Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hono Fatongia ʻaki Hoʻo Akó: Fakaʻehiʻehi mei he Kumi ʻUhingá pea Ngāue ʻi he Akó

“Ko Hono Fatongia ʻaki Hoʻo Akó: Fakaʻehiʻehi mei he Kumi ʻUhingá pea Ngāue ʻi he Akó,” Fuakava Motuʻá – Tohi Lēsoni ʻa e Faiako Seminelí (2026)

“Ko Hono Fatongia ʻaki Hoʻo Akó: Fakaʻehiʻehi mei he Kumi ʻUhingá pea Ngāue ʻi he Akó,” Fuakava Motuʻá – Tohi Lēsoni ʻa e Faiako Seminelí

Lavameʻa ʻi he Akó: Lēsoni 193

Ko Hono Fatongia ʻaki Hoʻo Akó

Fakaʻehiʻehi mei he Kumi ʻUhingá pea Ngāue ʻi he Akó

ʻI he taimi ʻoku faingataʻa ai e ngāue fakaakó, ʻoku tau faʻa kumi ʻuhinga pea fakatuai ke fai ha ngāue. ʻI heʻetau muimui ki he sīpinga ʻa e Fakamoʻuí mo fatongia ʻaki ʻetau akó, te tau tupulaki ʻi he potó ʻo hangē ko ia naʻá Ne faí (vakai, Luke 2:52). ʻE lava ke tokoni ʻa e lēsoni ko ʻení ki he kau akó ke nau ʻiloʻi ʻa e ngaahi ngāue ʻe lava ʻo tokoni ke nau fatongia ʻaki ʻenau akó.

Teuteu ʻa e tokotaha akó: Fakaafeʻi e kau akó ke fakakaukau ki heʻenau ngaahi ngāue fakaakó ʻaki e ngaahi fehuʻi ko ʻení:

Ko e hā ha ngaahi meʻa ʻoku ou fakahoko lelei ke tokoniʻi au ʻi he akó?
Ko e hā hono tuʻo lahi ʻeku kumi ʻuhingá ʻa ia te ne ala uesia ʻeku akó?

Ngaahi ʻEkitivitī Ako ʻOku Ala Fakahokó

Fatongia ki heʻetau akó

Fakaafeʻi e kau akó ke faʻu ha tūkunga fekauʻaki mo ha toʻu tupu pea mo ha fili hala ne nau fai fekauʻaki mo ʻenau ngāue fakaakó. Hangē ko ʻení, naʻe ʻikai ke ako e toʻu tupú ki ha sivi, aʻu tōmui ki he kalasí, liʻaki ha ngāue mahuʻinga, pe ʻikai tānaki ha ʻēsei. Te ke lava ʻo ʻai ha tokotaha ako ke ne tā ha fakatātā faingofua ʻi he palakipoé, ʻoange ki he tokotaha taʻu hongofulu tupú ha hingoa, pea hiki ʻenau fili taʻefakapotopotó ʻi lalo ʻi he fakatātā faingofuá.

Hili iá te ke lava ʻo hiki e Ngaahi Kumi ʻUhingá ʻi ʻolunga ʻi he fakatātā faingofuá. Fakakaukau ke fakaafeʻi e kau akó ke hiki takatakai ʻenau tali ki he fehuʻi ko ʻení ʻi he fakatātā he palakipoé.

Ko e hā ha ngaahi kumi ʻuhinga ʻe ala fai ʻe ha taha taʻu hongofulu tupu ki he fili taʻefakapotopoto ko ʻení?
ʻOkú ke pehē ko e hā ʻoku tau faʻa kumi ʻuhinga ai he taimi ʻe niʻihi ki he faʻahinga fili ko ʻení?

Naʻe akoʻi ʻe Palesiteni Lāsolo M. Nalesoni mo ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi moʻoni mahuʻinga ʻoku ʻaonga ke manatuʻi ʻi he taimi ʻe ʻahiʻahiʻi ai kitautolu ke tau kumi ʻuhinga ki he ngaahi fili taʻefakapotopoto ʻi he akó.

Ko e meʻa ia ʻaʻau ke ako. He ʻikai ke lava ʻo fai ia ʻe ha taha maʻau. Ko e fē pē ʻokú ke ʻi aí, fakatupulaki ha holi ke ako. ʻOku ʻikai hoko e ako fakaʻatamaí, kiate kitautolu Kāingalotu ʻo e Ngaahi ʻAho Kimui Ní ko ha faingamālie pē, ko ha fatongia fakalotu ia. (“Will You Choose to Increase in Learning?,” New Era, Sep. 2014, 2)

ʻI he ngaahi meʻa fakatuʻasinó mo fakalaumālié fakatouʻosi, ko e faingamālie ko ia ke maʻu e fatongia fakatāutahá ko ha meʻafoaki ia mei he ʻOtuá pea ka ne taʻeʻoua ia he ʻikai lava ke tau aʻusia ʻa e meʻa kotoa te tau malavá ʻi heʻetau hoko ko e ʻofefine pe foha ʻo e ʻOtuá. (“Tauʻatāina ʻo Taʻengata, ke Fili Maʻanautolu,” Liahona, Nōvema 2014, 18)

Ko e hā e meʻa ʻoku makehe kiate koe mei he ngaahi fakamatala ko ʻení?
Ko e hā ʻoku mahuʻinga ai ke tau fatongia fakataautaha ʻaki ʻetau akó?

Fakakaukau ke tokoni ke fakatokangaʻi ʻe he kau akó ʻa e moʻoni ko ʻení ʻaki hono hiki ia ʻi he tafaʻaki ʻo e fakatātā ʻi he palakipoé: ʻOku tokoni ʻetau fatongia fakataautaha ʻaki ʻetau akó ke tau ʻiloʻi hotau tuʻunga malava kakato ko e ngaahi ʻofefine mo e ngaahi foha ʻo e ʻOtuá.
Ko e hā ha ngaahi meʻa pau ʻe lava ke fai ʻe ha taha taʻu hongofulu tupu ke ne fatongia ʻaki ʻene akó?
ʻE tokoni fēfē hono fatongia fakataautaha ʻaki ʻetau akó ke tau hoko ʻo hangē ange ko e Fakamoʻuí?

ʻI hono tali ʻe he kau akó e ngaahi fehuʻi ʻi ʻolungá, te ke lava ʻo fakaafeʻi kinautolu ke vahevahe ʻa e ngaahi ʻulungaanga naʻe fakahaaʻi ʻe Sīsū Kalaisi ʻi Heʻene fatongia ʻaki ʻEne ngāue fakafaifekaú mo e misioná (hangē ko e faivelengá, loto-fakatōkilaló, mo e ʻofá).

Fakaʻaongaʻi ha kiʻi taimi ke ke fakakaukau ki he founga ʻe lava ke tokoniʻi ai koe ʻe hono fakatupulaki ʻo e ngaahi ʻulungaanga faka-Kalaisí ke ke ikunaʻi ʻa e ngaahi kumi ʻuhingá pea fatongia ʻaki hoʻo akó. Fakafanongo ki ha ngaahi ueʻi mei he Laumālie Māʻoniʻoní ʻe lava ʻo tokoni atu ke ke ʻiloʻi ʻa e ngaahi ʻulungaanga te ke lava ʻo fakatupulaki pe ngaahi tōʻonga te ke lava ʻo fakahoko ke fatongia ʻaki hoʻo ngāue fakaakó.

Ngaahi sīpinga fakafolofola ʻo e fatongia ʻakí

Ko hono ikunaʻi ʻo e ngaahi kumi ʻuhinga ke fatongia ʻaki ʻa e akó

Ke tokoni ke teuteu ʻa e kau akó ke vakai ki heʻenau moʻuí pea ikunaʻi ʻa e ngaahi kumi ʻuhinga ʻoku nau faí, mahalo ʻe tokoni ke fakahoko fakakalasi ʻa e ʻekitivitī ko ʻení.

Fakakaukau ki he toʻu tupu mei he kamataʻanga ʻo e kalasí. Fakakaukau ki he meʻa kuó ke ako mei he folofolá mo e aʻusia fakataautaha fekauʻaki mo hono fatongia ʻaki hoʻo akó. Tokoniʻi e toʻu tupu ko ʻení ʻaki hono fokotuʻu mai e ngaahi ʻulungaanga mo e tōʻonga faka-Kalaisi ʻokú ne fakahaaʻi ha loto-fiemālie ke fatongia ʻaki hono ako e ngaahi kumi ʻuhinga ʻi he palakipoé.

Kimuʻa pea nau kamatá, mahalo ʻe tokoni ke ʻoange ki he kau akó ha sīpinga. Ko ha ʻuhinga ki he aʻu tōmuí ko e “naʻe ʻikai fafangu taimi totonu au ʻe heʻeku faʻeé.” Mahalo ʻe fokotuʻu mai ʻe he kau akó, “Te u fatongia ʻaki ʻo hangē ko e Fakamoʻuí pea fokotuʻu ha fakatokanga ke fakapapauʻi ʻoku ou aʻu kei taimi ki he akó.” Te ke lava ʻo hiki e ngaahi fokotuʻu ʻa e kau akó ʻo ofi ki he ʻuhinga takitaha.

ʻE tokoniʻi fēfē kitautolu ʻe he Fakamoʻuí ʻi heʻetau feinga ke fatongia ʻaki ʻetau akó?

Fakakaukau ke fakaafeʻi ha kau ako ʻe loto-fiemālie ke vahevahe ʻa e meʻa kuo nau fai ʻi heʻenau moʻuí ke fatongia ʻaki fakataautaha ʻenau akó. ʻI heʻenau vahevahé, fakamālōʻia e kau akó ʻi he ngaahi ngāue ʻoku nau faí.

Fatongia ʻaki ʻeku akó

Fakaafeʻi e kau akó ke fakakakato ʻa e konga fakaʻosi ʻo e laʻipepa tufá. Mahalo te ke fie vahevahe ʻeni mo kinautolu ʻi heʻenau fekumi ki he tokoni ʻa e ʻEikí ke fatongia ʻaki ʻenau akó.

ʻI hoʻo fekumi ki ha fakahā mei he Tamai Hēvaní ki he founga ke ke fakalakalaka aí, ʻe lava ke ueʻi koe ʻe he Laumālie Māʻoniʻoní ʻi he ngaahi liliu ʻoku fiemaʻú. Te tau lava foki ʻo manatuʻi ʻoku ʻikai fiemaʻu ke tau fai kotoa ia ʻiate kitautolu pē; te tau lava ʻo fekumi ki he tokoni ʻa e Fakamoʻuí (vakai, ʻĪsaia 41:10).

Fakakaukau ke fakaafeʻi ha kau ako ʻe loto-fiemālié ʻa e meʻa ʻoku nau ongoʻi ʻoku ueʻi kinautolu ke fakahokó. Te ke lava ʻo vahevahe ha sīpinga mei hoʻo moʻuí ki hono fatongia ʻaki hoʻo akó. Poupouʻi e kau akó ke ō mo ʻenau laʻipepa tufá ki ʻapi ke tokoni ke nau manatuʻi ʻa e meʻa kuo ueʻi kinautolu ke fai he ʻaho ní.

Ngaahi Maʻuʻanga Tokoni Kehé

Ko e hā ʻoku mahuʻinga ai ke fatongia fakataautaha ʻaki [ʻa e akó]?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko hotau fatongia fakatāutahá ke ako e meʻa ʻoku totonu ke tau akó, ke moʻui ʻaki e meʻa ʻoku tau ʻilo ʻoku totonu ke tau moʻui ʻakí, pea mo aʻusia e tuʻunga ʻoku fie maʻu ʻe he ʻEikí ke tau aʻusiá. (“Mateuteu ke Maʻu ʻa e Meʻa ʻAonga Kotoa Pē,” Liahona, Mē 2019, 102)

Naʻe akoʻi ʻe Palesiteni Sēmisi E. Fausi (1920–2007) ʻo e Kau Palesitenisī ʻUluakí ʻo pehē:

ʻOku ou mamata ʻi hotau sōsaietí he ʻahó ni ki ha kakai tokolahi ʻoku nau tukuakiʻi e niʻihi kehé ʻi heʻenau tōnounoú. Kuó u fakatokangaʻi ko kinautolu ʻoku nau tali ʻa e fatongia fakataautaha ki heʻenau ngaahi ngāué ʻoku ola lelei ange ia ʻiate kinautolu ʻoku tukuakiʻi ʻenau ngaahi tōnounoú mo e taʻe lavameʻá ki ha taha kehe. (“Your Light—a Standard to All Nations,” Liahona, May 2006, 112–113)

Naʻe akonaki ʻa ʻEletā Lini G. Lōpini ʻo e Kau Fitungofulú ʻo pehē:

Ko e fatongia ʻaki ʻoku pēseti ʻe 100, ko hoʻo tali ia koe ko e tokotaha ʻokú ne puleʻi hoʻo moʻuí. Kapau ʻoku fehalaaki ha niʻihi pea ʻoku fiemaʻu ke liliu kimuʻa pea toki fai ha fakalakalaka lahi angé, ta ʻoku nau angaʻofa pea ʻoku nau puleʻi e ngaahi ola mo e ngaahi fiemaʻu lelei ʻi hoʻo moʻuí. ʻOku fehokotaki lelei ʻa e tauʻatāina ke filí mo e fatongiá. He ʻikai ke ke lava ʻo fakaʻehiʻehi mei he fatongiá taʻe te ke uesia ai mo e tauʻatāina ke filí. (“Be 100 Percent Responsible” [fakataha lotu ʻa e ʻUnivēsiti Pilikihami ʻIongí, 22 ʻAokosi 2017], 11, speeches.byu.edu)

Ngaahi ʻEkitivitī Fakalahi ki he Akó

Saula mo Nehemaia

Ko e founga ʻe taha ke tokoni ki he kau akó ke nau ako mei he folofolá ko hono fakafehoanaki ha talanoa ʻe ua mei he folofolá. ʻE lava ke fakaʻaongaʻi ʻa e ʻekitivitī ko ʻení ʻi he lēsoní kimuʻa pea ako ʻe he kau akó e ngaahi folofola ʻi he laʻipepa tufá. Te ke lava ʻo vahevahe e kau akó ki ha ngaahi hoa pea vahe ki he hoa takitaha ha taha ʻo e ngaahi fakamoʻoni fakafolofola ko ʻení:

1 Samuela 15:1–3, 9, 13–14, 20–21

Nehemaia 6:1–4, 15–16

Fakaafeʻi e kau akó ke ako ʻenau ngaahi vēsí ʻo kumi e founga naʻe fatongia fakataautaha ʻaki ʻe he fakafoʻituituí (Nehemaia) pe kumi ʻuhinga ki heʻene ngaahi ngāué (Saula). Ko e founga ʻe taha ʻe lava ke fokotuʻutuʻu ai ʻe he kau akó ʻenau ngaahi fakakaukaú ko hono fakaʻaongaʻi ʻa e laʻipepa tufa ko ʻení:

ʻE lava ke fakahingoa ʻe he kau akó ʻa e siakale toʻohemá ko Saula mo e siakale toʻomataʻú ko Nehemaia. Te nau lava ʻo lisi ha ngaahi faikehekehe ʻi he ngaahi siakale fakafoʻituituí pea lisi ʻa e ngaahi meʻa ʻoku faitatau aí ʻi he konga ʻoku fehokotakí.

Fatongia ʻaki ʻeku akó

Ke tokoni ki he kau akó ke fakakaukau ki he ngaahi ngāue mo e ngaahi tōʻonga ʻe lava ʻo tokoni ke nau fatongia ʻaki ʻenau akó, te ke lava ʻo ʻoange ha niʻihi pe kotoa ʻo e saati ko ʻení:

Kumi ʻUhinga	Fatongia ʻAki
Naʻe ʻikai ke u tānaki ʻeku ngāué koeʻuhí naʻe ʻikai mahino kiate au ʻa e founga ke fakahoko ai iá.	Naʻá ku fai ʻa e meʻa kotoa pē naʻá ku ʻiloʻí. Te u kole ha tokoni ʻi he ngaahi meʻa ʻoku ʻikai mahino kiate aú.
Naʻe ʻikai ke u ako ki heʻeku siví koeʻuhí naʻá ku feohi mo hoku ngaahi kaungāmeʻá.	Te u fili ke ako kimuʻa peá u feohi mo hoku ngaahi kaungāmeʻá.
Naʻe ngalo ʻi heʻeku faʻeé ke fafangu au, pea naʻá ku tōmui ki he akó.	Te u lava ʻo fokotuʻu ha fakatokanga taimi ke u ʻā hake ʻo aʻu kei taimi ki he akó.

Te ke lava ʻo fakaafeʻi e kau akó ke tānaki atu ha ngaahi tūkunga kehe ki he sātí pea aleaʻi e founga ʻe lava ke fakatonutonu ai e ngaahi kumi ʻuhinga ko ʻení ʻaki hono fatongia ʻakí. ʻI heʻenau tohinoa akó, ʻe lava ke fakakakato ʻe he kau akó ʻa e ngaahi sētesi ko ʻení ke tokoniʻi kinautolu ke faʻu ha palani ke nau fakapotopoto ange ai.

Ko ha kumi ʻuhinga kuó u faʻa fakaʻaongaʻi ke fakaʻehiʻehi mei hono fatongia ʻaki ʻeku ngāue fakaakó ko e .

Ko ha ngāue fakapotopoto ange te u lava ʻo ʻahiʻahiʻí ko e .

Fatongia ʻaki pēseti ʻe 100

Kimuʻa pea fakakaukau e kau akó ki ha ngaahi tūkunga fakaako mahuʻinga mo ha ngaahi kumi ʻuhinga pe ngaahi ngāue ʻe ala fai ʻe he toʻu tupú, te ke lava ʻo huluʻi ʻa e “Inspiring Short: 100 Percent Responsible” (3:22). Naʻe vahevahe ʻe ʻEletā Lini G. Lōpini ʻo e Kau Fitungofulú ʻi he vitiō ko ʻení ha talanoa ki hono ikunaʻi ʻe ha ongo tangata ngāue ʻi he fale tukuʻanga koloá ʻena kumi ʻuhingá pea fatongia ʻaki ʻena ngāué. Hili hoʻomou mamata ʻi he vitioó, ʻe lava ke ʻiloʻi ʻe he kau akó ha ngaahi tūkunga fakaako ʻe ala faingofua ai ke kumi ʻuhinga. Pea te nau lava leva ʻo ʻiloʻi ʻa e ngaahi ngāue te ne lava ʻo ikunaʻi ʻa e ngaahi kumi ʻuhinga ko iá.