« និក្ខមនំ ១៩–២០; ២៤; ៣១–៣៤ ៖ មេរៀនទី ៥០ ៖ និក្ខមនំ ២០:១២–១៧—ព្រះបញ្ញត្តិដប់ប្រការជួយយើងឲ្យស្រឡាញ់ព្រះ និងអ្នកជិតខាងរបស់យើង » សៀវភៅសិក្សាព្រះគម្ពីរសញ្ញាចាស់ សម្រាប់សិស្សថ្នាក់សិក្ខាសាលា ( ឆ្នាំ២០២៦ )
និក្ខមនំ ១៩–២០; ២៤; ៣១–៣៤ ៖ មេរៀនទី ៥០
និក្ខមនំ ២០:១២–១៧
ព្រះបញ្ញត្តិដប់ប្រការជួយយើងឲ្យស្រឡាញ់ព្រះ និងអ្នកជិតខាងរបស់យើង
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
នៅពេលកូនចៅអ៊ីស្រាអែលបោះត្រសាលនៅភ្នំស៊ីណាយ ព្រះអម្ចាស់បានបើកសម្ដែងព្រះបញ្ញត្តិដប់ប្រការ ។ តាមរយៈការកាន់តាមព្រះបញ្ញត្តិដប់ប្រការ នោះយើងបង្ហាញសេចក្ដីស្រឡាញ់ចំពោះព្រះ និងមនុស្សដទៃ ។ មេរៀននេះអាចជួយអ្នកឲ្យយល់ពីរបៀបកាន់តាមព្រះបញ្ញត្តិ ដែលនឹងជួយអ្នកឲ្យស្រឡាញ់ព្រះ និងអ្នកជិតខាងរបស់យើង ។
សិក្សាព្រះគម្ពីរ
សូមគិតពីព្រះបញ្ញត្តិដប់ប្រការ ដែលព្រះអម្ចាស់បានប្រទានដល់ម៉ូសេ ។ មនុស្សជាច្រើននៅជំនាន់របស់យើងពិបាកកាន់តាមព្រះបញ្ញត្តិទាំងនេះណាស់ ។ សូមចំណាយពេលបន្តិច ហើយចាត់ចំណាត់ថ្នាក់ព្រះបញ្ញត្តិទាំងនេះតាមយោបល់របស់អ្នក ពី ១ ( គោរពតាមខ្លាំងបំផុត ) ដល់ ១០ ( បំពានខ្លាំងបំផុត ) ។
ប្រសិនបើអ្នកត្រូវរំឭកព្រះបញ្ញត្តិទាំងនេះឡើងវិញ សូមអាន និក្ខមនំ ២០:៣–១៧ ។ នៅក្នុងមេរៀនមុន អ្នកប្រហែលជាបានគូសសម្គាល់ព្រះបញ្ញត្តិទាំងនេះ ។ ប្រសិនបើអ្នកមិនបានគូសសម្គាល់ទេ សូមគូសសម្គាល់ព្រះបញ្ញត្តិនីមួយៗនៃព្រះបញ្ញត្តិទាំងដប់នេះឥឡូវនេះ ។
នៅក្នុងមេរៀននេះ អ្នកនឹងសិក្សាអំពីព្រះបញ្ញត្តិទាំងប្រាំមួយ ដែលមាននៅក្នុង និក្ខមនំ ២០:១២–១៧ ឲ្យកាន់តែស៊ីជម្រៅ ។
ការយល់ដឹងពីព្រះបញ្ញត្តិរបស់ព្រះអម្ចាស់ អាចជួយអ្នកឲ្យស្រឡាញ់ព្រះ និងអ្នកជិតខាងរបស់អ្នកបានកាន់តែពេញលេញ ។ សូមប្រើធនធានខាងក្រោមនេះដើម្បី សិក្សាព្រះបញ្ញត្តិពីរ ឬច្រើន ក្នុងចំណោមព្រះបញ្ញត្តិទាំងនេះឲ្យបានកាន់តែស៊ីជម្រៅ ។
សម្រាប់ព្រះបញ្ញត្តិនីមួយៗដែលអ្នកសិក្សា សូមធ្វើដូចខាងក្រោម ៖
-
សូមដាក់តំណភ្ជាប់វគ្គបទគម្ពីរដែលអ្នកសិក្សា ។
-
សូមបន្ថែមស្លាកដែលនឹងជួយអ្នកឲ្យរកឃើញវគ្គបទគម្ពីរទាំងនេះនៅពេលក្រោយ ។
-
សូមឆ្លើយសំណួរទាំងនេះនៅក្នុងសៀវភៅកត់ចំណាំរបស់អ្នក ។
និក្ខមនំ ២០:១២ ។ « ចូរឲ្យគោរពប្រតិបត្តិដល់ឪពុកម្តាយ »
-
តើមានសេចក្តីសន្យាអ្វីដែលទាក់ទងទៅនឹងបទបញ្ញត្តិនេះ ?
សូមអាន លូកា ២:៤២–៥១; ២២:៤១–៤២ ឬ យ៉ូហាន ១៧:៤–៦; ១៩:២៥–២៧ ( សូមមើលផងដែរ ការបកប្រែដោយ យ៉ូសែប ស្ម៊ីធ, យ៉ូហាន ២:៤ [ នៅក្នុង យ៉ូហាន ២:៤ ) ។ សូមរកមើលរបៀបដែលព្រះយេស៊ូវបានធ្វើជាគំរូនៃការគោរពដល់ឪពុកម្ដាយនៅលើផែនដី និងព្រះវរបិតាសួគ៌របស់ទ្រង់ ។
-
តើអ្នកអាចគោរពដល់ឪពុកម្ដាយរបស់អ្នកដោយរបៀបណា ?
-
តើការធ្វើកិច្ចការទាំងនេះអាចជះឥទ្ធិពលលើទំនាក់ទំនងរបស់អ្នកជាមួយឪពុកម្ដាយរបស់អ្នកយ៉ាងដូចម្ដេច ?
និក្ខមនំ ២០:១៣ ។ « កុំឲ្យសម្លាប់មនុស្សឲ្យសោះ »
នៅក្នុង និក្ខមនំ ២០:១៣ ពាក្យ « សម្លាប់ » បានបកប្រែពីពាក្យភាសាហេព្រើរដែលមានន័យថា ឃាតកម្ម ( សូមមើល footnote a) ។ ឃាតកម្ម មានន័យថា បញ្ចប់ជីវិតរបស់មនុស្សម្នាក់ទៀតដោយចេតនា និងខុសច្បាប់ ។
សូមអាន គោលលទ្ធិ និងសេចក្តីសញ្ញា ៥៩:៦ ដើម្បីមើលពីរបៀបដែលព្រះអម្ចាស់បានពង្រីកការយល់ដឹងរបស់យើងអំពីព្រះបញ្ញត្តិនេះ ។
-
តើប្រព័ន្ធផ្សព្វផ្សាយ ឬការកម្សាន្តមួយចំនួនផ្សព្វផ្សាយអំពើហិង្សា ឬការមិនគោរពដល់ជីវិតមនុស្សតាមរបៀបណាខ្លះ ? តើយើងអាចធ្វើអ្វីខ្លះដើម្បីចៀសវាងពីប្រព័ន្ធផ្សព្វផ្សាយ ឬការកម្សាន្តប្រភេទទាំងនេះ ?
និក្ខមនំ ២០:១៤ ។ « កុំឲ្យផិតគ្នាឲ្យសោះ »
នៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ឆ្នាំ២០២២ ) សូមអានសេចក្ដីពិតដ៏អស់កល្បជានិច្ចនេះ « អារម្មណ៍ខាងផ្លូវភេទគឺជាផ្នែកសំខាន់មួយនៃផែនការរបស់ព្រះ » ( ទំព័រ២៣ ) និងការអញ្ជើញឲ្យ « រក្សាផ្លូវភេទ និងអារម្មណ៍ផ្លូវភេទឲ្យពិសិដ្ឋ » ( ទំព័រ២៥ ) ។
អ្នកក៏អាចអាន លោកុប្បត្តិ ៣៩:៩ ផងដែរ ហើយស្វែងរករបៀបដែលយ៉ូសែបបានឆ្លើយតប នៅពេលដែលលោកត្រូវបានល្បួងឲ្យធ្វើអ្វីដែលមិនបរិសុទ្ធ ។
-
តើអ្នកគិតថា ហេតុអ្វីបានជាអារម្មណ៍ផ្លូវភេទគឺពិសិដ្ឋ និងជាផ្នែកដ៏សំខាន់មួយនៃផែនការរបស់ព្រះ ?
និក្ខមនំ ២០:១៥–១៦ ។ « កុំឲ្យលួចប្លន់ឲ្យសោះ ។ កុំឲ្យធ្វើជាទីបន្ទាល់ក្លែង ទាស់នឹងអ្នកជិតខាងខ្លួនឲ្យសោះ » ។
ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ( ឆ្នាំ២០២២ ) បង្រៀនថា ៖ « ស្រឡាញ់សេចក្តីពិតឲ្យបានច្រើនដែលធ្វើឲ្យអ្នកមិនចង់លួច កុហក បន្លំ ឬបោកបញ្ឆោតតាមគ្រប់មធ្យោបាយ—ទាំងនៅសាលា កន្លែងធ្វើការ តាមអនឡាញ និងគ្រប់ទីកន្លែងទាំងអស់ ។ សូមធ្វើជាអ្នកដើរតាមព្រះយេស៊ូវគ្រីស្ទដ៏ស្មោះត្រង់ ដូចគ្នាទាំងនៅទីសាធារណៈ និងទីឯកជន » ( ទំព័រ ៣២ ) ។
ប្រសិនបើមាន សូមមើលវីដេអូ « Honesty: You Better Believe It! » ( ៤:៤៦ ) ។
-
តើយុវវ័យត្រូវបានល្បួងឲ្យកុហក បោកប្រាស់ ឬលួចតាមមធ្យោបាយណាខ្លះ ?
-
តើយើងអាចព្យាយាមស្មោះត្រង់ចំពោះគ្រប់កិច្ចការទាំងអស់ដែលយើងធ្វើដោយរបៀបណា ?
និក្ខមនំ ២០:១៧ ។ « កុំឲ្យលោភចង់បានឲ្យសោះ »
ការលោភចង់បានមានន័យថា ការមានភាពអាត្មានិយម ចង់បានហួសហេតុនូវអ្វីមួយដែលជារបស់អ្នកដទៃ ។ ការលោភចង់បានអាចបណ្ដាលឲ្យមានអារម្មណ៍ច្រណែនឈ្នានីស អំនួត លោភលន់ និងគ្មានការដឹងគុណ ។ យើងអាចកោតសរសើរអ្វីដែលអ្នកដទៃមាន និងខិតខំកែលម្អជីវិត និងកាលៈទេសៈរបស់យើង ។ ប៉ុន្តែយើងគួរតែធ្វើដូច្នេះដោយមានសកម្មភាពស្មោះត្រង់ និងសមស្រប ។
ប្រធាន ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ការចង់បានរបស់អ្នកដទៃ ការមិននិយាយរកគេពេលតូចចិត្ត ឬការធ្វើឲ្យគេមិនសូវសប្បាយចិត្ត មិនបានជួយអ្នកឲ្យឈរខ្ពស់ជាងមុនទេ ហើយការធ្វើឲ្យអ្នកដទៃខ្មាសគេក៏មិនបានជួយអ្នកបានល្អដែរ ។ ដូច្នេះសូមមានចិត្តល្អ និងមានអំណរគុណដែលព្រះមានព្រះទ័យល្អ ។ វាជារបៀបក្នុងការរស់នៅដ៏សប្បាយមួយ ។ ( « The Laborers in the Vineyard » Liahona ខែឧសភា ឆ្នាំ២០១២ ទំព័រ៣២ )
-
តើអ្នកគិតថា ការមានអំណរគុណចំពោះពរជ័យរបស់ព្រះ អាចជួយអ្នកមិនឲ្យលោភចង់បានរបស់អ្នកដទៃយ៉ាងដូចម្ដេច ?
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
តើខ្ញុំអាចចែកចាយពរជ័យមកពីការកាន់តាមព្រះបញ្ញត្តិរបស់ព្រះអម្ចាស់ជាមួយនឹងអ្នកដទៃដោយរបៀបណា ?
សូមធ្វើសេចក្តីប្រកាសអំពីសេវាសាធារណៈ អំពីព្រះបញ្ញត្តិមួយដែលអ្នកបានសិក្សា ។ សូមរៀបរាប់ពីរបៀបដែលវាជួយមនុស្សឲ្យស្រឡាញ់ព្រះ និងអ្នកជិតខាងរបស់ពួកគេ ។ អ្នកអាចសរសេរ គូរ ឬកត់ត្រាសេចក្តីប្រកាសរបស់អ្នកក៏បាន ។ សូមបញ្ចូលដូចខាងក្រោមនេះ ៖
-
ព្រះបញ្ញត្តិ
-
ពរជ័យមកពីការកាន់តាមព្រះបញ្ញត្តិ
-
បញ្ហាដែលទាក់ទងនឹងការមិនកាន់តាមព្រះបញ្ញត្តិ
-
ការអញ្ជើញឲ្យអ្នកដទៃកាន់តាមព្រះបញ្ញត្តិ
ជម្រើស ខ
តើព្រះបញ្ញត្តិរបស់ព្រះអាចជួយខ្ញុំឲ្យធ្វើការជ្រើសរើសល្អដោយរបៀបណា ?
ការដឹង និងការរស់នៅតាមព្រះបញ្ញត្តិរបស់ព្រះអម្ចាស់អាចប្រទានពរជ័យដល់អ្នក និងអ្នកដទៃបាន ។ សូមអានសាច់រឿងខាងក្រោមនេះ ហើយគិតថា តើព្រះបញ្ញត្តិមួយណាដែលបុគ្គលនេះអាចព្យាយាមគោរពតាមបាន ។ វាជួយបានផងដែរ ដើម្បីគិតពីរបៀបដែលព្រះបញ្ញត្តិនោះអាចផ្ដល់ពរជ័យដល់បុគ្គលនោះ ។
-
យុវជនម្នាក់បានរវល់លេងកីឡាសម្រាប់ក្រុមសាលារបស់គាត់ ។ គាត់បានខកខានមិនបានទៅរៀនខ្លះ ហើយត្រូវធ្វើកិច្ចការសាលា និងប្រឡងមុនការប្រកួតបន្ទាប់របស់គាត់ ។ គាត់សម្រេចចិត្តប្រើកិច្ចការសាលា និងក្រដាសប្រឡងរបស់មិត្តគាត់ដើម្បីទទួលបានចម្លើយយ៉ាងឆាប់រហ័ស ។
-
យុវនារីម្នាក់តាមដានមនុស្សផ្សេងៗគ្នាជាច្រើននៅលើប្រព័ន្ធផ្សព្វផ្សាយសង្គម ។ នាងមិនសប្បាយចិត្តនឹងរូបរាង និងការស្លៀកពាក់របស់នាង ។ នាងចំណាយពេលជាច្រើនខិតខំធ្វើឲ្យដូចនឹងមនុស្ស ដែលនាងឃើញនៅលើអនឡាញ ។
សូមជ្រើសរើសព្រះបញ្ញត្តិមួយ ក្នុងចំណោមព្រះបញ្ញត្តិដែលអ្នកបានសិក្សា ។ សូមសរសេរសាច់រឿងមួយរបស់អ្នកផ្ទាល់នៅក្នុងសៀវភៅកត់ចំណាំរបស់អ្នក ។ សូមរៀបរាប់ពីក្មេងជំទង់ម្នាក់ ដែលអាចទទួលបានពរជ័យ តាមរយៈការរស់នៅតាមព្រះបញ្ញត្តិដែលអ្នកបានជ្រើសរើស ។ សូមរួមបញ្ចូលពរជ័យដែលបានសន្យានានា និងពាក្យលើកទឹកចិត្ត ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់ពីរបៀបកាន់តាមព្រះបញ្ញត្តិ ដែលនឹងជួយអ្នកឲ្យស្រឡាញ់ព្រះ និងអ្នកជិតខាងរបស់យើង ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
សេចក្តីប្រកាសអំពីសេវាសាធារណៈដែលអ្នកបានធ្វើ ។
-
សាច់រឿងដែលអ្នកបានសរសេរ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?