Hoseas

Isang taon nang matalik na magkaibigan sina Camille at Hannah. Sa panahong iyon, naging malapit sila sa isa’t isa at sinuportahan nila ang isa’t isa sa mahihirap na panahon. Ibinahagi ni Hannah ang ilang bagay na nagpapahirap sa kanya. Nangako si Camille na hindi niya sasabihin sa ibang tao ang mga bagay na iyon. Gayunpaman, makalipas ang ilang araw, nalaman ni Hannah na sinabi ni Camille sa ilan sa iba pa nilang mga kaibigan ang mga paghihirap ni Hannah.

• Kung ikaw si Hannah, ano ang mga maaari mong maisip at madama?

• Bakit maaaring mahirap na patawarin si Camille?

Ang aklat ni Hoseas ay nagtuturo tungkol sa ugnayan ng mag-asawa. Sa mga banal na kasulatan, kadalasang ginagamit ng Panginoon ang kasal bilang simbolo ng ating pakikipagtipan sa Kanya. Itinuro ni Pangulong Russell M. Nelson na ang ating mga tipan ay lumilikha ng “pakikipagtipan kung saan [tayo at ang Panginoon] ay nangangakong maging tapat sa isa’t isa.” (“Ang Walang Hanggang Tipan,” Liahona, Okt. 2022, 6).

Kung minsan, hindi tapat sa Panginoon ang mga anak ng Diyos at lumalayo sila sa kanilang mga tipan sa Kanya. Sa inyong pag-aaral ng aklat ni Hoseas ngayon, alamin kung ano ang nadarama ng Panginoon at paano Siya tumutugon sa Kanyang mga pinagtipanang tao kahit na lumalayo sila sa Kanya.

Si Hoseas ay isang propeta sa Hilagang Kaharian ng Israel na nagpopropesiya kasabay ni Isaias. Inutos ng Panginoon kay Hoseas na pakasalan si Gomer, sa kabila ng katotohanan na siya ay naging isang mangangalunya at patutot. Sina Hoseas at Gomer ay nagkaroon ng tatlong anak (tingnan sa Hoseas 1:2–8).

Basahin ang Hoseas 2:5, at alamin ang sinabi ni Hoseas na ginawa ni Gomer. “Ang kanilang ina” ay tumutukoy kay Gomer.

• Paano maaaring kumatawan sa mga tao ng Israel ang mga ginawa ni Gomer?

  Maaari mong ipaliwanag na ang hindi pagiging tapat ni Gomer sa kanyang tipan sa kasal kay Hoseas ay kumakatawan sa espirituwal na hindi pagiging tapat ng Israel sa kanilang pakikipagtipan sa Diyos. Kung makatutulong, maaaring basahin ng mga estudyante ang 2 Mga Hari 17:14–16, at alamin kung paano nilabag ng Israel ang kanilang mga tipan sa Panginoon.

  Upang matulungan ang mga estudyante na maiugnay ang mga banal na kasulatan sa kanilang mga sarili, maaari kang magtanong ng tulad ng sumusunod. Ilista sa pisara ang mga sagot ng estudyante sa ilalim ng Kinakatawan ni Gomer ang Israel.

• Paano lumalayo kung minsan ang mga tao sa Panginoon at sa kanilang mga tipan sa Kanya sa ating panahon?

Pagnilayan ang mga paraan na maaari kang matukso na labagin ang iyong mga tipan o ang mga paraan na maaaring nagpapalayo sa iyo sa mga tipan mo sa Panginoon.

• Paano makatutulong ang natutuhan ninyo tungkol sa Panginoon sa mga kabataang pinanghinaan ng loob o nahihiya dahil lumayo sila sa Panginoon?

  Bago itanong ang susunod na tanong, maaaring makabuting payuhan ang mga estudyante na huwag magbahagi ng anumang bagay na masyadong personal, tulad ng mga dating kasalanan. Maaari ka ring magbahagi ng isang karanasan mula sa sarili mong buhay.

• Sa anong mga paraan ninyo nakita na ipinamalas ng Panginoon ang Kanyang pagmamahal at awa sa inyong buhay o sa buhay ng isang taong kilala ninyo?

Pumili ng isa sa mga sumusunod.

• Magsulat ng mensahe. Mag-isip ng isang tao (maaaring ikaw mismo) na maaaring nakadarama na masyado na siyang napalayo sa Panginoon para mapatawad pa Niya. Magsulat ng nakapanghihikayat na mensahe sa taong ito at ibahagi ang natutuhan mo tungkol sa Ama sa Langit at kay Jesucristo na sa palagay mo ay makatutulong sa kanya.

• Magsulat ng paglalarawan. Paano mo ilalarawan ang pagkatao ng Ama sa Langit at ni Jesucristo batay sa iyong natutuhan o nadama ngayon?