Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hono Fakakau ʻa e ʻEikí ʻi Hoʻo Akó: ʻE Fakalahi mo Fakamālohia ʻe he ʻEikí Hoʻo Ngaahi Feingá

“Ko Hono Fakakau ʻa e ʻEikí ʻi Hoʻo Akó: ʻE Fakalahi mo Fakamālohia ʻe he ʻEikí Hoʻo Ngaahi Feingá,” Fuakava Motuʻá – Tohi Lēsoni ʻa e Faiako Seminelí (2026)

“Ko Hono Fakakau ʻa e ʻEikí ʻi Hoʻo Akó: ʻE Fakalahi mo Fakamālohia ʻe he ʻEikí Hoʻo Ngaahi Feingá,” Fuakava Motuʻá – Tohi Lēsoni ʻa e Faiako Seminelí

Lavameʻa ʻi he Akó: Lēsoni 192

Ko Hono Fakakau ʻa e ʻEikí ʻi Hoʻo Akó

ʻE Fakalahi mo Fakamālohia ʻe he ʻEikí Hoʻo Ngaahi Feingá

Te tau fehangahangai ʻi heʻetau akó mo ha ngaahi fakafeʻātungia ʻi heʻetau ngāue ke fakatupulaki ʻetau ʻilo mo e mahino ki he moʻoní. ʻOku ʻikai fiemaʻu ia ke tau fehangahangai toko taha pē mo e ngaahi faingataʻa ko ʻení. ʻOku tokanga mai ʻa e Tamai Hēvaní mo Sīsū Kalaisi kiate kitautolu mo ʻetau fakalakalaká, pea ʻokú Na fie tokoniʻi kitautolu ʻi heʻetau ngaahi feinga ʻi he akó. ʻE lava ke tokoni ʻa e lēsoni ko ʻení ki he kau akó ke fakakau ʻa e ʻEikí ʻi heʻenau akó.

Teuteu ʻa e tokotaha akó: Fakaafeʻi e kau akó ke fakakaukau ki he founga kuo nau mamata ai ki hono tokoniʻi ʻe he ʻEikí kinautolu pe ko ha taha ʻoku nau ʻiloʻi ʻi he akó. Te nau lava ʻo teuteu ke vahevahe ʻa e aʻusia ko ʻení mo e kalasí.

Ngaahi ʻEkitivitī Ako ʻOku Ala Fakahokó

Ngaahi faingataʻa ʻi he akó

Fakakaukau ke kamata e kalasí ʻaki hano fakaafeʻi ha tokotaha ako ki muʻa ʻi he loki akó ke fakakakato ha ngāue ʻoku fiemaʻu ki ai e tokoni ʻa e niʻihi kehé. Hangē ko ʻení, haʻi e mata ʻo e tokotaha akó pea kole ange ke ne fokotuʻutuʻu e lolé pe ngaahi foʻi kulá ʻo fakatatau ki honau lanú. Ka faingataʻaʻia ʻa e tokotaha akó ʻi he kamatá, te ke lava ʻo fai ha fehuʻi hangē ko e, “ʻe tokoniʻi fēfē koe ʻe he niʻihi kehe ʻi he lokí?”

ʻE fekauʻaki fēfē ʻa e fakatātā ko ʻení mo ʻetau feinga ke ako ʻi he akoʻangá?
Ko e hā ha ngaahi tūkunga ʻi he akoʻangá pe ʻi he akó ʻe ala faingataʻa ki he toʻu tupú?

ʻE ala kau ʻi he tali ʻa e kau akó ha ngaahi meʻa hangē ko e faingataʻaʻia ʻi ha lēsoni pau ʻi he akó, ko ha pole fakaako, pe ngaahi palopalema ʻi hono levaʻi e taimí. ʻE lava ke ke lisi e ngaahi tali ko ʻení ʻi he palakipoé. Te ke lava ʻo poupouʻi e kau akó ke hiki ha faingataʻa ʻoku nau lolotonga fehangahangai mo ia ʻi heʻenau akó. ʻE tokoni ʻa e lisi ko ʻení ke vakai ki ai ʻi he lolotonga ʻo e lēsoní.

ʻOku tāpuakiʻi ʻe he ʻEikí ʻetau ngaahi feinga māʻoniʻoní

Lau ʻa e fakamatala ko ʻení meia ʻEletā Kalake G. Kilipati ʻo e Kau Fitungofulú, ʻo kumi e feituʻu te tau lava ʻo kumi tokoni ai ʻi he ngaahi faingataʻa ʻi heʻetau feinga ke ako ʻi he akó.

ʻOku ou ʻilo ʻe lava ke faingataʻa hoʻo akó pea ʻoku fiemaʻu ki ai ha feilaulau. ʻOku ou ʻiloʻi hoʻo ngāue mālohí pea ʻoku lahi ha ngaahi pō faingataʻa ʻi hoʻo ʻā fuoloa ke fakakakato e ngaahi ngāué, ako ha ngaahi fakakaukau foʻou, mo fakahoko ha ngaahi tukupā kehe ʻoku fiemaʻu ʻi hoʻo moʻuí. Ka ke kātaki pē. Hokohoko atu hoʻo loto-toʻá. Kae mateuteu foki ke hiki mei he loto-toʻá ki he angaʻofá. Fakakau atu ʻa e ʻEikí. Lotua ʻEne tokoní pea te Ne fakalahi hoʻo ngaahi feingá. ʻIloʻi e lahi ʻo ʻemau ʻofa ʻiate koé. Kae mahuʻinga angé, ʻiloʻi ʻa e lahi ʻo e ʻofa ʻa e ʻEikí ʻiate koé pea te Ne fakamālohia koe ʻi hoʻo ngaahi feinga māʻoniʻoni kotoa pē ke ako mo tupulaki pea hoko ʻo hangē ange ko Iá. (“From Grit to Grace” [fakataha lotu Fakaemāmani Lahi ʻa e BYU–Pathway, 25 Sepitema 2018], 2, byupathway.edu)

Ko e hā naʻá ke maʻu ʻokú ne ʻoatu ha ʻamanaki lelei pe te ne lava ʻo poupouʻi ha taha taʻu hongofulu tupu ʻi heʻene akó?

ʻI he vahevahe ʻa e kau akó, tokoni ke nau ʻiloʻi ha tefitoʻi moʻoni hangē ko ʻení, ʻi heʻetau fakakau ʻa e ʻEikí ʻi heʻetau akó, te Ne fakalahi mo fakamālohia ʻetau ngaahi feingá.
ʻE tāpuekina, fakalahi, pe fakamālohia fēfē ʻe he ʻEikí ʻetau ngaahi feingá ʻi he taimi ʻoku tau fakakau ai Ia ʻi heʻetau akó?

Mahalo ʻe talaatu ʻe he kau akó ha ngaahi meʻa hangē ko e founga ʻe lava ke tokoniʻi ai kinautolu ʻe he ʻEikí ke nau manatuʻi ʻa e meʻa kuo nau akó, faʻa kātaki ki he kau faiakó mo e kaungāakó, pe ongoʻi nonga lolotonga ha sivi. Te ke lava ʻo fakamatalaʻi ange ʻe faʻa tokoniʻi kitautolu ʻe he ʻEikí ke tau ako ʻo fakafou ʻi he Laumālie Māʻoniʻoní, ʻa ia te ne lava ʻo fakafonu kitautolu ʻaki ʻa e melinó, tokoni ke tau ʻilo ʻa e moʻoní, mo fakamaama hotau ʻatamaí (vakai, Loma 15:13; Molonai 10:5; Tokāteline mo e Ngaahi Fuakava 6:15).

Founga ke fakakau ai ʻa e ʻEikí ʻi hoʻo akó

Hili hono fakakakato ʻe he kau akó ʻa e laʻipepa tufá, fakakaukau ke fakaafeʻi kinautolu ke fili ha tokotaha lea ke vahevahe ʻa e meʻa naʻe aleaʻi ʻe he kulupú.

Makatuʻunga ʻi he meʻa kuó ke akó, ko e hā ha ngaahi meʻa pau te tau lava ʻo fai ke fakakau ai ʻa e ʻEikí ʻi heʻetau akó?

Kapau ʻoku fiemaʻu ʻe he kau akó ha fakahinohino lahi ange, te ke lava ʻo vahevahe ha niʻihi pe kotoa ʻo e ngaahi meʻá ni ko ha ngaahi founga ke fakakau ai ʻa e ʻEikí ʻi heʻetau akó:

Fakatokangaʻi pea houngaʻia ʻi he fanga kiʻi fakalakalaka iiki pe tuʻumaʻú (2 Nīfai 28:30).
Kole ʻi he lotu ki he Tamai Hēvaní ha ngaahi tāpuaki pau hangē ko e loto-toʻa ke hiki ho nimá, fai ha ngaahi fehuʻi, pea maʻu ha tokoni lahi ange (ʻEta 2:18–23).
Fakahaaʻi ho ngaahi vaivaí pea tui ki he ʻEikí te Ne tokoniʻi koe mo kinautolu (Mōsese 6:31–34; Mōsese 7:13).
Ako e ngaahi fakamatala mei he kalasí ʻi he ʻaho takitaha pea kole ha tāpuaki lakanga fakataulaʻeiki kimuʻa ʻi ha sivi pe ngāue mahuʻinga (Tokāteline mo e Ngaahi Fuakava 88:118).

Fakakaukau ke fakaafeʻi e kau akó ke vahevahe ha aʻusia ʻo e founga kuo fakalahi mo fakamālohia ai ʻe he ʻEikí kinautolu pe ko ha taha ʻoku nau ʻilo ʻi heʻenau fakakau ʻa e ʻEikí ʻi heʻenau akó.

Ko hono fakakau ʻa e ʻEikí ʻi heʻetau akó

ʻOange ha taimi ki he kau akó ke nau faʻu ha palani ke fakakau ʻa e ʻEikí ʻi heʻenau akó. Te ke lava ʻo fakaʻaliʻali ʻa e ngaahi fakahinohino ko ʻení pea poupouʻi ʻa e kau akó ke hiki ʻenau palaní ʻi heʻenau tohinoa akó.

Fakakaukau ki he faingataʻa ʻokú ke lolotonga fehangahangai mo ia ʻi he akó. Fakakakato ʻeni ʻi hoʻo tohinoa akó.

Ko e hā ha meʻa ʻi hoʻo ngāue fakaakó ʻokú ke loto-fiemālie ke feinga ke fakakau ai ʻa e Tamai Hēvaní mo Sīsū Kalaisi? Fakapapauʻi ʻa e meʻa te ke faí.

ʻE lava ke ke kole ki ha kau ako ʻe loto-fiemālie ke vahevahe ʻa e meʻa naʻa nau ongoʻi naʻe ueʻi kinautolu ke nau faí. Fakakaukau ke vahevahe hoʻo fakamoʻoni ki he Tamai Hēvaní mo Sīsū Kalaisi pea mo e founga te Na tāpuekina ai kitautolu ʻi heʻetau fakakau Kinaua ʻi heʻetau akó.

Ngaahi Maʻuʻanga Tokoni Kehé

Fēfē kapau ʻoku ʻi ai haʻaku ngaahi faingataʻa ʻokú ne fakafaingataʻaʻiaʻi ʻeku akó?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

19:13

Neongo ʻoku tau maʻu kotoa ha vaivaiʻanga, ka te tau lava ʻo ikunaʻi kinautolu. Kapau te tau loto fakatōkilalo mo tui, ʻe lava ke hoko e ngaahi meʻa vaivaí ʻo mālohi, tuʻunga ʻi he ʻaloʻofa pē ʻa e ʻOtuá.

ʻOku foaki ʻe he ʻaloʻofa ʻa e ʻOtuá, ʻi he kotoaʻetau moʻuí, ʻa e ngaahi tāpuaki fakatuʻasinó mo e ngaahi meʻa-foaki fakalaumālie ko ē ʻokú ne fakalahi hotau iví mo tokoniʻi ʻetau moʻuí. ʻOku fakafoʻou kitautolu ʻe Heʻene ʻaloʻofá. ʻOku tokoniʻi kitautolu ʻe Heʻene ʻaloʻofá ke tau aʻusia hotau tuʻunga lelei tahá. (“Ko e Meʻaʻofa ʻo e ʻAloʻofá,” Liahona, Mē 2015, 108)

Naʻe akoʻi ʻe Palesiteni Henelī B. ʻAealingi ʻo pehē:

ʻOku fakatou ʻafioʻi ʻe he ʻEikí ʻa e meʻa te Ne finangalo ke ke faí mo e meʻa ʻe fie maʻu ke ke ʻilóʻí. ʻOkú Ne angaʻofa mo tokaimaʻananga. Ko ia ʻe lava ai ke ke falala mo ʻamanaki atu kuó Ne ʻosi teuteuʻi ha ngaahi faingamālie ke ke ako ai ko e teuteu ki he ngāue te ke faí. He ʻikai te ke fakatokangaʻi lelei ʻa e ngaahi faingamālie ko iá, ʻo hangē pē ko aú. Ka ʻi he taimi ʻokú ke fakamuʻomuʻa ai e ngaahi meʻa fakalaumālié ʻi hoʻo moʻuí, ʻe tāpuakiʻi koe ke ke ongoʻi ʻa e meʻa pau ke ke akó, pea ʻe ueʻi koe ke ke toe ngāue mālohi ange. Te ke fakatokangaʻi ʻamui ange naʻe tupulaki ho mālohi ke ngāué, pea te ke houngaʻia ai. (“Education for Real Life,” Ensign, Oct. 2002, 18–19)

Ko e hā ʻoku totonu ai ke u tafoki ki he ʻOtuá ke maʻu ha tokoni ʻi heʻeku akó?

Naʻe pehē ʻe ʻEletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku tau mahuʻinga pea ʻofeina kitautolu ʻe he ʻEikí, he ʻokú Ne ʻofa, fanafana mai, mo tokangaekina kitautolu ʻi ha founga ʻoku makehe fakatāutaha kiate kitautolu. ʻOku taʻefakangatangata Hono potó mo e mālohí, ʻo mahulu ia ʻi he tangata mo e fefine fakamatelié. ʻOkú Ne ʻafioʻi hotau faingataʻá, lavameʻá, mo e ngaahi holi māʻoniʻoni ʻa hotau lotó. (“ʻI ha Palani Fakalangi,” Liahona, Nōvema 2017, 56)

Naʻe akonaki ʻa Palesiteni Lāsolo M. Nalesoni ʻo pehē:

Siʻi kāinga ʻofeina, ko e ʻOtuá ʻa e tupuʻanga ʻo e moʻoni kotoa pē. ʻOku tali ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e moʻoni kotoa pē ʻoku fakahā mai ʻe he ʻOtuá ki Heʻene fānaú, ʻo tatau ai pē pe naʻe ʻilo ia ʻi ha loki saienisi pe maʻu mei ha fakahā fakahangatonu meiate Ia. (“Ko e hā e Meʻa ʻOku Moʻoní?” Liahona, Nōvema 2022, 30)

Ngaahi ʻEkitivitī Fakalahi ki he Akó

Founga ʻe taha ke kamata ʻakí

Te ke lava ʻo fakaʻaliʻali ha ngaahi fakatātā ʻo ha toafa mo ha ngoue hangē ko e ongo ʻīmisi ko ʻení, kae ʻoua ʻe fakaafeʻi ha tokotaha ako ke fakakakato ha ngāue ʻi he kamataʻanga ʻo e kalasí. Te ke lava ʻo kole ki he kau akó ke vahevahe ʻa e meʻa ʻoku haʻu ki heʻenau fakakaukaú ʻi he taimi ʻoku nau fakakaukau ai ki ha toafa ʻi hono fakafehoanaki ki ha ngoué.

Lau ʻa e Saame 63:1 mo e ʻĪsaia 58:11, ʻo kumi e meʻa ʻoku akoʻi mai ʻe he ngaahi veesi ko ʻení fekauʻaki mo e ʻEikí.

ʻOku fekauʻaki fēfē ʻa e ngaahi ʻīmisi ko ʻení mo e meʻa naʻá ke ako fekauʻaki mo e ʻEikí?
Ko e hā ʻoku hoko ai ʻa e vaí ko ha heliaki mālohi ki he ʻEikí?

Tokoni ke fakatokangaʻi ʻe he kau akó ʻa e founga ʻoku fafangaʻi fakalaumālie ai ʻe he ʻEikí hotau laumālié pea ʻai ke tau lava ʻo tupulakí. Te ke lava ʻo fakaafeʻi e kau akó ke fakakaukau ki he founga ʻe lava ke tanumaki fakalaumālie ai ʻe he ʻEikí ʻenau ngaahi feinga ke akó. Te ke lava leva ʻo liliu ki he fakamatala meia ʻEletā Kalake G. Kilipeti fekauʻaki mo e akó.

Ko ha sīpinga mei he folofolá ʻo hono fakakau ʻo e ʻEikí

Mahalo ʻe ʻaonga ki he kau akó hano ako ha sīpinga mei he folofolá ʻa ia naʻe fakakau ai ʻe ha taha e ʻEikí. Fakakaukau ke fakaʻaongaʻi ʻa e ʻekitivitī ko ʻení ke fakaloloto e mahino ʻa e kau akó ki he moʻoni meia ʻEletā Kalaké.

Te ke lava ʻo fakamatalaʻi ki he kau akó naʻe maʻu ʻe he Tuʻi ko Nepukanesa ʻo Pāpiloné ha misi naʻá ne hohaʻa ai. Naʻá ne fekauʻi ʻa e kau tangata poto ʻo hono puleʻangá, kau ai ʻa Taniela, ke fakahā kiate ia ʻa e ʻuhinga ʻo e misí. Kapau he ʻikai ke nau lava, naʻe folofola ange ʻa e tuʻí ʻe tāmateʻi kinautolu. Naʻe kole ʻe Taniela ki he tuʻí ha kiʻi taimi lahi ange, ʻi heʻene talaʻofa ke fakaʻuhingaʻi ʻa e misí (vakai, Taniela 2:1–16).

Fakaafeʻi e kau akó ke lau ʻa e Taniela 2:17–23, ʻo kumi e meʻa te tau lava ʻo ako meia Taniela ʻe lava ʻo tokoni ke mahino kiate kitautolu ʻa e founga ʻe lava ke hoko ai ʻa e ʻEikí ko ha konga ʻo ʻetau akó. Te ke lava ʻo fai ha fehuʻi ʻe taha pe lahi ange mei he ngaahi fehuʻi ko ʻení.

ʻOkú ke pehē ko e hā naʻe mei ako ʻe Taniela fekauʻaki mo e ʻOtuá mei he aʻusia ko ʻení?
ʻOkú ke pehē ʻe ueʻi fakalaumālie pe ʻoange fēfē ʻe he sīpinga ʻa Tanielá ha ʻamanaki lelei ki ha taha taʻu hongofulu tupu ʻoku faingataʻaʻia ʻi he ngāue fakaakó?
Ko e hā ha ngaahi founga ʻoku fakatātaaʻi ai ʻe he aʻusia ʻa Tanielá ʻa e moʻoni naʻe akoʻi ʻe ʻEletā Kilipetí?

Ko ha sīpinga ʻo hono fakakau ʻo e ʻEikí, mei ha palōfita ʻi he ngaahi ʻaho kimui ní

Ke tokoni ke ʻilo ʻe he kau akó ha sīpinga fakaonopooni ʻo e moʻoni naʻe akoʻi ʻe ʻEletā Kilipetí, ʻe lava ke mamata ʻa e kau akó ʻi he sīpinga ko ʻení mei he moʻui ʻa Palesiteni Lāsolo M. Nalesoní (mei he taimi 4:15 ki he 8:38) (Russell M. Nelson, “Sweet Power of Prayer,” Liahona, May 2003, 7–8).

16:47

Hili iá, ʻe lava ke ke ʻeke ha fehuʻi hangē ko ʻení.

Naʻe fakakau fēfē ʻe Palesiteni Nalesoni ʻa e ʻEikí ʻi heʻene feinga ke ako e founga ke fakahoko ai e ngāue taʻe-hano-tatau ko ʻení?
Naʻe fakalahi mo fakamālohia fēfē ʻe he ʻEikí e ngaahi feinga ʻa Palesiteni Nalesoní?

Te ke lava ʻo fakahaaʻi neongo ʻoku kehe hotau ngaahi tūkungá mei he tūkunga ʻo Palesiteni Nalesoní, ka ʻoku tokanga mai ʻa e ʻEikí ki heʻetau ako ʻi heʻetau akoʻangá, ngāueʻangá, pe ʻi ʻapí. Neongo he ʻikai tā fakatātaaʻi ʻe he ʻEikí ha tali ʻi hotau ʻatamaí, ka ʻoku lahi ha ngaahi founga kehekehe te Ne fakalahi mo fakamālohia ai ʻetau ngaahi feingá ʻi he taimi ʻoku tau fakakau ai Ia ʻi he hala fonongá.