“Ezequiel 1–3; 33: ‘Gihimo Ko Ikaw nga Magbalantay,’” Manwal sa Magtutudlo sa Seminary sa Daang Tugon (2026)
“Ezequiel 1–3; 33: ‘Gihimo Ko Ikaw nga Magbalantay,’” Manwal sa Magtutudlo sa Seminary sa Daang Tugon
Ezequiel 1–3; 33–34; 36–37; 47: Leksiyon 138
Ezequiel 1–3; 33
“Gihimo Ko Ikaw nga Magbalantay”
Unsaon nato pagpabileng luwas kon daghan kaayo og espirituwal nga kapeligrohan sa kalibotan? Nagtawag ang Ginoo og mga propeta nga magserbisyo isip mga magbalantay aron pasidan-an ug protektahan kita. Gitawag sa Ginoo si Ezequiel aron moserbisyo isip magbalantay sa mga Israelinhon samtang nabihag sa Babilonia (tan-awa ang Ezequiel 3:16–17). Kini nga leksiyon makatabang sa mga estudyante nga mobati og mas dakong tinguha nga paminawon ang mga pasidaan sa mga propeta sa Ginoo.
Pagpangandam sa estudyante: Dapita ang mga estudyante nga basahon ang “Propeta” diha sa Giya ngadto sa mga Kasulatan o “Mga Propeta” sa Mga Hilisgotan ug mga Pangutana diha sa Librarya sa Ebanghelyo. Pwede nilang pangitaon ang tahas sa mga propeta ug pamalandongan kon sa unsang paagi ilang nakita nga ang mga propeta mituman niini nga tahas.
Posibleng mga Kalihokan sa Pagkat-on
Mga pagbati bahin sa propeta sa Ginoo
Ikonsiderar ang pagsugod sa klase pinaagi sa pagdapit sa mga estudyante nga pamalandongan ang ilang pagbati bahin sa mga propeta sa Ginoo karon. Usa ka paagi sa paghimo niini mao ang pagpakita og hulagway sa Presidente sa Simbahan ug dapiton ang mga estudyante sa pagkanta o sa pagpaminaw sa “Salamat, O Dios sa Propeta” (Mga Himno, nu. 13). Dayon, pwede nimong ihatag ang mga instruksyon sa ubos. Ilha nga managlahi tingali ang pagbati sa kada estudyante bahin sa propeta, ug OK ra na. Awhaga sila nga motubag nga matinud-anon.
Sa imong journal sa pagtuon, kompletoha ang mosunod nga pahayag gamit ang usa o kapin pang mga tubag:
Dihang makita nako ang propeta, maminaw niya nga mamulong, o magbasa sa iyang mga pulong, mobati ko nga …
Dapita ang andam nga mga estudyante sa pagpakigbahin sa klase kon unsay ilang gisulat. Pwede nimong ipasabot nga samtang mopakigbahin ug maminaw sila, pwedeng lamdagan sa Espiritu Santo ang ilang mga hunahuna ug pahumokon ang ilang mga kasingkasing nga sundon ang propeta sa Ginoo.
Gitawag sa Ginoo si Ezequiel isip usa ka propeta
Si Ezequiel gibihag ug gidala sa Babilonia uban sa mga Israelinhon. Samtang gibihag, giduaw siya sa Ginoo ug gitawag aron mahimong usa ka propeta (tan-awa sa Ezequiel 1–2). Misaad ang Ginoo nga palig-onon si Ezequiel samtang nagsangyaw siya sa masupilon ug gahi og kasingkasing nga mga tawo (tan-awa sa Ezequiel 3:7–9).
Ang Ezequiel 3:16–17 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra nila kining makita.
Basaha ang Ezequiel 3:10–11, 16–17, nga pangitaon kon unsay gitudlo sa Ginoo kang Ezequiel bahin sa iyang papel isip usa ka propeta.
-
Unsay inyong nakaplagan?
Aron tabangan ang mga estudyante nga masabtan kon unsay girepresentahan sa usa ka magbalantay, ikonsiderar ang pagpakita sa hulagway sa Carcassonne nga gilakip niini nga leksiyon, uban niini nga pahayag gikan ni Elder Neil L. Andersen.
Si Elder Neil L. Andersen sa Korum sa Napulog Duha ka Apostoles mipasabot:
Ang Carcassonne usa ka talagsaong siyudad nga giparilan didto sa France nga nagbarug sukad pa sa tunga-tungang kapanahunan. Tag-as nga mga tore ang nagbuntaog nga gipanalipdan niining mga paril, gitukod alang sa mga magbalantay nga magbarug niadtong mga tore sa adlaw ug gabii, nga kanunayng magtan-aw sa unahan alang sa kaaway. Kon makakita ang magbalantay og kaaway nga nagsingabut, ang iyang tingog sa pagpasidaan manalipod sa katawhan sa Carcassonne gikan sa taliabot nga kakuyaw nga wala nila makita.
Ang propeta usa ka magbalantay sa tore, nga manalipod kanato gikan sa espiritwal nga mga kakuyaw nga mahimong dili nato makita. (“Ang Propeta sa Dios,” Liahona, Mayo 2018, 25)
-
Unsaon nimo pag-summarize ang gitudlo sa Ezequiel 3:16–17 ug ni Elder Andersen bahin sa mga propeta?
Tabangi ang mga estudyante sa pag-ila nga gitawag sa Ginoo ang mga propeta nga moserbisyo isip mga magbalantay aron pasidan-an ta bahin sa espirituwal nga mga kakuyaw. Ipasabot nga ang Unang Kapangulohan ug Korum sa Napulog Duha ka Apostoles nagserbisyo isip mga propeta sa Ginoo karon. Kon nakompleto sa mga estudyante ang kalihokan sa pagpangandam sa estudyante, pwede nilang ipakigbahin ang ilang nakat-onan isip kabahin sa mosunod nga panaghisgotan.
-
Nganong ang “magbalantay” usa ka maayong paagi sa paghulagway sa papel sa mga propeta?
Sa Ezeqiel 33, gitudlo pag-usab sa Ginoo kang Ezequiel ang iyang responsibilidad nga moserbisyo isip magbalantay ug sa pagpakigbahin sa mensahe sa Dios ngadto sa Israel (tan-awa sa Ezequiel 33:1–7).
Basaha ang Ezequiel 33:9–11, nga pangitaon kon nganong gusto sa Ginoo nga pasidan-an ang Iyang katawhan.
-
Unsay itudlo kanato sa bersikulo 11 bahin sa Langitnong Amahan ug ni Jesukristo?
Gipakigbahin ni Elder D. Todd Christofferson sa Korum sa Napulog Duha ka Apostoles kon sa unsang paagi ang mga pasidaan sa propeta maoy ebidensya sa gugma sa Dios:
Imbis ganahan nga mosilot kanato, ang atong Langitnong Amahan ug ang atong Manluluwas nagtinguha sa atong kalipay ug naghangyo kanato sa paghinulsol, hingpit nga nasayud nga ang “pagkadautan dili mahitabo [ug dili gayud] mahimo nga kalipay” [Alma 41:10]. Mao nga si Ezequiel ug ang matag propeta kaniadto ug sukad, namulong sa pulong sa Dios uban sa lawom nga pagbati, mipasidaan sa tanan nga mopalayo kang Satanas, ang kaaway sa ilang mga kalag, ug “[mopili] sa kalingkawasan ug sa kinabuhi nga dayon, pinaagi sa halangdon nga Tigpataliwala sa tanan nga mga tawo” [2 Nephi 2:27]. (“Ang Tingog sa Pagpasidaan,” Liahona, Mayo 2017, 108)
-
Sa unsang paagi ang pagsabot kon nganong gitawag sa Ginoo ang Iyang mga propeta aron mahimong mga magbalantay makaimpluwensiya sa atong tinguha nga sundon sila?
Mga pasidaan gikan sa mga magbalantay
Ang mosunod nga kalihokan gituyo aron tabangan ang mga estudyante nga makita ang mga pananglitan sa mga pasidaan nga gihatag sa Ginoo pinaagi sa Iyang mga propeta. Ikonsiderar ang pagdapit sa mga estudyante nga magpili og usa sa mosunod nga mga opsiyon aron tun-an:
-
Bag-ohay lang nga mga pakigpulong sa mga sakop sa Unang Kapangulohan o Korum sa Napulog Duha ka Apostoles
-
Kini nga mga tudling sa kasulatan sa doktrinal nga kahanas o uban pang mga tudling nga imong napili: Isaias 5:20; 1 Mga Taga-Corinto 6:19–20 (tan-awa usab sa bersikulo 18); 2 Nephi 2:27; 2 Nephi 32:8–9; Alma 41:10; ug Doktrina ug mga Pakigsaad 64:9–11
Human makapili og opsiyon nga tun-an ang mga estudyante, ipakita ang mosunod nga mga instruksiyon:
Tun-i ang mga pagtulun-an gikan sa mga propeta sa Ginoo ug pangandam sa pagpakigbahin sa mosunod:
-
Mga pasidaan nga gihatag sa Ginoo pinaagi sa Iyang mga propeta.
-
Mga panalangin nga atong madawat o mga hagit nga atong malikayan tungod sa pagsunod niini nga mga pasidaan. Pwede nga gikan kini sa imong gitun-an o gikan sa imong mga hunahuna ug mga kasinatian.
-
Ang imong pagbati niini nga pasidaan maoy ebidensya sa gugma sa Dios o sa Iyang tinguha nga magmalipayon ta.
Pwede nimong dapiton ang kada estudyante nga mopili og usa ka propetikanhong pasidaan nga ilang nakita sa lakang 1 sa ilang pagtuon ug isulat kini sa pisara. Ang laing opsiyon, mao nga pwedeng isulat sa mga estudyante ang pasidaan diha sa usa ka pirasong papel ug i-post kini sa tibuok klasrom. Dapita ang mga estudyante nga basahon ang mga pasidaan nga gisulat sa uban. Dayon, pwedeng mopili ang klase og pipila nga mas detalyadong hisgotan. Pwede nimong hangyoon ang mga estudyante nga misulat sa gipili nga mga pasidaan nga ipakigbahin ang ilang mga tubag sa lakang 2 o 3 gikan sa ilang pagtuon.
Samtang maminaw ug moapil sa panaghisgotan ang mga estudyante, dapita sila sa pagpamalandong sa ilang personal nga mga kahimtang ug mga panginahanglan. Dasiga sila nga ikonsiderar kon naa bay piho nga mga pasidaan o mga mensahe ang Ginoo para kanila.
Pagsunod sa propeta
Pamalandonga ang mga hunahuna ug pagbati nga gipahibalo tingali kanimo sa Espiritu Santo sa tibuok leksiyon bahin sa Ginoo ug sa Iyang mga propeta. Idugang ang usa o ang duha sa mosunod nga mga linya diha sa imong journal sa pagtuon ug kompletoha kini pinaagi sa imong mga hunahuna o mga pagbati:
Ang usa ka butang nga gusto nakong hinumdoman bahin sa Ginoo ug sa Iyang mga propeta mao ang …
Gusto nakong sundon ang propeta sa Ginoo kay …
Pwede nimong taposon pinaagi sa paghangyo og pipila ka estudyante nga ipakigbahin ang ilang gisulat. Pwede pod nimong ipakigbahin ang imong pagbati bahin sa Ginoo ug sa Iyang mga propeta samtang giandam ug gitudlo nimo ang leksiyon.
Pagsag-ulo
Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanong hugpong sa mga pulong sa kasulatan atol niini nga leksiyon ug rebyohon kini sa umaabot nga mga leksiyon. Ang mahinungdanong hugpong sa mga pulong sa kasulatan para sa Ezequiel 3:16–17 maoang “Ang propeta ‘usa ka magbalantay alang sa balay sa Israel.’” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”