ម៉ិលគីស្សាដែកប្រសិទ្ធពរឲ្យអាប់រ៉ាម ដោយ វ៉លធើរ រ៉េន
លោកុប្បត្តិ ១២–១៧; អ័ប្រាហាំ ១–២ ៖ មេរៀនទី ២២
អ័ប្រាហាំ ១
« មានប្រាថ្នា…ធ្វើជា…អ្នកដើរតាមសេចក្ដីសុចរិត »
សូមមើល « សិក្សាព្រះគម្ពីរ » ដើម្បីជួយរៀបចំខ្លួនអ្នកខាងវិញ្ញាណដើម្បីរៀនសូត្រ ។
អ័ប្រាហាំបានធំដឹងក្ដីឡើងហ៊ុមព័ទ្ធដោយអំពើអាក្រក់ និងរូបព្រះ ។ ថ្វីបើមានកាលៈទេសៈទាំងនេះក្កី ក៏អ័ប្រាហាំមានបំណងប្រាថ្នាធ្វើតាមព្រះយេស៊ូវគ្រីស្ទ ដែលត្រូវបានគេស្គាល់នៅក្នុងជីវិតមុនផែនដី និងជាព្រះយេហូវ៉ាចំពោះអ័ប្រាហាំ ។ ពេលអ័ប្រាហាំចង់បានបំណងប្រាថ្នាដ៏សុចរិតរបស់លោក នោះព្រះអម្ចាស់បានប្រទានពរលោកឲ្យទទួលបានវា ។ មេរៀននេះអាចជួយអ្នកឲ្យមានសេចក្ដីសង្ឃឹមថា ព្រះវរបិតាសួគ៌អាចជួយអ្នកឲ្យទទួលបានពរជ័យ ដែលទ្រង់សព្វព្រះទ័យចង់ឲ្យអ្នកទទួលបាន ។
សិក្សាព្រះគម្ពីរ
ទេវតាជួយសង្គ្រោះអ័ប្រាហាំ ដោយ ឌេល ផាសុន
គម្ពីរអ័ប្រាហាំផ្ដល់នូវបរិបទ … តាមរយៈការបង្ហាញថា អ័ប្រាហាំគឺជាអ្នកស្វែងរក « ចំណេះដ៏ធំ » និងជា « អ្នកដើរតាមសេចក្ដីសុចរិត » ដែលបានជ្រើសរើសផ្លូវត្រូវ ថ្វីបើមានការលំបាកយ៉ាងខ្លាំងក៏ដោយ ។ លោកបានបដិសេធភាពទុច្ចរិតរបស់គ្រួសារខាងឪពុកលោក ហើយបានច្រានចោលរូបសំណាកនៃវប្បធម៌ដែលនៅជុំវិញ ទោះជាមានការគំរាមកំហែងដល់ស្លាប់ក៏ដោយ ។ ( សំណេរប្រធានបទដំណឹងល្អ « Translation and Historicity of the Book of Abraham » ) ។
សូមស្វែងយល់បន្ថែមទៀតអំពីគម្ពីរអ័ប្រាហាំ ។
« The Book of Abraham | Now You Know » ពីនាទីទី ០:០០ ដល់ ២:៤៣ ។
The Church History Topic « Book of Abraham Translation » ។
សំណេរប្រធានបទដំណឹងល្អ « Abraham, Book of » ។
សូមអាន អ័ប្រាហាំ ១:១–៧ ។ សូមប្រើពណ៌ ឬរចនាប័ទ្មមួយដើម្បីគូសសម្គាល់ពរជ័យទាំងឡាយ ដែលអ័ប្រាហាំប្រាថ្នាចង់បាន ។ សូមប្រើពណ៌ ឬរចនាប័ទ្មមួយទៀតដើម្បីគូសសម្គាល់ឧបសគ្គទាំងឡាយ ដែលលោកបានប្រឈមមុខ ។
-
ហេតុអ្វីពរជ័យទាំងនេះអាចជាអ្វីមួយដែលអ្នកចង់បានដែរ ? តើបំណងប្រាថ្នារបស់អ័ប្រាហាំ ដើម្បីធ្វើតាមព្រះយេស៊ូវគ្រីស្ទ បានជួយដល់លោកនៅក្នុងកាលៈទេសៈលំបាកដែលលោកបានឆ្លងកាត់យ៉ាងដូចម្ដេច ?
ព្រះយេហូវ៉ាបានជួយអ័ប្រាហាំឲ្យយកឈ្នះលើឧបសគ្គរបស់លោក
សូមអាន អ័ប្រាហាំ ១:១៥–២០ ហើយរកមើលរបៀបដែលព្រះយេហូវ៉ាបានជួយអ័ប្រាហាំឲ្យយកឈ្នះលើឧបសគ្គដែលលោកបានជួបប្រទះ ។ ឬអ្នកអាចមើល « Deliverance of Abraham » ( ១:៣៨ ) ។
-
តើអ្នកគិតថា អ័ប្រាហាំបានរៀនអ្វីខ្លះអំពីព្រះយេហូវ៉ា នៅក្នុងបទពិសោធន៍នេះ ? តើព្រះវរបិតាសួគ៌អាចជួយយើងឲ្យយកឈ្នះលើឧបសគ្គនានា ដើម្បីទទួលបានពរជ័យដ៏សុចរិតដែលយើងចង់បានដោយរបៀបណា ?
ក្រោយមកទៀតនៅក្នុងជីវិតរបស់អ័ប្រាហាំ ព្រះអម្ចាស់បានមកជួបនឹងលោក ហើយបានសន្យាថា ទ្រង់នឹងបំពេញសេចក្ដីប្រាថ្នាដ៏សុចរិតទាំងអស់របស់អ័ប្រាហាំ ( សូមមើល អ័ប្រាហាំ ២:៩–១១ ) ។
សូមអាន អ័ប្រាហាំ ២:១២–១៣ ដោយរកមើលអ្វីដែលអ័ប្រាហាំបានរៀន ។
ប្រធាន ជែហ្វ្រី អ័រ ហូឡិន បានថ្លែងទីបន្ទាល់ដូចខាងក្រោមនេះ ៖
ហេតុអ្វីបានជាយើងមិនគួរសង្ឃឹមថា សេចក្ដីប៉ងប្រាថ្នាដ៏សុចរិត និងការចង់បានដូចព្រះគ្រីស្ទ នៅតែអាចឆ្លើយតបដោយអព្ភូតហេតុយ៉ាងអស្ចារ្យដោយព្រះនៃរាល់សេចក្ដីសង្ឃឹម ? យើងទាំងអស់គ្នាត្រូវជឿថា អ្វីដែលយើងប្រាថ្នាក្នុងសេចក្ដីសុចរិតអាចក្លាយជារបស់យើងនៅថ្ងៃណាមួយ តាមរបៀបមួយមិនខាន ។ ( « A Perfect Brightness of Hope » Liahona ខែឧសភា ឆ្នាំ២០២០ ទំព័រ៨៣ )
សូមកត់ត្រានៅក្នុងសៀវភៅកត់ចំណាំរបស់អ្នកនូវអ្វីដែលបទពិសោធន៍របស់អ័ប្រាហាំ និងប្រសាសន៍របស់ប្រធាន ហូឡិន បង្រៀនអ្នកអំពីព្រះអម្ចាស់ ។
សូមពិនិត្យជម្រើសសិក្សាខាងក្រោមនេះឡើងវិញ ។ សូមរើសយកជម្រើសមួយ ឬច្រើន ។
ជម្រើស ក
ចុះបើបំណងប្រាថ្នាដ៏សុចរិតរបស់ខ្ញុំហាក់ដូចជាមិនកើតឡើងវិញនោះ ?
ព្រះវរបិតាសួគ៌ស្រឡាញ់យើង ហើយសព្វព្រះទ័យប្រទានពរដល់យើងចំពោះបំណងប្រាថ្នាដ៏សុចរិតនៃដួងចិត្តរបស់យើង ។ ប៉ុន្តែមិនមែនសេចក្តីសង្ឃឹមគ្រប់ទាំងអស់ត្រូវបានបំពេញនៅក្នុងជីវិតនេះនោះទេ ។ តើអ្នកធ្លាប់មានអារម្មណ៍បែបនេះទេ ? ប្រសិនបើអ្នកធ្លាប់ នោះវាមិនអីទេ ។ មានគំរូជាច្រើននៅក្នុងព្រះគម្ពីរ នៅពេលដែលជីវិត ឬស្ថានភាពរបស់មនុស្សបានកើតឡើង មិនដូចជាអ្វីដែលពួកគេចង់បាន ។
សូមអាន អ័ប្រាហាំ ១:១១ សាឡើងវិញ ហើយរកមើលអ្វីដែលបានកើតឡើងចំពោះស្ដ្រីព្រហ្មចារីវ័យក្មេងបីនាក់ ដែលបានរស់នៅក្នុងជំនាន់របស់អ័ប្រាហាំ ។ ហេតុអ្វីអ្នកគិតថា បំណងប្រាថ្នាដ៏សុចរិតរបស់មនុស្សមួយចំនួនត្រូវបានផ្តល់ឲ្យ ខណៈដែលអ្នកផ្សេងទៀតហាក់ដូចជាមិនបានផ្ដល់ឲ្យ ? តើអ្នកអាចថែរក្សាសេចក្ដីជំនឿរបស់អ្នកលើព្រះយេស៊ូវគ្រីស្ទយ៉ាងដូចម្ដេច សូម្បីតែនៅពេលដែលបំណងប្រាថ្នាដ៏សុចរិតហាក់ដូចជាមិនបានបំពេញ ?
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ក្នុងនាមជាអ្នកបម្រើរបស់ព្រះអម្ចាស់ ខ្ញុំសូមសន្យានឹងបងប្អូនថា ពេលដែលបងប្អូនស្មោះត្រង់ចំពោះព្រះយេស៊ូវគ្រីស្ទ និងសេចក្ដីសញ្ញារបស់បងប្អូន នោះបងប្អូននឹងទទួលបានពរជ័យតបស្នងនៅក្នុងជីវិតនេះ ព្រមទាំងបំណងប្រាថ្នាដ៏សុចរិតរបស់បងប្អូននៅក្នុងពេលវេលារបស់ព្រះអម្ចាស់ ។ មានសុភមង្គលនៅក្នុងដំណើរនៃជីវិតរមែងស្លាប់នេះ សូម្បីនៅពេលដែលក្ដីសង្ឃឹមដ៏សុចរិតទាំងអស់របស់យើងមិនត្រូវបានដឹងឮក្ដី ។ ( « ដំណើរផ្ទាល់ខ្លួននៃកូនរបស់ព្រះ » លីអាហូណា ខែឧសភា ឆ្នាំ២០២១ ទំព័រ៤៧ )
សូមសរសេរសារមួយទៅកាន់ខ្លួនអ្នកនៅពេលអនាគត សម្រាប់ពេលក្រោយដែលអ្នកមានអារម្មណ៍ថា បំណងប្រាថ្នារបស់អ្នកមិនត្រូវបានបំពេញតាមរបៀបដែលអ្នកចង់បាន ។ សូមរួមបញ្ចូលបទគម្ពីរ និងសេចក្ដីពិតអំពីព្រះវរបិតាសួគ៌ និងព្រះយេស៊ូវគ្រីស្ទ ដែលប្រទានដល់អ្នកនូវទំនុកចិត្តថា ទ្រង់ទាំងទ្វេនឹងថែទាំអ្នក ។
ជម្រើស ខ
តើខ្ញុំអាចអភិវឌ្ឍបំណងប្រាថ្នាដ៏សុចរិតដោយរបៀបណា ?
មនុស្សមួយចំនួនអាចជឿថា ព្រះរាជបំណងរបស់ព្រះដើម្បីជួយដល់យើង មានន័យថា ទ្រង់មានព្រះឆន្ទៈប្រទាននូវអ្វីៗដែលយើងទូលសូម ។ វាមិនមែនដូច្នោះនោះទេ ។ ពេលខ្លះ ផែនការដ៏ល្អបំផុតរបស់យើងអាចមិនមែនជាអ្វីដែលល្អបំផុតសម្រាប់យើងនោះទេ ។
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានពន្យល់ពីផ្នែកដ៏សំខាន់មួយនៃការទទួលបានពរជ័យមកពីព្រះ ៖
យើងស្គាល់ព្រះអង្គសង្គ្រោះ នៅពេលយើងធ្វើអស់ពីសមត្ថភាព ដើម្បីទៅកន្លែងដែលទ្រង់សព្វព្រះទ័យឲ្យយើងទៅ ព្យាយាមថ្លែងអ្វីដែលទ្រង់សព្វព្រះទ័យឲ្យយើងថ្លែង និងក្លាយជាមនុស្សដែលទ្រង់សព្វព្រះទ័យឲ្យយើងប្រែក្លាយ ។ នៅពេលយើងទទួលស្គាល់ដោយរាបសាពីការពឹងផ្អែកទាំងស្រុងរបស់យើងទៅលើទ្រង់ នោះទ្រង់ពង្រីកសមត្ថភាពរបស់យើងដើម្បីបម្រើកាន់តែមានប្រសិទ្ធភាព ។ បន្ដិចម្ដងៗ បំណងប្រាថ្នារបស់យើងដើរស្របទាំងស្រុងទៅនឹងព្រះរាជបំណងរបស់ទ្រង់ ហើយព្រះរាជបំណងរបស់ទ្រង់ក្លាយជាគោលបំណងរបស់យើង ដូចនេះយើងនឹង « ពុំប្រាថ្នាអ្វីដែលផ្ទុយពីបំណង [ របស់ទ្រង់ ] ឡើយ » ។ ( « If Ye Had Known Me » Liahona ខែវិច្ឆិកា ឆ្នាំ២០១៦ ទំព័រ១០៤ )
សូមអានដំណើររឿងខាងក្រោមនេះយ៉ាងហោចណាស់មួយ អំពីមនុស្សដែលព្យាយាមសម្របឆន្ទៈរបស់ពួកគេតាមព្រះឆន្ទៈរបស់ព្រះ ។ អ្នកអាចដាក់ស្លាកវគ្គបទគម្ពីរដែលអ្នកបានអានដោយឃ្លាមួយថា « សម្របតាមព្រះឆន្ទៈរបស់ព្រះ » ។
-
ព្រះយេស៊ូវនៅក្នុងសួនច្បារគែតសេម៉ានី—លូកា ២២:៤១–៤២
-
នីហ្វៃពេលរស់នៅក្នុងដែនដីបរិបូរណ៍—នីហ្វៃទី១ ១៧:៧–១០
-
ពាក្យសម្ដីរបស់អ័ប៊ីណាដៃទៅកាន់ស្ដេចដ៏ទុច្ចរិតណូអេ—ម៉ូសាយ ១៣:៧–៩
តើអ្នកបានរៀនអ្វីខ្លះ អំពីការសម្របបំណងប្រាថ្នាដ៏សុចរិតរបស់អ្នកជាមួយនឹងព្រះឆន្ទៈរបស់ព្រះអម្ចាស់ ?
ចែកចាយគំនិតរបស់អ្នក
គោលបំណងមេរៀន ៖ ដើម្បីជួយអ្នកឲ្យមានសេចក្ដីសង្ឃឹមថា ព្រះវរបិតាសួគ៌អាចជួយអ្នកឲ្យទទួលបានពរជ័យ ដែលទ្រង់សព្វព្រះទ័យចង់ឲ្យអ្នកទទួលបាន ។
សូមចែកចាយរឿងមួយ ឬច្រើន នៃអ្វីខាងក្រោមនេះជាមួយគ្រូបង្រៀន ឬសិស្សក្នុងថ្នាក់របស់អ្នក ៖
-
សារលិខិតដែលអ្នកបានបង្កើតសម្រាប់ខ្លួនអ្នកនាពេលអនាគត ។
-
ដំណើររឿងដែលអ្នកបានអានមកពីព្រះគម្ពីរ អំពីនរណាម្នាក់ដែលសម្របតាមព្រះឆន្ទៈរបស់ព្រះ ។ សូមរួមបញ្ចូលនូវរបៀបដែលវាជួយអ្នកឲ្យចង់សម្របតាមព្រះឆន្ទៈរបស់ព្រះវរបិតាសួគ៌សម្រាប់អ្នក ។
-
អ្វីមួយជាក់លាក់ដែលអ្នកបានធ្វើដើម្បីសម្រេចគោលបំណងមេរៀននេះ ។
-
មានសំណួរណាមួយដែលមេរៀននេះបានធ្វើឲ្យអ្នកឆ្ងល់ដែរឬទេ ។ តើអ្នកនឹងព្យាយាមស្វែងរកចម្លើយចំពោះសំណួររបស់អ្នកដោយរបៀបណា ?