“Sapakuka: Fa’atali Ai mo Tali i a Tatou Fesili Fa’amaoni,” Tusi Lesona a le Faia’oga Seminare o le Feagaiga Tuai (2026)
“Sapakuka: Fa’atali Ai mo Tali i a Tatou Fesili Fa’amaoni,” Tusi Lesona a le Faia’oga Seminare o le Feagaiga Tuai
Mika; Nauma; Sapakuka; Sefanaia: Lesona 153
Sapakuka
Fa’atali Ai mo Tali i a Tatou Fesili Fa’amaoni
Ina ua iai fesili a le perofeta o Sapakuka e fa’atatau i le amio leaga o siomia ai o ia, sa ia sa’ili atu ma fa’atali mo ni tali mai le Alii.E faapei o Sapakuka, e mafai ona tatou liliu atu i le Alii ma ni a tatou fesili.O lenei lesona e mafai ona fesoasoani i tagata a’oga e malamalama e fa’atatau i auala e fa’atumauina ai lo latou fa’atuatua iā Iesu Keriso pe a iai ni a latou fesili e foliga mai e le’o maua ni tali.
Sauniuniga a le tagata a’oga: Vala’aulia tagata a’oga e fesili i se uo po’o se tagatai o le aiga pe sa iai se taimi na latou tauivi ai ma ni fesili faigata na foliga mai e le’i maua ni tali.Afai o lea, e mafai e tagata a’oga ona fesiligia po’o le ā se mea sa fai e lenei tagata ina ia tumau ai lona fa’atuatua i le Alii a’o fa’atalitali mo ni tali.
Gaoioiga e Ono Mafai Ona Aoaoina Ai
O se mea masani le iai o ni fesili
U’u i luga se fagu o lo’o tusia ai se fa’ailoga fesili i le isi ou lima ma se isi fagu o lo’o pipi’i ai se ata o Keriso i le isi ou lima.Fa’amatala atu e faapea, o le tasi fagu o lo’o avea ma fa’ailoga o fesili po’o ni atugaluga e ono iā i tatou a’o le isi fagu e avea ma fa’ailoga o lo tatou fa’atuatua i le Alii ma lana talalelei.
Vala’aulia tagata a’oga e mafaufau i fesili o lo’o i lalo ae le’i faitauina le tautalaga mai iā Peresitene Uchtdorf.
-
Fa’amata e tatou te ono tauivi ma ni fesili faigatā ma fa’atuatua pea iā Iesu Keriso ma Lana Ekalesia toefuata’iina i le taimi e tasi?
Sa a’oa’o mai Peresitene Dieter F. Uchtdorf, a o i ai i le Au Peresitene Sili:
O le fia malamalama o le amataga lea o se molimau.E ono lagona e nisi le matamuli po o le le agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena.O le faia o fesili e le o se faailoga lea o le vaivai; ae o se teuteuala mo le tuputupu a’e.
Ua poloaiina i tatou e le Atua e saili i tali i a tatou fesili ma tau lava ina ole atu tatou te saili “ma le loto faamaoni, ma le manatu moni i ai, ma le faatuatua ia Keriso” [Moronae 10:4].A tatou faia faapea, o le a mafai ona fa’aali mai iā i tatou le moni o mea uma “e ala i le mana o le Agaga Pa’ia” [Moronae 10:5].
Aua le fefefe; ia fesili atu.Ia magafagafa, ae aua le masalosalo!Ae ia uumau pea e le aunoa i le faatuatua ma i le malamalama ua uma ona e mauaina.(“The Reflection in the Water” [faeasaite a le Ofisa o Aoga a le Ekalesia mo talavou matutua, Nov. 1, 2009], broadcasts.ChurchofJesusChrist.org)
-
Aisea e te manatu ai e tatau ona e malamalama i le mea na a’oa’o mai e Peresitene Uchtdorf?
Fesili Faigata
Na vala’auina e le Alii ia Sapakuka e avea ma perofeta i le mālō o Iuta ao le’i si’omia e ’au a Papelonia ia Ierusalema.E pei o isi perofeta, na iai fesili a Sapakuka ma na ia sa’ilia fo’i se malamalama mai i le Alii (taga’i i le Ieremia 12:1; Mata’upu Fa’avae ma Feagaiga 121:1–6).
Faitau le Sapakuka 1:2–4, vaavaai mo fesili sa tauivi ai Sapakuka.I lau ’api tala’aga mo suesuega, fa’amatala pe fa’apefea e se tasi ona fa’aalia ni fesili po’o ni popolega fa’apena.
Vala’aulia tagata a’oga e fa’asoa mai mea na latou tusia.Atonu e mafai ona latou fa’asoa mai ni mea e pei ona tā’ua i lalo:
-
Le Alii e, o e faafofogaina a’u? (fuaiupu e 2)
-
Aisea ua tele na’uā ai sauaga ma le agasala o lo’o si’omia ai a’u? (fuaiupu e 3)
-
Aisea ua le tausalaina ai tagata amio leaga mai i le tele o mea leaga latou te faia? (fuaiupu e 4)
Tu’u atu i tagata a’oga ta’itasi ni fasipea laiti e tusi ai i lalo a latou tali i le uunaiga lenei.
E faapei o Sapakuka, atonu e i ai fo’i ni a tatou fesili.Tusi i lalo ni fesili faigatā o e lagona e le’i taliina.
E mafai e tagata a’oga ona tu’u mea na latou tusia i totonu o le fagu o lo’o iai tatou fesili.
U’u i luga le fagu o lo’o iai fesili ae tu’u i lalo le fagu o lo’o avea ma fa’ailoga o lo tatou fa’atuatua iā Iesu Keriso.Fa’amatala atu e faapea a iai ni a tatou fesili, e ono fa’aosoosoina i tatou e tu’u ’ese lo tatou fa’atuatua iā Iesu Keriso ona e le o iā i tatou ni tali.
-
O le a le mata’utia o le tu’u ’ese o lo tatou fa’atuatua ma sootaga ma le Alii pe a iai ni a tatou fesili?
U’u uma fagu e lua i ou lima ma fa’amatala e lē tatau ona tatou tu’u ’ese lo tatou fa’atuatua iā Iesu Keriso ona o ni fesili.E mafai ona tatou aga’i i luma ma le fa’atuatuaina o le Alii a’o tatou sa’ilia ni tali.
A’o e su’esu’eina le Sapakuka, va’ai toto’a i uunaiga mai i le Agaga Pa’ia e ono fesoasoani iā te oe e aga’i ai i luma ma le fa’atuatua i le Alii a’o fa’atali ai mo ni tali.
Tepa atu i le Atua
I le taimi atoa o totoe o le lesona, atonu e te mafaufau e faavava le vala’auliaina o tagata a’oga e fa’aopoopo atu ni mea i le fagu o le fa’atuatua. A e faia fa’apea, tu’u atu i tagata a’oga fasipepa laiti e tusi ai ni mea na latou a’oa’oina mai iā Sapakuka po’o isi tagata o le vasega e fa’atatau i le auala e fa’atuatuaina ai le Alii ma aisea fo’i.
Ina ia tali atu i fesili a Sapakuka e fa’atatau i le amio leaga o tagata, na fetalai mai le Alii o le a Ia “fa’atuina i luga [le malo o] Kaletaia” (tagata Papelonia) e sauaina le fanauga a Isaraelu (taga’i i le Sapakuka 1:6).Na taumafaufau Sapakuka pe aisea na fa’ataga ai e le Alii tagata amio leaga o Papelonia e pulea ona tagata (taga’i i le Sapakuka 1:12–17).
Faitau le Sapakuka 2:1–4, va’ava’ai po’o le a se mea na filifili Sapakuka e fai a’o ia tauivi ma ana fesili ma pe na fa’apefea ona tali mai le Alii.
-
O le a se mea na e mauaina?
Atonu e te faia ni fesili tulitatao e pei o le, “O le ā sou manatu e fa’ape’ī foliga o le ‘va’ava’ai e iloa ai po’o le ā se mea o le a fetalai mai ai le [Atua]’? (taga’i i le Sapakuka 2:1)” po’o le “E fa’ape’ī foliga o le ‘ola i lo [tatou] fa’atuatua’? (taga’i i le Sapakuka 2:4).”
E mafai ona e vala’aulia tagata a’oga e fa’aopoopo ni mea o lo’o latou a’oa’oina i le fagu o le fa’atuatua.
Fa’amatala atu e faapea na fetalai le Alii ia Sapakuka e mulimuli ane ona fa’aumatiaina lea o le ’au Papelonia ona o lo latou amio leaga (taga’i i le Sapakuka 2:5–20).
Faitau le Sapakuka 3:17–19, vaavaai pe fa’apefea ona filifili Sapakuka e ola i lona fa’atuatua i le Alii.
A mana’omia e tagata a’oga se fesoasoani ina ia malamalama i le Sapakuka 3:17–18, e mafai ona e fa’amatala atu e faapea, o totonu o le fuaiupu 17, na fa’amatala mai ai e Sapakuka le tele o ni taunu’uga lē mana’omia (e lē fua mai la’au, lē tupu mai ni laautotō i le fanua, ma isi mea fa’apena).I le fuaiupu 18, na ia fa’apea mai o ia e “oli’oli lava i le Alii” e tusa lava po’o le ā le taunu’uga.
E mafai fo’i ona e fa’amatala o “vae o ’aila” i le Sapakuka 3:19 o lo’o fa’asino lea i vae o ’aila, lea e mafai ai e ’aila ona ā’ea luga o laufanua faigatā.O lenei atafaatusa ua fautua mai ai o le a tu’uina mai e le Alii iā i tatou le tomai e ā’ea ai o tatou mauga fa’afa’atusa.
-
E fa’apefea e le amio a Sapakuka ma ana faatinoga ona fa’aalia ai lona fa’atuatua i le Atua?
Fesoasoani i tagata a’oga ia iloa mai i le fa’ata’ita’iga a Sapakuka e faapea e mafai ona tatou filifili e tumau i le fa’atuatua i le Alii a’o fa’atali ai mo ni tali i a tatou fesili fa’amaoni.
-
O le ā se mea e te iloa e fa’atatau i le Tamā Fa’alelagi ma Iesu Keriso e ono fesoasoani iā te oe e faatuatua ai ia i La’ua a’o fa’atalitali mo ni tali?
A’o fa’asoa mai e tagata a’oga mea ua latou iloa, atonu e te faia fesili tulitatao e pei o le “Na fa’apefea ona oo ina e iloa lena mea e uiga i le Tamā Fa’alelagi ma Iesu Keriso?”
E ono mafai ona e vala’aulia tagata a’oga e fa’aopoopo mea na latou a’oa’oina mai iā Sapakuka po’o isi tagata o le vasega i totonu o le fagu o le fa’atuatua.
Auala e aga’i ai i luma
Fesoasoani i tagata a’oga e mafaufau i auala e aga’i ai i luma faatasi ai ma lo latou fa’atuatua i le Atua e tusa pe iai ni a latou fesili.I le faia ai fa’apea, e mafai e tagata a’oga ona matamata le “His Grace: Choosing to Believe in God” (4:07), vaavaai i mea na faia e Atamu e tumau ai lona fa’atuatua i le Atua e ui i fesili faigatā ma popolega.
E mafai fo’i ona faitau tagata a’oga i le 1 Nifae 10:17–22; 11:1 po o le Mosaea 24:9–17, pe su’esu’e se tasi o vaega i totonu o le “Sa’ilia o Tali mo Fesili” i totonu o Autū ma Fesili (Potutusi o le Talalelei).
-
O a mea o lo’o e a’oa’oina e ono fesoasoani i se tagata talavou e filifili ai e tumau i le fa’atuatua i le Atua a’o latou fa’atali ai mo ni tali?
E mafai e tagata a’oga ona fa’asoa mai ō latou aafiaga i le taimi na latou po o se tasi latou te iloa na filifili ai e faalagolago ma le fa’atuatua i le Atua a’o fa’atali ai mo ni tali. E mafai fo’i ona e fa’asoa atu sou aafiaga pe molimau atu e fa’atatau i le mafua’aga e te faatuatuaina ai le Tamā Fa’alelagi ma Iesu Keriso.
Uunaia tagata a’oga e tusi i lalo mea na latou a’oa’oina i lenei aso e fesoasoani ai iā i latou e fa’atuatuaina le Alii a’o fa’atali mo ni tali.E mafai e tagata a’oga ona fa’aopoopo manatu nei i le fagu o le fa’atuatua.
Pe a lava le taimi, e mafai ona e faitauina nisi o pepa mai le fagu o le fa’atuatua.A’o e faitau, e mafai ona e fesili i tagata a’oga e fa’asoa mai ni o latou manatu fa’aopoopo po’o ni lagona fo’i e oo ane iā i latou.
Mafaufau e teuina nei fagu e toe fa’aaoga i nisi lesona i le lumana’i.Mo se fa’ata’ita’iga, e mafai ona e fa’aaogaina mea sa fa’aopoopo e tagata a’oga i totonu o le fagu o le fa’atuatua e fa’aleleia ai se lesona mo fa’ata’ita’iga o le atamai i a’oa’oga fa’avae.