“Ezequiel 47: Mga Panalangin sa Templo,” Manwal sa Magtutudlo sa Seminary sa Daang Tugon (2026)
“Ezequiel 47: Mga Panalangin sa Templo,” Manwal sa Magtutudlo sa Seminary sa Daang Tugon
Ezequiel 1–3; 33–34; 36–37; 47: Leksiyon 141
Ezequiel 47
Mga Panalangin sa Templo
Gihatagan kita sa Ginoo og daghang panalangin pinaagi sa atong pagsimba diha sa templo. Nakita ni Ezequiel sa usa ka panan-awon ang usa ka templo sa ulahing mga adlaw nga tukoron sa Jerusalem. Nakakita siya og tubig nga nag-agas gikin niini nga templo, nga giayo ang naglibot nga yuta ug naghatag og kinabuhi sa Patay nga Dagat. Ang panan-awon nagsimbolo sa mga panalangin nga ihatag sa Ginoo kanato samtang gisimba nato Siya diha sa Iyang templo. Kini nga leksiyon makatabang sa mga estudyante nga mas modako ang tinguha sa pagsimba sa Dios diha sa templo.
Pagpangandam sa estudyante: Ikonsiderar ang paghatag sa mga estudyante sa mosunod nga mga pangutana ug pagdapit nila nga mosulod sa klase nga andam nga mopakigbahin sa ilang mga tubag:
Posibleng mga Kalihokan sa Pagkat-on
Tinguha sa pagsimba diha sa templo
Sugdi ang leksiyon sa paagi nga motabang sa mga estudyante sa paghunahuna bahin sa ilang tinguha nga motambong ug mosimba diha sa templo. Aron mahimo kini, pwede kang magpakita og hulagway sa templo. Dayon, isulat ang mga tubag sa mga estudyante sa usa sa mosunod nga mga pangutana diha sa usa ka kilid sa templo ug ang ilang mga tubag sa ubang pangutana diha sa pikas kilid.
-
Unsa ang pipila ka rason kon nganong gusto sa usa ka tin-edyer nga motambong ug mosimba sa templo?
-
Unsa ang pipila ka rason kon nganong dili sila gustong motambong sa templo? Unsay nakapalisod niini?
Makatabang sa mga estudyante ang mga pangutana sa pagsukod sa kaugalingon aron mailhan ang mga oportunidad alang sa personal nga pag-uswag ug pagkat-on. Dapita ang mga estudyante sa paggahin og panahon sa pagpamalandong sa mosunod nga pangutana bahin sa ilang kaugalingon.
-
Unsa ka dako ang imong tinguha sa pagsimba diha sa templo? Ngano man?
-
Unsa kaha ang makapugong sa imong kagustohan nga motambong sa templo?
Samtang imong tun-an ang Ezequiel karon, tinguhaa ang tabang sa Ginoo aron modako ang imong tinguha nga motambong ug mosimba diha sa templo.
Ang panan-awon ni Ezequiel sa templo
Pahinumdom: Aron tabangan ang mga estudyante nga mabati ang gugma sa Ginoo, importante niini nga leksiyon ang paghisgot sa mga panalangin nga naggikan sa Ginoo pinaagi sa templo, dili gikan sa templo mismo.
Sa Ezequiel 47, nakita ni Ezequiel ang usa ka panan-awon nga nagsimbolo sa mga panalangin nga ihatag sa Ginoo para sa tanan nga mohimo sa buhat sa templo ug family history. Nagsugod kini dihang gidala sa langitnong mensahero si Ezequiel ngadto sa pultahan sa templo sa Jerusalem.
Basaha ang Ezequiel 47:1, nga pangitaon kon unsay nakita ni Ezequiel nga naggikan sa templo.
-
Sa unsang paagi nga ang tubig angay nga simbolo alang sa mga panalangin sa Ginoo?
Pipila sa posibleng mga tubag naglakip nga ang tubig naghatag og kinabuhi, gikinahanglan sa tanan, makahinlo, ug anaa para sa tanan. Panahon sa Iyang mortal nga pagpangalagad, gitandi sa Manluluwas ang Iyang kaugalingon ug ang mga panalangin nga Iyang gitanyag ngadto sa buhing tubig (tan-awa sa Juan 4:10; 7:37–39).
Mapuslanon tingali para sa mosunod nga kalihokan ang pagpasabot nga ang usa ka maniko usa ka yunit sa sukod, gikan sa siko ngadto sa tumoy sa mga tudlo, gibana-bana nga 18 ngadto sa 21 ka pulgada o 45 ngadto sa 53 ka sentimetro.
Basaha ang Ezequiel 47:2–5, nga pangitaon kon unsa ka lawom ang tubig nga nag-agos pagawas sa templo.
Tungod kay klaro kaayo ang pagkatudlo sa Ginoo niini nga asoy, makatabang kon atong idrowing ang atong nakat-onan. Sa ibabaw nga bahin sa katunga sa panid sa imong journal sa pagtuon, pagdrowing og yanong hulagway sa templo ug sa tubig nga nag-agos gikan niini. (Dugangan ra nimo unya kon asa paingon ang tubig sa ubos nga bahin sa katunga sa panid.)
Kon mapuslanon, pwedeng tan-awon sa mga estudyante ang “And the River Will Grow,” nga anaa sa ChurchofJesusChrist.org, gikan sa time code 0:26–1:29.
-
Sa imong hunahuna, unsay gitudlo sa Ginoo niini nga panan-awon bahin sa mga panalangin nga Iyang ihatag pinaagi sa templo?
Pangutan-a ang mga estudyante:
-
Kon drowingan nimo og usa ka butang sa imong litrato nga magsimbolo sa usa ka lugar diin walay nagpuyo o motubo, unsa kini, ug ngano?
Kon susama nga pangutana ang ipangutana niadtong naa sa Jerusalem sa panahon ni Ezequiel, ang tubag tingali mao ang kamingawan sa Judea o ang Patay nga Dagat. Ginganlan kini og Patay nga Dagat kay walay mabuhi nga hayop o sagbot dinhi. Parat pod ang tubig niini ug dili ni mainom. Kon mapuslanon, ipakita o tultoli ang mga estudyante sa hulagway nga “Kamingawan sa Judea” (Mga Hulagway sa Biblia, num. 3) sa Mga Tabang sa Pagtuon sa Librarya sa Ebanghelyo o sa Apendiks sa Biblia aron makita ang kamingawan duol sa Patay nga Dagat. Pwede pod nilang tan-awon ang “Pisikal nga Mapa sa Balaan nga Yuta” (Mga Mapa sa Biblia, num. 1) ug pangitaon ang Kamingawan sa Judea ug ang Patay nga Dagat.
Basaha ang Ezequiel 47:8–9, 12, nga pangitaon kon unsay mahitabo sa tanang maabtan sa tubig nga gikan sa templo, apil ang Patay nga Dagat.
Dapita ang mga estudyante nga kompletohon ang ilang hulagway, pagdrowing sa unsay bag-o pa lang nilang nabasa diha sa ubos nga bahin sa katunga sa ilang papel.
Ang mosunod maoy pananglitan sa makapahunahuna nga pangutana nga motabang sa mga tigkat-on nga madiskobrehan ang doktrina ug mga baroganan sa ebanghelyo para sa ilang kaugalingon. Kini nga pamaagi makatabang aron mahimong mas mahinungdanon sa mga estudyante ang pagtuon sa kasulatan ug tugotan ang Ginoo nga personal nga motudlo ug modasig nila. (Para sa dugang nga pagbansay niini nga kahanas, tan-awa ang: “Paghimo og makapasiksik nga mga pangutana nga dili limitado ang tubag nga makatabang sa mga tigkat-on sa pagdiskobre og mga doktrina ug mga baroganan sa ebanghelyo sa ilang kaugalingon ug ayaw giyahi ang mga estudyante ngadto sa usa ka piho nga tubag” diha sa Pagpalambo sa mga Kahanas sa Magtutudlo.)
-
Unsaon nimo pag-summarize ang imong nakat-on gikan sa panan-awon ni Ezequiel?
Pwedeng ipakigbahin sa mga estudyante ang lainlain nga mga baroganan. Pasalamati sila sa ilang mga tubag ug pangutana kon nganong importante ang ilang nakat-onan.
Usa sa mga baroganan nga mailhan tingali sa mga estudyante mao: Samtang atong gisimba ang Ginoo diha sa templo, Iya kitang panalanginan og pagkaayo, bag-ong kinabuhi, ug pag-uswag. Gusto tingaling isulat sa mga estudyante kini nga baroganan o usa nga ilang nailhan diha sa ilang mga kasulatan tupad sa Ezequiel 47:1–9.
Kon mapuslanon para sa dugang pagsabot, ipadayon ang bidyo ni Elder Dale G. Renlund sa Korum sa Napulog Duha ka Apostoles ug sa iyang pamilya gikan sa time code 1:58–2:33.
Palawmi ang imong pagsabot
Pag-andam og kopya sa handout nga “Mga Panalangin sa Templo” para sa kada estudyante.
Basaha ang handout nga “Mga Panalangin sa Templo” ug badlisi o lingini ang mga panalangin nga makapadani nimo.
Diha sa ilang mga drowing, pwedeng isulat sa mga estudyante kini nga mga panalangin diha sa tubig nga nag-agos gikan sa templo. Pwede pod nilang idugang ang bisan unsang dugang nga mga panalangin nga ilang mahunahunaan nga ihatag sa Ginoo kanato pinaagi sa templo.
Ikonsiderar ang pagdapit sa mga estudyante sa pagpakigbahin sa ilang mga drowing ug gisulat nga mga panalangin ngadto sa usa ka partner o sa gagmayng grupo. Sa laing paagi, pwede kang magdrowing og suba diha sa pisara ug hangyoa ang mga estudyante nga isulat diha ang mga panalangin nga ilang nahunahunaan. Pwedeng idugang sa mga estudyante diha sa ilang drowing ang mga panalangin nga gusto nilang mahinumdoman gikan sa gipakigbahin sa uban.
-
Unsa nga mga panalangin ang mipatigbabaw nimo?
Dapita ang mga estudyante sa paghunahuna og mga tubag sa mosunod nga mga pangutana sulod sa pipila ka minuto sa dili pa ka mangutana nila. Samtang magpakigbahin sila, pwede kang mangutana og sama sa mosunod: “Nganong makahuloganon man kana kaninyo?” “Naa bay nakasinati og sama niana?” ug “Unsay gusto ninyong idugang sa gipakigbahin?”
Kon ang mga estudyante nagpuyo sa lugar diin daghan ang dili makatambong sa templo tungod sa gilay-on, ug wala silay daghang kaila nga tigtambongan sa templo, pwede nimong usbon ang ikaduhang pangutana nga ipangutana mahitungod sa mga panalangin nga nasinati sa mga estudyante o sa uban samtang nangandam sila sa pagsimba diha sa templo.
-
Sa unsang paagi nga ang bisan unsa sa mga panalangin nga imong nailhan makaayo o makahatag og kinabuhi?
-
Kanus-a nasinati nimo o sa imong kaila ang usa niini nga mga panalangin nga gikan sa Ginoo pinaagi sa pagsimba diha sa templo?
Kon makabenepisyo sa mga estudyante ang pagkakita og mga pananglitan sa pipila ka panalangin nga anaa tungod sa pagsimba diha sa templo, pwede nimong ipasalida ang usa sa mosunod nga mga bidyo:
-
“Temples Are a Beacon” (2:50)
-
“Family History and Temple Work: Healing and Sealing” (14:43) gikan sa time code 7:36–12:20.
Unsa ang imong gibati bahin sa templo
Sa pagtapos sa leksiyon, ikonsiderar ang pagpangita og lugar diha sa imong drowing o sa imong journal sa pagtuon aron isulat ang imong pagbati bahin sa pagtambong ug pagsimba diha sa templo ug pagdawat sa mga panalangin sa Ginoo. Tinguhaa ang tabang sa Espiritu Santo aron imong masulat pag-ayo ug tukma ang imong pagbati.
Ikonsiderar ang pagdapit ni bisan kinsang mga estudyante nga gustong ipakigbahin ang ilang hunahuna ug pagpamatuod. Ikonsiderar ang pagpakigbahin usab sa kaugalingon nimong pagbati.