Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Hōsea: Ko e ʻOfa mo e ʻAloʻofa ʻa e ʻEikí

“Hōsea: Ko e ʻOfa mo e ʻAloʻofa ʻa e ʻEikí,” Fuakava Motuʻá – Tohi Lēsoni ʻa e Faiako Seminelí (2026)

“Hōsea: Ko e ʻOfa mo e ʻAloʻofa ʻa e ʻEikí,” Fuakava Motuʻá – Tohi Lēsoni ʻa e Faiako Seminelí

Hōsea 1–6; 10–14; Sioeli: Lēsoni 146

Hōsea

Ko e ʻOfa mo e ʻAloʻofa ʻa e ʻEikí

ʻI he tohi Hōseá, naʻe fakaʻaongaʻi ai ʻe he ʻEikí ʻa e mali ʻa Hōsea mo Komelá ko ha fakataipe ke akoʻi ʻa ʻIsileli fekauʻaki mo ʻEne ʻofa fakafuakava taʻe-tūkuá. Hangē ko ʻIsilelí, mahalo te tau hē mei he ʻEikí mo ʻetau ngaahi fuakava mo Iá he taimi ʻe niʻihi. Ka ʻoku kei faivelenga pē ʻa Sīsū Kalaisi mo ʻofa ʻiate kitautolu. ʻE lava ke tokoni ʻa e lēsoni ko ʻení ke mahino ki he kau akó ʻa e ʻofa taʻe-tūkua mo e ʻaloʻofa ʻa e ʻEikí kiate kinautolú.

Teuteu ʻa e tokotaha akó: Fakaafeʻi e kau akó ke fakakaukau ki he ngaahi aʻusia kuó ne tokoniʻi kinautolu ke nau ongoʻi e ʻofa mo e ʻaloʻofa ʻa e ʻEikí

Ngaahi ʻEkitivitī Ako ʻOku Ala Fakahokó

Ko hono manatuʻi ʻo e Tamai Hēvaní mo Sīsū Kalaisí

Ke kamata e kalasí, teuteuʻi e kau akó ke nau fetuʻutaki ʻi ha founga ʻoku fekauʻaki mo e talanoa ʻo Hōsea mo Komelá. Ko e founga ʻe taha ke fai ai iá ko ha tūkunga hangē ko ʻení.

Kuo hoko ʻa Kamila mo ʻAna ko ha ongo kaungāmeʻa lelei ʻi ha taʻu kakato. ʻI he taimi ko iá, kuó na vāofi mo fepoupouaki ʻi he ngaahi taimi faingataʻá. Naʻe vahevahe ʻe ʻAna ha ngaahi meʻa ʻokú ne fefaʻuhi mo ia. Naʻe palōmesi ʻa Kamila he ʻikai ke ne vahevahe ʻa e ngaahi meʻa ko iá mo e kakai kehé. Ka neongo ia, ʻi he ngaahi ʻaho siʻi kuohilí, naʻe ʻilo ʻe ʻAna naʻe vahevahe ʻe Kamila ki ha niʻihi ʻo hona ngaahi kaungāmeʻa kehé fekauʻaki mo e ngaahi faingataʻaʻia ʻa ʻAná.

Kapau ko ʻAna koe, ko e hā ha ngaahi fakakaukau mo ha ngaahi ongo te ke maʻu?
Ko e hā ka faingataʻa ai ke fakamolemoleʻi ʻa Kamilá?

Fakakaukau ke fakamatalaʻi ange ko ha sīpinga ʻeni ʻe taha ʻo e founga te tau ala ongoʻi ai ʻoku lavakiʻi pe fakamamahiʻi kitautolu ʻi he taimi ʻoku maumauʻi ai ʻe ha taha ha palōmesi. Neongo te tau ala tali ʻa e ngaahi tūkunga ko ʻení ʻi ha ngaahi founga taʻeʻaonga, ka ʻoku kehe e tali ia ʻa e ʻEikí.

ʻOku akoʻi ʻe he tohi ʻa Hōseá fekauʻaki mo e vā fetuʻutaki ʻo e nofo-malí. ʻI he folofolá, ʻoku faʻa fakaʻaongaʻi ʻe he ʻEikí ʻa e malí ko ha fakataipe ʻo hotau vā fetuʻutaki fakafuakava mo Iá. Naʻe akoʻi ʻe Palesiteni Lāsolo M. Nalesoni ʻoku fokotuʻu ʻe heʻetau ngaahi fuakavá “ha vā fetuʻutaki ʻi he fuakavá ʻa ia ʻoku haʻisia ai [ʻa kitautolu mo e ʻEikí ke tau] fetauhiʻaki mo fefaitōnungaʻaki” (“Ko e Fuakava Taʻengatá,” Liahona, ʻOkatopa 2022, 6).

ʻI he taimi ʻe niʻihi, ʻoku ʻikai faitōnunga e fānau ʻa e ʻOtuá ki he ʻEikí pea nau hē mei heʻenau ngaahi fuakava mo Iá. ʻI hoʻo ako e tohi ʻa Hōseá he ʻaho ní, kumi ʻa e ongo ʻoku maʻu ʻe he ʻEikí mo ʻEne tali ki Heʻene kakai ʻo e fuakavá neongo ʻenau hē meiate Iá.

Hōsea mo Komela

Ke tokoni ke mahino ki he kau akó ʻa e talanoa ʻo Hōsea mo Komelá, fakaʻaliʻali pe fakamatalaʻi fakanounou e palakalafi ko ʻení.

Vakai ki he konga ʻo e Ngaahi Maʻuʻanga Tokoni Kehe ʻi he lēsoni ko ʻení ʻi he Gospel Library ki ha fakamatala lahi ange fekauʻaki mo e fekau ʻa e ʻOtuá kia Hōsea ke mali mo Komelá.

Naʻe hoko ʻa Hōsea ko ha palōfita ʻi he Puleʻanga Fakatokelau ʻo ʻIsilelí, ʻo kikite ʻi he taimi tatau pē mo ʻĪsaia. Naʻe fekauʻi ʻe he ʻEikí ʻa Hōsea ke mali mo Komela, neongo ʻa e foʻi moʻoni ko ia kuó ne tono tangata mo feʻauakí. Naʻe ʻi ai ha fānau ʻe toko tolu ʻa Hōsea mo Komela (vakai, Hōsea 1:2–8).

Mahalo te ke fie fakamatalaʻi ange ʻoku lea ʻa Hōsea maʻá e ʻEikí fekauʻaki mo Komela, ʻa ia ʻokú ne fakafofongaʻi ʻa e kakai ʻo ʻIsilelí. Fakakaukau ke faʻu ha kōlomu ʻe ua ʻi he palakipoé. Fakahingoa e kōlomu ʻe taha ʻOku fakafofongaʻi ʻe Hōsea ʻa e ʻEikí pea kōlomu ʻe tahá ʻOku fakafofongaʻi ʻe Komela ʻa ʻIsileli.

Lau ʻa e Hōsea 2:5, ʻo kumi e meʻa naʻe pehē ʻe Hōsea kuo fai ʻe Komelá. ʻOku ʻuhinga ʻa e “ʻe heʻenau faʻeé” kia Komela.

ʻE fakafofongaʻi fēfē ʻe he ngaahi ngāue ʻa Komelá ʻa e kakai ʻo ʻIsilelí?

Te ke lava ʻo fakamatalaʻi ange naʻe fakafofongaʻi ʻe he taʻefaitotonu ʻa Komela ʻi heʻene mali fuakava mo Hōseá ʻa e taʻefaitotonu fakalaumālie ʻa ʻIsileli ʻi honau vā fetuʻutaki fakafuakava mo e ʻOtuá. Kapau ʻe tokoni, ʻe lava ke lau ʻe he kau akó ʻa e 2 Ngaahi Tuʻi 17:14–16, ʻo kumi e founga kuo maumauʻi ai ʻe ʻIsileli ʻenau ngaahi fuakava mo e ʻEikí.

Ke tokoni ke fakafehokotaki ʻe he kau akó e folofolá ki heʻenau moʻuí, te ke lava ʻo fai ha fehuʻi hangē ko ʻení. Hiki e ngaahi tali ʻa e kau akó ʻi he palakipoé ʻi lalo ʻi he ʻOku fakafofongaʻi ʻe Komela ʻa ʻIsileli.
Ko e hā ha founga ʻoku hē ai ʻa e kakai ʻi hotau kuongá mei he ʻEikí mo ʻenau ngaahi fuakava mo Iá?

Mahalo ʻe vahevahe ʻe he kau akó ha ngaahi meʻa hangē ko e fuʻu femoʻuekina [ke tuku taimi] maʻá e ʻEikí, ko hono fakaʻaongaʻi taʻetaau e tekinolosiá, angakovi ki he niʻihi kehé, fakamuʻomuʻa e ngaahi meʻa kehé ʻi he ʻEikí, pe ngaahi angahala mamafá. ʻE lava ke fakakaukau ʻa e kau akó ki he lisi ko ʻení pe ngaahi meʻa kehe ʻi heʻenau fakalaulauloto ki he ueʻi ko ʻení.

Fakakaukau ki ha ngaahi founga ʻe ala ʻahiʻahiʻi ai koe ke ke maumauʻi hoʻo ngaahi fuakavá pe ngaahi founga te ke lava ai ʻo hē mei hoʻo ngaahi fuakava mo e ʻEikí.

Ko e ako fekauʻaki mo e ʻEikí

Fakaafeʻi e kau akó ke vahevahe e ngaahi fakamatala ʻo e moʻoni ne nau hiki ʻi heʻenau laʻipepa tufá. Te nau lava ʻo vahevahe leʻolahi pe hiki ʻenau ngaahi fakamatalá ʻi he palakipoé ʻi lalo ʻi he ʻOku fakafofongaʻi ʻe Hōsea ʻa e ʻEikí. ʻE lava ke nau hiki ha ngaahi moʻoni hangē ko ʻení:

ʻOku fonu ʻa Sīsū Kalaisi ʻi he ʻofa mo e ʻaloʻofa, ʻo aʻu pē ki he taimi ʻoku ou hē ai meiate Iá.
ʻOku fakaafeʻi ʻe Sīsū Kalaisi ʻEne kakai ʻo e fuakavá ke nau fakatomala mo tauhi ʻenau ngaahi fuakavá.

Lolotonga e vahevahe ʻa e kau akó, te ke lava ʻo fai ha ngaahi fehuʻi vakaiʻi ke tokoni ki he kau akó ke nau fakamahinoʻi ʻa e fehokotaki mo e folofolá: “Ko e hā ha konga ʻo e talanoá naʻá ne tokoniʻi koe ke ke ako fekauʻaki mo Ia?” pe “Naʻá ke vakai fēfē ki he moʻoni fekauʻaki mo Iá ʻoku fakatātaaʻi ʻia Hōseá?”

Kimuʻa pea fai ʻa e fehuʻi ko ʻení, te ke lava ʻo fakahinohino e kau akó ki he lisi ʻi he palakipoé ʻo e ngaahi founga ʻoku tau faʻa hē ai mei he ʻEikí mo ʻetau ngaahi fuakava mo Iá.

ʻE tokoniʻi fēfē ʻe he meʻa ʻokú ke ako fekauʻaki mo e ʻEikí ʻa e toʻu tupu ʻoku nau ongoʻi loto-foʻi pe mā koeʻuhí kuo nau hē mei he ʻEikí?

Kimuʻa pea fai e fehuʻi hokó, mahalo ʻe fakapotopoto ke faleʻi e kau akó ke ʻoua te nau vahevahe ha meʻa ʻoku fuʻu fakataautaha, hangē ko e ngaahi angahala kimuʻá. Te ke lava foki ʻo vahevahe ha aʻusia mei hoʻo moʻuí.
Ko e hā ha ngaahi founga kuó ke vakai ai ki hano fakamoʻoniʻi ʻe he ʻEikí ʻEne ʻofá mo e ʻaloʻofá ʻi hoʻo moʻuí pe ʻi he moʻui ʻa ha taha ʻokú ke ʻiloʻi?

Fakahaaʻi ʻa e mahinó

ʻI hono maʻu ʻe he kau akó ha faingamālie ke fakamatalaʻi pe fakakaukau ki he meʻa kuo nau akó, te ne lava ʻo fakaafeʻi ʻa e Laumālie Māʻoniʻoní ke ne akoʻi lahi ange kinautolu. Ko e founga ʻe taha ke nau fakahoko ai ʻení ko e ʻekitivitī faitohi nounou ko ʻení.

Fili ha taha ʻo e ngaahi meʻá ni.

Hiki ha pōpoaki. Fakakaukau ki ha taha (ʻe lava ko koe pē) ʻokú ne ongoʻi kuo fuʻu mamaʻo ʻene hē mei he ʻEikí ke toe fakamolemoleʻi ia. Hiki ha pōpoaki fakalotolahi ki he tokotaha ko ʻení pea vahevahe ʻa e meʻa kuó ke ako fekauʻaki mo e Tamai Hēvaní mo Sīsū Kalaisi ʻa ia ʻokú ke pehē ʻe ala tokoni kiate iá.
Tohi ha fakamatala. Te ke fakamatalaʻi fēfē ʻa e ʻulungaanga ʻo e Tamai Hēvaní mo Sīsū Kalaisi ʻo makatuʻunga ʻi he meʻa naʻá ke ako pe ongoʻi he ʻaho ní?

Te ke lava ʻo vahevahe mo e kau akó ʻe lava ke tau hangē ko Komelá, ʻo fili ke tali e fakaafe finangalo ʻofa ʻa e ʻEikí ke fakatomala pea foki kiate Ia ʻi he taimi kuo tau hē aí. Fakakaukau ke fakaʻosi ʻaki hoʻo fakamoʻoni ki he ʻEikí.

Ngaahi Maʻuʻanga Tokoni Kehé

Hōsea 1:2–3; 2:5. Naʻe fekauʻi moʻoni nai ʻe he ʻOtuá ha palōfita ke mali mo ha taha feʻauaki?

Naʻe pehē ʻe Keli Miulesiteni, ko ha Toketā mo e palōfesa ʻo e folofola fakakuongamuʻá ʻi he ʻUnivēsiti Pilikihami ʻIongí:

Kuo fehuʻia ʻe ha niʻihi pe naʻe moʻoni e mali ʻa Hōsea ki ha feʻauakí pe ko ha talanoa fakatātā pē. ʻOku lahi ha ngaahi fakaikiiki ʻi he tohí ʻoku fakaʻuhinga ki he moʻoni ʻo e malí, neongo ʻoku ʻikai ke tau fakapapauʻi. (“Hosea 1,” The Essential Old Testament Companion: Key Insights to Your Gospel Study [2013], 476)

ʻOku kehe fēfē ha fuakava mei ha aleapau?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e meʻá ni fekauʻaki mo ʻene aʻusia ʻi hono akoʻi ha kalasi semineli pongipongi fekauʻaki mo e tohi ʻa Hōseá:

Naʻá ku maʻu ha ongo foʻou fekauʻaki mo e ʻuhinga ke fai ai ha fuakava mo e ʻEikí. Kuó u fanongo ʻi he kotoa ʻo ʻeku moʻuí ki he ngaahi fakamatala ʻoku pehē ʻoku hangē ʻa e ngaahi fuakavá ha aleapaú, ko ha aleapau ʻa ia ʻoku loto ai ha taha ke fai ha meʻa pea loto leva mo e tokotaha ʻe tahá ke fai ha meʻa kehe.

ʻI ha ngaahi ʻuhinga lahi ange ʻi he meʻa te u lava ʻo fakamatalaʻí, lolotonga e ngaahi ʻaho ko ia hono akoʻi e tohi ʻa Hōseá, naʻá ku ongoʻi ha meʻa foʻou, ko ha meʻa naʻe mālohi ange. Naʻe ʻikai ko ha talanoa ʻeni fekauʻaki mo ha alea fakapisinisi ʻa ha ongo hoa ngāue. … Ko ha talanoa ʻofa ʻeni. Ko ha talanoa ʻeni ʻo ha fuakava mali naʻe haʻi ʻe he ʻofá, ko ha ʻofa līʻoa. Ko e meʻa naʻá ku ongoʻi he taimi ko iá, pea kuo tupulaki ia ʻi he fakalau ʻa e taʻú, ko e ʻEikí, ʻa ia kuó Ne tāpuekina au ke fakahoko ha ngaahi fuakava mo Iá, ʻokú Ne ʻofa ʻiate au, pea mo koe … ʻaki e ʻofa mateaki ʻa ia kuó u ofo maʻu pē ai pea ʻoku ou loto-fakamātoato ke faʻifaʻitakiʻí. (“Covenants and Sacrifice” [address given at the Church Educational System Symposium on the Old Testament, Aug. 15, 1995])

ʻE fakamolemoleʻi moʻoni nai au ʻe he ʻOtuá ʻi he taimi ʻoku ou hē ai meiate Iá?

Naʻe akonaki ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

13:49

Neongo pe ko e hā e fuoloa ʻo ʻetau mavahe mei he halá pe mamaʻo ʻo ʻetau ʻauheé, ko e momeniti pē ʻoku tau pehē ai ke tau liliú, ʻoku tokoni e ʻOtuá ke tau foki. Mei he tafaʻaki ʻa e ʻOtuá, ko ʻetau foki pē ki he halá ʻo fou ʻi he fakatomala moʻoní mo vilitaki atu ki muʻa ʻo tuʻu maʻu ʻia Kalaisí, ʻe hangē pē naʻe ʻikai ke tau mavahé. (“Mou Fili he ʻAhó Ni,” Liahona, Nōvema 2018, 106)

Naʻe akonaki ‘a Palesiteni ʻEmelī Pele Filimana, Palesiteni Lahi ʻo e Kau Finemuí, ʻo pehē:

10:24

ʻOku ou fie moʻui ʻi ha vā fetuʻutaki fakafuakava mo [e ʻOtuá].

Mahalo mo kimoutolu foki. Kamata ʻi he tuʻunga ʻoku mou ʻi aí. ʻOua naʻa tuku ke taʻofi koe ho tūkungá. Manatuʻi, ko e vavé pe tuʻunga ʻi he halá ʻoku ʻikai mahuʻinga tatau ia mo e fakalakalaká. Kole ki ha taha ʻokú ke falala ki ai ʻa ia ʻoku ʻi he hala ʻo e fuakavá, ke ne fakafeʻiloaki koe ki he Fakamoʻui kuo nau ako ʻo ʻiloʻí. Ako lahi ange kiate Ia. Ngāueʻi ʻa e vā fetuʻutakí ʻaki hono fakahoko ha fuakava mo Ia. ʻOku ʻikai mahuʻinga ia pe ko e hā ho taʻu motuʻá pe tūkungá. Te ke lava ʻo ʻaʻeva mo Ia. (“ʻAʻeva ʻi ha Vā Fetuʻutaki Fakafuakava mo Kalaisi,” Liahona, Nōvema 2023, 79)

Ngaahi ʻEkitivitī Fakalahi ki he Akó

Ko ha sīpinga ʻo e ʻofa fakafuakavá

Hili hono fakakakato e laʻipepa tufá, te ke lava ʻo fakaafeʻi e kau akó ke nau mamata ʻi he “Enduring Love” (4:16), ʻo kumi pe ʻoku fōtunga fēfē ʻa e ʻofa fakafuakavá. Hili iá, te ke lava ʻo ʻeke e fehuʻi ko ʻení:

4:12

ʻE akoʻi fēfē kitautolu ʻe he ngaahi sīpinga ʻo e husepāniti ko ʻení mo Hōseá fekauʻaki mo e fōtunga ʻo e ʻofa fakafuakava ʻa e ʻEikí kiate kitautolú?

Hesed: ko ha faʻahinga ʻofa makehe

Ke tokoni ke mahino lahi ange ki he kau akó ʻa e ʻofa fakafuakava ʻa e ʻEikí, te ke lava ʻo vahevahe ʻa e lea ko ʻeni meia Palesiteni Lāsolo M. Nalesoní:

Ko e hesed ko ha foʻi lea makehe ia ʻokú ne fakamatalaʻi ha vā fetuʻutaki ʻi he fuakavá ʻa ia ʻoku haʻisia ai ʻa e ongo tafaʻakí fakatouʻosi ke na fetauhiʻaki mo fefaitōnungaʻaki. …

Ko e hesed ko ha faʻahinga ʻofa mo e ʻaloʻofa makehe ia ʻoku ongoʻi ʻe he ʻOtuá pea ʻoku fakaaʻu atu ia kiate kinautolu kuo nau fakahoko ha fuakava mo Iá. Pea ʻoku tau fetauhiʻaki ʻi he hesed mo Ia.

Koeʻuhí kuo fakahoko ʻe he ʻOtuá ʻa e hesed kiate kinautolu kuo nau fakahoko ha fuakava mo Iá, te Ne ʻofa ʻiate kinautolu. ʻE hokohoko atu ʻene ngāue mo kinautolú mo ʻoange ha ngaahi faingamālie ke nau liliu ai. Te Ne fakamolemoleʻi kinautolu ʻi he taimi te nau fakatomala aí. Pea kapau te nau hē, te Ne tokoniʻi kinautolu ke nau ʻilo honau hala ke foki ai kiate Iá. (“Ko e Fuakava Taʻengatá,” Liahona, ʻOkatopa 2022, 6)

Kapau ʻoku ongoʻi ʻe ha taha ʻoku fuʻu tōtuʻa ʻenau ngaahi fehalaākí ke toe fakamolemoleʻi kinautolu, ko e hā e meʻa ʻokú ke vakai ki ai ʻi he fakamatala ko ʻení te ne lava ʻo ʻomi kiate kinautolu ha ʻamanaki leleí?

Naʻe fakaʻaongaʻi ʻe Hōsea ʻa e foʻi lea hesed ʻi he Hōsea 2:19; 4:1; 6:4, 6; 10:12; 12:6. Naʻe fakaʻaongaʻi ʻe he kau liliu lea ʻo e Pulusinga Kingi Sēmisí ha ngaahi lea faka-Pilitānia kehekehe ke liliu ʻaki ʻa e hesed.

Angaʻofa (Hōsea 2:19)
ʻAloʻofa (Hōsea 4:1; 6:6; 10:12; 12:6)
Lelei (6:4)

Te ke lava ʻo fakaafeʻi e kau akó ke lau ʻa e ngaahi veesi ko iá pea vahevahe ha ngaahi fakakaukau lahi ange fekauʻaki mo e ʻofa fakafuakava ʻa e ʻEikí. Te ke lava foki ʻo kole ki he kau akó ke nau fakakaukau ki ha ngaahi founga te tau lava ai ʻo fakahaaʻi hotau hesed [vā fakafuakava] mo e ʻEikí.

Hōsea 2:5–8. Ko e fekumi ki he fiefiá ʻi he ngaahi feituʻu halá

Ke tokoni ki he kau akó ke nau fakakaukau ki he feituʻu ʻoku nau fekumi ai ki he fiefiá, te mou lava ʻo vakai ki he aʻusia ʻa Komelá.

Lau ʻa e Hōsea 2:5–8 pea tokoni ke ʻiloʻi ʻe he kau akó naʻe ʻosi foaki pē ʻe Hōsea kia Komela (veesi 8) ʻa e ngaahi meʻa naʻe ʻuhinga ai e liʻaki ʻe Komelá ʻene ngaahi fuakavá ke fekumi ki aí (veesi 5).

Vahevahe ʻa e fakamatala ko ʻeni meia Palesiteni Lāsolo M. Nalesoní:

18:43

Ko ha foʻi moʻoni mahuʻinga ʻeni: neongo e kikihi ʻa māmani ʻoku ʻomi ʻe he mālohí, koloá, ʻiloá, mo e ngaahi fakananivi ʻo e kakanó ʻa e fiefiá, ka ʻoku ʻikai! He ʻikai ke nau lava! ʻOku halaʻatā ha meʻa ʻe maʻu mei ai ka ko ha fetongi fakangalingali pē ki he “tuʻunga monūʻia mo fakafiefia ʻo kinautolu ʻoku tauhi ʻa e ngaahi fekau ʻa e ʻOtuá” [Mōsaia 2:41].

Ko hono moʻoní, ʻoku toe fakaongosia lahi ange ke kumi ʻa e fiefiá ʻi ha feituʻu he ʻikai ke ke teitei maʻu ai! Ka, ʻi he taimi ʻokú ke ngāue fakataha ai mo Sīsū Kalaisi ʻo fakahoko e ngāue fakalaumālie ʻoku fiemaʻu ke ikuʻi ʻaki ʻa e māmaní, ko Ia, pea ko Ia tokotaha pē, ʻokú Ne maʻu ʻa e mālohi ke fakamoʻui koe mei he ngaahi kovi ʻo e māmaní. (“Ikuʻi ʻa Māmani mo Maʻu ha Fiemālie,” Liahona, Nōvema 2022, 97)

Ko e hā e ʻuhinga ʻoku faingataʻa ai ke maʻu ʻa e fiefiá ʻi he ngaahi meʻa ʻoku pehē ʻe he māmaní te ne ʻomi ʻa e fiefiá?
Kuó ke maʻu fēfē ʻa e fiefiá ʻi hoʻo fekumi kia Sīsū Kalaisi mo feinga ke moʻui ʻaki ʻEne ongoongoleleí?