Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Selemaia 2–3: “Tafoki Mai … He ʻOku Pehē ʻe [he ʻEikí] ʻOku Ou ʻAloʻofa”

“Selemaia 2–3: ‘Tafoki Mai … He ʻOku Pehē ʻe [he ʻEikí] ʻOku Ou ʻAloʻofa,’” Fuakava Motuʻá – Tohi Lēsoni ʻa e Faiako Seminelí (2026)

“Selemaia 2–3: ‘Tafoki Mai … He ʻOku Pehē ʻe [he ʻEikí] ʻOku Ou ʻAloʻofa,’” Fuakava Motuʻá – Tohi Lēsoni ʻa e Faiako Seminelí

Selemaia 1–3; 7; 16–18; 20: Lēsoni 131

Selemaia 2–3

“Tafoki Mai … He ʻOku Pehē ʻe [he ʻEikí] ʻOku Ou ʻAloʻofa”

Hangē ko e ʻaho ní, naʻe mālohi e ngaahi ivi tākiekina fakamāmani ʻi he kuonga ʻo Selemaiá. Naʻe hē ha tokolahi ʻo e kakai ʻa e ʻEikí mei Heʻene ngaahi akonakí pea vave pē hano ikunaʻi kinautolu ʻe honau ngaahi filí. Neongo ʻenau faiangahalá, ka naʻe fekauʻi atu ʻa Selemaia ke akoʻi naʻe kei fakaafeʻi kinautolu ʻe he ʻOtuá ke nau tafoki kiate Ia pea fakamoʻui kinautolu. ʻE lava ke tokoni ʻa e lēsoni ko ʻení ke fakatupulaki ʻe he kau akó ʻenau loto-holi ke tafoki ki he Fakamoʻuí ki ha ʻaloʻofa mo ha fakamoʻui.

Teuteu ʻa e tokotaha akó: Fakaafeʻi e kau akó ke kumi ha potufolofola ʻokú ne akoʻi e ngaahi tāpuaki ʻo e fakatomalá. ʻE lava ke nau teuteu ke vahevahe e ʻuhinga ʻoku mahuʻingamālie ai e ngaahi tāpuaki ko iá kiate kinautolú.

Ngaahi ʻEkitivitī Ako ʻOku Ala Fakahokó

Ngaahi ʻaiʻanga vai ʻoku ʻikai ha vai ai

Ke tokoni ke mahino ki he kau akó e tuʻunga ʻo e kakai ʻi he kuonga ʻo Selemaiá, fakamatalaʻi ange ʻoku faʻa tokoniʻi kitautolu ʻe he ʻEikí ke tau sio ki he ngaahi moʻoni fakalaumālié ʻaki hono fakafehoanaki kinautolu ki he ngaahi meʻa ʻoku tau maheni mo iá.

Fakakaukau ke ʻomi ki he kalasí ha sioki vai, pe poulu lahi, pea mo ha ipu ʻoku ʻi ai ha fanga kiʻi foʻi ava ʻi lalo.

Puke hake ʻa e sioki vaí ʻi hono lau ʻe he kau akó ʻa e veesi ko ʻení.

Lau ʻa e Selemaia 2:13, ʻo kumi ha huafa ʻo e Fakamoʻuí ʻe lava ke fakafofongaʻi ʻe he vaí. (Ko e “ʻaiʻanga vaí” ko ha feituʻu ia ʻi lalo fonua ʻoku faʻu ke tānaki ai e vaí.)

Ko e hā ʻe lava ke akoʻi mai ʻe he hingoa “matavai ʻo e vai moʻuí” fekauʻaki mo Sīsū Kalaisí?

ʻE lava ke vahevahe ʻe he kau akó ha ngaahi meʻa peheni ko Sīsuú ko ha maʻuʻanga tokoni maʻu ai pē ia ʻo e fufulu mo e fakafonu fakalaumālié.

Fakaafeʻi ha tokotaha ako ke ne puke ha ipu ʻi ʻolunga ʻi he poulú (ke fakapapauʻi ʻoku ʻikai mahua ʻa e vaí) pea lingi ha vai mei he siokí ki he ipú. ʻE ala tokoni ke toe vakai ʻa e kau akó ki he veesi 13 kimuʻa pea ʻeke ha taha ʻo e ongo fehuʻi ko ʻení pe fakatouʻosi.
Ko e hā ʻe ala fakafofongaʻi ʻe hono lilingi ʻo e vaí ki he ipú mei he vēsí?
Ko e hā ʻe lava ke akoʻi mai ʻe he ngaahi ava ʻi he ʻaiʻanga vaí fekauʻaki mo e tuʻunga fakalaumālie ʻo e kakai ʻi he kuonga ʻo Selemaiá?

Vahevahe mo e kau akó naʻe tafoki ʻa e kakai ʻi he kuonga ʻo Selemaiá ki he ngaahi meʻa ʻo e māmaní, hangē ko e ngaahi ʻotua loí kae ʻikai ko e ʻEikí, ke maʻu ha taumuʻa mo ha mālohi ʻi heʻenau moʻuí.

Fakakaukau ʻi ha kiʻi taimi ki he tuʻunga ʻokú ke ʻi ai ʻi he tafoki kia Sīsū Kalaisi ke maʻu ha taumuʻa mo ha mālohi ʻi hoʻo moʻuí. ʻI hoʻo ako he ʻaho ní, ongoʻingofua ha ngaahi fakakaukau mo ha ngaahi ongo mei he Laumālie Māʻoniʻoní fekauʻaki mo e tafoki ki he Fakamoʻuí kae ʻikai ko ha ngaahi maʻuʻanga tokoni kehe ki ha ngaahi tāpuaki mo ha fakamoʻui.

Ongoʻi mamaʻo mei he Tamai Hēvaní mo Sīsū Kalaisi

Ke tokoni ki he kau akó ke nau fakafelāveʻi mo e tūkunga ko ʻení, fakakaukau ke fakaʻaliʻali ha fakatātā ʻo ha toʻu tupu hangē ko ia ʻoku hā atú. Fakaafeʻi e kau akó ke ʻai ha hingoa mo ha ngaahi fakaikiiki fekauʻaki mo ia.

Fakakaukauloto ʻoku ʻi ai ha talavou ʻi hoʻo kalasi seminelí ʻokú ne ongoʻi ʻoku hangē ʻene moʻuí ha ʻaiʻanga vai kuo maumaú ʻi he ngaahi fili taʻefakapotopoto kuó ne fai ʻi he kuohilí. ʻOkú ne ongoʻi mamaʻo mei he Tamai Hēvaní mo Sīsū Kalaisi pea ʻoku ʻikai ke ne ʻamanaki lelei ke toe lelei ange e ngaahi meʻá.

Lau ʻa e Selemaia 3:12–15, 22, ʻo kumi e ngaahi fakamatala ʻo Sīsū Kalaisi ʻe ʻaonga ʻo ka mahino ki he toʻu tupu ko ʻení. (Mahalo ʻe tokoni ke ʻiloʻi ʻoku ʻuhinga ʻa e “fakaholomui” ʻi he ngaahi veesi ko ʻení ki he taʻetui pe talangataʻa.)

Fakakaukau ke hiki ʻa e fakamatala taʻekakato ko ʻení ‘i he palakipoé. Fakaafeʻi e kau akó ke vahevahe ha ngaahi founga ke fakakakato ai e fakamatalá ʻo fakaʻaongaʻi e ngaahi foʻi lea pe kupuʻi lea mei he ngaahi vēsí.

Ko kinautolu ʻoku fakatomala pea tafoki ki he ʻEikí, te Ne …”

ʻE lava ke kau ʻi he ngaahi talí ʻa e “ʻaloʻofá,” “ʻikai houhaú,” (veesi 12), “ʻomi ʻa kimoutolu ki Saione,” (veesi 14), “foaki kiate kimoutolu ʻa e kau tauhi (kau taki) … pea te nau fafanga ʻaki ʻa kimoutolu ʻa e potó mo e ʻiló” (veesi 15), “fakamoʻui hoʻomou fakaholomuí,” (veesi 22), mo e alā meʻa pehē.

Mahalo ʻe tokoni ke tuku ha taimi ke aleaʻi ai ha ngaahi kupuʻi lea mei he ngaahi veesi ko ʻení ʻoku ʻi ai ha ngaahi fehuʻi ʻa e kau akó ki ai. Fakaafeʻi e kau akó ke hiki ʻi heʻenau tohinoá ha kupuʻi lea ʻe taha pe ua ʻoku nau pehē ʻe tokoni ki he talavou ʻi he tūkungá ke mahino kiate ia fekauʻaki mo Sīsū Kalaisi. ʻE maʻu ʻe he kau akó ʻa e faingamālie ke vahevahe ʻa e meʻa ʻoku nau filí ʻamui ange.

Ko e ʻaloʻofa ʻa e Tamai Hēvaní mo Sīsū Kalaisi

Ke tokoni ke fakatupulaki ʻe he kau akó ʻenau loto-falala ki he finangalo ʻo e ʻEikí ke tāpuakiʻi mo fakamoʻui ʻa kinautolu ʻoku tafoki kiate Iá, te ke lava ʻo vahevahe ʻa e fakamatala ko ʻení.

Naʻe akoʻi ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo e finangalo ʻa e Tamai Hēvaní mo Sīsū Kalaisi ke fakamoʻui ʻa kinautolu ʻoku fakatomalá:

Ko hai ia ʻiate kitautolu kuo teʻeki mavahe mei he hala ʻo e māʻoniʻoní, ʻo fakakaukau taʻe-fakapotopoto te tau maʻu ha fiefia lahi ange ʻi he fononga ʻi hotau hala siokitá?

Ko hai ia ʻiate kitautolu kuo teʻeki ke ne ongoʻi fakatōkilalo, loto-mamahi, mo holiholivale ke maʻu ha fakamolemole mo ha ʻaloʻofá?

Mahalo ʻe fifili ha niʻihi, “ʻOku malava nai ke u toe foki? ʻE lumaʻi, fakasītuʻaʻi, mo liʻaki au ʻo taʻengata ʻe hoku ngaahi kaungāmeʻa kimuʻá? ʻE lelei ange nai ke u hē ai pē au? ʻE fēfē ʻa e fakafeangai ʻa e ʻOtuá kapau te u feinga ke foki?”…

ʻE hāʻele mai ʻetau Tamai Hēvaní kiate kitautolu, ʻoku fonu Hono lotó ʻi he ʻofa mo e manavaʻofa. …

ʻOku ou fakamoʻoni ko e momeniti te ke fili ai ke foki mo fononga ʻi he hala ʻo hotau Fakamoʻuí mo e Huhuʻí, te ke maʻu Hono mālohí ʻi hoʻo moʻuí pea liliu ai. (“Ko e Foha Maumau Koloá mo e Hala ʻOku Fakatau ki ʻApí,” Liahona, Nōvema 2023, 88)

Hiki ʻi hoʻo tohinoá ha ngaahi fakakaukau kuó ke maʻu mei he fakamatala ko ʻení ʻa ia te ne lava ʻo tāpuakiʻi ʻa e talavou ʻi he tūkungá. Te ke maʻu ha faingamālie ke vahevahe ʻa e ngaahi meʻá ni ʻamui ange.

Fakaʻosi

ʻE lava ke hoko ʻa e ʻekitivitī ko ʻení ko ha faingamālie lelei ke ongoʻi ai ʻe he kau akó e fakamoʻoni ʻa e Laumālie Māʻoniʻoní ki he meʻa ʻoku nau lea ʻakí mo e meʻa ʻoku nau fanongo ai mei he kau ako kehé.

Fakakaukau ke fakaʻaliʻali ʻa e ngaahi fakahinohino ko ʻení. (ʻOku ʻomi ʻe he ʻuluaki poini ʻi laló ha faingamālie ki he kau akó ke vahevahe ʻa e meʻa naʻa nau fai ʻi he teuteu ʻa e tokotaha akó kimuʻa he kalasí.)

Teuteu ke vahevahe ʻa e meʻa te ke lea ʻaki ki he talavou ʻi he tūkungá ʻaki haʻo toe vakaiʻi ʻa e meʻa naʻá ke hiki ʻi hoʻo tohinoá. Fakakaukau ke fakakau foki ʻa e ngaahi meʻa ko ʻení:

Ko ha meʻa mei ha potufolofola pe talanoa fakafolofola ʻe taha ʻokú ne fakahaaʻi ʻa e ngaahi tāpuaki ʻo e fakatomalá (Te ke lava ʻo kumi ʻa e fakatomalá ʻi he Fakahinohino ki he Ngaahi Folofolá.)

Ko hoʻo ngaahi ongo fekauʻaki mo e ʻofa mo e finangalo ʻa e Fakamoʻuí ke tokoniʻi ʻa kinautolu kotoa pē ʻoku tafoki kiate Iá

Hili hono maʻu ʻe he kau akó ha taimi ke teuteu aí, fakaafeʻi kinautolu ke vahevahe ʻenau ngaahi fakakaukaú mo ha hoa pe kulupu toko siʻi.

Hili hono maʻu ʻe he kau akó ha faingamālie ke vahevahé, te ke lava ʻo fakaʻosi e lēsoní ʻaki hano fakaafeʻi ha niʻihi ʻe loto-fiemālie ke vahevahe ʻenau ngaahi tali ki he fehuʻi ko ʻení.

Ko e hā kuó ke ako pe ongoʻi he ʻahó ni te ne lava ʻo tākiekina hoʻo loto-holi ke tafoki ki he Fakamoʻuí ke maʻu ʻEne ʻaloʻofá mo e fakamoʻuí?

Ngaahi Maʻuʻanga Tokoni Kehé

Ko e hā ha ngaahi tāpuaki ʻe lava ke maʻu mei he tafoki kia Sīsū Kalaisí?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

13:25

ʻI he tukutaha ʻetau tokangá kia Sīsū Kalaisí, ʻoku tau vakai ai ki he meʻa kotoa pē ʻi hotau ʻātakaí—lolotonga ʻetau kei moʻuí—ʻo fakafou ʻi heʻetau ʻofa kiate Iá. ʻOku puli māmālie atu ai ʻa e ngaahi fakahohaʻa taʻe mahuʻingá, pea tau toʻo mo e ngaahi meʻa ʻoku ʻikai fenāpasi mo Hono māmá mo e ʻulungāngá. ʻI he hoko atu hoʻo piki maʻu ʻi ho ʻatamaí ʻa e foʻi fakakaukau ko ʻeni ʻo Sīsū Kalaisí, falala kiate Ia, mo tauhi ʻEne ngaahi fekaú, ʻoku ou palōmesi atu he ʻikai ngata pē ʻi ha fakahinohino fakalangi ka ko ha mālohi fakalangi foki—ʻa e mālohi ʻokú ne ʻomi ha ivi ki hoʻo ngaahi fuakavá, nonga ki ho ngaahi faingataʻaʻiá pea mo ha fiefia ʻi ho ngaahi tāpuakí. (“Naʻe Pīkitai Hoku ʻAtamaí ʻi he Fakakaukau Ko ʻEni kia Sīsū Kalaisí,” Liahona, Mē 2023, 93)

Fēfē kapau ʻokú ke ongoʻi hangē kuo fuʻu mamaʻo hoʻo heé?

Naʻe vahevahe ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá:

14:31

Neongo pe ko e hā ha meʻa kuo hoko ʻi hoʻo moʻuí, ʻoku ou toe fakaongo mo fakahā atu ʻa e ngaahi lea ʻa hoku kaungāmeʻa ʻofeina mo e kaungā ʻAposetolo ko ʻEletā Sefilī R. Hōlaní: “He ʻikai malava ke taʻe-aʻu atu kiate koe e maama taʻengata ʻo e [feilaulau fakalelei] ʻa Kalaisí.”

Neongo kapau kuo taki koe ʻe hoʻo ngaahi filí ke ke mamaʻo mei he Fakamoʻuí mo Hono Siasí, ka ʻoku tuʻu ʻa e ʻEiki Faifakamoʻuí ʻi he hala ʻoku fakatau ki ʻapí, ʻo talitali lelei koe. Pea ʻi heʻemau hoko ko e kāingalotu ʻo e Siasi ʻo Sīsū Kalaisí ʻoku mau feinga ke muimui ki Heʻene sīpingá mo talitali lelei [kimoutolu] ko homau ngaahi tokoua mo e tuofāfine, ko homau kaungāmeʻa. ʻOku mau fiefia mo kātoanga fiefia mo koe. (“Ko e Foha Maumau Koloá mo e Hala ʻOku Fakatau ki ʻApí,” Liahona, Nōvema 2023, 88)

Naʻe pehē ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku akoʻi kitautolu ʻe he meʻa kotoa pē ʻi he ongoongoleleí te tau lava ʻo liliu kapau ʻoku tau fiemaʻu, ʻe lava ke tokoniʻi kitautolu kapau ʻoku tau fiemaʻu moʻoni ia, ʻe lava ke fakamoʻui kitautolu, ʻo tatau ai pē pe ko e hā e palopalema ʻo e kuohilí. (“He Hath Filled the Hungry with Good Things,” Ensign Nov. 1997, 66)

Ngaahi ʻEkitivitī Fakalahi ki he Akó

“Ngaahi meʻa taʻeʻaonga” (Selemaia 2:8, 11)

Makehe mei hono ako ʻo e Selemaia 2:13, ʻe lava ke ʻai ke ʻilo ʻe he kau akó mo fakaʻilongaʻi ʻa e ongo kupuʻi lea “ngaahi meʻa taʻeʻaongá” mo e “meʻa taʻeʻaongá” ʻi he Selemaia 2:8, 11. Te ke lava ʻo fakaafeʻi e kau akó ke lau ʻa e fakamatala ko ʻeni meia Palesiteni Nalesoní, ʻo kumi e founga ʻoku fekauʻaki ai mo e ngaahi akonaki ʻa Selemaiá:

18:43

Ko ha foʻi moʻoni mahuʻinga ʻeni: neongo e kikihi ʻa māmaní ʻoku ʻomi ʻe he mālohí, koloá, ʻiloá, mo e ngaahi fakananivi ʻo e kakanó ʻa e fiefiá, ka ʻoku ʻikai! He ʻikai ke nau lava! ʻOku halaʻatā ha meʻa ʻe maʻu mei ai ka ko ha fetongi fakangalingali pē ki he “tuʻunga monūʻia mo fiefia ʻo kinautolu ʻoku tauhi ʻa e ngaahi fekau ʻa e ʻOtuá.”

Ko hono moʻoní, ʻoku toe fakaongosia lahi ange ke kumi ʻa e fiefiá ʻi ha feituʻu he ʻikai ke ke teitei maʻu ai! Ka, ʻi he taimi ʻokú ke ngāue fakataha ai mo Sīsū Kalaisi ʻo fakahoko e ngāue fakalaumālie ʻoku fiemaʻu ke ikuʻi ʻaki ʻa e māmaní, ko Ia, pea ko Ia tokotaha pē, ʻokú Ne maʻu ʻa e mālohi ke fakamoʻui koe mei he ngaahi kovi ʻo e māmaní. (“Ikuʻi ʻa Māmani mo Maʻu ha Fiemālie,” Liahona, Nōvema 2022, 96–97)

Ko e hā ha ngaahi sīpinga ʻo ha ngaahi meʻa ʻoku fekumi e kakaí ki ha fiefia ai ʻi ha feituʻu he ʻikai teitei maʻu ai? ʻE tatau fēfē nai ia mo ha ʻaiʻanga vai kuo maumaú?
Kuó ke maʻu fēfē pe ko ha niʻihi kehe ʻokú ke ʻilo ha fiefia ʻi he muimui ki he Fakamoʻuí?

Tafoki ki he ʻEikí

ʻI he taimi ʻe niʻihi, ʻoku fakaʻaongaʻi ʻe he folofolá ha ngaahi kupuʻi lea ʻoku tau pehē ʻoku mahino ki he kau akó, ka ʻoku ʻikai. Mahalo ʻe tokoni ke fakapapauʻi ʻoku mahino ki he kau akó ʻa e founga te nau lava ai ʻo “tafoki” kia Sīsū Kalaisí (vakai, Selemaia 3:12, 22). Ko e founga ʻe taha te ke lava ai ʻo fai ʻení ko hono fakaafeʻi kinautolu ke kumi ha potufolofola ʻokú ne akoʻi e tafoki ki he ʻEikí. ʻOku kau ʻi he ngaahi sīpingá ʻa e 2 Nīfai 31:20; ʻĪnosi 1:2–4; Molonai 7:16; mo e Tokāteline mo e Ngaahi Fuakava 11:12.

Hili iá, ʻe lava ke fakaafeʻi e kau akó ke vahevahe ʻa e meʻa naʻa nau maʻú mo e founga ʻe tokoni ai ki ha taha ke tafoki pe foki ki he ʻEikí.

Ko ha sīpinga ʻo e ʻaloʻofa mo e ʻofa ʻa e ʻEikí

Ki hano fetongi ʻo e ngaahi sīpinga fakavitiō ʻi he lēsoní, te ke lava ʻo huluʻi ʻa e “Wheelz: Overcoming is Possible.” Fakaafeʻi e kau akó ke kumi e founga ʻoku fakahoʻata ai ʻe he talanoa ko ʻení e meʻa naʻe akoʻi ʻe he ʻEikí ʻi he Selemaia 3:12–15, 22.

7:13