« ការយកឈ្នះលើឧបសគ្គក្នុងការបន្តការអប់រំ ៖ ការប្រើប្រាស់ធនធានទាំងអស់ដែលមាន » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការយកឈ្នះលើឧបសគ្គក្នុងការបន្តការអប់រំ ៖ ការប្រើប្រាស់ធនធានទាំងអស់ដែលមាន » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
ការរៀបចំសម្រាប់ការអប់រំ និងការងារនាពេលអនាគត ៖ មេរៀនទី ១៩០
ការយកឈ្នះលើឧបសគ្គក្នុងការបន្តការអប់រំ
ការប្រើប្រាស់ធនធានទាំងអស់ដែលមាន
ព្រះអម្ចាស់បានបង្រៀនថា « សិរីល្អនៃព្រះគឺជាបញ្ញា » ( គោលលទ្ធិ និងសេចក្តីសញ្ញា ៩៣:៣៦ ) ។ បន្ថែមពីលើនេះទៀត ថ្នាក់ដឹកនាំសាសនាចក្របានបង្រៀនម្ដងហើយម្ដងទៀតអំពីសារៈសំខាន់នៃការអប់រំ ។ ទោះយ៉ាងណាក៏ដោយ ពេលខ្លះឧបសគ្គធ្វើឲ្យការបន្តការសិក្សារបស់យើងមានការពិបាក ។ មេរៀននេះអាចជួយសិស្សឲ្យកំណត់ធនធានដែលមាន ដើម្បីយកឈ្នះលើឧបសគ្គដើម្បីការបន្តការអប់រំរបស់ពួកគេ ។
សកម្មភាពរៀនសូត្រដែលអាចមាន
កំណត់ឧបសគ្គទាំងឡាយ
ចំណាំ ៖ ឧបសគ្គក្នុងការបន្តការអប់រំមានភាពខុសគ្នានៅជុំវិញពិភពលោក ។ អ្នកប្រហែលជាត្រូវកែសម្រួលសាច់រឿង ឬឧបសគ្គដែលអាចកើតមានដោយផ្អែកលើតំបន់របស់អ្នក និងតម្រូវការរបស់សិស្សអ្នក ។
ពិចារណាចាប់ផ្តើមថ្នាក់ដោយការគូរ ឬបង្ហាញរូបភាពរបស់ក្មេងជំទង់ដែលកំពុងសម្លឹងមើលម្ខាងទៀតនៃទន្លេ ដើម្បីតំណាងឲ្យការអប់រំនាពេលអនាគតដូចរូបភាពខាងក្រោម ។ បន្ទាប់មក សូមចែកចាយសាច់រឿងដូចខាងក្រោមនេះ ។
នៅក្នុងមេរៀនថ្នាក់សិក្ខាសាលានាពេលថ្មីៗនេះ គ្រូបង្រៀនរបស់លៀម បានចែកចាយសេចក្តីថ្លែងការណ៍មួយចំនួនមកពីថ្នាក់ដឹកនាំសាសនាចក្រអំពីសារៈសំខាន់នៃការអប់រំបន្ទាប់ពីថ្នាក់វិទ្យាល័យ ។ លៀមជឿលើដំបូន្មាននេះ ហើយចង់ធ្វើតាមដំបូន្មាននេះ ។ ប៉ុន្តែនៅពេលគាត់គិតអំពីអនាគត គំនិតរបស់គាត់ពោរពេញទៅដោយឧបសគ្គទាំងអស់ ដែលអាចរារាំងគាត់មិនឲ្យសម្រេចគោលដៅរបស់គាត់ ។
បន្ទាប់ពីចែកចាយបទពិសោធន៍របស់លៀម អ្នកអាចអញ្ជើញសិស្សឲ្យរាយបញ្ជីឧបសគ្គដែលអាចកើតមាននៅលើ ឬនៅជិតរូបភាពនៃទន្លេ ដែលអាចរារាំងលៀម ឬក្មេងជំទង់ផ្សេងទៀតមិនឲ្យបន្តការអប់រំរបស់ពួកគេ ។ ប្រសិនបើសិស្សបានធ្វើសកម្មភាព ការរៀបចំសិស្ស អ្នកអាចអញ្ជើញពួកគេឲ្យចែកចាយឧបសគ្គមួយចំនួនពីបញ្ជីរបស់ពួកគេ ។
លើកទឹកចិត្តសិស្សឲ្យពិចារណាទាំងឧបសគ្គខាងក្រៅ និងខាងក្នុង ។ ឧបសគ្គខាងក្រៅអាចរួមមានការមានកម្រិតផ្នែកហិរញ្ញវត្ថុ ចំណាត់ថ្នាក់ទាប ឬមានការរាំងស្ទះផ្សេងៗ ។ ឧបសគ្គខាងក្នុងអាចរួមបញ្ចូលទាំងការខ្វះទំនុកចិត្ដ ឬការខ្វះសេចក្ដីសង្ឃឹម ឬបំណងប្រាថ្នា ។
ដើម្បីជួយសិស្សឲ្យគិតអំពីឧបសគ្គដែលអាចកើតមានចំពោះការបន្ដការអប់រំរបស់ពួកគេ អ្នកអាចអញ្ជើញពួកគេឲ្យធ្វើសកម្មភាពខាងក្រោម ។
នៅក្នុងសៀវភៅកំណត់ហេតុការសិក្សារបស់អ្នក សូមឆ្លើយសំណួរទាំងនេះ ៖
-
តើឧបសគ្គមួយណា ( ពីលើក្តារខៀន ឬអ្នកដទៃ ) ដែលអ្នកបារម្ភថាអាចរារាំងដល់ការបន្ដការអប់រំរបស់អ្នក ?
-
តើអ្នកមានទំនុកចិត្តកម្រិតណាថាអ្នកអាចជម្នះឧបសគ្គទាំងនេះបាន ?
-
តើព្រះអង្គសង្គ្រោះអាចជួយអ្នកឲ្យយកឈ្នះលើឧបសគ្គទាំងនេះដោយរបៀបណា ?
ក្នុងអំឡុងពេលមេរៀននៅថ្ងៃនេះ សូមស្វែងរកចំណាប់អារម្មណ៍ពីព្រះវិញ្ញាណ ដើម្បីជួយអ្នកកំណត់របៀបជាក់លាក់ ដើម្បីយកឈ្នះលើឧបសគ្គរបស់អ្នកចំពោះការអប់រំ ។
ការឆ្លងទន្លេយ័រដាន់
ដើម្បីជួយសិស្សឲ្យប្រើព្រះគម្ពីរដើម្បីរៀនពីរបៀបជម្នះឧបសគ្គចំពោះការអប់រំរបស់ពួកគេ សូមពិចារណាពិភាក្សាអំពីដំណើររឿងរបស់យ៉ូស្វេ និងកូនចៅអ៊ីស្រាអែលដែលឆ្លងទន្លេយ័រដាន់ ( សូមមើល មេរៀនទី ៦២ ៖ « យ៉ូស្វេ ២–៤ » សម្រាប់សេចក្ដីលម្អិតបន្ថែមទៀត ) ។ អ្នកអាចអាន ឬសង្ខេបកថាខណ្ឌខាងក្រោមនេះតាមដែលត្រូវការ ។
នៅពេលយ៉ូស្វេ និងកូនចៅអ៊ីស្រាអែលបានមកដល់ស្រុកកាណាន ព្រះអម្ចាស់បានសន្យានឹងពួកគេនូវដែនដីទាំងអស់នៅត្រើយម្ខាងនៃទន្លេយ័រដាន់ ( សូមមើល យ៉ូស្វេ ១:១–៧ ) ។ ទោះជាយ៉ាងណាក៏ដោយ ពួកគេបានប្រឈមមុខនឹងឧបសគ្គក្នុងការឆ្លងកាត់ទន្លេដែលហូរហៀរដើម្បីសម្រេចបាននូវគោលដៅរបស់ពួកគេ ( សូមមើល យ៉ូស្វេ ៣:១៥ ) ។
អ្នកអាចរៀបចំសិស្សជាគូ ឲ្យអាន និងពិភាក្សាខគម្ពីរខាងក្រោម ។ វាអាចនឹងមានប្រយោជន៍ក្នុងការពន្យល់ថា ឃ្លា « កល់នៅនឹងជាគំនរ » ( ខទី ១៣ ) និង « ឡើងជាគំនរ » ( ខទី ១៦ ) សំដៅលើលំហូរនៃទន្លេយ័រដាន់ដែលបាននៅនឹង ។
សូមអាន យ៉ូស្វេ ៣:៦–៨, ១៣–១៧ ដោយរកមើលចំណុចដូចខាងក្រោម ៖
-
សកម្មភាពដ៏ស្មោះត្រង់ដែលពួកសង្ឃបានធ្វើដើម្បីឲ្យកូនចៅអ៊ីស្រាអែលឆ្លងទន្លេយ័រដាន់
-
ជំនួយរបស់ព្រះក្នុងការអនុញ្ញាតឲ្យកូនចៅអ៊ីស្រាអែលឆ្លងកាត់ទន្លេយ័រដាន់
សិស្សអាចចែកចាយជាមួយដៃគូនូវអ្វីដែលពួកគេរកឃើញ ។ ពួកគេអាចពិភាក្សាអំពីរបៀបដែលទង្វើដ៏ស្មោះត្រង់របស់ពួកសង្ឃ និងជំនួយរបស់ព្រះអម្ចាស់បានអនុញ្ញាតឲ្យកូនចៅអ៊ីស្រាអែលយកឈ្នះលើឧបសគ្គនោះ ។
បន្ទាប់មក អ្នកអាចសួរសិស្សក្នុងថ្នាក់នូវសំណួរខាងក្រោម ៖
-
តើដំណើររឿងនេះអាចជួយក្មេងជំទង់ដែលប្រឈមមុខនឹងឧបសគ្គចំពោះការបន្ដការអប់រំរបស់ពួកគេបានយ៉ាងដូចម្ដេច ?
នៅក្នុងសៀវភៅកំណត់ហេតុការសិក្សារបស់អ្នក សូមសរសេរសេចក្តីថ្លែងការណ៍នៃសេចក្តីពិតដោយផ្អែកលើអ្វីដែលអ្នកបានរៀន ដែលអាចអនុវត្តចំពោះការយកឈ្នះលើឧបសគ្គក្នុងការបន្តការអប់រំរបស់អ្នក ។
សិស្សអាចនឹងប្រើពាក្យសម្ដីរបស់ពួកគេផ្ទាល់ដើម្បីចែកចាយសេចក្ដីពិតមួយដូចជា ៖ នៅពេលយើងឆ្ពោះទៅមុខដោយសេចក្ដីជំនឿលើព្រះយេស៊ូវគ្រីស្ទ ទ្រង់នឹងជួយយើងយកឈ្នះលើឧបសគ្គដែលយើងប្រឈមមុខ ។
-
ហេតុអ្វីបានជាការឈានទៅមុខដោយសេចក្ដីជំនឿលើព្រះយេស៊ូវគ្រីស្ទ ( ការធ្វើគ្រប់យ៉ាងក្នុងអំណាចរបស់យើង ) ចាំបាច់ដើម្បីជម្នះឧបសគ្គចំពោះការអប់រំ ?
-
ហេតុអ្វីបានជាការស្វែងរក ជំនួយរបស់ព្រះ ដោយស្មោះត្រង់អាចចាំបាច់ដើម្បីជម្នះឧបសគ្គចំពោះការអប់រំ ?
អ្នកអាចរំឭកសិស្សថាការឈានទៅមុខដោយសេចក្ដីជំនឿលើព្រះយេស៊ូវគ្រីស្ទ រួមបញ្ចូលនូវគ្រប់ការខិតខំទាំងអស់ដែលពួកគេអាចនឹងធ្វើ ។ ឧទាហរណ៍ ការនិយាយទៅកាន់អ្នកប្រឹក្សា ការរកប្រាក់ និងការថ្វាយដង្វាយមួយភាគក្នុងដប់ដោយស្មោះត្រង់ គឺជារបៀបទាំងអស់ដើម្បីឆ្ពោះទៅមុខដោយសេចក្ដីជំនឿលើព្រះយេស៊ូវគ្រីស្ទ ដើម្បីយកឈ្នះលើឧបសគ្គចំពោះការអប់រំ ។
សាច់រឿងអនុវត្ត
សកម្មភាពខាងក្រោមជួយសិស្សឲ្យអនុវត្តការត្រិះរិះពិចារណា ។ អ្នកអាចចង្អុលបង្ហាញដល់សិស្សថា ការត្រិះរិះពិចារណា គឺជាជំនាញដែលអាចជួយយើងធ្វើការសម្រេចចិត្តល្អៗ ។ វារួមមាន ( ១ ) ការសង្កេត និងការប្រមូលព័ត៌មានអំពីការសម្រេចចិត្ត ( ២ ) ការសួរសំណួរអំពីអ្វីដែលអ្នកកំពុងសង្កេត ( ៣ ) ការពិភាក្សាអំពីការសង្កេតរបស់អ្នកជាមួយអ្នកដទៃ និង ( ៤ ) ការដោះស្រាយបញ្ហាដោយផ្អែកលើអ្វីដែលអ្នករៀន ។ អ្នកអាចឲ្យសិស្សបំពេញជំហានទាំងនេះជាផ្នែកនៃសកម្មភាពនេះ ។
សូមអញ្ជើញសិស្សឲ្យបង្កើតសាច់រឿងមួយនៅលើក្រដាសមួយដែលមានឧបសគ្គដែលទាក់ទងនឹងក្មេងជំទង់ ។ ប្រសិនបើពួកគេត្រូវការជំនួយ ពួកគេអាចបំពេញចន្លោះនៅក្នុងប្រយោគខាងក្រោម ។
( ឈ្មោះក្មេងជំទង់ ) ដឹងថាការអប់រំបន្ទាប់ពីវិទ្យាល័យមានសារៈសំខាន់ ។ ប៉ុន្តែឧបសគ្គមួយក្នុងការបន្តការអប់រំរបស់ពួកគេគឺ ( រៀបរាប់ពីឧបសគ្គ ) ។
បន្ទាប់មក អ្នកអាចប្រមូលសាច់រឿងដែលបានបញ្ចប់ ដាក់វាបញ្ចូលគ្នា ហើយចែកចាយវាទៅឲ្យសិស្សក្នុងថ្នាក់ ។
សិស្សអាចប្រើសំណៅមេរៀន « ការប្រមូលព័ត៌មានដើម្បីយកឈ្នះលើឧបសគ្គក្នុងការអប់រំ » និងមេរៀនដែលពួកគេបានរៀនចេញពី យ៉ូស្វេ ៣ ដើម្បីជួយពួកគេឆ្លើយសំណួរខាងក្រោមអំពីសាច់រឿងដែលពួកគេបានទទួល ។ ពួកគេអាចសរសេរចម្លើយរបស់ពួកគេនៅខាងក្រោយក្រដាសសាច់រឿង ។
-
តើបុគ្គលនេះអាចសួរសំណួរអ្វីខ្លះ នៅពេលពួកគេពិចារណាអំពីធនធានដែលមាន ? តើពួកគេអាចពិភាក្សាសំណួរមួយចំនួនរបស់ពួកគេជាមួយនរណា ?
-
តើបុគ្គលនេះអាចធ្វើសកម្មភាពអ្វីខ្លះ ដើម្បីឈានទៅមុខដោយសេចក្ដីជំនឿលើព្រះយេស៊ូវគ្រីស្ទ ដើម្បីយកឈ្នះឧបសគ្គរបស់ពួកគេ ?
-
តើព្រះអាចជួយបុគ្គលនេះឲ្យយកឈ្នះឧបសគ្គរបស់ពួកគេដោយរបៀបណា ?
អ្នកអាចអញ្ជើញសិស្សដែលស្ម័គ្រចិត្ដឲ្យចែកចាយសាច់រឿង និងដំបូន្មានរបស់ពួកគេជាមួយសិស្សក្នុងថ្នាក់ ។ ជាផ្នែកមួយនៃការពិភាក្សារបស់អ្នក អ្នកអាចអញ្ជើញសិស្សឲ្យចែកចាយបទពិសោធន៍ដែលព្រះបានជួយពួកគេ ឬនរណាម្នាក់ដែលពួកគេស្គាល់ឲ្យយកឈ្នះលើឧបសគ្គចំពោះការបន្តការអប់រំរបស់ពួកគេ ។ ឬអ្នកអាចចែកចាយឧទាហរណ៍មួយពី « ការអធិប្បាយរបស់អែលឌើរ និង ស៊ីស្ទើរ ហ្គីលប៊ឺត » ចាប់ពីនាទីទី ៣:២៥ ដល់ ៥:៤៨ នៅក្នុងការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ខែឧសភា ឆ្នាំ២០២៤ ។
សេចក្ដីបញ្ចប់
អ្នកអាចអញ្ជើញសិស្សឲ្យពិនិត្យមើលបញ្ជីនៃឧបសគ្គផ្ទាល់ខ្លួនដែលពួកគេបានកំណត់នៅពេលចាប់ផ្តើមថ្នាក់ ។ សូមលើកទឹកចិត្តពួកគេឲ្យស្វែងរកការណែនាំពីព្រះវិញ្ញាណ នៅពេលពួកគេឆ្លើយសំណួរខាងក្រោមនៅក្នុងសៀវភៅកំណត់ហេតុរបស់ពួកគេ ។
-
តើធនធានអ្វីខ្លះដែលអ្នកអាចប្រើបានពីការពិភាក្សាថ្ងៃនេះដើម្បីជួយអ្នកយកឈ្នះលើឧបសគ្គ និងត្រៀមខ្លួនសម្រាប់ការអប់រំនាពេលអនាគត ?
-
តើសកម្មភាពស្មោះត្រង់អ្វីខ្លះដែលអ្នកអាចធ្វើបាន ដើម្បីឲ្យព្រះវរបិតាសួគ៌ និងព្រះយេស៊ូវគ្រីស្ទអាចជួយអ្នកយកឈ្នះលើឧបសគ្គរបស់អ្នក ?
អ្នកអាចបិទថ្នាក់ដោយការថ្លែងទីបន្ទាល់ថា នៅពេលយើងធ្វើអ្វីៗទាំងអស់ដោយអររីករាយក្នុងអំណាចរបស់យើង ព្រះវរបិតាសួគ៌ និងព្រះយេស៊ូវគ្រីស្ទ នឹងជួយយើងយកឈ្នះឧបសគ្គរបស់យើងចំពោះការបន្តការអប់រំរបស់យើង ។