យ៉ូសែបអភ័យទោសឲ្យពួកបងប្រុសរបស់លោក ដោយ ថិត ហិននីងហ្គឺ
លោកុប្បត្តិ ៤២–៥០; មេរៀនទី ៣៥
លោកុប្បត្តិ ៤២–៤៥
« ខ្ញុំនេះជាយ៉ូសែប ជាប្អូនប្រុសអ្នករាល់គ្នា »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
ជាច្រើនឆ្នាំបន្ទាប់ពីលក់លោកធ្វើជាទាសករនៅស្រុកអេស៊ីព្ទ យ៉ូសែបក៏បានជួបជុំជាមួយពួកបងប្រុសរបស់លោកវិញ ។ លោកអាចជ្រើសរើសដើម្បីខឹង និងអន់ចិត្ត ដោយសារតែទុក្ខវេទនាទាំងអស់ដែលលោកបានទទួលរង ។ ទោះជាយ៉ាងណាក៏ដោយ ដូចជាព្រះអង្គសង្គ្រោះដែរ យ៉ូសែបបានជ្រើសរើសផ្ដល់នូវសេចក្ដីមេត្តាករុណា និងការអភ័យទោសដល់ពួកបងប្រុសរបស់លោក ដែលធ្លាប់បានធ្វើបាបលោក ។ មេរៀននេះអាចជួយអ្នកឲ្យធ្វើតាមគំរូរបស់ព្រះអង្គសង្គ្រោះ ដោយផ្ដល់ការអភ័យទោសឲ្យបានកាន់តែច្រើន ។
សិក្សាព្រះគម្ពីរ
តើអ្នកធ្លាប់ត្រូវនរណាម្នាក់ធ្វើបាប ហើយឃើញថាវាពិបាកអភ័យទោសឲ្យដែរឬទេ ? យើងត្រូវបានបង្គាប់ឲ្យ « អត់ទោសដល់មនុស្សទាំងអស់ » ( គោលលទ្ធិ និងសេចក្ដីសញ្ញា ៦៤:១០ ) ។ វាមិនមែនងាយស្រួលជានិច្ចនោះទេ ។ ពេលខ្លះ វាអាចថែមទាំងមានអារម្មណ៍ថាមិនអាចទៅរួចទៀតផង ។ ប្រសិនបើមាន សូមមើលវីដេអូ « Joseph and the Famine » ( ២:២៥ ) ហើយរកមើលអ្វីដែលដំណើររឿងរបស់យ៉ូសែបអាចបង្រៀនអ្នកអំពីការអត់ទោសឲ្យអ្នកដទៃ ។
នៅក្នុង លោកុប្បត្តិ ៣៧ ពួកបងប្រុសដែលច្រណែននឹងយ៉ូសែបបានគ្រោងសម្លាប់លោក ( សូមមើល លោកុប្បត្តិ ៣៧:១៨ ) ។ នៅទីបំផុត ពួកគេបានទុកជីវិតឲ្យលោក ប៉ុន្តែបានលក់លោកជាទាសករ ( សូមមើល លោកុប្បត្តិ ៣៧:២៨ ) ។ ជាច្រើនឆ្នាំក្រោយមក មានអំណត់អត់ដ៏ធំមួយ ។ ពួកបងប្អូនប្រុសទាំងដប់នាក់បានទៅស្រុកអេស៊ីព្ទដើម្បីទិញស្បៀងអាហារ ។ ពួកគេបានជួបយ៉ូសែប ដែលត្រួតត្រាលើគ្រាប់ធញ្ញជាតិរបស់ស្រុកអេស៊ីព្ទទាំងអស់ ។ ប៉ុន្ដែពួកគេមិនបានស្គាល់លោកទេ ។ ប្រសិនបើអ្នកជាយ៉ូសែបវិញ តើអ្នកនឹងឆ្លើយតបទៅពួកបងប្រុសរបស់អ្នកយ៉ាងដូចម្តេច ?
សូមអាន លោកុប្បត្តិ ៤២:២១–២៤ ហើយរកមើលរបៀបដែលយ៉ូសែបបានមានប្រតិកម្ម នៅពេលឮពួកបងប្រុសរបស់លោកនិយាយអំពីអ្វីដែលពួកគេបានប្រព្រឹត្តដាក់លោក ។ យ៉ូសែបមិនបានបង្ហាញអត្តសញ្ញាណរបស់លោកនោះទេ ។ ផ្ទុយទៅវិញ លោកបានផ្ដល់អាហារដល់ពួកបងប្រុសរបស់លោក ប៉ុន្ដែបានប្រាប់ពួកគេឲ្យត្រឡប់មកវិញ ដោយនាំបេនយ៉ាមីនមកជាមួយ ។
សូមអាន លោកុប្បត្តិ ៤៣:៣០ ហើយរកមើលរបៀបដែលយ៉ូសែបបានមានប្រតិកម្ម នៅពេលឃើញបេនយ៉ាមីន ដែលជាប្អូនប្រុសរបស់លោក ។ យ៉ូសែបបានសាកល្បងសេចក្ដីស្រឡាញ់របស់ពួកបងប្រុសលោកចំពោះបេនយ៉ាមីន ដោយចោទគាត់ពីបទលួច និងគំរាមចាប់គាត់ដាក់គុក ។ យូដាបានប្រគល់ជីវិតខ្លួនជាថ្នូរនឹងជីវិតរបស់បេនយ៉ាមីន ។
សូមអាន លោកុប្បត្តិ ៤៥:១–២ ដោយរកមើលរបៀបដែលយ៉ូសែបបានមានប្រតិកម្ម បន្ទាប់ពីយូដាបានស្ម័គ្រចិត្តលះបង់ជីវិត ដើម្បីការពារបេនយ៉ាមីន ។
នៅទីបំផុត យ៉ូសែបបានបង្ហាញអត្តសញ្ញាណរបស់លោកដល់ពួកបងប្រុសរបស់លោក ។
សូមអាន លោកុប្បត្តិ ៤៥:៣–៨ ហើយគូសពណ៌ចំណាំឃ្លាណាមួយ ដែលបង្ហាញថា យ៉ូសែបបានជ្រើសរើសអភ័យទោសឲ្យពួកបងប្រុសរបស់លោក ។ ហេតុអ្វីបានជាមនុស្សមួយចំនួនអាចជ្រើសរើសមិនព្រមអភ័យទោសឲ្យ ប្រសិនបើពួកគេស្ថិតនៅក្នុងស្ថានភាពរបស់យ៉ូសែបនោះ ? តើអ្នកគិតថា ហេតុអ្វីបានជាយ៉ូសែបបានសម្រេចចិត្តអភ័យទោសឲ្យពួកបងប្រុសរបស់លោក ?
សូមមើល ឬអានសេចក្ដីថ្លែងការណ៍ខាងក្រោមមកពីប្រធាន ប៊យដ៏ ខេ ផាកកឺ ( ឆ្នាំ១៩២៤–២០១៥ ) អំពីការបដិសេធមិនព្រមអភ័យទោសឲ្យ ៖
អាកប្បកិរិយានោះគឺហាក់ដូចជាបុរសម្នាក់ ដែលត្រូវគេវាយនឹងដំបងអ៊ីចឹង ។ ដោយសារកំហឹង គាត់យកដំបងមកវាយខ្លួនឯងចំលើក្បាលពេញមួយជីវិតរបស់គាត់ ។ វាជារឿងដ៏ល្ងង់ខ្លៅ ! វាគួរឲ្យសោកស្តាយណាស់ ! ការសងសឹកបែបនោះគឺនាំឲ្យខ្លួនឯងវេទនា ។ ប្រសិនបើអ្នកត្រូវគេប្រមថា សូមអភ័យទោស បំភ្លេចវាចោល ហើយកុំគិតពីវាទៀត ។ ( « Guided by the Holy Spirit » Liahona ខែឧសភា ឆ្នាំ២០១១ ទំព័រ៣២ )
នៅក្នុងសៀវភៅកត់ចំណាំរបស់អ្នក សូមឆ្លើយសំណួរខាងក្រោមនេះ ៖
-
តើជីវិតរបស់អ្នកអាចទទួលបានពរជ័យយ៉ាងដូចម្តេច ដោយសារការធ្វើតាមគំរូរបស់ព្រះគ្រីស្ទ និងផ្ដល់ការអភ័យទោស ?
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
ហេតុអ្វីបានជាខ្ញុំគួរតែអភ័យទោសឲ្យអ្នកដទៃ ?
-
ម៉ាកុស ១១:២៥–២៦
-
លូកា ៦:៣៦
-
អេភេសូរ ៤:៣១–៣២
-
កូល៉ុស ៣:១៣
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានចែកចាយ ៖
ប្រាកដណាស់ រឿងដែលព្រះសព្វព្រះទ័យខ្លាំងបំផុតអំពីការធ្វើជាព្រះនោះគឺ ការរំភើបព្រះទ័យក្នុងការមានក្តីមេត្តាករុណា ជាពិសេសដល់អស់អ្នកទាំងឡាយណា ដែលពុំរំពឹងថានឹងទទួលបានវា ហើយដែលជារឿយៗពួកគេមានអារម្មណ៍ថាពួកគេពុំសមនឹងទទួលវា ។ ( « The Laborers in the Vineyard » Liahona ខែឧសភា ឆ្នាំ២០១២ ទំព័រ៣៣ )
ជម្រើស ខ
តើព្រះរំពឹងឲ្យខ្ញុំអភ័យទោសឲ្យមនុស្សគ្រប់គ្នាមែនទេ ?
ព្រះអម្ចាស់បានបញ្ជាក់ច្បាស់ណាស់អំពីការរំពឹងទុករបស់ទ្រង់ថាឲ្យពួកយើងម្នាក់ៗត្រូវចេះអភ័យទោស ។
-
លូកា ២៣:៣៣–៣៤ ។ ព្រះអង្គសង្គ្រោះបានរងទុក្ខនៅលើឈើឆ្កាង ។
-
គោលលទ្ធិ និងសេចក្ដីសញ្ញា ៦៤:៨–១០ ។ វិវរណៈដល់ពួកអែលឌើរនៃសាសនាចក្រនៅឆ្នាំ១៨៣១ ។
តើការរំពឹងទុករបស់ព្រះឲ្យអភ័យទោសដល់អ្នកដទៃ អាចនាំមកនូវសុភមង្គលដ៏កាន់តែខ្លាំងនៅក្នុងជីវិតរបស់អ្នកបានយ៉ាងដូចម្តេច ? តើការដឹងថា ព្រះនឹងជំនុំជម្រះពួកយើងម្នាក់ៗ ធ្វើឲ្យវាងាយស្រួលក្នុងការអភ័យទោសដោយរបៀបណា ?
ប្រធាន រ័សុល អិម ណិលសុន បានបង្រៀនដូចខាងក្រោមអំពីការអភ័យទោសឲ្យអ្នកដទៃ ៖
បើមិនអាចអភ័យទោសនៅពេលបច្ចុប្បន្ននេះទេ សូមទូលអង្វរសូមអំណាចនៃព្រះលោហិតដ៏ធួនរបស់ព្រះយេស៊ូវគ្រីស្ទឲ្យជួយដល់បងប្អូន ។ កាលបងប្អូនធ្វើដូច្នោះ ខ្ញុំសន្យាថា បងប្អូននឹងមានភាពសុខសាន្ដផ្ទាល់ខ្លួន និងមានសន្ទុះខាងវិញ្ញាណកាន់តែខ្លាំង ។
ពេលព្រះអង្គសង្គ្រោះធ្វើដង្វាយធួនសម្រាប់មនុស្សទាំងអស់ នោះទ្រង់បានបើកផ្លូវឲ្យអ្នកដែលធ្វើតាមទ្រង់ទទួលបាននូវព្រះចេស្ដានៃការព្យាបាល ការពង្រឹង និងការប្រោសលោះរបស់ទ្រង់ ។ អភ័យឯកសិទ្ធិខាងវិញ្ញាណទាំងនេះនឹងកើតមានដល់អ្នកទាំងអស់ណា ដែលព្យាយាមស្ដាប់ និងធ្វើតាមទ្រង់ ។ ( « អំណាចនៃសន្ទុះខាងវិញ្ញាណ » លីអាហូណា ខែឧសភា ឆ្នាំ២០២២ ទំព័រ១០០ )
ប្រសិនបើមាន វាអាចមានប្រយោជន៍ដើម្បីមើលវីដេអូនេះ « Forgiving Others: An Easter Message from President Russell M. Nelson » ( ៥:០១ ) ។
សូមសរសេរកថាខណ្ឌមួយ ដែលបញ្ជាក់ពីអារម្មណ៍របស់អ្នកអំពីការអភ័យទោសឲ្យបុគ្គលនោះ ។ តើអ្នកសម្គាល់ឃើញអ្វីខ្លះ ដែលអាចនឹងរារាំងសមត្ថភាពរបស់អ្នកក្នុងការផ្ដល់ការអភ័យទោស ? សូមរាយបញ្ជីវិធីមួយចំនួនដែលអ្នកអាចស្វែងរកជំនួយពីព្រះអង្គសង្គ្រោះនៅក្នុងការខិតខំរបស់អ្នក ។
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យធ្វើតាមគំរូរបស់ព្រះអង្គសង្គ្រោះ ដោយផ្ដល់ការអភ័យទោសឲ្យបានកាន់តែច្រើន ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
កថាខណ្ឌដែលអ្នកបានសរសេរនៅក្នុងសៀវភៅកត់ចំណាំរបស់អ្នក ។
-
អ្វីដែលអ្នកបានរៀនមកពីគំរូរបស់យ៉ូសែប និងរបស់ព្រះយេស៊ូវស្ដីពីការអភ័យទោស ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?