ » ( ខទី ៣៦ ) ។
-
សូមអាន សាំយូអែល ទី១ ១៧:៣៨–៥១ ហើយរកមើលរបៀបដែលដាវីឌពឹងផ្អែកលើព្រះអម្ចាស់ នៅពេលលោកប្រឈមមុខនឹងកូលីយ៉ាត ។
សូមមើលវីដេអូ « The Lord Will Deliver Me » ( ៣:២៣ ) ដើម្បីមើលពីការពិពណ៌នាដែលអ្នកបានអាន ។ បន្ទាប់មក សូមឆ្លើយសំណួរដូចខាងក្រោមនៅក្នុងសៀវភៅកត់ចំណាំរបស់អ្នក ៖
-
តើដាវីឌបានដឹងអ្វីខ្លះអំពីព្រះអម្ចាស់ ដែលបានផ្ដល់ទំនុកចិត្តឲ្យលោកទៅប្រយុទ្ធនឹងកូលីយ៉ាត ?
-
តើអ្វីដែលដាវីឌបានដឹងអំពីព្រះអម្ចាស់អាចជួយដល់យើង នៅពេលយើងប្រឈមមុខនឹងឧបសគ្គរបស់យើងដោយរបៀបណា ?
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើខ្ញុំអាចប្រឈមមុខនឹងកូលីយ៉ាតដោយរបៀបណានៅក្នុងជីវិតរបស់ខ្ញុំ ?
នៅក្នុង សាំយូអែល ទី១ ១៧:៤០ យើងបានរៀនថា ដាវីឌ « រើសក្រួសរលីងៗចំនួន៥ដុំ » ដើម្បីច្បាំងនឹងកូលីយ៉ាត ។
ស៊ីស្ទើរ អេនឌ្រា មូណូស ស្ពែនណោស បានលើកឡើងដូចខាងក្រោម ៖
ដាវីឌបានត្រៀមខ្លួនដោយមានក្រួសចំនួនប្រាំដុំ ខណៈដែលលោកបានប្រើក្រួសតែមួយដុំគត់ដើម្បីសម្លាប់កូលីយ៉ាត ។ មានប្រាំដុំ ! រឿងនេះធ្វើឲ្យខ្ញុំគិតអំពីរបៀបដែលខ្ញុំអាចរៀបចំខ្លួនខ្ញុំដើម្បីប្រឈមនឹងពិភពលោកនេះ ។
ចុះបើក្រួសនីមួយៗរបស់ដាវីឌ តំណាងឲ្យកម្លាំងដែលយើងត្រូវការដើម្បីយកឈ្នះក្នុងជីវិតវិញនោះ ? តើក្រួសទាំងប្រាំដុំនោះអាចជាអ្វីខ្លះ ? ( « ស្មោះត្រង់ដរាបដល់ចុងបំផុត » លីអាហូណា ខែឧសភា ឆ្នាំ២០២៤ ទំព័រ ៦០ )
សូមសរសេរកំណត់ចំណាំនៅជិតនឹង ខទី ៤០ ដែលមានចំណងជើងថា « របៀបប្រាំយ៉ាងដើម្បីរៀបចំខ្លួនខ្ញុំប្រឈមនឹងឧបសគ្គ » ។ បន្ទាប់មក សូមរាយបញ្ជីរបៀបប្រាំយ៉ាង ឬច្រើនយ៉ាង ដែលអ្នកអាចងាកទៅរកព្រះអម្ចាស់ដើម្បីទទួលបានកម្លាំងយកឈ្នះលើឧបសគ្គរបស់អ្នក ។
សូមប្រមូលដុំក្រួសចំនួនប្រាំ ហើយសរសេរលើដុំក្រួសនីមួយៗអំពីរបៀបដែលអ្នកអាចទទួលបានកម្លាំងពីព្រះគ្រីស្ទ ។ សូមដាក់ក្រួសទាំងនោះនៅកន្លែងដែលអ្នកនឹងមើលឃើញវាជាការរំឭក ។ ឧទាហរណ៍ អ្នកអាចដាក់ដុំក្រួសនៅលើខ្នើយរបស់អ្នក ដើម្បីរំឭកឲ្យអានព្រះគម្ពីរមុនពេលចូលគេង ឬដាក់មួយក្នុងស្បែកជើងរបស់អ្នក ដើម្បីរំឭកអ្នកឲ្យអធិស្ឋានមុនពេលចេញទៅក្រៅនៅពេលព្រឹក ។
ជម្រើស ខ
តើការដែលដាវីឌយកឈ្នះលើកូលីយ៉ាត គឺជានិមិត្តរូបនៃព្រះគ្រីស្ទយ៉ាងដូចម្ដេច ?
នៅក្នុងសៀវភៅកត់ចំណាំរបស់អ្នក សូមសរសេរកំណត់ហេតុមួយ ហាក់ដូចជាអ្នកគឺជាទាហានអ៊ីស្រាអែលម្នាក់ដែលមើលដាវីឌចេញទៅប្រយុទ្ធ ។ សូមប្រាកដថា អ្នករួមបញ្ចូលចំណុចដូចខាងក្រោម ៖
-
តើអ្នកមានអារម្មណ៍យ៉ាងណា នៅពេលកូលីយ៉ាតប្រកួតជាមួយអ្នកជារាល់ថ្ងៃ ?
-
តើអ្នកមានអារម្មណ៍យ៉ាងណា នៅពេលដាវីឌយកឈ្នះលើគាត់ ?
-
តើអ្នកមានអារម្មណ៍យ៉ាងណាចំពោះដាវីឌ បន្ទាប់ពីអ្វីដែលលោកបានធ្វើសម្រាប់អ្នក និងប្រជាជនរបស់អ្នក ?
ចំណុចសំខាន់ៗជាច្រើននៃជីវិតរបស់ដាវីឌ បង្ហាញពីជីវិត និងបេសកកម្មរបស់ព្រះយេស៊ូវគ្រីស្ទ ។
សូមប្រើតារាងខាងក្រោមដើម្បីស្វែងយល់ពីភាពស្រដៀងគ្នាមួយចំនួនរវាងដាវីឌ និងព្រះយេស៊ូវគ្រីស្ទ ។ សូមពិចារណាភ្ជាប់តំណវគ្គបទគម្ពីរទាំងនេះដើម្បីធ្វើឲ្យវាងាយស្រួលស្វែងរក នៅពេលអ្នកសិក្សាដំណើររឿងនេះលើកក្រោយ ។
|
ដាវីឌ |
ព្រះយេស៊ូវគ្រីស្ទ |
|---|---|
ដាវីឌ សាំយូអែល ទី១ ១៧:១២ | ព្រះយេស៊ូវគ្រីស្ទ លូកា ២:៤ |
ដាវីឌ សាំយូអែល ទី១ ១៦:១១; ១៧:១៥ | ព្រះយេស៊ូវគ្រីស្ទ យ៉ូហាន ១០:១៤ |
ដាវីឌ សាំយូអែល ទី១ ១៦:១៣ | ព្រះយេស៊ូវគ្រីស្ទ លូកា ៤:១៨; យ៉ូហាន ១:៤៩ |
ដាវីឌ សាំយូអែល ទី១ ១៧:៥០–៥១ | ព្រះយេស៊ូវគ្រីស្ទ |
សូមអានកំណត់ហេតុដែលអ្នកបានសរសេរនោះសាឡើងវិញ នៅពេលចាប់ផ្ដើមសកម្មភាពនេះ ។ តើការយល់ដឹងអំពីបទពិសោធន៍របស់ដាវីឌក្នុងការសង្គ្រោះអ៊ីស្រាអែល អាចជួយអ្នកឲ្យដឹងគុណចំពោះការសង្រ្គោះដោយព្រះយេស៊ូវគ្រីស្ទយ៉ាងដូចម្តេច ? សូមសរសេរចម្លើយរបស់អ្នកនៅក្រោមកំណត់ហេតុដំបូងរបស់អ្នក ។
ចែកចាយគំនិតរបស់អ្នក
គោលបំណងមេរៀន ៖ មេរៀននេះអាចជួយអ្នកពឹងផ្អែកលើព្រះអម្ចាស់ នៅពេលអ្នកប្រឈមមុខនឹងឧបសគ្គទាំងឡាយ ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
រូបភាព ឬការពិពណ៌នាពីគ្រាប់ក្រួសដែលអ្នកបានរើស អ្វីដែលអ្នកសរសេរលើវា ហើយថាតើអ្នកនឹងទុកវានៅកន្លែងណា ។
-
កំណត់ហេតុដែលអ្នកបានសរសេរសម្រាប់ជម្រើស ខ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?