“Auai i Galuega o le Malumalu ma Talafaasolopito o Aiga: “O le A ō A‘e i le Mauga o Siona Faaola,’” Tusi Lesona a le Faia’oga Seminare o le Feagaiga Tuai (2026)
“Auai i Galuega o le Malumalu ma Talafaasolopito o Aiga: “O le A ō A‘e i le Mauga o Siona Faaola,’” Tusi Lesona a le Faia’oga Seminare o le Feagaiga Tuai
Sauniuniga mo le Malumalu: Lesona 204
Auai ai i Galuega o le Malumalu ma Talafaasolopito o Aiga
“O le A ō A‘e i le Mauga o Siona Faaola”
Faaola, Togiola, ma le Laveai, o faalagiga ia ua tuuina atu ia Iesū Keriso o Le na faauuina e le Tamā Faalelagi e laveai i tatou mai lo tatou tulaga pa’ū (tagai i le Isaia 61:1–3).Ua valaaulia i tatou e le Faaola e faatasi ma Ia i Lana galuega o ni “faaola” (tagai i le Opetaia 1:21) a o tatou auai i le laveaiga o o tatou augatuaa ua maliliu.O lenei lesona e mafai ona fesoasoani i tagata a’oga e faatu se sini ia avea atili ai faapei o le Faaola e ala i le auai ai i galuega o le malumalu ma talafaasolopito o aiga.
Sauniuniga a le tagata a’oga: Valaaulia tagata a’oga e fai se mea e fesootai i le galuega a le malumalu ma le talafaasolopito o aiga, e pei o se tasi o mea nei:
Fatu se faitotoa i luga o le FamilySearch.org.
Fa’aalu ni nai minute e suesue ai faamatalaga e uiga i lou aiga i luga o le FamilySearch.org.
Sue se igoa o se tasi o ou tuaa o lo o manaomia pea ona faamaeaina sauniga o le malumalu.
Fesili i se matua po o matua o matua, e faasoa mai se mea e uiga i o latou olaga pe e uiga i se tuaa.
Gaoioiga e Ono Mafai Ona Aoaoina Ai
Agai atu e Laveai
Mafaufau e amata le vasega i le tusiaina o le upu Laveai i luga o le laupapa.
Ona faaali atu lea o le ata o paionia taavale tosolima a Martin ma Willie , ma valaaulia tagata a’oga e faasoa mai auiliiliga mai le ata e faaalia ai le manaomia o se laveai.Po o lou fesili atu i tagata a’oga po o a mea latou te iloa e uiga i le mea na tupu o lo o faaalia i lenei ata.Atonu o le a aoga le aotelega o lo o i lalo.
Mai le 1856 i le 1860, e faitau afe paeonia o Le Au Paia o Aso e Gata Ai na faimalaga atu i le Vanu o Sate Leki e faaaoga ai taavale tosolima.Ia Oketopa 1856, na auina atu ai e Brigham Young le au laveai e fesoasoani i tagata o ‘au taavale tosolima a Martin ma Willie, o e o lo o iai pea i le fiaselau maila le mamao [mai Sate Leki] ma ua vave lata ona o’o ane le tau malulu.
Na faasoa mai e Bishop W. Christopher Waddell o le Au Epikopo Pule Faamalumalu le tulaga lenei:
Sa faamatala e se tasi o le vaega a Uili le tulaga atuatuvale a o lei taunuu le ‘au lavea’i autu.Na ia faasoa mai: “I le taimi lava na foliga ai o le a leiloloa uma, … ma sa foliga mai ua le o toe tele se faamoemoe e ola ai pea sa pei o se emo o se uila mai le vanimonimo, le tali mai o le Atua ia matou tatalo.O se vaega lavea’i na aumaia meaai ma sapalai … , na iloa atu. …Sa maeu lava lo matou loto faafetai atu ai i le Atua mo lo matou laveaiga.”
O nei au laveai o ni toa manumanu i le au paionia, na tuuina o latou ola i se tulaga lamatia i ni tulaga ogaoga o le tau ina ia aumaia le to’atele sa mafai [ona laveaiina] ma le saogalemu i le nogoaga e taunuu iai.(“Sili Atu Nai Lo o se Toa,” Liahona, Nov. 2023, 89)
-
Pe ana o oe o se tasi o nei paionia pagatia, aisea e te ono mafaufau ai o nei au laveai o ni toa?
Mafaufau e faaali atu se ata o se tasi o ou tuaa.E mafai ona e faasoa atu i tagata a’oga sina mea e uiga i lena tuaa.
E faapena foi ona valaauina i tatou e le Tamā Faalelagi ma Iesū Keriso e lavea’i o tatou tuaa ua maliliu.E mafai ona tatou faia lenei mea e ala i le auai i galuega o le malumalu ma talafaasolopito o aiga.
-
E ono faapefea e o tatou tuaa ua maliliu ona manaomia le fesoasoani ia laveaiina e pei o paionia o taavale tosolima?
Afai e manaomia, e mafai ona e faamatala atu, tatou te manaomia uma lava sauniga taua ina ia toe foi atu ai i le Tamā Faalelagi e aofia ai le papatisoga, mauaina o le meaalofa a le Agaga Paia, ma le faaeega paia o le malumalu.E le mafai ona maua e o tatou tuaa ua maliliu nei sauniga e i latou lava.Ua saunia e le Ali’i se auala mo i latou e maua ai nei sauniga, e ala i galuega o le malumalu mo e ua maliliu (tagai i le Mataupu Faavae ma Feagaiga 128:15).
Mafaufau loloto i tulaga nei:
-
O le a sou lagona e uiga i le auai ai i galuega o le malumalu ma talafaasolopito o aiga?Aisea?
I lenei lesona atoa, faamaumau soo se musumusuga faaleagaga e mafai ona fesoasoani ia te oe e iloa ai auala e mafai ai ona avea oe ma se tasi o le au laveai a le Tamā Faalelagi ma Iesū Keriso mo ou tuaa.
O Faaola i le Mauga o Siona
Mafaufau e tusi se ata faigofie o se mauga ma se malumalu ma valaaulia tagata a’oga e faia lenei me lava e tasi i a latou api talaaga mo suesuega.Faaigoa le ata i le Mauga o Siona.Ona aotele le ma faitau le mea lenei ina ia fesoasoani i tagata a’oga ia malamalama e uiga i le faatatauga o Opetaia.
Ina ua mavae le toilalo o Ierusalema, sa valoia e le perofeta o Opetaia o le to’atele o fanau a Esau (le uso masaga a le perofeta o Iakopo) o le a faaumatia ona o le amioleaga.Na valoia foi e Opetaia se taumafaiga e lavea’i ai nei suli ma le to’atele o isi.E ono fesoasoani le iloa e faapea i lenei fuaiupu “Mauga o Siona”, e mafai ona faasino i le aai o Ierusalema ma lona malumalu.
Faitau le Opetaia 1:17, 21, vaavaai mo upu e faamanatu ai ia te oe le malumalu.
E ono faailoa mai e tagata a’oga upu e pei o le lavea’i, paia, po o faaola.Valaaulia tagata a’oga e faailoga le fasifuaitau “o le a o mai i luga o le mauga o Siona le au faaola” (Opetaia 1:21).
-
O le a sou manatu e uiga i le avea ai ma se “faaola … i luga o le mauga o Siona” (Opetaia 1:21)?
Na faamatala mai e Elder Gerrit W. Gong o le Korama a Aposetolo e To’asefululua e faapea:
Ua tuuina mai e le Ali’i ia i tatou le avanoa paia e avea atili ai e faapei o Ia a o tatou ofoina atu sui sauniga faaolaina o le malumalu e manaomia e isi, ae le mafai ona faia mo i latou lava.E oo ina tatou atoatoa atili ma faaatoatoaina a o avea i tatou ma “faaola … i luga o le mauga o Siona.”(“Fiafia ma Faavavau”, Liahona, Nov. 2022, 85)
Atonu e manaomia ona e faamalamalama atu, o le sui o lona uiga o le suitulaga i se isi tagata.
E mafai ona tusi e tagata a’oga a latou tali i le fesili lenei i lalo ifo o a latou atatusi o le malumalu.
-
O le a se mea e te aoaoina mai ia Opetaia ma Elder Gong e uiga i le avea ai ma “faaola … i luga o le mauga o Siona” (Opetaia 1:21)?
E ui e ono faaaoga e tagata a’oga ni upu eseese, latou te ono faasoa mai le upumoni lenei: E mafai ona avea atili i tatou faapei o le Faaola pe a tatou mauaina o tatou tuaa ma faia sauniga faaolaina mo i latou i le malumalu.
-
E ono mafai faapefea e galuega o le malumalu mo tuaa ua maliliu ona faatusa i se auala faatauvaa i le mea na faia e le Faaola mo i tatou?
E mafai ona e faamatala atu e faapea e ala i Lana Togiola, ua mafai ai e le Faaola ona lavea’i i tatou mai le agasala ma le oti—o se mea e le mafai ona tatou faia mo i tatou lava (tagai i le Alema 34:8–12).E faapena foi, ona mafai ona tatou fesoasoani e lavea’i o tatou tuaa a o tatou faia sauniga faaolaina mo i latou—o se mea e le mafai ona latou faia mo i latou lava.
-
O a uiga faaKeriso e mafai ona tatou atiina a’e a o tatou sailia o tatou tuaa ma faia sauniga mo i latou i le malumalu?
O le amataina ai
Faavasega tagata a’oga i ni vaega to’alaiti ma valaaulia i latou e filifili se numera i le va o le 1 ma le 4.Ona tufatufa lea o le pepa faasafua “Auala e Fa e Auai ai i Galuega o le Malumalu ma Talafaasolopito o Aiga.”Valaaulia vaega ta’itasi e faitau le parakalafa e fetaui ma le numera ua latou filifilia, ona talanoaina lea o fesili o i lalo i a latou vaega.Po o le faitau o auala uma e fa ma filifili se tasi latou te mananao e taulai atu iai.
Faaali atu fesili nei.E mafai ona tusi e tamaiti a’oga a latou tali faataamilo i a latou atatusi o le malumalu.
-
O a ni auala faatino e mafai ona faia e se talavou e pei ona fautuaina e Elder Gong?
-
O a nisi o auala e mafai ai ona tatou auai ai i galuega o le malumalu ma talafaasolopito o aiga?(E te ono faaaofia ai ou aafiaga po o aafiaga o isi.)
Valaaulia ni nai tagata a’oga e faasoa mai a latou tali ma le vasega.E mafai ona e tusi a latou tali faataamilo i le atatusi o le malumalu o loo i luga o le laupapa.E te ono maua manatu faaopoopo i le tusiga “Family History Is for Everyone: 9 Fun Ways to Participate[O Talafaasolopito o Aiga e mo Tagata Uma: 9 Auala Fiafia e Auai Ai],” e maua i le ChurchofJesusChrist.org.
Afai e lava le taimi, faaaoga le Ordinances Ready[Saunia mo Sauniga] o lo o maua i le FamilySearch.org e faaali ai i tagata a’oga le auala e faaavanoa ai igoa mo le malumalu.
-
O a faamanuiaga po o aafiaga na e maua a o e auai i galuega o le malumalu ma talafaasolopito o aiga?
O lau sini
Saili le fesoasoani a le Agaga Paia a o e faia se sini i totonu o lau api talaaga e faatino ai se tasi o fautuaga o loo lisiina i luga o le laupapa.Atonu e ono fesoasoani manatu nei ia te oe:
-
E faapefea ma o afea e mafai ai ona e faia galuega o talafaasolopito o aiga
-
O ai e mafai ona fesoasoani ia te oe
-
O le auala e mafai ai e lenei sini ona fesoasoani ia te oe e avea atili ai e faapei o Iesū Keriso
Mafaufau e ta’uina atu o le tele o uarota ma paranesi e iai faufautua o malumalu ma talafaasolopito o aiga e mafai ona fesoasoani i tagata a’oga e amatalia ona auai i galuega o le malumalu ma talafaasolopito o aiga.
Faaiu e ala i le faailoaina atu o le mautinoa i le gafatia o au tagata a’oga e avea ma tagata laveai ma “faaola … i luga o le mauga o Siona” (Opetaia 1:21).