Vendosja e Synimeve

• Çfarë shpreson të arrish brenda tre muajve? Brenda një viti? Brenda pesë vjetësh?

  Ftojini nxënësit t’i përsiatin pyetjet vijuese. Nxënësit e gatshëm mund t’ia tregojnë më pas përgjigjet e tyre klasës.

• Çfarë mendimesh ose ndjenjash ke ndërsa mendon rreth këtyre synimeve? Pse?

Ati Qiellor dhe Jezu Krishti duan që ti të bëhesh vetja jote më e mirë – duke u bërë përfundimisht siç janë Ata (shih tek 3 Nefi 12:48). Në mësimin e sotëm, kërko udhërrëfimin e Shpirtit për të parë se si Ata mund të të ndihmojnë t’i vendosësh dhe t’i arrish synimet e tua vetjake.

Lexoje thënien vijuese nga Plaku Ulises Soares, i Kuorumit të Dymbëdhjetë Apostujve, duke kërkuar atë që mëson rreth vendosjes dhe arritjes së synimeve tona:

“Ndihma që mund të marrim nga Zoti për objektivat dhe synimet tona të drejta, është e pakufizuar dhe Ai na përkrah në çdo përpjekje të mirë dhe të drejtë. … Unë ju ftoj të merrni parasysh mënyrat për të synuar përpjekjet e drejta në jetën tuaj pavarësisht nga rrethanat tuaja. Unë ju siguroj se Zoti e do secilin prej nesh dhe Ai është gjithnjë aty për të na ndihmuar, pavarësisht nga situata me të cilën po përballemi.” (“Goals, Growth, and Progress – Recent Messages from Prophets and Apostles”, [artikull vetëm në formatin elektronik], Liahona, janar 2023, Gospel Library [Biblioteka e Ungjillit])

• Si mund të gjejë zbatim mesazhi i Plakut Soares për vendosjen dhe arritjen e synimeve tona?

  Megjithëse nxënësit mund të përdorin fjalë të ndryshme, ndihmojini ata të kuptojnë se Zoti do të na ndihmojë t’i vendosim dhe arrijmë synimet tona të drejta. Merreni parasysh ta shkruani këtë të vërtetë në tabelë.

  Më pas shkruani Zoti në tabelë, mbi diagramin nga fillimi i mësimit dhe bëni pyetjen vijuese.

• Çfarë ndryshimi bën për ty dijenia se Zoti do të të ndihmojë ndërsa i vendos dhe kërkon t’i arrish synimet e tua?

  Mund të jetë e dobishme të shpjegoni se ne mund të vendosim synime në shumë fusha të jetës sonë, duke përfshirë synimet për arsimimin, marrëdhëniet dhe shëndetin tonë fizik. Çdo përpjekje për t’u rritur, përmirësuar dhe përparuar, në një mënyrë të ngjashme me të Krishtit, mund të jetë një synim i drejtë.

  Disa nxënës mund të ndihen të shkurajuar në lidhje me vendosjen e synimeve për shkak se ata më shpesh ndiejnë sikur nuk i arrijnë ato sesa ia dalin me sukses. Për t’i ndihmuar këta nxënës, merrni parasysh të bëni pyetjen vijuese.

• Kur nuk i arrijmë synimet tona, përse është e rëndësishme të kujtojmë se Zoti na do dhe është aty për të na ndihmuar, siç dha mësim Plaku Soares?

Disa vjet para thirrjes së tij si profeti i Zotit, Abrahami u rrit në një tokë ligësie dhe idhujtarie. Edhe babai i tij vendosi t’ia “m[errte] jetën” (Abraham 1:30).

Lexo tek Abraham 1:1–2, 4, duke kërkuar synimet që kishte vendosur Abrahami për vete.

• Çfarë gjete?

• Duke marrë parasysh rrethanat e Abrahamit, sa e vështirë mund të ketë qenë t’i arrinte synimet e tij?

Zoti e shpëtoi jetën e Abrahamit në mënyrë të mrekullueshme dhe premtoi ta ndihmonte t’i arrinte synimet e tij të drejta (shih tek Abraham 1:15–20).

Lexo tek Abraham 1:18–19, duke kërkuar mënyrën se si Zoti do ta ndihmonte Abrahamin.

• Si mund të ndikojë përvoja e Abrahamit në mënyrën se si ti mendon rreth synimeve të tua?

• Si të kanë ndihmuar Ati Qiellor dhe Jezu Krishti ty ose dikë që ti njeh, që të vendosësh ose të arrish një synim të drejtë?

Hap PDF‑në

Shqyrtoji parimet në fletushkë dhe përgatitu t’u përgjigjesh pyetjeve vijuese:

• Cilat pjesë të këtij procesi i bën mirë? Cilat pjesë janë më të vështirat për ty? Pse?

• Si mund të duket ta përfshish Zotin dhe të kërkosh ndihmën e Tij gjatë gjithë këtij procesi?

Rendit në ditarin e studimit disa shembuj të synimeve të drejta dhe të vlefshme që adoleshentët mund t’i vendosin për jetën e tyre.

Më pas, zgjidh njërin nga këto synime dhe, duke përdorur parimet në fletushkë, krijo një skenar në të cilin një individ mund ta bëjë në mënyrë realiste secilin hap. Merre parasysh se si mund ta përfshish Zotin në këtë proces.

Përsiati synimet e tua vetjake duke përdorur hapin e parë nga fletushka. Për ta bërë këtë, mund të reflektosh mbi vizatimin tënd nga fillimi i mësimit.

Shkruaj një ose dy synime që do të doje t’i arrije. Krijo një plan të hollësishëm që përvijon hapat që do të doje të ndërmerrje për t’i arritur ato. Sigurohu të përfshish në planin tënd mënyrën se si mund ta përfshish Zotin te synimet e tua.