“Амос 3; 7: Их Эзэн бошиглогчдоороо дамжуулан үнэнийг илчилдэг,” Хуучин Гэрээний семинарын багшийн гарын авлага (2026)
“Амос 3; 7: Их Эзэн бошиглогчдоороо дамжуулан үнэнийг илчилдэг,” Хуучин Гэрээний семинарын багшийн гарын авлага
Амос; Обадиа; Иона: 149-р хичээл
Амос 3; 7
Их Эзэн бошиглогчдоороо дамжуулан үнэнийг илчилдэг
Ятгалгын дуу хоолой ихтэй энэ дэлхийд алинд нь итгэхээ мэдэх нь хэцүү байж болно. Аз болоход бидний хайрт Тэнгэр дэх Эцэг болон Аврагч Есүс Христ Өөрсдийн төлөвлөгөөг амьд бошиглогчдоороо дамжуулан бидэнд илчилдэг билээ. Энэ хичээл Тэнгэрлэг Эцэг, Есүс Христ хоёр бошиглогчдоороо дамжуулан зөвлөгөө ба үнэнийг илчилдэг гэдгийг ойлгоход нь суралцагчдад тусалж чадна.
Боломжит суралцах үйл ажиллагаа
Бошиглолын зөвлөгөөний хариултууд
Дараах үйл ажиллагаа бошиглогчдын талаарх хандлагаа тунгаан бодоход суралцагчдад туслах зорилготой. Олон нийтийн сүлжээн дэх дараах гурван хариултыг самбарт бичих нь тустай байж болох юм.
Дараах үйл ажиллагааны нэг хувилбар болгож та Ерөнхий чуулган эсвэл өсвөр үеийнхний онцгой цугларалт дээр бошиглогчийн хэлсэн үгийг сонссоныхоо дараа найзууд нь эдгээр хариултыг хуваалцсан гэж төсөөлөхөд суралцагчдыг урьж болно. Дараа нь та дагалдах асуултыг алгасаж болно.
Олон нийтийн мэдээллийн хэрэгслээр тавьсан мэдээлэлд дараах хариултуудыг бичсэнийг харж байна гэж төсөөл.
“Тэр энэ талаар ярих шаардлагагүй. Тэр ойлгохгүй байна.”
“Тэр үнэхээр юу болж байгааг ойлгохоо больсон.”
“Хийх ёстой бүх зүйлийнхээ хажуугаар би энэ зөвлөгөөг маш завгүй амьдралдаа яаж хэрэгжүүлж болохыг ойлгохгүй байна.”
-
Эдгээр хариулт хэний тухай байж болох вэ?
Та амьд бошиглогчийн зургийг үзүүлж, эдгээр үгс бошиглогчийн хэлсэн ямар нэг зүйлийн хариулт гэж төсөөлөхөд суралцагчдыг урьж болно. Суралцагчид яагаад хэн нэгэн хүнд дээрх хандлагуудын аль нэг байж болох талаар хуваалцаж болно.
Бошиглолын зөвлөгөөг дагах талаарх мэдрэмжээ үнэлж цэгнэхэд суралцагчдад туслахын тулд дараах асуултуудыг үзүүлэх талаар бодож үз.
Дэлхий дээрх Их Эзэний өнөөгийн бошиглогчийн талаар ямархуу бодолтой байгаагаа бодох цаг гарга. Дараах асуултуудад өгөх хариултаа бодож ол.
-
Би бошиглогчийн зөвлөгөөний талаар юу гэж боддог вэ? Ямар зөвлөгөө өгөхөөс нь хамааран миний бодол санаа өөрчлөгддөг үү?
-
Би бошиглолын зөвлөгөөг дагах ямар шалтгаанууд байж болох вэ? Бошиглолын зөвлөгөөг дагах нь надад яагаад хэцүү байж болох вэ?
Бид өнөөдөр Амосын номыг судлах үед Бурханы бошиглогчдоороо дамжуулан бидэнд өгсөн үгсийн ач холбогдлын талаар илүү ихийг мэдэхэд Ариун Сүнс танд тусалж чадна. Та өнөөдөр суралцаж байхдаа өөрт төрсөн бодол санаа эсвэл асуултуудаа бичиж авч болно.
Их Эзэн Өөрийн төлөвлөгөөг бошиглогчдоороо дамжуулан илчилдэг
Амосын Израилын хойд хаант улс дахь хүмүүст тохинуулан бошиглох үед Бурхантай гэрээ хийсэн хүмүүсээс олонх нь Түүнийг болон Түүний бошиглогчдыг орхиж, хөрш үндэстнүүдийн ёс бус замаар явсан байв ( Амос 2:6–12-ыг үзнэ үү). Их Эзэн тэднийг наманчлалд дуудуулахаар Амосыг сонгосон. Амос нь II Иеробоам хаан болон түүний хүмүүс устгагдаж, олзлогдох талаар бошиглосон ( Aмос 7:8–9; 11, 17-г үзнэ үү).
Амос 7:10–15-ыг уншаад, II Иеробоам хааны санваартан Амазиа Амосын бошиглолын зөвлөгөөнд хэрхэн хариулсныг олж мэд.
-
Та нар юу олж мэдсэн бэ?
-
Яагаад хүмүүс өөрсдийгөө “[Амосын] бүх үгийг нь тээж үл чадна” (Амос 7:10) гэж бодож, түүнийг өөр газар эш үзүүлэхийг хүссэн ( Амос 7:12-ыг үзнэ үү) гэж та нар бодож байна вэ?
-
Зарим хүн Бурханы бошиглогчдыг нэр хүндгүй, хэрэгцээгүй гэж үзэж эсвэл тэднээс холбоогоо тасалсан ч тэд яагаад заасаар байдаг вэ?
Хэрэв суралцагчид үүнийг дурдахгүй бол та Амос бошиглогчоор дуудагдахаасаа өмнө юу хийж байсныг (Амос 7:14-ийг үзнэ үү), мөн Их Эзэн 15-р шүлэгт Амосыг бошиглогч болгон дуудахын тулд юу хийснийг асууж болно. Иосеф Смит болон бусад хүний нэгэн адил Их Эзэн бошиглогчдоо дуудахаас өмнө тэднийг өндөр байр суурь, ололт амжилтад хүрэхийг шаарддаггүй гэдгийг тайлбарла. Хэрэв суралцагчдад энэ асуултад хариулахад туслалцаа хэрэгтэй бол та Gospel Library дахь энэ хичээлийн “Нэмэлт эх сурвалжууд” хэсэгт буй ерөнхийлөгч Нэлсоны хэлсэн үгийг хуваалцаж болно.
Хэдхэн бүлгийн өмнө Их Эзэн Амосоор дамжуулан Өөрийнхөө болон бошиглогчдынхоо тухай хүчирхэг үнэнийг илчилсэн.
Амос 3:7 бол төгс эзэмших сургаалын хэсэг юм. Төгс эзэмших сургаалын хэсгүүдийг хялбархан олохын тулд өвөрмөц аргаар тэмдэглэхэд суралцагчдыг урихыг бодож үзээрэй.
Амос 3:7–8-г уншаад, Их Эзэн бошиглогчдоороо дамжуулан юуг үргэлж хийхийг олж мэд.
Нууц гэдэг үгнээс гадна зөвлөгөө, төлөвлөгөө гэсэн үг хэллэг орсон гэдгийг мэдэх нь суралцагчдад тустай байж болох юм.
-
Бид эдгээр шүлгээс Их Эзэний талаар юуг мэдэж авч болох вэ?
Их Эзэн төлөвлөгөөгөө бошиглогчдоороо дамжуулан илчилдэг гэдгийг олж тогтоохын тулд суралцагчид өөр өөр үгс ашиглаж болно. Та энэхүү үнэний жишээ болгож хэрэв хүмүүс наманчлахгүй бол хүмүүсийн ёс бус байдлаас болж Иудей болон Израил эцэстээ устгагдахаас өмнө юу тохиолдохыг Их Эзэн илчилсэн гэдгийг хуваалцаж болох юм ( Амос 2:4–6, 8:11–12-ыг үзнэ үү).
Хичээл үргэлжлэх явцад Их Эзэн бидэнд хайртай мөн биднийг удирдан чиглүүлэхийг хүсдэг гэдгийг онцлох арга замуудыг эрж хай.
-
Бусад хүн бошиглогчийн үгэнд хэрхэн хандаж байгаагаас үл шалтгаалан түүнийг сонсох нь та нарын хувьд яагаад чухал болох талаар энэхүү үнэн танд юу зааж чадах вэ?
Их Эзэний бошиглогчдыг дагах нь
Дараах үйл ажиллагаа бол Тэнгэрлэг Эцэг, Есүс Христ хоёр бошиглогчдоороо дамжуулан үнэнийг илчилдэг талаарх ойлголтоо гүнзгийрүүлэхэд суралцагчдад туслах нэг арга зам юм. Суралцагчдыг жижиг бүлгүүдэд хуваагаад, үйл ажиллагааны алхмуудыг нэг нэгээр нь үзүүлэх талаар бодож үз.
Хичээлийн эхэнд дурдсан олон нийтийн мэдээллийн хэрэгсэл дээр бичсэн сэтгэгдлийг эргэн санаж, тэдгээрээс нэгийг сонго. Дараах үйл ажиллагаа хариулт бичихэд бэлтгэхэд тань туслах болно.
-
Амос 3:7-г дахин уншаад, дээрх сэтгэгдлийг бичсэн хүнд энэ нь хэрхэн тус болохыг тунгаан бодоорой. Мөн дараах төгс эзэмших сургаалын хэсгүүдийг уншаад, тэдгээр нь хэрхэн тусалж болохыг олж мэд. (Эдгээр судрыг Амос 3:7-той холбох эсвэл солбицсон эшлэл болгох талаар бодож үз.)
-
Езекиел 3:16–17
-
-
Бурханы бошиглогчийн үгийг сонссоноор ирж болох дор хаяж хоёр адислалыг дурдаарай. Та нар судрууд, Сүмийн түүхийн түүх эсвэл өнөөгийн бошиглогчдын сургаалуудаас жишээ олж болно. Бошиглогчийн үг таны амьдралыг эергээр өөрчилсөн нэг жишээг хуваалцахаар оролд.
Та шаардлагатай бол дараах жишээнүүдээс заримыг суралцагчидтайгаа хуваалцаж болно:
-
Хэрэв тэд наманчлахгүй бол үерээр устгагдах болно гэдгийг Их Эзэн Өөрийн бошиглогч Ноагаар дамжуулан хүмүүст сэрэмжлүүлсэн ( Moсе 8:22–30; Эхлэл 7:17–24-ийг үзнэ үү).
-
Бошиглогч Исаиа Цагаатгалаараа дамжуулан Аврагч юу туулах талаар бошиглосон ( Исаиа 53:3–5-ыг үзнэ үү).
-
Гэр оронд төвлөрсөн, Сүмийн дэмжлэгтэй сүм “цар тахлын ямар нэгэн сэжүүр гарахаас өмнө … [биднийг бэлтгэж], ирсэн сорилт бэрхшээлийг тэсэн гарах боломжийг олго[сон]” (Гари Э. Стивэнсон, “Их Эзэний өндөр ээл хишгийг хүртсэн,” Ерөнхий чуулган, 2020 оны 10-р сар, 112-117).
Миний хариулт
Өнөөдөр сурсан болон мэдэрсэн зүйлсээ ашиглан хичээлийн эхэнд хэлсэн сөрөг сэтгэгдлүүдийн аль нэгэнд хариулахад туслах хариу бич. Дор хаяж нэг судар болон хувийн туршлага бүхий нэг жишээг багтаахаа бүү мартаарай.
Цөөн суралцагчийг сайн дураараа хариултаа хуваалцахад урь. Бурхан бошиглогчдоороо дамжуулан илчилсэн хайр, удирдамжийн тухай Ариун Сүнсний танд заасан зүйлсийг хуваалцах талаар бодож үз.
Цээжлэх
Та энэ хичээлийн турш төгс эзэмших сургаалын эшлэл, судрын түлхүүр үг хэллэгийг цээжлэхэд нь суралцагчдад тусалж, дараагийн хичээлүүд дээр давтаж болно. Амос 3:7-гийн судрын гол үг хэллэг нь: “Их Эзэн Бурхан … зарц нар, эш үзүүлэгчдэдээ нууцаа илчилдэг.” “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.