Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Isaias 40–43: Hupayon sa Dios ang Iyang Katawhan

“Isaias 40–43: Hupayon sa Dios ang Iyang Katawhan,” Manwal sa Magtutudlo sa Seminary sa Daang Tugon (2026)

“Isaias 40–43: Hupayon sa Dios ang Iyang Katawhan,” Manwal sa Magtutudlo sa Seminary sa Daang Tugon

Isaias 40–49: Leksiyon 119

Isaias 40–43

Hupayon sa Dios ang Iyang Katawhan

Jesus is standing on a hill. You can see the sun in the background

Dili gayod biyaan sa Dios ang Iyang katawhan sa pakigsaad. Pinaagi sa Iyang propeta si Isaias, gihupay sa Dios kadtong dad-on sa Babelonia ingon nga binihag. Ang Dios nagtanyag kanato, Iyang katawhan sa pakigsaad karon, sa samang mga pulong sa paghupay: “Ayaw kahadlok kay mag-uban ako kanimo” (Isaias 41:10). Kini nga leksiyon makatabang sa mga estudyante nga mabati ang paghupay sa Dios.

Pagpangandam sa estudyante: Dapita ang mga estudyante nga basahon o paminawon ang mga pulong sa pipila o tanang bersikulo sa himno nga “Unsa Kalig-on ang Tukuranan” (Mga Himno—alang sa Panimalay ug sa Simbahan). Hangyoa sila sa pag-ila sa makapahupay nga mga pulong o hugpong sa mga pulong ug sulod sa klase nga andam sa pagpakigbahin.

Posibleng mga Kalihokan sa Pagkat-on

Ang kahadlok dili bag-o

Ikonsiderar ang pagsugod sa klase pinaagi sa pagpakita sa mosunod nga pamahayag ug pangutana. Pwedeng dapiton ang mga estudyante nga ilista ang ilang mga tubag diha sa pisara.

Gipakigbahin ni Elder Ronald A. Rasband sa Kurom sa Napulog Duha ka Apostoles ang mosunod nga obserbasyon:

Ang kahadlok dili bag-o. Ang mga tinun-an ni Jesukristo, nga gikan sa Dagat sa Galilea, nahadlok sa “unos, ug ang mga balud” sa kangitngit sa kagabhion (Marcos 4:34). Isip Iyang mga disipulo karon, kita usab adunay mga kahadlok. (“Ayaw Kabalaka,” Liahona, Nob. 2018, 18)

Unsa ang pipila sa gikahadlokan sa mga tawo sa kalibotan, apil sa mga disipulo ni Jesukristo?

Human ilista sa mga estudyante ang lainlaing gikahadlokan, ipakigbahin ang nahibiling bahin sa pamahayag ni Elder Rasband, nga naglakip sa mga nakita niya nga gikahadlokan sa kalibotan karon. Pwede nimong idugang ang pipila niini ngadto sa listahan sa pisara.

Si Elder Rasband mipadayon:

15:41

Ang atong mga single adult mahadlok nga mohimo og mga pasalig sama sa pagminyo. Ang mga bag-ong minyo … mahadlok nga magkaanak ngadto sa nagkadaotan nga kalibotan. Ang mga misyonaryo adunay gikahadlokan nga daghang mga butang, ilabina sa pagduol og dili mga kaila. Ang mga biyuda mahadlok nga magpadayon nga mag-inusara. Ang mga tin-edyer mahadlok nga dili dawaton; ang mga estudyante sa grade school mahadlok sa ilang unang adlaw sa eskuwelahan; ang mga estudyante sa unibersidad mahadlok nga mokuha og pasulit [test]. Mahadlok kita sa kapakyasan, pagsalikway, kasagmuyo, ug sa wala mahibaloi. Mahadlok kita sa mga bagyo, mga linog, ug mga sunog nga moguba sa yuta ug sa atong kinabuhi. Mahadlok kita nga dili mapilian, ug sa laing bahin mahadlok kita nga mapilian. Mahadlok kita nga dili kaayo maayo; mahadlok kita nga dili panalanginan sa Ginoo. Mahadlok kita og kausaban, ug ang atong mga kahadlok modako ngadto sa kalisang. Naapil ba nako ang tanan? (“Ayaw Kabalaka,” Liahona, Nob. 2018, 18)

Unsay epekto sa atong mga gikahadlokan nganhi kanato?

Ikonsiderar ang pagdapit sa mga estudyante sa pagpamalandong kon makasabot ba sila sa bisan hain sa mga gikahadlokan nga gilista o sa paghunahuna sa ilang mga gikahadlokan. Ipakigbahin ang mosunod nga konteksto aron tabangan ang mga estudyante nga makita ang mga kahimtang nga nakapahadlok sa mga Israelita.

Gipanagna ni Isaias ang kalaglagan ug pagkabihag nga mahitabo sa Israel ug Juda. Sugod sa Isaias 40, gidasig sa Dios si Isaias nga magsulat alang sa umaabot nga mga Judeo kinsa magpuyo ingon nga mga binihag.

Unsa ang pipila sa mga gikahadlokan o gikabalak-an nga tingali giatubang sa usa ka tawo nga nabihag?

Basaha ang Isaias 40:1–2, nga pangitaon ang mensahe nga gisugo sa Dios kang Isaias nga ihatag ngadto sa Iyang katawhan sa pakigsaad.

Unsang mga hiyas o mga kinaiya sa Dios ang imong nakat-onan gikan niini nga mga bersikulo?

Ipakigbahin ang imong pagsaksi nga hupayon sa Dios ang Iyang katawhan sa pakigsaad sa atong panahon. Ikonsiderar ang pagpakita sa mosunod nga hulagway. Pwede kining idrowing sa mga estudyante, o ang susama niini, diha sa ilang mga journal sa pagtuon. Dapita sila nga markahan ang ilang mga drowing aron tubagon ang kauban nga mga pangutana.

Kahadlok Paghupay

Sa katibuk-an, hain niini nga sukdanan nimo ibutang ang imong pagbati bahin sa imong kinabuhi karon?
Asa nimo ibutang ang imong pagbati bahin sa umaabot?

Samtang magtuon ka, pangitaa kon unsay gitudlo sa Dios nga makatabang nimo nga mas makasinati sa Iyang paghupay. Kon makabasa o makadungog kag usa ka butang nga sa imong hunahuna maghatag og kahupayan, ang maong mga hunahuna mao tingali ang Espiritu Santo nga nakig-istorya nimo. Ikonsiderar ang pagrekord niini nga mga panglantaw duol sa drowing diha sa imong journal sa pagtuon.

Hupayon sa Dios ang Iyang katawhan

Aron tabangang mahupay ang Iyang katawhan sa pakigsaad, gidasig sa Dios si Isaias sa pagtudlo og daghang butang bahin Kaniya diha sa Isaias 40–43. Aduna kay kahigayonan sa pag-ila sa pipila niini nga mga kamatuoran ug ikonsiderar kon sa unsang paagi kini makatabang nga hupayon ang usa ka tawo nga nahadlok.

Ipakita ang mosunod nga mga instruksiyon ug ipasabot sa mga estudyante nga aduna silay higayon sa pagkompleto niini nga kalihokan sa ulahing bahin sa leksiyon.

Gamit ang usa ka tudling gikan sa Isaias, paghimog mubong mensahe nga makahupay sa usa ka tawo nga nahadlok. Iapil ang kada usa sa mosunod:

Lakang 1. Mga pulong o hugpong sa mga pulong gikan sa tudling nga makatabang sa usa ka tawo nga mobating gihupay sa Dios. Isummarize kini ngadto sa usa ka simpleng pamahayag sa kamatuoran.

Lakang 2. Usa ka kasulatan, himno, o pamahayag gikan sa lider sa Simbahan nga mosuporta sa mga pagtulun-an sa tudling.

Lakang 3. Usa ka personal nga kasinatian o modernong ehemplo nga nagpakita kon sa unsang paagi makapahupay ang pagkahibalo niini bahin sa Dios.

Modelo

Sa dili pa kompletohon sa mga estudyante kini nga kalihokan, ipasabot nga maghatag ka og modelo gamit ang Isaias 41:10–14. Ang mosunod maoy usa ka paagi nga makahatag kag model niini nga mga lakang. Padayong ipakita ang tulo ka lakang ug klaroha pag-ayo ngadto sa mga estudyante kon imong pagpakita sa kada lakang.

Basaha ang Isaias 41:10–14, nga pangitaon ang mga pulong sa Dios sa paghupay ngadto sa Iyang katawhan sa pakigsaad. Timan-i ang ulod sa bersikulo 14 mahimong nagpasabot og maaghop ug mapaubsabon.

Lakang 1

Unsa nga mga pulong o hugpong sa mga pulong ang makapahupay para nimo? Ngano man?
Unsaon nimo kini pag-summarize ngadto sa usa ka simpleng pamahayag sa kamatuoran?

Sa kaugalingong mga pulong sa mga estudyante, mailhan tingali nila ang usa ka butang nga sama sa: Dili kita angayng mahadlok, kay ubanan ug palig-onon sa Dios ang Iyang katawhan sa pakigsaad.

Lakang 2

Sa unsang paagi ang pagkahibalo nga ubanan ug lig-onon kita sa Dios makatabang nato nga dili mahadlok?

Gipakigbahin ni Elder Neil L. Andersen sa Korum sa Napulog Duha ka Apostoles kon sa unsang paagi makatabang ang atong relasyon sa Ginoo aron dili kita mahadlok:

15:3

Bisan sa nagkadaghang kalibotanon nga mga impluwensiya sa atong palibot, kita dili angayng mahadlok. Ang Ginoo dili mosalikway sa Iyang katawhan sa pakigsaad. Adunay makatimbang nga gahom sa pagpadayag ug espirituhanong mga gasa nga ihatag ngadto sa mga matarong. Kining gidugang nga panalangin sa espirituhanong gahom, hinoon, dili ihatag nato tungod lamang kay kita kabahin niini nga henerasyon. Kini moabot samtang kita nagpalig-on sa atong hugot nga pagtuo ni Ginoong Jesukristo ug nagsunod sa Iyang mga sugo, samtang kita makaila Kaniya ug nahigugma Kaniya. (Neil L. Andersen, “Magpaduol ngadto sa Manluluwas,” Liahona, Nob. 2022, 74)

Lakang 3

Kanus-a nimo gibati nga giubanan ug gilig-on ka sa Dios?

Mga mensahe sa paghupay

Hatagi og panahon ang mga estudyante sa pag-andam sa ilang mubong mensahe sa paghupay. Pwede nila kining himoon nga indibidwal o uban sa ilang partner.

Pagpili og usa sa mosunod nga mga hut-ong sa mga bersikulo. Paghimog usa ka mubong mensahe nga makahupay sa tawo nga nahadlok. Sunda ang tulo ka lakang sa paghimo niini.

Isaias 40:9–11

Isaias 40:28–31

Isaias 41:17–20

Isaias 42:5–7

Isaias 43:1–2

Isaias 43:25–26

Dihang andam na ang mga estudyante, dapita sila nga ipakigbahin ang ilang mga mensahe sa paghupay diha sa mga grupo o uban sa klase. Kon ipakigbahin sa mga estudyante ang usa ka himno ingon nga bahin sa ilang mensahe, pwede nimo silang dapiton sa pagpili og usa ka bersikulo nga mosuporta sa ilang gipakigbahin. Kantaha kana nga bersikulo uban sa klase. Pwede nimo kining sublion, depende kon sa nahibiling oras.

Panapos

Hatagi og panahon ang mga estudyante nga pamalandongan ang ilang nakat-onan bahin sa Dios nga makahupay nila. Pahinumdomi sila nga kini nga mga pag-aghat dinasig sa Espiritu Santo, nga nagtudlo ug nagpamatuod sa Langitnong Amahan ug kang Jesukristo. Dapita ang mga estudyante nga irekord ang ilang mga hunahuna diha sa ilang journal sa pagtuon.

Dugang nga mga Kapanguhaan

Sa unsang paagi nakatabang nako ang pagkaanaa sa Dios sa akong kinabuhi sa pagbuntog sa kahadlok?

Si Presidente Russell M. Nelson mitudlo:

14:48

Ako nasayod nga ang kinabuhi nga walay Dios usa ka kinabuhi nga puno sa kahadlok. Ako nasayod usab nga ang kinabuhi nga anaang Dios usa ka kinabuhi nga puno sa kalinaw, hingpit nga kalipay, ug gahom. Paghimo sa desisyon nga magpuyo sa inyong kinabuhi nga anaa ang Dios.

Akong hinigugmang mga kabatan-onan, ang atong Langitnong Amahan ug ang Iyang Pinalanggang Anak, si Jesukristo, andam nga mopanalangin kaninyo. Siya dili mosalikway kaninyo. (“Worldwide Day of Testimony: I Can Do All Things Through Christ,” Okt. 22, 2023)

Bisag og ang Ginoo misaad nga maanaa kanako, unsa kaha kon mobati ko nga nag-inusara?

Si Presidente Dieter F. Uchtdorf, kanhi sa Unang Kapangulohan, mipakigbahin sa mosunod:

Wala kamo mag-inusara niini nga biyahe. Ang inyong Langitnong Amahan nakaila kaninyo. Bisan kon walay nakabati kaninyo, Siya nakabati kaninyo. Kon nagmaya kamo sa pagkamatarung, Siya nagmaya uban kaninyo. Kon nabug-atan kamo sa pagsulay, Siya nagsubo uban kaninyo.

… Mosaad ko kaninyo, wala mo mag-inusara. (“Ang Inyong Talagsaong Biyahe sa Pagpauli,” Liahona, Mayo 2013, 128)

Isaias 41:10, 13. Unsa ang importansiya sa tuong kamot?

Sa pagtumong sa hugpong sa mga pulong nga “Ako … mokupot sa imong kamot nga tuo” (Isaias 41:13), ang usa ka iskolar sa Santos sa Ulahing mga Adlaw mipakigbahin sa mosunod nga panabot:

Ang kamot nga tuo mao ang kamot sa pakigsaad. Kini nga hugpong sa mga pulong nagpahinumdom nato sa pakigsaad nga relasyon nga naa kita uban sa Ginoo, ingon nga iyang “alagad” ug “pinili” (tan-awa sa Isaias 41:8–9). Nagsugyot kini nga gunitan sa Ginoo ang atong kamot, nagpasabot nga tabangan kita Niya kon atong tumanon ang atong mga pakigsaad uban ang pagkamatarong. Nagsugyot usab kini nga gunitan sa Ginoo ang atong kamot ingon nga ekspresyon sa paghupay ug suporta (tan-awa sa Isaias 42:6). (Donald W. Parry, Pagsabot sa Isaias [1998], 353–354)

Dugang nga mga Kalihokan sa Pagkat-on

Ang kabantogan sa Dios

Sa dili pa magtuon sa Isaias 41:10, 13, hatagi og panahon ang mga estudyante nga masabtan kon unsay gitudlo ni Isaias bahin sa kabantogan sa Dios.

Usa ka paagi sa pagbuhat niini mao ang pagdala og timbangan ug lainlaing butang sa klase. Dapita ang mga estudyante nga tagnaon kon unsa ka bug-at ang matag butang ug dayon timbanga kini. Dayon dapita ang mga estudyante nga basahon ang Isaias 40:12, nga pangitaon kon unsay gisulti sa Dios nga Siya lamang ang makasukod o makatimbang.

O pwede kang magdalag dakong balde sa klase ug dapiton ang mga estudyante nga basahon ang Isaias 40:15, nga pangitaon kon giunsa paggamit sa Dios ang usa ka balde aron ihulagway ang Iyang kabantogan.

Sa unsang paagi ang pagsulay sa pagsabot sa kabantogan sa Dios makahupay niadtong nabihag sa Babelonia?
Sa unsang paagi kini nga kahibalo mohupay nato sa atong mga pagsulay karon?

Samtang imong tun-an ang Isaias 40–43, padayon pagpangita sa ebidensiya sa kabantogan sa Dios ug kon sa unsang paagi kini nga kahibalo makahupay nimo.

Isaias 41:10. Mga cross-reference bahin sa pagbuntog sa kahadlok

Aron tabangan ang mga estudyante nga masabtan ang pagdapit sa Dios nga “Ayaw kahadlok,” dapita sila sa pag-link o pag-cross reference sa Doktrina ug mga Pakigsaad 6:36–37 o 68:5–6 ngadto sa Isaias 41:10. O dasiga sila sa pagpangita og laing makahuluganon nga mga kasulatan pinaagi sa pagpangita sa hugpong sa mga pulong nga “ayaw kahadlok” diha sa Librarya sa Ebanghelyo.

Dapita ang mga estudyante sa pagpakigbahin ngadto sa ilang partner kon sa unsang paagi ang tudling o mga tudling nga ilang gi-link motabang nila nga mas masabtan ng pagdapit sa Dios nga “ayaw kahadlok.”

Pagkinabuhi uban ang hugot nga pagtuo

Aron suportahan ang mga kamatuoran bahin sa Ginoo nga gipakigbahin tingali sa mga estudyante, ug nganong kita makabaton og hugot nga pagtuo diha Kaniya, ikonsiderar ang pagtan-aw sa “Live by Faith, Not by Fear,” (1:09) nga anaa sa Librarya sa Ebanghelyo. Dapita ang mga estudyante sa pagrekord sa mga butang nga ilang nakat-onan diha sa ilang journal sa pagtuon.

1:9

Usa ka kahayag ngadto sa mga Hentil

Kon mopakigbahin ang mga estudyante og mensahe sa paghupay gikan sa Isaias 42:5–7, paggahin og panahon sa pagtabang sa klase nga masabtan ang atong responsibilidad nga ipakigbahin ang mensahe sa Dios ngadto sa uban. Pwede nimong ipasabot nga ang pulong Hentil duha ang kahulogan. Usahay nagtumong kini sa mga tawo nga dili Israelita og kagikan. Usahay nagtumong kini sa mga tawo nga wala ang ebanghelyo ni Jesukristo sa ilang kinabuhi (tan-awa ang Giya ngadto sa mga Kasulatan, “Hentil”).

Unsay atong mabuhat aron mahimo kitang kahayag niadtong anaa sa espirituwal nga kangitngit?
Sa unsang paagi nga kini nga mga bersikulo adunay kalabutan sa buhat nga atong gihimo sa mga templo?
Sa unsang paagi kini naay kalabutan sa misyonaryo nga buhat?

Si Presidente Russell M. Nelson mipasabot:

Minahal nga batan-ong mga higala, ang matag usa kaninyo importante ngadto sa Ginoo. Siya migahin kaninyo hangtod niining higayona aron sa pagtabang sa pagpundok sa Israel. Ang inyong desisyon sa pagserbisyo og misyon, pangsangyaw man o pangserbisyo nga misyon, makapanalangin kaninyo ug sa daghan pang uban. …

Ang tanang misyonaryo nagtudlo ug nagpamatuod sa Manluluwas. Ang espirituhanon nga kangitngit sa kalibotan nakapahimo sa kahayag ni Jesukristo nga wala pa sukad mas gikinahanglan kaysa karon. Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. (“Pagsangyaw sa Ebanghelyo sa Kalinaw,” Liahona, Mayo. 2022, 7)