« សារៈសំខាន់នៃការគោរពប្រតិបត្តិក្នុងការនាំអ្នកដទៃមកកាន់ព្រះគ្រីស្ទ ៖ ការគោរពប្រតិបត្តិក្នុងកិច្ចការផ្សព្វផ្សាយសាសនា » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« សារៈសំខាន់នៃការគោរពប្រតិបត្តិក្នុងការនាំអ្នកដទៃមកកាន់ព្រះគ្រីស្ទ ៖ ការគោរពប្រតិបត្តិក្នុងកិច្ចការផ្សព្វផ្សាយសាសនា » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ការរៀបចំខ្លួនធ្វើជាអ្នកផ្សព្វផ្សាយសាសនា ៖ មេរៀនទី ២០០
សារៈសំខាន់នៃការគោរពប្រតិបត្តិក្នុងការនាំអ្នកដទៃមកកាន់ព្រះគ្រីស្ទ
ការគោរពប្រតិបត្តិក្នុងកិច្ចការផ្សព្វផ្សាយសាសនា
ការជ្រើសរើសដើម្បីគោរពប្រតិបត្តិ ដោយសារយើងស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទ គឺជាផ្នែកដ៏សំខាន់មួយនៃដំណើរជីវិតរមែងស្លាប់របស់យើង ( សូមមើល យ៉ូហាន ១៤:១៥ ) ។ ការគោរពប្រតិបត្តិផ្ទាល់ខ្លួនរបស់យើងមានសារៈសំខាន់ជាពិសេសនៅពេលយើងតំណាងឲ្យព្រះអង្គសង្គ្រោះព្រះយេស៊ូវគ្រីស្ទ ក្នុងនាមជាសមាជិកនៃសាសនាចក្ររបស់ទ្រង់ និងជាពួកអ្នកផ្សព្វផ្សាយសាសនាពេញម៉ោង ។ មេរៀននេះអាចជួយសិស្សឲ្យស្គាល់ពីសារៈសំខាន់នៃការគោរពប្រតិបត្តិក្នុងការធ្វើកិច្ចការរបស់ព្រះអង្គសង្គ្រោះក្នុងនាមជាពួកអ្នកផ្សព្វផ្សាយសាសនា ។
ការរៀបចំសិស្ស ៖ អញ្ជើញសិស្សឲ្យពិនិត្យមើលចំណុចមួយចំនួននៅក្នុងបទដ្ឋានសម្រាប់ការបម្រើជាអ្នកផ្សព្វផ្សាយសាសនាដែលមាននៅក្នុងផ្នែកទី ៣ នៃ « បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ » នៅក្នុងបណ្ណាល័យដំណឹងល្អ ។ ម្យ៉ាងវិញទៀត សិស្សអាចនិយាយជាមួយនរណាម្នាក់ដែលបានបម្រើបេសកកម្ម ហើយសួរថាតើបទដ្ឋានបេសកកម្មអ្វីដែលពួកគេចងចាំ ។
សកម្មភាពរៀនសូត្រដែលអាចមាន
បទដ្ឋានអ្នកផ្សព្វផ្សាយសាសនា
សូមពិចារណាចាប់ផ្តើមមេរៀនដោយការបង្ហាញរូបភាពនៃអ្នកផ្សព្វផ្សាយសាសនា និងធនធាន បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ ពីគេហទំព័រ ChurchofJesusChrist.org ។ អ្នកអាចពន្យល់សិស្សថា ពួកអ្នកផ្សព្វផ្សាយសាសនាត្រូវបានរំពឹងថានឹងធ្វើតាមបទដ្ឋានជាក់លាក់មួយចំនួន ខណៈពេលដែលពួកគេតំណាងឲ្យព្រះអង្គសង្គ្រោះ ។
-
តើបទដ្ឋានអ្វីខ្លះដែលពួកអ្នកផ្សព្វផ្សាយសាសនាត្រូវបានរំពឹងទុកថានឹងគោរពតាម ?
ប្រសិនបើចាំបាច់ អ្នកអាចចែកចាយបទដ្ឋានអ្នកផ្សព្វផ្សាយសាសនាមួយចំនួនដែលមានរាយនៅខាងក្រោមនេះ ចេញពីបទពិសោធន៍ផ្ទាល់ខ្លួនរបស់អ្នក ឬផ្សេងទៀតដែលមាននៅក្នុង ផ្នែកទី ៣ ឬផ្នែកទី ៧ នៃបទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ ពីគេហទំព័រ ChurchofJesusChrist.org ។ អ្នកអាចចង្អុលបង្ហាញថា ពួកអ្នកផ្សព្វផ្សាយសាសនាក៏ត្រូវបានរំពឹងទុកថានឹងធ្វើតាមការប្រឹក្សារបស់ថ្នាក់ដឹកនាំបេសកកម្មរបស់ពួកគេផងដែរ នៅពេលពួកគេដឹកនាំកិច្ចការរបស់ព្រះអម្ចាស់ដោយសុចរិត ។
បទដ្ឋានអ្នកផ្សព្វផ្សាយសាសនាមួយចំនួន ៖
-
ចូរមានចិត្តល្អ វិជ្ជមាន និងលើកស្ទួយ ។
-
តែងតែនៅជាមួយដៃគូអ្នកជានិច្ច ។
-
ចៀសវាងស្ថានភាពទាំងឡាយដែលអាចប្រែជាមានគ្រោះថ្នាក់ខាងរាងកាយ និងខាងវិញ្ញាណ ។ កុំប្រើឧបករណ៍ដែលមានថាមពល ដំណើរការគ្រឿងចក្រធនធ្ងន់ ឬជិះត្រាក់ទ័រ រថយន្តសណ្ដោង ឬកុងទុន័រសន្តោង ។
-
ចៀសវាង ទូរទស្សន៍ ភាពយន្ដ វីដេអូហ្គេម និងវីដេអូដែលមិនមានការអនុញ្ញាត ។
-
ដាក់កម្រិតទំនាក់ទំនងខាងរាងកាយជាមួយនរណាម្នាក់ដែលមានភេទផ្ទុយគ្នា នៅតឹ្រមការចាប់ដៃប៉ុណ្ណោះ ។
-
ហេតុអ្វីបានជាបទដ្ឋានមួយចំនួននេះអាចជាការពិបាកដើម្បីឲ្យអ្នកផ្សព្វផ្សាយសាសនាគោរពតាម ? ហេតុអ្វីបានជាបទដ្ឋានទាំងនោះមានសារៈសំខាន់ចំពោះពួកអ្នកផ្សព្វផ្សាយសាសនាដើម្បីធ្វើតាម ?
អ្នកអាចអញ្ជើញសិស្សពីរបីនាក់ឲ្យចែកចាយគំរូនៃអ្នកផ្សព្វផ្សាយសាសនាម្នាក់ដែលពួកគេស្គាល់ បទដ្ឋានដែលពួកគេត្រូវបានសុំឲ្យប្រកាន់ខ្ជាប់ និងរបៀបដែលព្រះអង្គសង្គ្រោះបានប្រទានពរដល់ពួកគេសម្រាប់កិច្ចខិតខំរបស់ពួកគេ ។
ភាពសុចរិតផ្ទាល់ខ្លួន និងការគោរពប្រតិបត្តិ
អ្នកអាចចែកចាយសេចក្ដីថ្លែងការណ៍ខាងក្រោមនេះមកពីអែលឌើរ សូរ៉េស ដើម្បីជួយសិស្សឲ្យកំណត់នូវសេចក្តីពិតអំពីទំនាក់ទំនងនៃការគោរពប្រតិបត្តិ និងកិច្ចការផ្សព្វផ្សាយសាសនា ។
នៅក្នុងការមានប្រសាសន៍ទៅកាន់ពួកអ្នកផ្សព្វផ្សាយសាសនា អែលឌើរ អូលីសេស សូរ៉េស ក្នុងកូរ៉ុមនៃពួកសាវកដប់ពីរនាក់ បានបង្រៀន ៖
ភាពសុចរិតផ្ទាល់ខ្លួនគឺជាលក្ខណសម្បត្តិដ៏សំខាន់បំផុតមួយដើម្បីតំណាងឲ្យព្រះអង្គសង្គ្រោះនៅចំពោះមុខពិភពលោក ។ វាក៏ធ្វើឲ្យយើងមានភាពស័ក្តិសមក្នុងការមានព្រះវិញ្ញាណបរិសុទ្ធជាដៃគូរបស់យើងផងដែរ ។ …
ប្រសិនបើយើងជ្រើសរើសមិនគោរពប្រតិបត្ដិទេ នោះយើងនឹងមិនអាចតំណាងឲ្យព្រះអង្គសង្គ្រោះបានទេ ហើយយើងក៏នឹងមិនមានព្រះវិញ្ញាណនៃព្រះអម្ចាស់គង់នៅជាមួយយើងដែរ ។ … ដើម្បីធ្វើជាឥទ្ធិពលវិជ្ជមាននៅក្នុងជីវិតរបស់បុគ្គលដែលអ្នកបង្រៀន អ្នកត្រូវតែមានព្រះវិញ្ញាណនៃព្រះអម្ចាស់គង់នៅជាមួយអ្នក ។ …
ប្រសិនបើអ្នកគោរពតាមដោយដួងចិត្ដស្មោះស្ម័គ្រ នោះអ្នកនឹងបង្ហាញដល់ព្រះអម្ចាស់នូវឆន្ទៈរបស់អ្នកក្នុងការធ្វើតាមទ្រង់ សេចក្តីស្រឡាញ់របស់អ្នកចំពោះទ្រង់ និងចំពោះព្រះវរបិតាសួគ៌របស់យើង ។ ការរីកចម្រើនខាងវិញ្ញាណរបស់អ្នកនឹងកាន់តែទូលំទូលាយ ។ អ្នកនឹងស្គាល់ព្រះអង្គសង្គ្រោះ ហើយការណ៍នេះនឹងធ្វើឲ្យមានភាពខុសគ្នាទាំងស្រុងនៅក្នុងបេសកកម្ម និងក្នុងជីវិតរបស់អ្នក ។ ( ស្កត ថៃលឺ « Obedience Is Critical for Missionaries to Fulfill Their Responsibilities, Elder Soares Teaches »newsroom.ChurchofJesusChrist.org ថ្ងៃទី២៩ ខែមីនា ឆ្នាំ២០២១ )
-
តើយើងរៀនអ្វីខ្លះពីអែលឌើរ សូរ៉េស អំពីសារៈសំខាន់នៃការគោរពប្រតិបត្តិ ?
សិស្សអាចនឹងប្រើពាក្យសម្ដីផ្ទាល់ខ្លួនរបស់ពួកគេដើម្បីកំណត់នូវសេចក្ដីពិតមួយដូចជាភាពសុចរិតផ្ទាល់ខ្លួន និងការគោរពប្រតិបត្តិធ្វើឲ្យយើងមានលក្ខណសម្បត្ដិគ្រប់គ្រាន់ដើម្បីតំណាងឲ្យព្រះអង្គសង្គ្រោះ និងមានភាពជាដៃគូនៃព្រះវិញ្ញាណ ។
វាប្រហែលជាមានប្រយោជន៍ក្នុងការពន្យល់ថា ការគោរពប្រតិបត្តិរួមបញ្ចូលទាំងការរក្សាសេចក្ដីសញ្ញារបស់យើងជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ។ ការគោរពប្រតិបត្តិគឺជាផ្នែកមួយដ៏សំខាន់នៃភាពសុចរិតផ្ទាល់ខ្លួន និងជាការបង្ហាញនៃសេចក្តីស្រឡាញ់ចំពោះព្រះវរបិតាសួគ៌ និងព្រះយេស៊ូវគ្រីស្ទ ( សូមមើល យ៉ូហាន ១៤:១៥ ) ។
-
តើពរជ័យអ្វីខ្លះដែលអ្នកបានឃើញព្រះវរបិតាសួគ៌ និងព្រះយេស៊ូវគ្រីស្ទប្រទានដល់នរណាម្នាក់ដែលព្យាយាមគោរពតាមទ្រង់ទាំងទ្វេ ?
-
តើអ្នកបានឃើញពរជ័យទាំងនេះក្នុងជីវិតរបស់អ្នក ឬក្នុងជីវិតរបស់នរណាម្នាក់ដែលអ្នកស្គាល់ដោយរបៀបណា ?
សូមចំណាយពេលមួយភ្លែតដើម្បីពិចារណាពីការខិតខំប្រឹងប្រែងបច្ចុប្បន្នរបស់អ្នកប្រកបដោយការអធិស្ឋាន នៅក្នុងការគោរពប្រតិបត្ដិតាមព្រះវរបិតាសួគ៌ និងព្រះយេស៊ូវគ្រីស្ទ ។ សូមយាងអញ្ជើញព្រះវិញ្ញាណបរិសុទ្ធឲ្យជួយអ្នកដឹងនូវអ្វីដែលអ្នកកំពុងធ្វើបានល្អ ឬអ្វីដែលអ្នកប្រហែលជាត្រូវកែតម្រូវដើម្បីបង្ហាញសេចក្ដីស្រឡាញ់របស់អ្នកចំពោះទ្រង់ទាំងទ្វេឲ្យកាន់តែប្រសើរ ហើយនាំអ្នកដទៃមករកទ្រង់ទាំងទ្វេ ។
ការគោរពប្រតិបត្តិដ៏ស្មោះត្រង់ក្នុងកិច្ចការផ្សព្វផ្សាយសាសនា
ដើម្បីជួយសិស្សមើលឃើញពីរបៀបដែលការគោរពប្រតិបត្តិអាចជួយយើងនាំអ្នកដទៃមករកព្រះគ្រីស្ទបាន សូមពិចារណាពិភាក្សាអំពីដំណើររឿងនៃឥទ្ធិពលរបស់ដានីយ៉ែលលើស្ដេចដារីយុសពី ដានីយ៉ែល ៦ ។ សិស្សប្រហែលជាបានសិក្សាដំណើររឿងនេះនៅក្នុង មេរៀនទី ១៤៥ ៖ « ដានីយ៉ែល ៦ » ។ អ្នកអាចសង្ខេបដំណើរនេះយ៉ាងខ្លីជាមួយកថាខណ្ឌខាងក្រោម ។
ទោះជាបានក្លាយជាទាសករនៅបាប៊ីឡូន និងពើស៊ីក៏ដោយ ដានីយ៉ែលបានបម្រើព្រះអម្ចាស់ដោយស្មោះត្រង់ ។ ស្តេចដារីយុសលើកដានីយ៉ែលឡើងជា « កំពូលលើពួកអធិបតី និងពួកនាយកទាំងប៉ុន្មាន » នៅក្នុងនគររបស់ទ្រង់ « ដ្បិតលោក [ ដានីយ៉ែល ] មានវិញ្ញាណយ៉ាងស្រួចស្រាល់ » ( ដានីយ៉ែល ៦:៣ ) ។ ក្នុងការខិតខំងដើម្បីបង្ខូចកេរ្តិ៍ឈ្មោះដានីយ៉ែលនៅក្នុងក្រសែភ្នែករបស់ស្តេចដារីយុស អធិបតីផ្សេងទៀតបានរៀបចំផែនការមួយដើម្បីធ្វើឲ្យភាពស្មោះត្រង់របស់ដានីយ៉ែលចំពោះស្តេចដារីយុសប្រឆាំងទាស់នឹងភាពស្មោះត្រង់របស់ដានីយ៉ែលចំពោះព្រះ ។ ពួកគេបានដាក់សម្ពាធដល់ដារីយុសឲ្យប្រកាសថា ការសូមអ្វីពីព្រះណា ឬពីអ្នកណាផ្សេងក្រៅពីស្ដេចដារីយុស នោះនឹងត្រូវទទួលទោសប្រហារជីវិតនៅក្នុងរូងសិង្ហ ( សូមមើល ដានីយ៉ែល ៦:៤–៩ ) ។ ទោះជាមានគ្រោះថ្នាក់ក៏ដោយ ដានីយ៉ែលបានបង្ហាញឆន្ទៈក្នុងការគោរពប្រតិបត្ដិដោយការបន្តអធិស្ឋានទៅព្រះ ។ នៅពេលដែលការអធិស្ឋានរបស់ដានីយ៉ែលត្រូវបានរាយការណ៍ ដារីយុសបានយល់ព្រមដោយស្ទាក់ស្ទើរក្នុងការបោះលោកចូលទៅក្នុងរូង ។
សូមអាន ដានីយ៉ែល ៦:១៨–២៨ ដោយរកមើលឥទ្ធិពលដែលការគោរពប្រតិបត្ដិរបស់ដានីយ៉ែលចំពោះព្រះអម្ចាស់មានទៅលើស្តេចដារីយុស ។
-
តើអ្នកបានរកឃើញអ្វីខ្លះ ?
-
តើការខិតខំប្រឹងប្រែងរបស់យើងដើម្បីគោរពតាមព្រះអម្ចាស់មានឥទ្ធិពលវិជ្ជមានទៅលើរបៀបដែលអ្នកដទៃមានមើលទៅព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?
ចែកចាយពីអ្វីដែលអ្នកបានរៀន
សូមពិចារណាអញ្ជើញសិស្សឲ្យបង្កើតគម្រោងដែលអាចប្រើសម្រាប់សុន្ទរកថាដែលមានរយៈពេលពីបីទៅប្រាំនាទី ។ ដើម្បីជួយសិស្សបង្កើតគម្រោងរបស់ពួកគេ អ្នកអាចផ្តល់សំណៅមេរៀន « សារៈសំខាន់នៃការគោរពប្រតិបត្តិនៅពេលចែកចាយដំណឹងល្អរបស់ព្រះយេស៊ូវគ្រីស្ទ » ។
ការណែនាំខាងក្រោមអាចត្រូវបានបង្ហាញដើម្បីជួយសិស្សបង្កើតគម្រោងនេះ ។
បង្កើតគម្រោងមួយដែលអាចត្រូវបានប្រើដើម្បីថ្លែងសុន្ទរកថាពីបីទៅប្រាំនាទីអំពីសារៈសំខាន់នៃការគោរពប្រតិបត្តិ នៅពេលចែកចាយដំណឹងល្អរបស់ព្រះអង្គសង្គ្រោះជាមួយអ្នកដទៃ ។
រួមបញ្ចូលយ៉ាងហោចណាស់បីចំណុចខាងក្រោមនៅក្នុងគម្រោងរបស់អ្នក ។
-
ខគម្ពីរអំពីការគោរពប្រតិបត្តិ និងរបៀបដែលវាអាចអនុវត្តចំពោះការចែកចាយដំណឹងល្អនៃព្រះយេស៊ូវគ្រីស្ទ ។
-
គំរូមួយចេញពីព្រះជន្ម ឬការបង្រៀនរបស់ព្រះយេស៊ូវគ្រីស្ទ ដែលអាចជួយនរណាម្នាក់ដែលខិតខំគោរពប្រតិបត្តិ ។
-
គំរូសម័យទំនើបអំពីសារៈសំខាន់នៃការគោរពប្រតិបត្តិ និងរបៀបដែលព្រះវរបិតាសួគ៌ និងព្រះយេស៊ូវគ្រីស្ទនឹងប្រទានពរដល់កិច្ចខិតខំប្រឹងប្រែងរបស់យើង ។
-
សម្រង់ប្រសាសន៍ខ្លីមួយពីថ្នាក់ដឹកនាំសាសនាចក្រដែលសង្កត់ធ្ងន់លើការខិតខំប្រឹងប្រែងដើម្បីគោរពប្រតិបត្តិ និងពរជ័យសម្រាប់ការធ្វើដូច្នេះ ។
-
អារម្មណ៍ផ្ទាល់ខ្លួនរបស់អ្នកអំពីមូលហេតុដែលការគោរពប្រតិបត្តិមានសារៈសំខាន់ នៅពេលយើងតំណាងឲ្យព្រះអង្គសង្គ្រោះក្នុងនាមជាសមាជិកនៃសាសនាចក្ររបស់ទ្រង់ និងជាពួកអ្នកផ្សព្វផ្សាយសាសនារបស់ទ្រង់ ។
អ្នកក៏អាចផ្តល់ឲ្យសិស្សនូវសំណៅមេរៀនទីពីរនៅក្នុងមេរៀននេះ ដើម្បីរៀបចំគម្រោងសម្រាប់ការឡើងនិយាយរបស់ពួកគេ ។ ពួកគេអាចដាក់ចំណងជើងនៅក្នុងប្រអប់ទីមួយ ការណែនាំដ៏សាមញ្ញមួយអំពីសុន្ទរកថារបស់ពួកគេនៅក្នុងប្រអប់ទីពីរ ដំណើររឿងចំនួនបីដែលពួកគេបានសម្រេចចិត្តបញ្ចូលចេញពីបញ្ជីខាងលើនៅក្នុងប្រអប់បីបន្ទាប់ និងទីបន្ទាល់របស់ពួកគេនៅក្នុងប្រអប់ចុងក្រោយ ។
បន្ទាប់ពីសិស្សបានបង្កើតគម្រោងរបស់ពួកគេហើយ ពួកគេអាចធ្វើការជាមួយដៃគូដើម្បីហាត់ ឬកែលម្អសុន្ទរកថារបស់ពួកគេ ។ បន្ទាប់មកអ្នកអាចអញ្ជើញសិស្សឲ្យចែកចាយសុន្ទរកថារបស់ពួកគេជាមួយថ្នាក់ទាំងមូល ។ សិស្សមួយចំនួនប្រហែលជាមិនស្រួលចិត្តក្នុងការចែកចាយឮៗនោះទេ ។ អ្នកអាចលើកទឹកចិត្តពួកគេឲ្យយកគម្រោងរបស់ពួកគេទៅផ្ទះ ហើយបង្រៀនសមាជិកគ្រួសារ ឬមិត្តភក្តិ ។
សូមពិចារណាចែកចាយទីបន្ទាល់របស់អ្នកអំពីសារៈសំខាន់នៃភាពសុចរិតផ្ទាល់ខ្លួន នៅពេលយើងតំណាងឲ្យព្រះអង្គសង្គ្រោះ និងដំណឹងល្អរបស់ទ្រង់ទៅកាន់អ្នកដទៃ ។