The Passover Supper [ អាហារយប់ថ្ងៃបុណ្យរំលង ] ដោយ ប្រាយអិន ខល
និក្ខមនំ ៧–១៣; មេរៀនទី ៤២
និក្ខមនំ ១២–១៣ ផ្នែកទី ១
បុណ្យរំលងរបស់ព្រះអម្ចាស់
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
តើអ្នកធ្លាប់មានអារម្មណ៍ថាទ័លច្រកដែរឬទេ ? នៅក្នុងករណីនៃទាសភាពរបស់ពួកសាសន៍អ៊ីស្រាអែលនៅស្រុកអេស៊ីព្ទ និងនៅក្នុងគ្រប់ករណីទាំងអស់នៃការជាប់ឃុំឃាំងខាងវិញ្ញាណ មានវិធីតែមួយគត់ដើម្បីគេចផុតបាន ។ ព្រះយេស៊ូវគ្រីស្ទបានរៀបចំអាហារសម្រាប់បុណ្យរំលង ទុកជាការរំឭកជានិមិត្តរូបនៃព្រះចេស្ដាដ៏សង្គ្រោះនៃដង្វាយធួនរបស់ទ្រង់ ។ មេរៀននេះអាចជួយអ្នកឲ្យយល់ពីសារៈសំខាន់របស់ព្រះអង្គសង្គ្រោះ និងដង្វាយធួនរបស់ទ្រង់នៅក្នុងជីវិតរបស់អ្នក ។
សិក្សាព្រះគម្ពីរ
កាលពីថ្ងៃទី២៣ ខែមិថុនា ឆ្នាំ២០១៨ សមាជិកចំនួន ១២ នាក់នៃក្រុមបាល់ទាត់យុវវ័យមួយ ដែលមានអាយុពី ១១ ដល់ ១៦ ឆ្នាំ និងជំនួយការគ្រូបង្វឹកអាយុ២៥ឆ្នាំរបស់ពួកគេ បានសម្រេចចិត្តរុករកប្រព័ន្ធរូងភ្នំដ៏សាំញ៉ាំមួយនៅភាគខាងជើងប្រទេសថៃ បន្ទាប់ពីហ្វឹកហាត់រួច ។ ភ្លាមៗក្រោយពីពួកគេចូលទៅ មានភ្លៀងធ្លាក់យ៉ាងខ្លាំងលិចរូងភ្នំនោះ ដែលធ្វើឲ្យពួកគេជាប់នៅខាងក្នុងដែលមានចម្ងាយ ៤ គីឡូម៉ែត្រ ( ២,៥ ម៉ាយល៍ ) នៅក្នុងរូងភ្នំ និងកាត់ផ្តាច់ទំនាក់ទំនងជាមួយពិភពខាងក្រៅអស់រយៈពេលជាងមួយសប្តាហ៍ ។ នៅទីបំផុត នាថ្ងៃទី២ ខែកក្កដា ក្រុមអ្នកជំនាញមុជទឹកបានរកឃើញក្រុមយុវវ័យនេះ ។ ប៉ុន្តែទឹកជំនន់ និងភ្លៀងធ្លាក់បន្ថែមទៀត បានធ្វើឲ្យការជួយសង្គ្រោះភ្លាមៗស្ទើរតែមិនអាចធ្វើទៅបាន ។ ភ្លៀងរដូវវស្សាធ្លាក់កាន់តែច្រើន ការរំដោះក្រុមបាល់ទាត់ចេញពីរូងភ្នំបន្តស្ថិតនៅក្នុងភាពមិនច្បាស់ការណ៍ ។
សូមចំណាយពេលមួយសន្ទុះ ដើម្បីជញ្ជឹងគិតពីគ្រាដែលអ្នកមានអារម្មណ៍ថាជាប់គាំង ទ័លច្រក ឬអស់សង្ឃឹម ។ នៅក្នុងមេរៀននេះ អ្នកនឹងរៀនពីរបៀបដែលព្រះអង្គសង្គ្រោះបានរំដោះពួកសាសន៍អ៊ីស្រាអែលចេញពីសេវកភាពនៅស្រុកអេស៊ីព្ទ ។ នៅពេលអ្នកសិក្សា សូមយាងព្រះវិញ្ញាណបរិសុទ្ធឲ្យជួយអ្នកយល់ថា ព្រះអង្គសង្គ្រោះក៏ជាអង្គរំដោះរបស់អ្នកផងដែរ ។
នៅក្នុងមេរៀនមុន អ្នកបានសិក្សាពីគ្រោះកាចចំនួនប្រាំបួន ដែលព្រះអម្ចាស់បានប្រើដើម្បីបញ្ចុះបញ្ចូលពួកសាសន៍អ៊ីស្រាអែល និងពួកសាសន៍អេស៊ីព្ទថា ទ្រង់គឺជាព្រះ ។
សូមអាន និក្ខមនំ ១១:៤–៦ ។ សូមគូសសម្គាល់គ្រោះកាចទីដប់ និងចុងក្រោយគេដែលព្រះអម្ចាស់បានបញ្ជូនមក ។
ព្រះអម្ចាស់បានសន្យាដល់ពួកសាសន៍អ៊ីស្រាអែលថា ប្រសិនបើពួកគេគោរពប្រតិបត្តិតាមការបង្គាប់របស់ទ្រង់ដោយស្មោះត្រង់ នោះទ្រង់នឹងធ្វើឲ្យគ្រោះកាចនោះ « រំលង » ពួកគេ ហើយកូនច្បងរបស់ពួកគេនឹងមិនស្លាប់ឡើយ ( សូមមើល និក្ខមនំ ១២:១៣, ២៣ ) ។ ដោយហេតុផលនេះហើយ ទើបព្រះអម្ចាស់បានហៅព្រឹត្តិការណ៍នេះថា បុណ្យរំលង ( សូមមើល និក្ខមនំ ១២:៤៣ ) ។ ការបង្គាប់របស់ព្រះអម្ចាស់ទាក់ទងនឹងអាហារ រួមមានអ្វីដែលត្រូវរៀបចំ និងរបៀបទទួលទាន ។ ព្រះអង្គសង្គ្រោះបានប្រើនិមិត្តរូបនៅក្នុងអាហារនៃបុណ្យរំលង ដើម្បីបង្រៀនពួកសាសន៍អ៊ីស្រាអែលអំពីអង្គទ្រង់ ។
អ្នកអាចរៀនបន្ថែមទៀតអំពីនិមិត្តរូបទាំងនេះនៅក្នុងវីដេអូ « The Passover » ( ២:៥៥ ) ។
សូមសិក្សា និក្ខមនំ ១២:៣–៨, ១៥, ២១–២៣ ។ សូមប្រើតារាងខាងក្រោមនេះ ដើម្បីសរសេរកំណត់ចំណាំនៅជាប់នឹងវគ្គបទគម្ពីរនីមួយៗ ដែលពន្យល់ពីអ្វីដែលសកម្មភាពនីមួយៗអាចមានអត្ថន័យជានិមិត្តរូប ។
|
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? |
តើសេចក្តីបង្គាប់នេះអាចជានិមិត្តរូបអ្វី ? |
|---|---|
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? និក្ខមនំ ១២:៣–៦, ២១ | តើសេចក្តីបង្គាប់នេះអាចជានិមិត្តរូបអ្វី ? ព្រះយេស៊ូវគ្រីស្ទ ដែលជា « កូនចៀមនៃព្រះ » ( យ៉ូហាន ១:៣៦ ) គឺឥតខ្ចោះ ហើយបានប្រទានព្រះជន្មរបស់ទ្រង់សម្រាប់យើង ។ |
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? និក្ខមនំ ១២:៧, ២២ | តើសេចក្តីបង្គាប់នេះអាចជានិមិត្តរូបអ្វី ? ដង្វាយធួននៃព្រះយេស៊ូវគ្រីស្ទអាចការពារយើងបាន នៅពេលយើងអនុវត្តតាមលក្ខខណ្ឌនៃការប្រែចិត្តនៅក្នុងជីវិតរបស់យើង ។ |
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? និក្ខមនំ ១២:៨, ១៥ | តើសេចក្តីបង្គាប់នេះអាចជានិមិត្តរូបអ្វី ? បន្លែល្វីង គឺជាការរំឭកអំពីទាសភាពដ៏ល្វីងជូរចត់របស់ពួកសាសន៏អ៊ីស្រាអែលនៅស្រុកអេស៊ីព្ទ ហើយប្រៀបដូចជាភាពល្វីងជូរចត់នៃអំពើបាបដែរ ។ ដំបែ អាចធ្វើឲ្យនំប៉័ងដុះផ្សិត ។ ជាផ្នែកមួយនៃការប្រែចិត្ត យើងអាចបំបាត់អ្វីដែលអាចធ្វើឲ្យវិញ្ញាណរបស់យើងពុករលួយចេញពីជីវិតរបស់យើងបាន ។ |
សូមអាន និក្ខមនំ ១២:៥០–៥១; ១៣:៣ ដើម្បីមើលថា តើមានអ្វីកើតឡើង នៅពេលកូនចៅសាសន៏អ៊ីស្រាអែលធ្វើបុណ្យរំលង ។ សូមសរសេរកំណត់ចំណាំមួយនៅក្បែរវគ្គបទគម្ពីរណាមួយនូវសេចក្ដីពិតដូចតទៅនេះ ៖ ព្រះអង្គសង្គ្រោះរំដោះរាស្ដ្ររបស់ទ្រង់ចេញពីសេចក្ដីស្លាប់ខាងវិញ្ញាណ និងខាងសាច់ឈាម ។
សូមរំឭកដំណើររឿងកីឡាករបាល់ទាត់ដែលជាប់គាំងពីខាងដើម ។ បន្ទាប់ពីអស់រយៈពេលជាច្រើនថ្ងៃ អ្នកជំនាញមកពីជុំវិញពិភពលោកបានកំណត់វិធីសាស្ត្រមួយសម្រាប់ការជួយសង្គ្រោះពួកគេ ។ អ្នកជំនាញខាងមុជទឹកបានចូលទៅក្នុងទឹកដ៏គ្រោះថ្នាក់នៃប្រព័ន្ធរូងភ្នំដ៏សាំញ៉ាំនោះ ហើយបានរំដោះក្មេងប្រុសទាំងនោះ និងគ្រូបង្វឹករបស់ពួកគេចេញពីរូងភ្នំដែលលិចទឹកនោះ ។
សូមឆ្លើយសំណួរខាងក្រោមនេះនៅក្នុងសៀវភៅកត់ចំណាំរបស់អ្នក ៖
-
តើសកម្មភាពទាំងឡាយរបស់អ្នកជំនាញមុជទឹក អាចជានិមិត្តរូបនៃអ្វីដែលព្រះអង្គសង្គ្រោះអាចធ្វើសម្រាប់អ្នកយ៉ាងដូចម្តេច ?
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
ហេតុអ្វីបានជាដង្វាយធួនរបស់ព្រះយេស៊ូវគ្រីស្ទមានសារៈសំខាន់ចំពោះខ្ញុំ ?
ប្រធាន រ័សុល អិម ណិលសុន បានបង្រៀន ៖
ដោយសារព្រះអង្គសង្គ្រោះបានប្រោសលោះពួកយើងម្នាក់ៗពីភាពទន់ខ្សោយ កំហុស និងអំពើបាប ហើយដោយសារទ្រង់បានដកពិសោធការឈឺចាប់ ការបារម្ភ និងបន្ទុកដែលបងប្អូនធ្លាប់មាន នោះពេលបងប្អូនប្រែចិត្តដ៏ពិត ហើយស្វែងរកជំនួយពីទ្រង់ តាមរយៈដង្វាយធួនដ៏និរន្តររបស់ទ្រង់ បងប្អូនអាចយកឈ្នះលើពិភពលោកដ៏គ្រោះថ្នាក់បច្ចុប្បន្ននេះបាន ។
បងប្អូនអាចយកឈ្នះលើគ្រោះកាចនៃលោកិយដែលធ្វើឲ្យយើងនឿយហត់ខាងវិញ្ញាណ និងខាងសតិអារម្មណ៍នេះ រួមទាំងអំនួត កំហឹង អសីលធម៌ ការស្អប់ ភាពលោភលន់ ការច្រណែនឈ្នានីស និងការភ័យខ្លាចផងដែរ ។ ( « ឈ្នះលោកិយ ហើយបានសេចក្តីសម្រាក » លីអាហូណា ខែវិច្ឆិកា ឆ្នាំ២០២២ ទំព័រ៩៦ )
នៅក្នុងសៀវភៅកត់ចំណាំរបស់អ្នក សូមសរសេររឿងសម្រាប់សម្ដែងខ្លីមួយ ដែលមានការសន្ទនាសម្រាប់សាច់រឿងខាងក្រោមនេះ ។
សូមស្រមៃថា ក្មេងជំទង់សាសន៍អ៊ីស្រាអែលម្នាក់ ដែលទើបតែបានចូលរួមក្នុងបុណ្យរំលងជាលើកដំបូងនៅស្រុកអេស៊ីព្ទ កំពុងនិយាយជាមួយក្មេងជំទង់នៅសម័យទំនើបម្នាក់ ។ សូមជួយឲ្យការសន្ទនារបស់ពួកគេ បង្ហាញពីមូលហេតុដែលដង្វាយធួនរបស់ព្រះអង្គសង្គ្រោះគឺពិតជាមានសារៈសំខាន់ខ្លាំងណាស់ ។ សូមប្រើសំណួរខាងក្រោមដើម្បីសរសេរនាដ្យកថា ៖
សំណួរដែលក្មេងជំទង់នៅសម័យទំនើបអាចសួរ ៖
-
តើអ្នកនឹងពិពណ៌នាអំពីបទពិសោធន៍របស់អ្នកក្នុងសេវកភាព និងអ្វីដែលអ្នកបានរៀនមកពីបុណ្យរំលងយ៉ាងដូចម្ដេច ?
សំណួរដែលក្មេងជំទង់សាសន៍អ៊ីស្រាអែលអាចសួរ ៖
-
តើអ្នកបានជួបប្រទះនឹងការសាកល្បងអ្វីខ្លះ ដែលមានអារម្មណ៍ថាដូចជាទាសករ ?
សំណួរដែលក្មេងជំទង់ទាំងពីរអាចសួរ ៖
-
តើព្រះអម្ចាស់បានផ្លាស់ប្ដូរជីវិតរបស់អ្នកយ៉ាងដូចម្ដេច ?
-
តើអ្នកនឹងចែកចាយអ្វីខ្លះ អំពីព្រះអម្ចាស់ដល់មនុស្សដែលស្ទាក់ស្ទើរក្នុងការដើរតាមទ្រង់ ?
ជម្រើស ខ
តើព្រះយេស៊ូវគ្រីស្ទអាចរំដោះខ្ញុំចេញពីអ្វីខ្លះ ?
ពួកសាសន៍អ៊ីស្រាអែលត្រូវការជំនួយរបស់ព្រះយេហូវ៉ា ដើម្បីប្រោសពួកគេឲ្យរួចចេញពីសេវកភាពរបស់ពួកសាសន៍អេស៊ីព្ទ ។ ប៉ុន្តែនៅក្នុងផែនការរបស់ព្រះវរបិតាសួគ៌ មនុស្សទាំងអស់ត្រូវការសេចក្ដីសង្គ្រោះ ។ បុណ្យរំលងគឺជានិមិត្តរូបនៃសមត្ថភាពរបស់ព្រះអង្គសង្គ្រោះ ដើម្បីរំដោះប្រជាជនរបស់ទ្រង់ទាំងអស់ ។
សូមអានវគ្គបទគម្ពីរខាងក្រោម ហើយរកមើលថា តើព្រះយេស៊ូវគ្រីស្ទរំដោះយើងចេញពីអ្វី ។ អ្នកអាចដាក់តំណភ្ជាប់វគ្គបទគម្ពីរទាំងនេះទៅនឹង និក្ខមនំ ១៣:៣ បាន ។
-
ម៉ាថាយ ១១:២៨–៣០
អ្នកក៏អាចមើលវីដេអូខ្លីនេះមកពីសុន្ទរកថារបស់ប្រធាន រ័សុល អិម ណិលសុន « ឈ្មោះត្រឹមត្រូវរបស់សាសនាចក្រ » បានផងដែរ ។
នៅក្នុងសៀវភៅកត់ចំណាំរបស់អ្នក សូមធ្វើបដាមួយ ។ សូមសរសេរឃ្លា « អ្នកត្រូវការព្រះយេស៊ូវ ព្រោះ … » ។
សូមបញ្ចប់សេចក្តីថ្លែងការណ៍នេះ ដោយការរួមបញ្ចូលពាក្យ ឃ្លា ឬសូម្បីតែរូបគំនូរ ដែលបង្ហាញពីអ្វីដែលអ្នកបានរៀន និងទទួលអារម្មណ៍ ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យយល់ពីសារៈសំខាន់របស់ព្រះអង្គសង្គ្រោះ និងដង្វាយធួនរបស់ទ្រង់នៅក្នុងជីវិតរបស់អ្នក ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
នាដ្យកថាដែលអ្នកបានសរសេរអំពីការសន្ទនា រវាងក្មេងជំទង់សាសន៍អ៊ីស្រាអែល និងក្មេងជំទង់សម័យទំនើប ។
-
បដាដែលអ្នកបានធ្វើ អំពីមូលហេតុដែលអ្នកត្រូវការព្រះយេស៊ូវ ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?