« អេសេគាល ១–៣; ៣៣ ៖ ‹ យើងបានតាំងឯងឲ្យជាអ្នកយាម › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« អេសេគាល ១–៣; ៣៣ ៖ ‹ យើងបានតាំងឯងឲ្យជាអ្នកយាម › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
អេសេគាល ១–៣; ៣៣–៣៤; ៣៦–៣៧; ៤៧ ៖ មេរៀនទី ១២៨
អេសេគាល ១–៣; ៣៣
« យើងបានតាំងឯងឲ្យជាអ្នកយាម »
តើយើងអាចរក្សាសុវត្ថិភាពបានយ៉ាងដូចម្តេច បើគ្រោះថ្នាក់ខាងវិញ្ញាណមានច្រើននៅក្នុងពិភពលោកនេះ ? ព្រះអម្ចាស់ហៅពួកព្យាការីឲ្យបម្រើជាអ្នកយាមដើម្បីព្រមាន និងការពារយើង ។ ព្រះអម្ចាស់បានហៅអេសេគាលឲ្យធ្វើជាអ្នកយាមសម្រាប់ពួកសាសន៍អ៊ីស្រាអែល ខណៈជាប់ជាឈ្លើយរបស់សាសន៍បាប៊ីឡូន ( សូមមើល អេសេគាល ៣:១៦–១៧ ) ។ មេរៀននេះអាចជួយសិស្សឲ្យមានអារម្មណ៍ចង់ស្តាប់តាមការព្រមាននៃព្យាការីរបស់ព្រះអម្ចាស់កាន់តែខ្លាំងឡើង ។
ការរៀបចំសិស្ស ៖ អញ្ជើញសិស្សឲ្យអាន « ព្យាការី » នៅក្នុង សេចក្តីណែនាំដល់បទគម្ពីរទាំងឡាយ ឬ « Prophets » នៅក្នុង Topics and Questions នៅក្នុងបណ្ណាល័យដំណឹងល្អ ។ ពួកគេអាចរកមើលតួនាទីរបស់ព្យាការី ហើយជញ្ជឹងគិតពីរបៀបដែលពួកគេមើលឃើញព្យាការីបំពេញតួនាទីនេះ ។
សកម្មភាពរៀនសូត្រដែលអាចមាន
ការមានអារម្មណ៍អំពីព្យាការីរបស់ព្រះអម្ចាស់ ។
សូមពិចារណាអំពីការចាប់ផ្តើមថ្នាក់ដោយការអញ្ជើញសិស្សឲ្យគិតពិចារណាពីអារម្មណ៍របស់ពួកគេអំពីព្យាការីរបស់ព្រះអម្ចាស់នៅសព្វថ្ងៃនេះ ។ របៀបមួយដើម្បីធ្វើការណ៍នេះ អាចជាការដាក់បង្ហាញរូបភាពរបស់ប្រធាននៃសាសនាចក្រ ហើយអញ្ជើញសិស្សឲ្យច្រៀង ឬស្តាប់បទ « យើងអរគុណទ្រង់ចំពោះព្យាការី » ( ទំនុកតម្កើង ល.រ. ១៩ ) ។ បន្ទាប់មក អ្នកអាចផ្តល់ការណែនាំខាងក្រោម ។ សូមដឹងថាអារម្មណ៍របស់សិស្សអំពីព្យាការីអាចនឹងខុសគ្នាពីម្នាក់ទៅម្នាក់ ហើយវាមិនជាថ្វីទេ ។ លើកទឹកចិត្តពួកគេឲ្យឆ្លើយតបដោយស្មោះត្រង់ ។
នៅក្នុងសៀវភៅកំណត់ហេតុការសិក្សារបស់អ្នក សូមបំពេញសេចក្តីថ្លែងការណ៍ខាងក្រោមជាមួយនឹងការឆ្លើយតបមួយ ឬច្រើន ៖
នៅពេលខ្ញុំមើលព្យាការី ស្តាប់លោកមានប្រសាសន៍ ឬអានប្រសាសន៍របស់លោក ខ្ញុំមានអារម្មណ៍ថា …
សូមអញ្ជើញសិស្សដែលស្ម័គ្រចិត្តឲ្យចែកចាយជាមួយសិស្សក្នុងថ្នាក់នូវអ្វីដែលពួកគេបានសរសេរ ។ អ្នកអាចពន្យល់ថា នៅពេលពួកគេចែកចាយ ហើយស្តាប់ នោះព្រះវិញ្ញាណបរិសុទ្ធអាចបំភ្លឺគំនិតពួកគេ ហើយបន្ទន់ចិត្តពួកគេដើម្បីធ្វើតាមព្យាការីរបស់ព្រះអម្ចាស់ ។
ព្រះអម្ចាស់ហៅអេសេគាលថាជាព្យាការី
អេសេគាលត្រូវបានចាប់យកទៅក្រុងបាប៊ីឡូនជាមួយនឹងពួកសាសន៍អ៊ីស្រាអែលឯទៀត ។ ខណៈជាប់ជាឈ្លើយ ព្រះអម្ចាស់យាងមកជួបលោក ហើយបានហៅលោកឲ្យធ្វើជាព្យាការី ( សូមមើល អេសេគាល ១–២ ) ។ ព្រះអម្ចាស់បានសន្យាថានឹងពង្រឹងអេសេគាល នៅពេលលោកបានផ្សព្វផ្សាយទៅកាន់ប្រជាជនដែលបះបោរ និងមានចិត្តរឹងរូស ( សូមមើល អេសេគាល ៣:៧–៩ ) ។
អេសេគាល ៣:១៦–១៧ គឺជាវគ្គចំណេះចំណានខាងគោលលទ្ធិមួយ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីឲ្យពួកគេអាចងាយរកវាឃើញ ។
សូមអាន អេសេគាល ៣:១០–១១, ១៦–១៧ ដោយរកមើលអ្វីដែលព្រះអម្ចាស់បានបង្រៀនអេសេគាលអំពីតួនាទីរបស់លោកជាព្យាការី ។
-
តើអ្នកបានរកឃើញអ្វីខ្លះ ?
ដើម្បីជួយសិស្សយល់ពីរូបភាពនៃអ្នកយាមម្នាក់ សូមពិចារណាដាក់បង្ហាញរូបភាពរបស់ខាខាសសូន ដែលបានបញ្ចូលក្នុងមេរៀននេះ រួមជាមួយនឹងសេចក្តីថ្លែងការណ៍នេះមកពីអែលឌើរ នែល អិល អាន់ឌើរសិន ។
អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ បានពន្យល់ ៖
ខាខាសសូនគឺជាទីក្រុងមួយដ៏អស្ចារ្យនៅក្នុងប្រទេសបារាំង ដែលបានសាងសង់ឡើងតាំងពីមជ្ឈិមសម័យ ។ ប៉មខ្ពស់ៗត្រូវបានសង់ឡើងទៅលើពីជញ្ជាំងការពារទីក្រុងនោះសម្រាប់ឲ្យអ្នកចាំយាមឈរលើប៉មទាំងនោះទាំងយប់ទាំងថ្ងៃ ដោយយកចិត្តទុកដាក់ផ្តោតមើលទីឆ្ងាយៗរកមើលសត្រូវរបស់ពួកគេ ។ នៅពេលអ្នកចាំយាមបានឃើញពួកខ្មាំងសត្រូវរបស់ពួកគេចូលមក នោះសំឡេងព្រមានរបស់គាត់បានការពារប្រជាជននៅទីក្រុងខាខាសសូនពីគ្រោះថ្នាក់ដែលហៀបនឹងកើតឡើងដែលពួកគេពុំអាចមើលឃើញ ។
ព្យាការីគឺជាអ្នកចាំយាមនៅលើប៉ម ដោយការពារយើងពីគ្រោះថ្នាក់ខាងវិញ្ញាណដែលយើងពុំអាចមើលឃើញ ។ ( « The Prophet of God » Liahona ខែឧសភា ឆ្នាំ២០១៨ ទំព័រ ២៥ )
-
តើអ្នកអាចសង្ខេបអ្វីខ្លះដែល អេសេគាល ៣:១៦–១៧ និង អែលឌើរ អាន់ឌើរសិន បង្រៀនអំពីពួកព្យាការីដោយរបៀបណា ?
សូមជួយសិស្សឲ្យស្គាល់ថា ព្រះអម្ចាស់ហៅពួកព្យាការីដែលបម្រើជាអ្នកយាមដើម្បីព្រមានយើងអំពីគ្រោះថ្នាក់ខាងវិញ្ញាណ ។ សូមពន្យល់ថា គណៈប្រធានទីមួយ និងកូរ៉ុមនៃសាវកដប់ពីរនាក់បម្រើជាព្យាការីរបស់ព្រះអម្ចាស់នៅសព្វថ្ងៃនេះ ។ ប្រសិនបើសិស្សបានបញ្ចប់សកម្មភាពរៀបចំសិស្សរួចហើយ ពួកគេអាចចែកចាយអ្វីដែលពួកគេបានរៀនដែលជាផ្នែកនៃការពិភាក្សាខាងក្រោម ។
-
ហេតុអ្វី« អ្នកយាម »គឺជាវិធីដ៏ល្អមួយដើម្បីពិពណ៌នាពីតួនាទីរបស់ព្យាការី ?
នៅក្នុង អេសេគាល ៣៣ ព្រះអម្ចាស់បានបង្រៀនអេសេគាលម្តងទៀតនូវការទទួលខុសត្រូវរបស់លោកក្នុងការបម្រើជាអ្នកយាម ហើយចែកចាយសារលិខិតរបស់ព្រះជាមួយអ៊ីស្រាអែល ( សូមមើល អេសេគាល ៣៣:១–៧ ) ។
សូមអាន អេសេគាល ៣៣:៩–១១ ដោយរកមើលហេតុផលដែលព្រះអម្ចាស់សព្វព្រះទ័យចង់ព្រមានរាស្ត្ររបស់ទ្រង់ ។
-
តើ ខទី ១១ អាចបង្រៀនយើងអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ បានចែកចាយពីរបៀបដែលការព្យាកររបស់ព្យាការីគឺជាភស្ដុតាងនៃសេចក្ដីស្រឡាញ់របស់ព្រះ ៖
ជំនួសឲ្យការចង់ថ្កោលទោសយើង ព្រះវរបិតាសួគ៌ និងព្រះអង្គសង្គ្រោះយើងស្វែងរកសុភមង្គលឲ្យយើង ហើយអង្វរឲ្យយើងប្រែចិត្ត ដោយត្រាស់ដឹងយ៉ាងច្បាស់ថា « សេចក្ដីទុច្ចរិតពុំដែល[ និងពុំ ]ជាសុភមង្គលឡើយ » [ អាលម៉ា ៤១:១០ ] ។ ដូច្នេះអេសេគាល និងព្យាការីគ្រប់រូបពីមុន និងចាប់ពីនោះមក ដោយថ្លែងពីបន្ទូលរបស់ព្រះចេញពីចិត្ត បានព្រមានដល់ជនទាំងអស់ដែលនឹងងាកចេញពីសាតាំង ជាមារសត្រូវនៃព្រលឹងពួកគេ ហើយ« រើសយកឥស្សរភាព និង ជីវិតដ៏នៅអស់កល្បជានិច្ច តាមរយៈព្រះជាអ្នកសង្រួបសង្រួមដ៏ធំរបស់មនុស្សលោកទាំងអស់ »[ នីហ្វៃទី២ ២:២៧ ] ។ ( « The Voice of Warning » Liahona ខែឧសភា ឆ្នាំ២០១៧ ទំព័រ១០៨ )
-
តើការយល់ដឹងពីមូលហេតុដែលព្រះអម្ចាស់ហៅព្យាការីរបស់ទ្រង់ឲ្យធ្វើជាអ្នកយាមអាចមានឥទ្ធិពលលើបំណងប្រាថ្នារបស់យើងដើម្បីធ្វើតាមពួកលោកដោយរបៀបណា ?
ការព្រមានមកពីអ្នកយាម
សកម្មភាពខាងក្រោមនេះគឺមានគោលបំណងជួយសិស្សមើលឃើញឧទាហរណ៍នៃការព្រមានដែលព្រះអម្ចាស់បានប្រទានតាមរយៈព្យាការីរបស់ទ្រង់ ។ សូមពិចារណាអញ្ជើញសិស្សឲ្យជ្រើសរើសយកជម្រើសមួយដូចខាងក្រោមនេះដើម្បីសិក្សា ៖
-
សុន្ទរកថាថ្មីៗមកពីសមាជិកនៃគណៈប្រធានទីមួយ ឬកូរ៉ុមនៃពួកសាវកដប់ពីរនាក់
-
វគ្គបទគម្ពីរចំណេះចំណានខាងគោលលទ្ធិទាំងនេះ ឬវគ្គបទគម្ពីរផ្សេងទៀតនៃការជ្រើសរើសរបស់អ្នក ៖ អេសាយ ៥:២០; កូរិនថូស ទី១ ៦:១៩–២០ ( សូមមើលផងដែរ ខទី ១៨ ); នីហ្វៃទី២ ២:២៧; នីហ្វៃទី២ ៣២:៨–៩; អាលម៉ា ៤១:១០ និង គោលលទ្ធិ និងសេចក្តីសញ្ញា ៦៤:៩–១១
បន្ទាប់ពីសិស្សបានជ្រើសរើសជម្រើសមួយដើម្បីសិក្សារួចហើយ សូមបង្ហាញការណែនាំដូចខាងក្រោម ៖
សិក្សាការបង្រៀនពីព្យាការីរបស់ព្រះអម្ចាស់ ហើយរៀបចំខ្លួនចែកចាយដូចតទៅនេះ ៖
-
ការព្រមានដែលព្រះអម្ចាស់បានប្រទានតាមរយៈព្យាការីរបស់ទ្រង់ ។
-
ពរជ័យដែលយើងអាចទទួលបាន ឬបញ្ហាប្រឈមនានាដែលយើងអាចជៀសវាងបានដោយការធ្វើតាមការព្រមានទាំងនេះ ។ ទាំងនេះអាចមកពីអ្វីដែលអ្នកបានសិក្សា ឬមកពីគំនិត និងបទពិសោធន៍របស់អ្នក ។
-
តើអ្នកមានអារម្មណ៍យ៉ាងណាដែលថាការព្រមាននេះគឺជាភស្តុតាងនៃសេចក្តីស្រឡាញ់របស់ព្រះ ឬបំណងប្រាថ្នារបស់ទ្រង់សម្រាប់យើងដើម្បីមានសុភមង្គល ។
អ្នកអាចអញ្ជើញសិស្សម្នាក់ៗឲ្យជ្រើសរើសការព្រមានមួយរបស់ព្យាការីដែលពួកគេបានរកឃើញក្នុងជំហានទី ១ នៃការសិក្សារបស់ពួកគេ ហើយសរសេរវានៅលើក្ដារខៀន ។ ជាជម្រើសមួយផ្សេងទៀត សិស្សអាចសរសេរការព្រមាននោះនៅលើក្រដាសមួយសន្លឹក ហើយបិទវានៅក្នុងថ្នាក់រៀន ។ សូមអញ្ជើញសិស្សឲ្យអានការព្រមានដែលអ្នកដទៃបានសរសេរ ។ បន្ទាប់មក សិស្សអាចជ្រើសរើសការព្រមានពីរបី ដើម្បីពិភាក្សាលម្អិតបន្ថែមទៀត ។ អ្នកអាចសុំសិស្សដែលបានសរសេរការព្រមានដែលបានជ្រើសរើសនោះឲ្យចែកចាយចម្លើយរបស់ពួកគេចំពោះជំហានទី ២ ឬ ៣ ចេញពីការសិក្សារបស់ពួកគេ ។
នៅពេលសិស្សស្តាប់ និងចូលរួមក្នុងការពិភាក្សា សូមអញ្ជើញពួកគេឲ្យគិតពិចារណាពីស្ថានភាព និងតម្រូវការផ្ទាល់ខ្លួនរបស់ពួកគេ ។ សូមលើកទឹកចិត្តពួកគេឲ្យពិចារណាថាតើព្រះអម្ចាស់មានការព្រមាន ឬមានសារលិខិតជាក់លាក់សម្រាប់ពួកគេដែរឬអត់ ។
ការធ្វើតាមព្យាការី
សូមគិតពិចារណាពីគំនិត និងអារម្មណ៍ដែលព្រះវិញ្ញាណបរិសុទ្ធអាចនឹងមានព្រះបន្ទូលមកកាន់អ្នកនៅក្នុងមេរៀននេះអំពីព្រះអម្ចាស់ និងព្យាការីរបស់ទ្រង់ ។ សូមបន្ថែមឃ្លាមួយ ឬទាំងពីរខាងក្រោមទៅក្នុងសៀវភៅកំណត់ហេតុការសិក្សារបស់អ្នក ហើយបំពេញវាដោយគំនិត ឬអារម្មណ៍របស់អ្នក ៖
អ្វីមួយដែលខ្ញុំចង់ចងចាំអំពីព្រះអម្ចាស់ និងព្យាការីរបស់ទ្រង់គឺ …
ខ្ញុំចង់ធ្វើតាមព្យាការីរបស់ព្រះអម្ចាស់ដោយសារ …
អ្នកអាចបញ្ចប់ដោយសុំឲ្យសិស្សពីរបីនាក់ចែកចាយអ្វីដែលពួកគេបានសរសេរ ។ អ្នកក៏អាចចែកចាយអារម្មណ៍ដែលអ្នកមានអំពីព្រះអម្ចាស់ និងពួកព្យាការីរបស់ទ្រង់ នៅពេលអ្នករៀបចំ និងបង្រៀនមេរៀននេះផងដែរ ។
ទន្ទេញ
អ្នកអាចចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះសម្រាប់ អេសេគាល ៣:១៦–១៧ គឺ« ព្យាការីគឺជា ‹ អ្នកយាមដល់ពូជពង្សអ៊ីស្រាអែល › »។ គំនិតសម្រាប់សកម្មភាពទន្ទេញ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។