« ការចែកចាយដំណឹងល្អតាមរបៀបធម្មតាៗ ៖ ការចែកចាយដំណឹងល្អអាចជាផ្នែកមួយនៃជីវិតប្រចាំថ្ងៃ » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការចែកចាយដំណឹងល្អតាមរបៀបធម្មតាៗ ៖ ការចែកចាយដំណឹងល្អអាចជាផ្នែកមួយនៃជីវិតប្រចាំថ្ងៃ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ការរៀបចំខ្លួនធ្វើជាអ្នកផ្សព្វផ្សាយសាសនា ៖ មេរៀនទី ១៩៧
ការចែកចាយដំណឹងល្អតាមរបៀបធម្មតាៗ
ការចែកចាយដំណឹងល្អអាចជាផ្នែកមួយនៃជីវិតប្រចាំថ្ងៃ
ក្នុងនាមជាសមាជិកនៃសាសនាចក្ររបស់ព្រះអង្គសង្គ្រោះ វាជាពរជ័យ និងទំនួលខុសត្រូវរបស់យើងក្នុងការជួយឲ្យ « អស់ទាំងគ្រួសារនៅលើផែនដីនឹងបានពរ គឺដោយព្រះពរទាំងឡាយនៃដំណឹងល្អ » ( អ័ប្រាហាំ ២:១១) ។ ជួនកាល វាហាក់ដូចជាពិបាកក្នុងការស្វែងរកវិធីដើម្បីណែនាំអ្នកដទៃឲ្យស្គាល់ដំណឹងល្អរបស់ព្រះអង្គសង្គ្រោះ ។ មេរៀននេះអាចជួយសិស្សឲ្យហាត់ចែកចាយដំណឹងល្អនៃព្រះយេស៊ូវគ្រីស្ទជាមួយអ្នកដទៃតាមរបៀបសាមញ្ញៗ ។
ការរៀបចំសិស្ស ៖ សូមអញ្ជើញសិស្សឲ្យជញ្ជឹងគិតដោយការអធិស្ឋានអំពីស្ថានភាពដែលពួកគេអាចចែកចាយអ្វីមួយអំពីសាសនាចក្រ ឬដំណឹងល្អជាផ្នែកមួយនៃការសន្ទនាទូទៅ ។ សិស្សអាចគិតអំពីរបៀបដើម្បីធ្វើការណ៍នេះឲ្យមានប្រសិទ្ធភាព ហើយស្វែងរកឱកាសដើម្បីធ្វើដូច្នេះ ។
សកម្មភាពរៀនសូត្រដែលអាចមាន
ការចែកចាយអ្វីដែលប្អូនចូលចិត្ត
សូមពិចារណាចាប់ផ្តើមមេរៀនដោយការអញ្ជើញសិស្សពីរឬបីនាក់ឲ្យពិពណ៌នាអំពីវិស្សមកាល អាហារដែលចូលចិត្ដ ឬអ្វីផ្សេងទៀតដែលមិនមានលក្ខណៈផ្ទាល់ខ្លួនពេក ។ ពួកគេក៏អាចចែកចាយពីមូលហេតុដែលពួកគេចង់ណែនាំអ្នកផ្សេងទៀតឲ្យសាកល្បងវាផងដែរ ។
បង្ហាញជម្រើសខាងក្រោមបន្ទាប់ពីសិស្សម្នាក់ៗចែកចាយ ។ សូមឲ្យសិស្សក្នុងថ្នាក់លើកចំនួនម្រាមដៃដែលពិពណ៌នាយ៉ាងល្អបំផុតពីអារម្មណ៍របស់ពួកគេចំពោះអ្វីដែលត្រូវបានចែកចាយ ។
-
ឥឡូវនេះខ្ញុំកាន់តែចាប់អារម្មណ៍ក្នុងការសាកល្បងអ្វីដែលពួកគេបានចែកចាយ ។
-
ខ្ញុំចាប់អារម្មណ៍បន្តិចបន្តួចក្នុងការសាកល្បងវា ។
-
ចំណាប់អារម្មណ៍របស់ខ្ញុំចំពោះវាមិនផ្លាស់ប្តូរទេ ។
អ្នកអាចចង្អុលបង្ហាញថា វាអាចងាយស្រួលក្នុងការចែកចាយរបស់ដែលយើងចូលចិត្ត សូម្បីតែនៅពេលដែលអ្នកផ្សេងទៀតសម្រេចចិត្តមិនសាកល្បងអ្វីដែលយើងបានចែកចាយក៏ដោយ ។
-
តើអ្នកគិតថាសកម្មភាពនេះអាចអនុវត្តយ៉ាងណាចំពោះការចែកចាយជំនឿរបស់យើងអំពីព្រះអង្គសង្គ្រោះ និងសាសនាចក្ររបស់ទ្រង់ជាមួយអ្នកដទៃ ?
-
តាមទស្សនវិស័យដ៏អស់កល្បជានិច្ច តើជំនឿសំខាន់ៗអ្វីខ្លះដែលអ្នកអាចចែកចាយជាមួយមិត្តភក្តិ និងក្រុមគ្រួសាររបស់អ្នក ? ហេតុអ្វី ?
មូលហេតុដែលយើងចែកចាយ
ដើម្បីជួយសិស្សឲ្យស្គាល់ពរជ័យមួយចំនួនរបស់ព្រះយេស៊ូវគ្រីស្ទ និងដំណឹងល្អរបស់ទ្រង់ដែលយើងអាចចែកចាយ សូមពិចារណាអញ្ជើញក្រុមតូចៗឲ្យសិក្សាវគ្គបទគម្ពីរខាងក្រោម ។ សិស្សម្នាក់ៗក្នុងក្រុមអាចសិក្សាខគម្ពីរផ្សេងៗគ្នា ហើយបន្ទាប់មករាយការណ៍ទៅក្រុមនូវអ្វីដែលពួកគេបានរកឃើញ ។
សិក្សាវគ្គបទគម្ពីរខាងក្រោម ដោយរកមើលមូលហេតុដែលអ្នកចង់ឲ្យមនុស្សជាទីស្រឡាញ់របស់អ្នកស្គាល់ព្រះអង្គសង្គ្រោះ ។
អេសាយ ១:១៨
អេសាយ ២៥:៤, ៨–៩
អេសាយ ៤០:២៨–៣១
អេសាយ ៤៣:២៥
អេសាយ ៥៤:១០
-
តើសេចក្តីពិតមួយណាដែលអ្នករំភើបបំផុតក្នុងការចែកចាយជាមួយមនុស្សជាទីស្រឡាញ់របស់អ្នក ? ហេតុអ្វី ?
យកឈ្នះលើភាពស្ទាក់ស្ទើរ
សូមឲ្យសិស្សដឹងថា វាជារឿងធម្មតាទេក្នុងការមានអារម្មណ៍ភ័យខ្លាចអំពីការចែកចាយដំណឹងល្អនៅពេលខ្លះ ។ សូម្បីតែព្យាការីដ៏អស្ចារ្យដូចជាហេណុក ( សូមមើល ម៉ូសេ ៦:២៧, ៣១ ) និងយេរេមាក៏ត្រូវយកឈ្នះលើការស្ទាក់ស្ទើរមួយចំនួនដែរ ។
សូមអាន យេរេមា ១:៦ ដោយរកមើលថាតើយេរេមាបានមានអារម្មណ៍បែបណា នៅពេលលោកត្រូវបានហៅឲ្យបង្រៀនប្រជាជន ។
-
ហេតុអ្វីបានជាមនុស្សនៅសព្វថ្ងៃនេះ ដែលពិតជាចង់ឲ្យមនុស្សជាទីស្រឡាញ់របស់ពួកគេមកកាន់ព្រះគ្រីស្ទនៅតែមានភាពស្ទាក់ស្ទើរក្នុងការចែកចាយដំណឹងល្អជាមួយពួកគេ ?
សូមអាន យេរេមា ១:៧–៩ ដោយស្វែងរកដំបូន្មាន និងការសន្យារបស់ព្រះអង្គសង្គ្រោះចំពោះយេរេមា ។
-
តើអ្នកគិតថាព្រះបន្ទូលរបស់ព្រះអង្គសង្គ្រោះចំពោះយេរេមាអាចអនុវត្តចំពោះយើងយ៉ាងដូចម្ដេច នៅពេលយើងចែកចាយដំណឹងល្អរបស់ទ្រង់ ?
អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានផ្តល់ដំបូន្មានខាងក្រោម ដែលអាចជួយយើងយកឈ្នះលើការស្ទាក់ស្ទើរក្នុងការចែកចាយដំណឹងល្អផងដែរ ៖
មិនថាបងប្អូននៅកន្លែងណាលើផែនដីនេះទេ មានឱកាសច្រើនរាប់មិនអស់ដើម្បីចែកចាយដំណឹងល្អនៃព្រះយេស៊ូវគ្រីស្ទជាមួយមនុស្សដែលបងប្អូនជួប សិក្សាជាមួយ រស់នៅ ឬធ្វើការប្រាស្រ័យទាក់ទងជាមួយ ។ …
អ្វីដែលខ្ញុំសុំពីបងប្អូនគឺថា បងប្អូនតែងស្វែងរកឱកាសដើម្បីបង្ហាញពីជំនឿរបស់បងប្អូនតាមធម្មតា ហើយទាក់ទងដោយសាមញ្ញជាមួយមនុស្សទូទៅ —ទាំងដោយផ្ទាល់ និងតាមអ៊ិនធើរណិត ។
តាមវិធីណាក៏ដោយដែលវាងាយស្រួលសម្រាប់បងប្អូន សូមចែកចាយជាមួយនឹងមនុស្សអំពីមូលហេតុដែលព្រះយេស៊ូវគ្រីស្ទ និងសាសនាចក្ររបស់ទ្រង់សំខាន់ចំពោះបងប្អូន ។ ( « Missionary Work: Sharing What Is in Your Heart » Liahona ខែឧសភា ឆ្នាំ២០១៩ ទំព័រ ១៥, ១៧ )
-
តើអ្នកនឹងសង្ខេបការសន្យារបស់ព្រះអម្ចាស់ចំពោះយេរេមា និងការបង្រៀនរបស់អែលឌើរ អុជដូហ្វ ទៅជាសេចក្ដីថ្លែងការណ៍ដ៏សាមញ្ញមួយអំពីសេចក្ដីពិតដោយរបៀបណា ?
ដោយប្រើពាក្យពេចន៍របស់សិស្ស អ្នកអាចសរសេរសេចក្ដីពិតដូចខាងក្រោមនៅលើក្ដារខៀន ៖ ព្រះអង្គសង្គ្រោះអាចជួយយើងចែកចាយដំណឹងល្អរបស់ទ្រង់តាមរបៀបធម្មតា និងសាមញ្ញ ។
សូមពិចារណាអញ្ជើញសិស្សឲ្យពិភាក្សាអំពីសំណួរខាងក្រោមនេះជាក្រុមតូចៗ បន្ទាប់មកសុំសិស្សស្ម័គ្រចិត្តពីរបីនាក់ឲ្យចែកចាយការឆ្លើយតបរបស់ពួកគេជាមួយសិស្សក្នុងថ្នាក់ ។
-
តើអ្វីដែលធ្វើឲ្យមានភាពខុសគ្នារវាងការចែកចាយដំណឹងល្អដោយមានអារម្មណ៍ « ធម្មតា និងសាមញ្ញ » និង ដោយអារម្មណ៍ឆ្គាំឆ្គង ?
-
តើអ្នកអាចនឹកឃើញដល់នរណាម្នាក់ដែលនិយាយអំពីដំណឹងល្អតាមរបៀបធម្មតាដែរឬទេ ? បើដូច្នេះ តើពួកគេធ្វើវាបានដោយរបៀបណា ?
ប្រសិនបើសិស្សនឹងទទួលបានអត្ថប្រយោជន៍ពីគំរូផ្សេងទៀតនៃការចែកចាយដំណឹងល្អរបស់ព្រះយេស៊ូវគ្រីស្ទដោយធម្មតាអ្នកអាចមើល « Simple Ways to Love, Share, and Invite, for Youth » ( ២:៥០ ) ដែលមាននៅក្នុងបណ្ណាល័យដំណឹងល្អ ។
« ការឆ្លើយឆ្លងក្នុងការសន្ទនាប្រកបដោយប្រសិទ្ធិភាព »
ផ្នែកនេះនៃមេរៀននេះអាចជួយសិស្សអនុវត្តនូវវិធីមួយដើម្បីលើកឡើងអំពីព្រះយេស៊ូវគ្រីស្ទ និងដំណឹងល្អរបស់ទ្រង់យ៉ាងសាមញ្ញនៅក្នុងការសន្ទនា ។ អ្នកអាចអនុវត្តជំនាញផ្សេងៗជាមួយសិស្សរបស់អ្នកដែលអាចមានប្រយោជន៍ជាងសម្រាប់ពួកគេ ។ សូមពិចារណាកាន់កញ្ចក់ ហើយបង្ហាញសេចក្តីថ្លែងការណ៍ខាងក្រោម ។
អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកទាំងដប់ពីរនាក់បានពន្យល់ពីរបៀបមួយដែលអ្នកអាចបង្កើតការសន្ទនាអំពីប្រធានបទនៃដំណឹងល្អ ។
ខ្ញុំស្គាល់និស្សិតបញ្ចប់ការសិក្សានៅ ប៊ី.វ៉ាយ.យូ. ម្នាក់ដែលជាគំរូដ៏អស្ចារ្យ ។ លោកចង្អុលបង្ហាញថាមានការឆ្លើយឆ្លងដ៏មានប្រសិទ្ធិភាពនៅក្នុងការសន្ទនានោះ ។ ប្រសិនបើយើងនិយាយអំពីអាកាសធាតុ មនុស្សឆ្លើយតបដោយនិយាយអំពីអាកាសធាតុ ។ ប្រសិនបើយើងនិយាយពីកីឡា គេឆ្លើយតបដោយនិយាយពីកីឡា ។ មិត្តម្នាក់នេះនិយាយថា គាត់សួរមនុស្សដែលគាត់ជួបអំពីសាលារបស់ពួកគេ ហើយស្តាប់ដោយយកចិត្តទុកដាក់ ។ បន្ទាប់ពីពួកគេឆ្លើយតបដោយការសួរគាត់វិញអំពីសាលារបស់គាត់ គាត់ប្រាប់ពួកគេអំពី ប៊ី.វ៉ាយ.យូ. ហើយបន្ទាប់មកចែកចាយទីបន្ទាល់របស់គាត់អំពីដំណឹងល្អ ។ បន្ទាប់មក តាមរបៀបដ៏វិជ្ជមានមួយ គាត់បានសុំឲ្យពួកគេរៀនបន្ថែមទៀតពីអ្នកពួកផ្សព្វផ្សាយសាសនា ។ គាត់បានទទួលជោគជ័យយ៉ាងខ្លាំងក្នុងការចែកចាយដំណឹងល្អ ។ ( « How to Be a Member Missionary » New Era ខែកុម្ភៈ ឆ្នាំ២០១៥ ទំព័រ ៤៨ )
-
តើអ្នកនឹងពន្យល់អំពីការប្រើប្រាស់ « ការឆ្លើយឆ្លងដ៏មានប្រសិទ្ធិភាពនៅក្នុងការសន្ទនា » ដើម្បីលើកឡើងអំពីដំណឹងល្អជាមួយអ្នកដទៃដោយរបៀបណា ?
កំណត់និយមន័យ
ដើម្បីជួយសិស្សឲ្យត្រៀមខ្លួនអនុវត្តជំនាញនេះ សូមចែកចាយការណ៍ខាងក្រោមជាមួយពួកគេ ៖
ការនិយាយអំពីផ្នែកមួយនៃជីវិតរបស់យើងអាចមានអារម្មណ៍ធម្មតាជាង ប្រសិនបើយើងសួរអ្នកផ្សេងអំពីរឿងដូចគ្នានៅក្នុងជីវិតរបស់ពួកគេ ។ ដើម្បីធ្វើដូចនេះ អ្នកអាច ៖
-
ជ្រើសរើសអ្វីមួយដែលអ្នកបានធ្វើនាពេលថ្មីៗនេះ ឬនឹងធ្វើក្នុងពេលឆាប់ៗនេះ ដើម្បីចូលរួមនៅក្នុងសាសនាចក្រនៃព្រះយេស៊ូវគ្រីស្ទ ឬដំណឹងល្អរបស់ទ្រង់ ។
-
សូមគិតអំពីសំណួរមួយដែលអ្នកអាចសួរដល់នរណាម្នាក់ដែលនឹងធ្វើឲ្យវាកាន់តែមានភាពសាមញ្ញសម្រាប់អ្នកដើម្បីចែកចាយអ្វីដែលអ្នកបានជ្រើសរើសអំពីសាសនាចក្រ ឬដំណឹងល្អរបស់ព្រះអង្គសង្គ្រោះ ។
-
សួរសំណួររបស់អ្នក ស្តាប់ចម្លើយរបស់ពួកគេដោយយកចិត្ដទុកដាក់ បន្ទាប់មកចែកចាយអ្វីដែលអ្នកបានជ្រើសរើស ។
អ្នកក៏អាចបង្ហាញពីសារៈសំខាន់នៃការស្តាប់អ្នកដទៃដោយយកចិត្តទុកដាក់យ៉ាងពិតប្រាកដ មុនពេលចែកចាយអំពីខ្លួនយើង ( សូមមើល ប្រកាសដំណឹងល្អរបស់យើង ៖ មគ្គុទេសក៍ចែកចាយដំណឹងល្អនៃព្រះយេស៊ូវគ្រីស្ទ, ទំព័រ ១៩២ ) ។
គំរូ
ធ្វើតាមគំរូ « ការឆ្លើយឆ្លងដ៏មានប្រសិទ្ធិភាពនៅក្នុងការសន្ទនា » ដោយសួរសិស្សអំពីអ្វីដែលពួកគេបានធ្វើនៅចុងសប្តាហ៍នេះ ។ បន្ទាប់ពីបានស្តាប់ចម្លើយរបស់ពួកគេយ៉ាងយកចិត្ដទុកដាក់ហើយ សូមប្រាប់ពួកគេអំពីចុងសប្តាហ៍របស់អ្នក ហើយត្រូវប្រាកដថារួមបញ្ចូលអ្វីដែលវិជ្ជមានអំពីបទពិសោធន៍របស់អ្នកនៅព្រះវិហារ ។
អ្នកក៏អាចចែកចាយឧទាហរណ៍ដូចជា ៖
សួរថា « តើព្រឹកនេះយ៉ាងម៉េចដែរ ? » ( ស្តាប់ចម្លើយរបស់ពួកគេ ។ ) បន្ទាប់មកចែកចាយអ្វីមួយដូចជា « ខ្ញុំមានបទពិសោធន៍ដ៏ល្អបំផុតនៅព្រឹកនេះក្នុងការរៀនថ្នាក់សិក្ខាសាលា … » ។
សួរថា « តើអ្នកមានអ្វីសប្បាយៗដែលបានគ្រោងទុកសម្រាប់សប្តាហ៍នេះឬទេ ? » ( ស្តាប់ចម្លើយរបស់ពួកគេ ។ ) រួចចែកចែកអ្វីមួយដូចជា « ខ្ញុំនឹងទៅព្រះវិហារបរិសុទ្ធជាមួយក្រុមគ្រួសារនៅយប់ថ្ងៃពុធដើម្បី … »
អនុវត្ត
អញ្ជើញសិស្សឲ្យអនុវត្តជំនាញនេះ ។ អាស្រ័យលើពេលវេលាដែលមាន សិស្សអាចអនុវត្តជំនាញនេះជាមួយដៃគូជាច្រើន ដោយការចែកចាយទិដ្ឋភាពផ្សេងៗនៃដំណឹងល្អនៅក្នុងជីវិតរបស់ពួកគេ ។ សូមលើកទឹកចិត្តពួកគេឲ្យស្វែងរកឱកាសដើម្បីនិយាយអំពីព្រះវរបិតាសួគ៌ ព្រះយេស៊ូវគ្រីស្ទ និងពរជ័យនៃដំណឹងល្អ ។ វាអាចមានប្រយោជន៍ក្នុងការដាក់បង្ហាញជំហានខាងក្រោម ។
រៀបចំខ្លួនដើម្បីចែកចាយដំណឹងល្អរបស់ព្រះអង្គសង្គ្រោះ
សូមពិចារណារំឭកសិស្សថា ភាពជោគជ័យក្នុងការចែកចាយដំណឹងល្អមិនត្រូវបានកំណត់ដោយ ថាតើបុគ្គលនោះទទួលយកសារលិខិតរបស់ព្រះអង្គសង្គ្រោះឬអត់នោះទេ ។ ការពិតមួយដែលថាយើងព្យាយាមចែកចាយពន្លឺរបស់ព្រះអង្គសង្គ្រោះគឺតែងតែជាជោគជ័យ ។
ដើម្បីបញ្ចប់ថ្នាក់ អ្នកអាចបង្ហាញប្រធានបទខាងក្រោម ហើយអញ្ជើញសិស្សឲ្យកត់ត្រាគំនិតរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។
សូមអាន យេរេមា ១:៧–៩ ម្តងទៀត ហើយគិតពិចារណាអំពីរបៀបដែលព្រះអម្ចាស់អាចជួយអ្នកចែកចាយដំណឹងល្អរបស់ទ្រង់ ។ បន្ទាប់មក សូមចំណាយពេលពីរបីនាទីដើម្បីគិតអំពីស្ថានភាពនានានៅក្នុងសប្ដាហ៍នេះដែលអ្នកអាចស្ថិតនៅ ដែលអ្នកអាចពិភាក្សាអំពីដំណឹងល្អជាមួយបុគ្គលម្នាក់បាន ។ សូមទូលសុំនូវជំនួយរបស់ព្រះវរបិតាសួគ៌ដោយប្រកបដោយការអធិស្ឋាន ដើម្បីស្គាល់ពីរបៀបដែលអ្នកអាចចែកចាយសារលិខិតរបស់ព្រះអង្គសង្គ្រោះដោយសាមញ្ញ ។ សូមចាំថា ដូចដែលព្រះអម្ចាស់បានជួយយេរេមា ទ្រង់ក៏នឹងជួយអ្នកក្នុងការខិតខំប្រឹងប្រែងរបស់អ្នកដែរ ។