“Fa’ataitaiga o le Atamai i A’oa’oga Fa’avae 10: Fa’aaoga Mataupu Fa’avae o le Mauaina o le Malamalama Fa’aleagaga,” Tusi Lesona a le Faia’oga Seminare o le Feagaiga Tuai (2026)
“Fa’ataitaiga o le Atamai i A’oa’oga Fa’avae 10: Fa’aaoga Mataupu Fa’avae o le Mauaina o le Malamalama Fa’aleagaga,” Tusi Lesona a le Faia’oga Seminare o le Feagaiga Tuai
Mika; Nauma; Sapakuka; Sefanaia: Lesona 154
Fa’ata’ita’iga o le Atamai i A’oa’oga Fa’avae 10
Fa’aaoga Mataupu Fa’avae o le Mauaina o le Malamalama F’aaleagaga
O le atamai i a’oa’oga fa’avae e mafai ona fesoasoani i tagata a’oga e atiae o latou olaga i luga o le faavae o Iesu Keriso ma Lana talalelei.O lenei lesona e mafai ona fesoasoani i tagata a’oga e fa’asoa mai fuaitau o le atamai i a’oa’oga fa’avae e anoa i o latou olaga, ma fesoasoani ia i latou e a’oa’o ma fa’aaoga mataupu fa’avae paia mo le mauaina o le malamalama fa’aleagaga.
Sauniuniga a le tagata a’oga: Vala’aulia tagata a’oga e toeiloilo fuaitau o le atamai i a’oa’oga fa’avae na latou a’oa’oina.Uunaia i latou e omai saunia i le vasega e fa’asoa atu se tasi na fa’alolotoina lo latou ta’utinoga, malamalama i le talalelei, po’o le sootaga ma le Tamā Fa’alelagi ma Iesu Keriso.O se lisi o nei fuaitau o loo maua i le faaiuga o le Pepa o Fa’amatalaga Autū o le Atamai i A’oa’oga Fa’avae (2022).
Gaoioiga e Ono Mafai Ona Aoaoina Ai
Iloiloga o le atamai i aoaoga faavae: Faasoa
Ina ’ia saunia tagata a’oga e fa’asoa atu ni fuaitau o a’oa’oga fa’avae na iai se a’afiaga iā i latou i lenei tausaga, mafaufau e vala’aulia tagata a’oga e tali vave i le fesili o lo’o i lalo fa’atasi ma sana paga i tulaga eseese ua lisiina atu.
O le a se mea’ai e te fiafia lava iai i tulaga eseese nei?
-
Mea muamua i le taeao
-
Mea’ai māmā i le leva o le po
-
I lou aso fanau
-
I se aoauli vevela
-
I se afiafi mālūlū
E pei ona suia au meaai e te fiafia iai e faatatau i tulaga eseese, e mafai foi ona suia au fuaitau o mau e sili ona e fiafia iai e fa’avae i mana’oga ma tulaga eseese.
Mafaufau e vala’aulia tagata a’oga e manatunatu loloto i a latou tali i le fesili lenei mo tulaga eseese taitasi e pei ona fa’amatalaina i lalo.E mafai ona e taofi pe a mae’a ona fa’asoaina atu i tulaga taitasi ina ia mafai e tagata a’oga ona toe iloilo le lisi o fuaitau mo le atamai o a’oa’oga fa’avae o le Feagaiga Tuai i le fa’ai’uga o le Pepa Autū mo le Atamai o A’oa’oga Fa’avae (2023).Ona vala’aulia lea o tagata a’oga e fa’asoa fuaitau na latou filifilia ma aisea fo’i [na filifilia ai] ma ni a latou paga po’o ni vaega toalaiti.
Ia mautinoa e tu’u ia lava se taimi o le vasega mo le vaega o le “A’oa’o ma fa’aaoga mata’upu fa’avae mo le mauaina o le malamalama fa’aleagaga”.
O le ā se fuaitau mo le atamai o a’oa’oga fa’avae o le Feagaiga Tuai e pito sili ona e fiafia iai mo mea ta’itasi o lo’o i lalo?Aisea?
-
Ina ia a’oa’o e uiga ia Iesu Keriso ma Lana misiona
-
Ina ia fa’amatala lo tatou mana’omia ai o perofeta
-
Ina ia malamalama i le ata o le fa’aolataga
A’oa’o ma fa’aaoga mataupu fa’avae o le mauaina o le atamai fa’aleagaga
Mo le gaoioiga lenei, atonu e fesoasoani le tu’u o tagata a’oga i ni vaega ta’ito’atolu, fa’atasi ai ma tagata taitasi o le vaega e taula’i atu i se mataupu fa’avae o le mauaina o le malamalama fa’aleagaga. Tu’u i tagata a’oga se taimi e iloilo otooto ai parakalafa i le Pepa Autū mo le Atamai i A’oa’oga Fa’avae e ōgatusa ma la latou mataupu fa’avae.(O manatu mo gaoioiga toe fa’amanatu o lo o aofia ai le “Gaoioiga o le Iloiloga o le Atamai i A’oa’oga Fa’avae” i le fa’aopoopoga o lenei tusi lesona.)
A mae’a ona fai le iloiloga a tagata a’oga, tuu atu i vaega ta’itasi se fasipepa.Vala’aulia i latou e fa’aaoga la’asaga e tolu i lalo e tusi ai se ata fa’ata’ita’i moni o le a fa’ailoa mai ai o le a taua le fa’aaogaina o mataupu fa’avae o le mauaina o le malamalama fa’aleagaga.A mana’omia e vaega ni nai ta’ita’iga, e mafai ona e fa’asinoina i latou e fausia ni ata fa’ata’ita’i e fa’atatau i se talavou o lo’o iai ni fesili po’o ni atugaluga e uiga i se tasi o autu nei:
-
O le moni o le Tusi a Mamona
-
O le mana’omia o se Ekalesia a Iesu Keriso toefuataiina i luga o le fogaeleele
-
O se fautuaga talu ai nei mai i le perofeta
Afai e fesoasoani, e iai ata fa’ataitai ua fautuaina i le vaega o le “Gaoioiga Fa’aopoopo e A’oa’o Ai” o lenei lesona o lo’o maua i le ChurchofJesusChrist.org.
Fa’aaoga la’asaga nei e fausia ma fa’atalanoa ai se ata fa’ata’ita’i moni e ono mafai e se talavou ona fa’aaoga ai mataupu fa’avae o le mauaina o le malamalama fa’aleagaga e fesoasoani ai mo ni fesili po’o ni atugaluga.
-
Tusi i lalo le suafa o le tagata ma ona tausaga ma se lu’itau moni faale-fa’atuatua o lo’o feagai ma i latou.
-
Lisi se fesili se tasi pe lua fo’i po’o ni atugaluga o lo’o ia i latou e afua i la latou luitau.
-
Fa’atalanoa le fesili o lo’o i lalo ma le tou vaega, ae aua le tusia ni tali i luga o le pepa.Mautinoa e maua le avanoa e fa’asoa mai ai tagata ta’ito’atasi o le vaega o latou malamalamaaga.
-
E mafai fa’apefea e mataupu fa’avae o le mauaina o le malamalama fa’aleagaga ona fesoasoani i se tagata i le tulaga o lo’o iai o ia?
Tuu atu i vaega ia matua lava le taimi e fa’atalanoa ai le fesili lea faatoa uma ona tuuina atu.Atonu e te fia savalivali solo i totonu o le potu ma faatasi atu i vaega eseese mo sina taimi puupuu ina ia a’oa’o mai i mea o loo latou faasoaina atu i le tasi ma le isi.
Afai e te lagona e fesoasoani le ave i vaega o nisi fesili patino e tele atu, e ono mafai ona e ave iai ni nai fesili o i lalo po’o fesili uma fo’i.
-
O a ni mea e te iloa e fa’atatau i le Tamā Fa’alelagi ma Lana fuafuaga mo Lana fanau e ono fesoasoani i lenei tagata e maua ai se va’aiga e fa’avavau?
-
E ono mafai fa’apefea e a latou filifiliga i lenei tulaga ona aafia ai la latou so’otaga mo se taimi umi ma le Tamā Fa’alelagi ma Iesu Keriso?
-
O a ni mau po’o ni saunoaga fo’i mai ta’ita’i o le Ekalesia e te ono fautuaina e latou te su’esu’eina?
Afai e lava le taimi, a mae’a ona fa’asoa mai vaega, vala’aulia i latou e fesuia’i latou ata fa’ata’ita’i ma se isi vaega ma fa’atalanoa le fesili (po’o ni fesili) e fa’aaoga ai le ata fa’ataitai a le isi vaega.
Fa’aaogaina patino
O le lesona mulimuli lenei mo le faata’ita’iga o le atamai i a’oa’oga fa’avae o le tausaga mo le Feagaiga Tuai.I le iloaina ai o lena mea, atonu e fesoasoani ai i tagata a’oga e mafaufau loloto ma tusi i a latou api tala’aga o suesuega e uiga i se tulaga i o latou lava olaga lea e mafai ona latou fa’aaogaina ai mataupu fa’avae o le mauaina o le malamalama fa’aleagaga.Atonu e mafai ona e fa’asoaina atu se fa’ata’ita’iga puupuu mai i lou olaga lea na fa’amanuiaina ai oe i mataupu fa’avae o le mauaina o le malamalama fa’aleagaga.
E mafai ona e fa’ai’uina le vasega e ala i le vala’aulia o tagata a’oga e faamae’a se tasi pe sili atu fo’i o uunaiga nei e uiga i le tulaga na latou tusia e uiga iai i totonu o a latou api tala’aga mo su’esu’ega.Uunaia i latou e saili atu i musumusuga mai le Agaga Paia e ono fesoasoani ia i latou e fa’aaoga nei mataupu fa’avae i o latou olaga.
-
O se tasi o auala e mafai ona ou faatino ai ma le fa’atuatua ia Iesu Keriso o …
-
O mea moni ou te manatuaina e fa’atatau i le Tamā Fa’alelagi, Iesu Keriso, ma la Laua fuafuaga e mafai ona fesoasoani ia te a’u o …
-
O puna’oa o fa’amatalaga nei e mafai ona ou liliu ai e fa’amalosia ai lo’u fa’atuatua i le Fa’aola ma ana a’oa’oga o …
Uunaia tagata a’oga e fa’aaoga ma le loto iai nei mataupu fa’avae i o latou olaga ma galulue e faatino musumusuga latou te mauaina.