« ការសិក្សាសារលិខិតរបស់ពួកអ្នកបម្រើរបស់ព្រះអម្ចាស់ ៖ ការធ្វើឲ្យប្រសាសន៍របស់ថ្នាក់ដឹកនាំសាសនាចក្រជាផ្នែកមួយនៃការរៀនសូត្រដំណឹងល្អរបស់អ្នក » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការសិក្សាសារលិខិតរបស់ពួកអ្នកបម្រើរបស់ព្រះអម្ចាស់ ៖ ការធ្វើឲ្យប្រសាសន៍របស់ថ្នាក់ដឹកនាំសាសនាចក្រជាផ្នែកមួយនៃការរៀនសូត្រដំណឹងល្អរបស់អ្នក » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ការបង្រៀនរបស់ថ្នាក់ដឹកនាំសាសនាចក្រ ៖ មេរៀនទី ២០៦
ការសិក្សាសារលិខិតរបស់ពួកអ្នកបម្រើរបស់ព្រះអម្ចាស់
ការធ្វើឲ្យប្រសាសន៍របស់ថ្នាក់ដឹកនាំសាសនាចក្រជាផ្នែកមួយនៃការរៀនសូត្រដំណឹងល្អរបស់អ្នក
តើសារលិខិតរបស់ពួកអ្នកបម្រើរបស់ព្រះអម្ចាស់ផ្ដល់ពរដល់ជីវិតរបស់អ្នកយ៉ាងដូចម្តេច ? ការសិក្សាព្រះបន្ទូលរបស់ព្រះអម្ចាស់ដែលបានផ្ដល់ឲ្យដោយថ្នាក់ដឹកនាំនៃសាសនាចក្ររបស់ទ្រង់ ជួយយើងឲ្យឮព្រះសូរសៀងរបស់ព្រះអម្ចាស់ ។ មេរៀននេះអាចជួយសិស្សរួមបញ្ចូលការសិក្សាសារលិខិតរបស់ព្រះអម្ចាស់ដែលបានផ្ដល់ឲ្យដោយពួកអ្នកបម្រើរបស់ទ្រង់ ជាផ្នែកមួយនៃការរៀនសូត្រដំណឹងល្អផ្ទាល់ខ្លួនរបស់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យគិតអំពីពរជ័យមួយចំនួនដែលពួកគេបានទទួល នៅពេលពួកគេបានសិក្សាសារលិខិតថ្មីៗពីថ្នាក់ដឹកនាំសាសនាចក្រ ។ ពួកគេក៏ប្រហែលជាអាចសួរសមាជិកគ្រួសារ ឬថ្នាក់ដឹកនាំសាសនាចក្រក្នុងតំបន់អំពីពរជ័យដែលពួកគាត់បានដកពិសោធ ។ ពួកគេនឹងមានឱកាសអំឡុងពេលរៀនដើម្បីចែកចាយពីពរជ័យទាំងនេះ ។
សកម្មភាពរៀនសូត្រដែលអាចមាន
ហេតុអ្វីសិក្សាសារលិខិតរបស់ថ្នាក់ដឹកនាំសាសនាចក្រ ?
ដើម្បីចាប់ផ្តើម សូមពិចារណាចែកចាយសេចក្តីថ្លែងការណ៍ខាងក្រោម ហើយអញ្ជើញសិស្សឲ្យវាយតម្លៃជាឯកជននូវកិច្ចខិតខំប្រឹងប្រែងរបស់ពួកគេ ដើម្បីចូលរួមនៅក្នុងសន្និសីទទូទៅ ។
នៅពេលអ្នកវាយតម្លៃសេចក្តីថ្លែងការណ៍ទាំងពីរខាងក្រោម តើអ្នកនឹងពិពណ៌នាសេចក្តីថ្លែងការណ៍នីមួយៗថា « ពិតពីខ្ញុំ » ឬ « មិនពិតពីខ្ញុំ » ដែរឬទេ ?
-
ខ្ញុំមើលសន្និសីទទូទៅ ។
-
ខ្ញុំអាន និងសិក្សាសុន្ទរកថាបន្ទាប់ពីសន្និសីទទូទៅ ។
បន្ទាប់ពីសិស្សមានពេលមួយភ្លែតដើម្បីជញ្ជឹងគិតហើយ សូមធានាពួកគេថាគោលបំណងនៃស្វ័យវាយតម្លៃគឺជាឱកាសសម្រាប់ពួកគេដើម្បីវាយតម្លៃថាពួកគេកំពុងធ្វើបានល្អប៉ុនណា និងអ្វីដែលពួកគេអាចកែលម្អបាន ។
នៅចុងបញ្ចប់នៃសន្និសីទទូទៅ ប្រធាន រ័សុល អិម ណិលសុន បានមានប្រសាសន៍ ៖
ខ្ញុំសង្ឃឹមថា បងប្អូននឹងសិក្សាសារលិខិតពីសន្និសីទនេះម្តងហើយម្តងទៀតនៅខែក្រោយៗនេះ ។ ( « រីករាយនៅក្នុងអំណោយទាននៃកូនសោបព្វជិតភាព » លីអាហូណា ខែឧសភា ឆ្នាំ២០២៤ ទំព័រ ១១៩ )
-
តើអ្នកគិតថា ហេតុអ្វីបានជាសំខាន់ដើម្បីសិក្សាសារលិខិតពីសន្និសីទទូទៅ ?
-
ហេតុអ្វីបានជាវាអាចនឹងពិបាកសម្រាប់ក្មេងជំទង់ក្នុងការសិក្សាសារលិខិតទាំងនេះ ? តើអ្នកបានប្រឈមមុខ ឬអ្នកអាចប្រឈមមុខនឹងឧបសគ្គអ្វីខ្លះ កាលអ្នកព្យាយាមសិក្សាសារលិខិតទាំងនេះជាទៀងទាត់ ?
នៅពេលសិស្សចែកចាយ អ្នកអាចសរសេរឧបសគ្គមួយចំនួន ដែលពួកគេបានលើកឡើងដាក់នៅលើក្ដារខៀន ។ អ្នកអាចប្រើបញ្ជីនេះនៅពេលក្រោយក្នុងមេរៀននេះ ។
នៅពេលអ្នកសិក្សានៅថ្ងៃនេះ សូមយាងអញ្ជើញព្រះវិញ្ញាណបរិសុទ្ធឲ្យជួយអ្នកដឹងពីមូលហេតុដែលវាសំខាន់ក្នុងការសិក្សាសារលិខិតទាំងនេះ ។ អ្នកអាចស្វែងរករបៀបដែលព្រះវរបិតាសួគ៌ និងព្រះយេស៊ូវគ្រីស្ទអាចជួយអ្នកឲ្យយកឈ្នះលើការលំបាកណាមួយដែលធ្វើឲ្យវាពិបាកក្នុងការរួមបញ្ចូលសារលិខិតទាំងនេះនៅក្នុងការសិក្សាដំណឹងល្អផ្ទាល់ខ្លួនរបស់អ្នក ។
ពួកព្យាការីមានប្រសាសន៍ពីព្រះបន្ទូលរបស់ព្រះអម្ចាស់
ដើម្បីជួយសិស្សយល់ពីមូលហេតុដែលការសិក្សាសារលិខិតរបស់ពួកអ្នកបម្រើរបស់ព្រះអម្ចាស់មានសារៈសំខាន់ខ្លាំង នោះអ្នកអាចអញ្ជើញពួកគេឲ្យសិក្សាការហៅរបស់អេសេគាលដើម្បីធ្វើជាព្យាការីក្នុងគ្រានៃការក្បត់សាសនារបស់អ៊ីស្រាអែល ។ សិស្សអាចសិក្សាការហៅរបស់អេសេគាលដើម្បីធ្វើជា « អ្នកយាមនៅលើប៉ម » ( សូមមើល អេសេគាល ៣:១៦–១៧ ) នៅក្នុង មេរៀនទី ១៣៨ ៖ « អេសេគាល ១–៣; ៣៣ » ។ ប្រសិនបើសិស្សមិនទាន់បានរៀនមេរៀននេះទេ អ្នកអាចចែកចាយសេចក្តីសង្ខេបដូចខាងក្រោម ។
ព្រមជាមួយនឹងពួកសាសន៍អ៊ីស្រាអែលជាច្រើននាក់ផ្សេងទៀត អេសេគាលត្រូវបានគេចាប់យកទៅក្រុងបាប៊ីឡូន ។ ខណៈជាប់ជាឈ្លើយ ព្រះអម្ចាស់បានយាងមកជួបលោក ហើយបានហៅលោកឲ្យធ្វើជាព្យាការី ( សូមមើល អេសេគាល ១–២ ) ។
សូមអាន អេសេគាល ៣:៤, ១០–១១, ២៧ ដោយរកមើលការណែនាំរបស់ព្រះអម្ចាស់ដល់ព្យាការីរបស់ទ្រង់ ។
-
តើយើងអាចរៀនអ្វីខ្លះអំពីតួនាទីរបស់ព្យាការីរបស់ព្រះអម្ចាស់ ?
អ្នកប្រហែលជាចង់លើកឡើងនូវឃ្លាដែលថា « ទោះបើគេនឹងព្រមស្តាប់តាម » នៅក្នុង ខទី ១១ និង « អ្នកណាដែលស្តាប់ ចូរស្តាប់ចុះ » នៅក្នុងខទី ២៧ ។ សូមចែកចាយថា ព្រះអម្ចាស់ប្រទានដល់រាស្រ្តរបស់ទ្រង់នូវជម្រើសដើម្បីស្តាប់ព្រះបន្ទូលរបស់ទ្រង់ តាមរយៈពួកព្យាការីរបស់ទ្រង់ និងអ្នកដែលទ្រង់ហៅឲ្យដឹកនាំ ។
បន្ទាប់មកអ្នកអាចសរសេរនូវសេចក្តីពិតមិនពេញលេញខាងក្រោមនៅលើក្ដារខៀន ៖ នៅពេលយើងជ្រើសរើសដើម្បីស្ដាប់ព្រះបន្ទូលរបស់ព្រះអម្ចាស់ដែលបានផ្ដល់ដោយពួកអ្នកបម្រើរបស់ទ្រង់ នោះទ្រង់នឹង …
សូមអញ្ជើញសិស្សឲ្យបំពេញឃ្លានេះជាគោលការណ៍មួយ ដោយប្រើសេចក្ដីថ្លែងការណ៍ខាងក្រោមនេះពីប្រធាន ណិលសុន ។
ប្រធាន រ័សុល អិម ណិលសុន បានចែកចាយពរជ័យមួយចំនួនដែលព្រះអង្គសង្រ្គោះបានសន្យាដល់អស់អ្នកដែល ស្ដាប់ ( ស្ដាប់តាម ) ប្រុងស្ដាប់ ( ស្ម័គ្រចិត្តគោរពប្រតិបត្តិ ) និង ស្ដាប់តាម ( ធ្វើតាមដោយសេចក្តីជំនឿ ) នូវការបង្រៀនដែលព្រះអង្គសង្រ្គោះបានប្រទានដល់ពួកអ្នកបម្រើរបស់ទ្រង់ ៖
[ យើ ]ង ស្ដាប់ទ្រង់ នៅពេលយើងផ្ទៀងស្ដាប់ពាក្យសម្ដីរបស់ពួកព្យាការី អ្នកមើលឆុត និងអ្នកទទួលវិវរណៈ ។ ពួកសាវកដែលបានតែងតាំងឡើងដោយព្រះយេស៊ូវគ្រីស្ទ តែងតែថ្លែងទីបន្ទាល់អំពីទ្រង់ ។ ពួកលោកបង្ហាញផ្លូវ នៅពេលយើងធ្វើដំណើរឆ្លងកាត់ទីខ្វែងខ្វាត់ដួងចិត្តតានតឹងនៃបទពិសោធន៍ជីវិតរមែងស្លាប់របស់យើង ។
តើអ្វីនឹងកើតឡើង នៅពេលបងប្អូនកាន់តែស្ដាប់ដោយបំណងចិត្ត ប្រុងស្ដាប់ ហើយផ្ទៀងស្ដាប់អ្វីដែលព្រះអង្គសង្គ្រោះបានមានបន្ទូល និងអ្វីដែលទ្រង់កំពុងមានបន្ទូលឥឡូវនេះតាមរយៈពួកព្យាការីរបស់ទ្រង់ ? ខ្ញុំសូមសន្យាថា បងប្អូននឹងប្រទានពរនូវអំណាចបន្ថែមទៀតដើម្បីប្រឈមនឹងការល្បួង បញ្ហា និងភាពទន់ខ្សោយ ។ ខ្ញុំសន្យាថាមាន អព្ភូតហេតុជាច្រើននៅក្នុងអាពាហ៍ពិពាហ៍ ទំនាក់ទំនងគ្រួសារ និងកិច្ចការប្រចាំថ្ងៃរបស់បងប្អូន ។ ហើយខ្ញុំសន្យាថា សមត្ថភាពរបស់បងប្អូនដើម្បីដឹងអំពីអំណរនឹងចម្រើនឡើង ទោះជាមានការវឹកវរខ្លាំងក្នុងជីវិតបងប្អូនក្ដី ។ ( « Hear Him » Liahona ខែឧសភា ឆ្នាំ២០២០ ទំព័រ ៩០ ) ( នាទីទី ១៣:០៧ ដល់ ១៤:១៦ )
-
តើពរជ័យដែលបានសន្យាអ្វីខ្លះដែលអ្នកបានរកឃើញ ?
សិស្សអាចរកឃើញថាព្រះអង្គសង្រ្គោះនឹង ៖
-
បង្ហាញផ្លូវដល់យើងឆ្លងកាត់ភាពសាំញ៉ាំនៃបទពិសោធក្នុងជីវិតរមែងស្លាប់របស់យើង ។
-
ប្រទានពរដល់យើងដោយនូវព្រះចេស្ដារបស់ទ្រង់ ដើម្បីប្រឈមមុខនឹងការល្បួង ការពុះពារ និងភាពទន់ខ្សោយ ។
-
នាំយកអព្ភូតហេតុដល់គ្រួសារ និងការងារប្រចាំថ្ងៃរបស់យើង ។
-
បង្កើនសមត្ថភាពរបស់យើងក្នុងការទទួលបាននូវអំណរ ទោះបីជាមានភាពច្របូកច្របល់កើនឡើងក្នុងជីវិតក៏ដោយ ។
សូមពិចារណាអញ្ជើញសិស្សឲ្យចែកចាយពរជ័យផ្សេងទៀតដែលពួកគេបានឃើញចេញពីការខិតខំរបស់ពួកគេដើម្បីសិក្សាព្រះបន្ទូលរបស់ព្រះអង្គសង្គ្រោះ ហើយបន្ថែមវាទៅក្នុងបញ្ជីនៅលើក្ដារខៀន ។ សិស្សអាចនឹងទទួលបានអត្ថប្រយោជន៍ពីការកំណត់នូវរបៀបមួយចំនួនដែលពរជ័យដែលបានសន្យាទាំងនេះអាចជួយក្មេងជំទង់ ។ ដើម្បីធ្វើដូច្នេះ អ្នកអាចរៀបចំសិស្សជាក្រុមតូចៗ ដើម្បីពិភាក្សាការណ៍ខាងក្រោម ៖
ដោយមើលទៅពរជ័យដែលបានសន្យាទាំងនេះ សូមគិតអំពីកាលៈទេសៈជាក់លាក់មួយដែលពរជ័យមួយក្នុងចំណោមពរជ័យទាំងនេះនឹងមានប្រយោជន៍សម្រាប់ក្មេងជំទង់ ។
-
តើអ្នកអាចចែកចាយអ្វីខ្លះ ដើម្បីជួយក្មេងជំទង់ឲ្យសិក្សាសារលិខិតរបស់ថ្នាក់ដឹកនាំសាសនាចក្រ ប្រសិនបើពួកគេកំពុងមានការលំបាកដើម្បីធ្វើវានោះ ?
-
តើនៅពេលណាដែលអ្នក ឬនរណាម្នាក់ដែលអ្នកស្គាល់បានដកពិសោធន៍នូវពរជ័យទាំងនេះ ?
បង្កើនការសិក្សារបស់អ្នកអំពីសារលិខិតរបស់ព្រះអម្ចាស់
សូមពិចារណាអញ្ជើញសិស្សឲ្យជ្រើសរើសពរជ័យដែលបានសន្យាមួយ ឬច្រើននៅលើក្ដារខៀន ដែលពួកគេចង់ទទួលបានក្នុងជីវិតរបស់ពួកគេ ហើយសរសេរវានៅក្នុងសៀវភៅកំណត់ហេតុការសិក្សារបស់ពួកគេ ។
អ្នកអាចយោងទៅបញ្ជីឧបសគ្គទាំងឡាយដែលក្មេងជំទង់អាចប្រឈមមុខ ដែលបានបង្កើតមុននេះនៅក្នុងមេរៀននេះ ។ អ្នកអាចជ្រើសរើសឧបសគ្គមួយ ហើយសួរសំណួរដូចខាងក្រោម ៖
-
តើដំបូន្មានអ្វីដែលអ្នកនឹងផ្ដល់ឲ្យ ដើម្បីជួយនរណាម្នាក់ឲ្យយកឈ្នះលើឧបសគ្គនេះ ?
សូមពិចារណាអញ្ជើញសិស្សឲ្យគិតអំពីរបៀបដែលពួកគេអាចបញ្ចូលការសិក្សាអំពីសារលិខិតរបស់ថ្នាក់ដឹកនាំសាសនាចក្រទៅក្នុងជីវិតរបស់ពួកគេ ។ សូមធានាដល់ពួកគេថាការណ៍នេះមិនចាំបាច់ចំណាយពេលច្រើនពេកទេ ។ ចែកចាយគំនិតមួយចំនួនជាមួយសិស្សក្នុងថ្នាក់ ហើយអញ្ជើញសិស្សឲ្យចែកចាយគំនិតខ្លះៗដែលមានប្រយោជន៍សម្រាប់ពួកគេ ។ អ្នកអាចស្វែងរកសកម្មភាពឌីជីថលបន្ថែមនៅក្នុងសកម្មភាពរៀនសូត្របន្ថែម នៅក្នុងកំណែអនឡាញនៃសៀវភៅសិក្សានេះ ។
សូមគិតអំពីរបៀបមួយដែលអ្នកមានអារម្មណ៍ថាអ្នកអាចបញ្ចូលការសិក្សាសារលិខិតរបស់ថ្នាក់ដឹកនាំសាសនាចក្រទៅក្នុងការសិក្សាផ្ទាល់ខ្លួនរបស់អ្នក ។ សូមជ្រើសរើសគំនិតមួយដូចខាងក្រោម ៖
-
តាមដានគណនីប្រព័ន្ធផ្សព្វផ្សាយសង្គមរបស់ថ្នាក់ដឹកនាំសាសនាចក្រ ។
-
សិក្សាសុន្ទរកថា ឬផ្នែកមួយនៃសុន្ទរកថាដែលជាផ្នែកនៃការថ្វាយបង្គំនៅថ្ងៃអាទិត្យ ឬនៅថ្ងៃផ្សេងទៀតនៅក្នុងសប្តាហ៍ ។
-
ស្តាប់សុន្ទរកថាខណៈដែលកំពុងធ្វើសកម្មភាពផ្សេងទៀត ដូចជាពេលកំពុងធ្វើលំហាត់ប្រាណ ធ្វើដំណើរ ឬធ្វើការ ។
-
សូមប្រើ Study Plan feature ( មុខងារដាក់ផែនការសិក្សា ) ដើម្បីបង្កើតផែនការសិក្សាសុន្ទរកថាពីសន្និសីទទូទៅថ្មីៗបំផុត ឬសារលិខិតពីប្រធានសាសនាចក្របច្ចុប្បន្ន ។
-
ប្រើ Scripture Citation Index ( លិបិក្រមសេចក្តីដកស្រង់ពីព្រះគម្ពីរ ) នៅពេលអ្នកស្វែងរកព្រះគម្ពីរដែលមានអត្ថន័យចំពោះអ្នកនៅក្នុងការសិក្សាព្រះគម្ពីរផ្ទាល់ខ្លួនរបស់អ្នក ។ មាននៅគេហទំព័រ scriptures.byu.edu លិបិក្រមនេះអាចជួយអ្នកមើលឃើញការប្រើប្រាស់ថ្មីៗបំផុតនៃខគម្ពីរនៅក្នុងសន្និសីទទូទៅ ។ អ្នកអាចភ្ជាប់សម្រង់ទៅខគម្ពីរនៅក្នុងបណ្ណាល័យដំណឹងល្អ ។
-
ឬបន្ថែមគំនិតដែលអ្នកមានអំពីការបញ្ចូលការសិក្សាសារលិខិតពីថ្នាក់ដឹកនាំសាសនាចក្រក៏បាន ។
អ្នកអាចលើកទឹកចិត្តសិស្សឲ្យអធិស្ឋានទូលសុំជំនួយពីព្រះវរបិតាសួគ៌ នៅពេលពួកគេខិតខំសិក្សាព្រះបន្ទូលរបស់ទ្រង់ដែលបានប្រទានមកតាមរយៈពួកអ្នកបម្រើរបស់ទ្រង់ ។ អ្នកអាចចែកចាយសក្ខីភាពរបស់អ្នកអំពីពរជ័យដែលអ្នកបានទទួល នៅពេលអ្នកបានព្យាយាមបង្កើនការសិក្សារបស់អ្នកអំពីសារលិខិតរបស់ពួកអ្នកបម្រើរបស់ព្រះអម្ចាស់ ។ សូមពិចារណាតាមដានសិស្សនៅពីរបីសប្តាហ៍ទៀត ដោយផ្តល់ឱកាសឲ្យពួកគេចែកចាយភាពជោគជ័យ និងការពុះពារដែលពួកគេមាន ។