“Isaias 49: ‘Ako Mikulit Kaninyo diha sa mga Palad sa Akong mga Kamot,’” Manwal sa Magtutudlo sa Seminary sa Daang Tugon (2026)
“Isaias 49: ‘Ako Mikulit Kaninyo diha sa mga Palad sa Akong mga Kamot,’” Manwal sa Magtutudlo sa Seminary sa Daang Tugon
Isaias 40–49: Leksiyon 121
Isaias 49
“Ako Mikulit Kaninyo diha sa mga Palad sa Akong mga Kamot”
Ang Langitnong Amahan ug si Jesukristo personal ug hingpit nga nakaila nimo. Pero usahay makahiagom kita og mga hagit sa mortalidad ug moingon, “Gibiyaan ako sa Ginoo” (tan-awa sa Isaias 49:14). Gipasaligan kita sa mga pulong ni Isaias nga gikulit ta sa mga kamot sa Manluluwas ug dili kita Niya biyaan o kalimtan (tan-awa sa Isaias 49:16). Kini nga leksiyon makatabang sa mga estudyante nga mobati nga gimahal kita sa Langitnong Amahan ug ni Jesukristo ug dili kita Nila kalimtan.
Pagpangandam sa estudyante: Dapita ang mga estudyante sa pagsulod sa klase nga namalandong sa mga kasinatian diin ilang gibati nga ang Langitnong Amahan ug si Jesukristo nakahinumdom kanila. Pwede nilang pangutan-on ang usa ka sakop sa pamilya o higala bahin sa mga kasinatian nga mibati silang nga nahinumdom ang Langitnong Amahan ug si Jesukristo.
Posibleng mga Kalihokan sa Pagkat-on
Gihinumdoman sa Ginoo
Ikonsiderar ang pagsugod sa klase pinaagi sa pagpakita og hulagway sa gagmayng bulak nga gitawag og “forget-me-nots.”
Samtang nakigbahin og handumanan sa pagkabata, si Presidente Dieter F. Uchtdorf, kanhi sa Unang Kapangulohan, miingon:
Isip usa ka bata, kon motan-aw ko sa gagmayng forget-me-not, akong bation usahay nga ingon og pareho ako nianang gamay nga bulak—gamay ug walay kahulugan. Naghunahuna ko kon makalimtan ba kaha ako sa akong pamilya o sa akong Langitnong Amahan. (“Ayaw Ko Paghikalimti,” Liahona, Nob. 2011, 122)
-
Unsay pipila ka rason kon nganong mobati tingali ang usa ka tin-edyer nga gikalimtan na siya sa uban o sa Langitong Amahan?
-
Unsay nahibaloan na nimo bahin sa Langitnong Amahan ug kang Jesukristo nga gusto nimong ipakigbahin ngadto sa usa ka tawo nga mibati nga gikalimtan na?
Mipadayon si Presidente Uchtdorf:
Mga tuig human niadto makalingi ako nianang batan-ong lalaki uban sa kalumo ug kalooy. Ug ako nang nahibaloan karon—nga wala gayud ako mahikalimti. Ug may butang pa akong nahibaloan: isip usa ka Apostol sa atong Agalon, nga si Jesukristo, makapamahayag ako uban sa tanang kasiguroan ug kombiksyon sa akong kasingkasing—bisan kamo! Kamo wala hikalimti. (“Ayaw Ko Paghikalimti,” Liahona, Nob. 2011, 122)
Pamalandongi ang kaugalingon nimong mga kasinatian uban sa Langitnong Amahan ug kang Jesukristo samtang imong tubagon ang mosunod nga mga pangutana:
-
Unsa ka kamasaligon nga nailhan ug nahinumdoman ka Nila?
-
Unsa nga mga kasinatian nimo o niadtong imong kaila ang nakatabang nimo nga mas masabtan kon unsa ka hingpit ang pagkaila ug paghinumdom Nila kanimo?
Samtang imong tun-an ang Isaias 49 karon tinguhaa ang mga impresyon gikan sa Espiritu Santo nga nagpamatuod nga dili gayod ka kalimtan sa Langitnong Amahan ug ni Jesukristo.
Dili gyod kalimtan sa Ginoo ang Zion
Pwede nimong ipasabot nga mosulat usahay si Isaias sa paagi nga ang iyang mga pulong pwedeng ipahayag sa lainlaing klase sa mga tawo, apil ang Manluluwas, si Isaias mismo, ang karaang Israel sa pakigsaad, o bisan ang modernong Israel sa pakigsaad. Tungod niining balaknon nga estilo, pwedeng gamiton ang mga sinulat ni Isaias sa halapad sa lainlaing kahimtang ug sirkumstansya. Kana ang rason kon nganong komportable si Nephi sa pagtandi sa mga pulong ni Isaias ngadto sa iyang kaugalingon ug sa iyang katawhan (tan-awa sa 1 Nephi 19:23).
Pwede usab nimong ipasabot sa mga estudyante nga dihang Iyang gitawag si Isaias sa pagsangyaw bahin sa paghinulsol, nahibalo ang Ginoo nga dili maayo ang pagdawat ang mensahe (tan-awa sa Isaias 6:9–10). Pwede nimong pangutan-on ang mga estudyante kon unsay ilang bation bahin sa susamang assignment.
Basaha ang Isaias 49:4–5, nga maghunahuna kon nganong kini ang gibati ni Isaias. Dayon basaha kini nga maghunahuna kon sa unsang paagi nga kini ang gibati sa katawhan sa pakigsaad sa Dios.
-
Bisan pag dihang mag-antos kita, unsay matabang niini nga mga bersikulo kanato nga mahinumdom mahitunogd sa Ginoo?
Basaha ang Isaias 49:13–16, nga pangitaon kon unsay gusto sa Ginoo nga masabtan sa Iyang katawhan sa pakigsaad (Zion).
-
Unsaon nimo ni pag-summarize niining usa ka pamahayag sa kamatuoran?
Mahimong gamiton tingali sa mga estudyante ang kaugalingon nilang mga pulong, pero tabangi sila nga mailhan ang kamatuoran nga gimahal kita sa Ginoo ug dili gyod kita Niya kalimtan o biyaan.
Ingon nga pagpangandam para sa mosunod nga kalihokan sa journal, pwede nimong ipakita ang mga hulagway sa Manluluwas diha sa krus ug ang marka sa mga lansang diha sa Iyang nabanhaw nga mga kamot.
Ikonsiderar ang pagpatukar og mananoy, balaan nga musika aron sa pagdapit sa Espiritu samtang nagsulat ang mga estudyante.
I-cross reference o i-link ang Isaias 49:16 ngadto sa Juan 19:15–19 ug 3 Nephi 11:10–15. Hinay-hinaya og basa kini nga mga tudling, markahi ang mga pulong ug hugpong sa mga pulong nga motabang nimo nga mabati ang gugma sa Langitnong Amahan ug ni Jesukristo alang kanimo. Pangitaa ang mga pagtulun-an nga motabang nimong masabtan kon nganong dili ka Nila kalimtan o biyaan.
Aron tabangan ang mga estudyante nga mahanduraw ang ilang gibasa diha sa Juan 19 ug 3 Nephi 11, pwede nimong ipasalida ang mga bidyo nga “Jesus Is Scourged and Crucified” gikan sa time code 2:31 hangtod 3:11 ug “Jesus Christ Appears at the Temple | 3 Nephi 11:1–17” gikan sa time code 2:23 hangtod 4:57 gikan sa ChurchofJesusChrist.org.
Dili kita Niya kalimtan
Diha sa imong journal sa pagtuon, pagsulat og usa ka parapo nga nagpasabot kon unsay kahulogan para nimo sa giingon sa Manluluwas nga “ako mikulit kaninyo diha sa mga palad sa akong mga kamot” (Isaias 49:16).
Dihang ang mga kamatuoran diha sa kasulatan gitudlo usab sa buhing mga propeta, mas daling makita sa mga estudyante ang kaimportante niini nga mga pagtulun-an diha sa ilang kinabuhi karon. Ang mosunod nga handout maghatag og usa ka paagi aron tabangan ang mga estudyante sa paghimo niini nga mga koneksyon. (Para sa dugang nga pagbansay sa mga imbitasyon nga makatabang sa pagkonektar sa mga estudyante sa mga pulong sa mga propeta, tan-awa sa “Pagtudlo gikan sa mga kasulatan ug sa mga pulong sa mga propeta sa ulahing mga adlaw” diha sa Pagpalambo sa mga Kahanas sa Magtutudlo.)
Ikonsiderar ang paggamit sa handout nga “Ako Dili Malimot Kaninyo” aron tabangan ang mga estudyante nga mas mapalawoman ang ilang pagsabot nga dili gayod sila kalimtan sa Langitnong Amahan ug ni Jesukristo. Pwede nimong ibutang ang pipila o ang tanang pakisayran sa mga kinutlo ug kasulatan gikan sa handout diha sa tibuok lawak klasehan.
Anaa sa Dugang nga mga Kapanguhaan ang uban pang makatabang nga mga kinutlo.
Pwedeng hilom nga molibot sa lawak kalsehan ang mga estudyante, nga basahon ang daghan sa mga kinutlo ug mga tudling sa kasulatan. Pwede nilang dugangan ang parapo nga ilang gisulat sa ilang mga journal.
Ingon nga bahin sa kalihokan, ikonsiderar ang paghangyo sa mga estuaynte nga isulat sa pisara ang usa ka butang nga ilang nakat-onan leksiyon karon. Pwede basahon sa mga estudyante ang gisulat sa uban ug dugangan ang mga panglantaw diha sa ilang sinulat sa journal.
Ipakigbahin ang imong gibati
Dihang mahuman na og tuon sa mga estudyante ang handout, pwedeng ipakigbahin sa mga boluntaryo ang ilang nakita nga makahuloganon gikan sa mga kinutlo, mga kasulatan, ug personal nga mga panabot.
Sa pagtapos sa klase, pwede nimong dapiton ang mga estudyante nga tubagon ang mosunod nga mga pangutana uban ang usa ka pares, o gagmayng mga grupo, o uban sa klase.
-
Unsay imong gilaoman nga imong mahinumdoman gikan sa imong nakat-onan ug nabati karon samtang nagtuon ka sa Isaias 49?
-
Unsa ang usa ka butang nga imong mahimo aron mahinumdoman nga dili gayod ka kalimtan sa Langitnong Amahan ug ni Jesukristo?