“Isaias 44–47: ‘Gawas Kanako Wala Nay Laing Dios,’” Manwal sa Magtutudlo sa Seminary sa Daang Tugon (2026)
“Isaias 44–47: ‘Gawas Kanako Wala Nay Laing Dios,’” Manwal sa Magtutudlo sa Seminary sa Daang Tugon
Isaias 40–49: Leksiyon 120
Isaias 44–47
“Gawas Kanako Wala Nay Laing Dios”
Kada adlaw, nag-atubang kita og mga impluwensiya nga naghagit sa atong debosyon sa Langitnong Amahan ug ni Jesukristo. Kay nag-atubang og susamang mga tentasyon, ang pipila ka Israelita sa panahon ni Isaias ang misugod sa pagsimba sa ubang tinubdan. Agi og tubag, mahigugmaon pero klarong gipasidan-an sa Ginoo ang mga Israelita batok sa pagsimba og bakak nga mga dios. Kini nga leksiyon makatabang sa mga estudyante nga unahon ang Langitnong Amahan ug si Jesukristo kay kang bisan kinsa o sa bisan unsa diha sa ilang kinabuhi.
Pagpangandam sa estudyante: Dapita ang mga estudyante nga pamalandong ang ilang nakat-onan sa tibuok nilang pagtuon sa Daang Tugon. Dayon, dapita sila sa pagpamalandong, “Sa unsang paagi ang akong nakat-onan bahin sa Langitnong Amahan ug kang Jesukristo mopalambo sa akong tinguha nga unahon Sila sa akong kinabuhi?”
Posibleng mga Kalihokan sa Pagkat-on
Pagsimba og bayani
Ikonsiderar ang pagsugod sa klase sa pagpangutana sa mosunod nga pangutana.
-
Kon mag-survey ka sa mga tin-edyer sa atong dapit sa kon kinsay ilang bayani, kinsa kahay ilang iapil?
Dayon dapita ang mga estudyante nga himoon ang mosunod diha sa ilang journal sa pagtuon.
Paghimo og lista sa personal nimong bayani. Pagbutang og bitoon tupad niadtong naay labing dakong impluwensiya sa imong kinabuhi.
Si Bishop W. Christopher Waddell sa Presiding Bishopric mipakigbahin sa mosunod nga tambag bahin sa atong mga idolo.
Sa dihang gamay pa ko ang akong unang mga bayani mao ang mga atleta. Ang akong labing unang mga handomanan mao ang pagkolekta og mga kard sa baseball nga adunay mga litrato ug mga estatistika sa mga magdudula sa Major League Baseball. Ang “pagsimba og bayani” isip usa ka bata makalingaw ug inosente, sama sa mga bata nga magsinina sa ilang paborito nga mga superhero alang sa Kalag-kalag. Bisan og kita nagdayeg ug nagtahod sa daghang lalaki ug babaye nga adunay talento ug talagsaon sa ilang mga abilidad ug mga kontribusyon, ang gidak-on sa pagtahod kanila kon pasobrahan, mahimong susama sa mga anak ni Israel nga nagsimba og bulawan nga baka didto sa desiyerto sa Sinai. …
Ang bayani—atong bayani, karon ug sa kanunay—mao si Jesukristo, ug ang bisan unsa, o bisan kinsa, nga makasamok nato gikan sa Iyang mga pagtulon-an, nga makita diha sa mga kasulatan ug pinaagi sa mga pulong sa buhi nga mga propeta, negatibong makaapekto sa atong kauswagan diha sa dalan sa pakigsaad. (“Labaw Pa sa usa ka Bayani,” Liahona, Nob. 2023, 90)
-
Unsang bahina sa mensahe ni Bishop Waddell ang mipatigbabaw nimo?
Aron tabangan ang mga estudyante nga susihon kon asang bahina sa ilang kinabuhi ang Langitnong Amahan ug si Jesukristo, pwede nimo silang dapiton nga tan-awon pag-usab ang ilang listahan sa mga bayani samtang hilom nilang pamalandongon ang mosunod nga mga pangutana.
-
Naa bay bisan kinsa sa imong mga bayani nga nakabalda sa imong pagsimba sa Langitnong Amahan ug kang Jesukristo?
-
Naa bay mga interes, kalihokan, o butang nga posibleng makabalda sa imong pagsimba Kanila?
Samtang mangandam ang mga estudyante sa pagtuon sa mga pagtulun-an ni Isaias karon, dapita sila sa pagpaminaw sa mga impresyon gikan sa Espiritu Santo bahin sa mga paagi aron ilang mauna sa ilang kinabuhi ang Langitnong Amahan ug si Jesukristo.
Wala nay lain nga Dios
Ipasabot nga ang mga anak sa Israel sa panahon ni Isaias naglisod sa pag-una sa Ginoo diha sa ilang kinabuhi. Hinuon, midangop sila sa bakak nga dios sama sa mga dios-dios alang sa tabang.
Ikonsiderar ang pagdapit sa managpares o gagmayng mga grupo sa pagbasa sa mosunod nga mga bersikulo ug sa paghimog usa ka kapahayag nga summary sa ilang nakat-onan.
Basaha ang Isaias 44:6, 8 ug 46:9, nga pangitaon kon unsay gusto sa Ginoo nga masabtan sa mga anak sa Israel bahin sa pagptutok sa ilang pagsimba.
Dapita ang pipila ka estudyante nga ipakigbahin ang summary sa nakat-onan sa ilang grupo. Kon dili nila ipakigbahin nga silasila ra, tabangi ang mga estudyante nga mailhan ang usa ka kamatuoran nga parehas sa mosunod: Walay usa ka tawo o butang ang ikatandi kang Jesukristo.
Isip bahin sa inyong panaghisgot, pwede nimong ipasabot nga ang Isaias 44:6 naglakip pipila ka titulo ni Jesukristo. Pwede nimong dapiton ang mga estudyante nga ipakigbahin ang gitudlo niini nga mga titulo bahin kang Jesukristo.
Sa Isaias 44–46, gihulagway sa Ginoo nga ang mga Israelita nagsimba sa bakak nga mga dios. Iyang gipahinumdoman ang katawhan nga sila naghimo, nagsimba, ug nag-ampo sa mga dios-dios nga hinimo sa mao ra nga kahoy nga ilang gigamit nga pangsugnod. Ug dihang nabihag ang mga Israelita, naglisod ang ilang mga hayop sa pagguyod sa mga kariton nga gikargahan sa ilang hinimo sa tawo nga mga dios-dios.
Basaha ang Isaias 44:14–19 ug Isaias 46:1–2, nga pangitaon ang paghulagway sa Ginoo sa karaang mga dios-dios nga sa atong panahon pwedeng magamit sa mga butang nga makabalda sa mga tawo gikan sa Ginoo. (Makatabang tingali ang pagkahibalo nga duha sa mga dios-dios nga ilang gisimba gitawag og Bel ug Nebo.)
-
Unsay imong nakaplagan?
Pwede nimong isulat ang hugpong sa mga pulong nga “mohapa pa ba ako sa atubangan sa punoan sa usa ka kahoy? ” (Isaias 44:19) diha sa pisara. Hangyoa ang mga estudyante nga ipakigbahin ang kahulogan niini nga pangutana sa kaugalingon nilang mga pulong.
Dayon, papasa ang hugpong sa mga pulong nga “sa punoan sa usa ka kahoy”, ug magpabilin na lang ang “Mohapa pa ba ako sa atubangan sa ?”
Dapita ang mga estudyante sa pag-adto sa pisara ug kompletohon ang kapahayag sa mga paagi nga magamit sa mga tawo sa atong panahon.
-
Unsa kapeligro ang pag-una niini nga mga tawo o butang kay sa Langitnong Amahan ug kang Jesukristo?
-
Nganong lisod tingali ang kanunayng pag-una sa Langitnong Amahan ug kang Jesukristo sa atong kinabuhi?
Pag-una kang Jesukristo
Aron matabangan ang mga estudyante sa pag-una sa Manluluwas diha sa ilang kinabuhi, pwede kang magpakita og hulagway ni Jesukristo, sama sa anaa sa sinugdanan sa leksiyon, diha sa tunga sa pisara. Samtang himoon sa mga estudyante ang mosunod nga kalihokan, pwede nilang isulat ang mga hiyas nga ilang makaplagan diha sa palibot sa hulagway.
Tun-i ang dili moubos sa duha sa mosunod nga mga tudling. Samtang hinayon ug klarohon nimo og basa ang mga bersikulo, pangitaa kon unsay atong makat-onan bahin kang Jesukristo nga mohatag nato og pagsalig nga unahon Siya sa atong kinabuhi.
-
Isaias 44:1–4
-
Isaias 44:21–23
-
Isaias 44:24–25
-
Isaias 45:20–22
-
Isaias 46:3–5
Pwede nimong hangyoon ang mga estudyante nga magdugang og uban pang mga hiyas diha sa pisara nga ilang nahibaloan bahin ni Jesukristo gikan sa ilang mga kasinatian o gikan sa uban pang kasulatan.
Aron matabangan ang mga estudyante nga ipakigbahin ang ilang mga hunahuna bahin sa dili hitupngan nga gahom ni Jesukristo, pwede nimong ipangutana ang musunod.
-
Sa unsang paagi ang pagsabot niini nga mga kamatuoran bahin kang Jesukristo motabang sa usa ka tawo nga naglisod sa pag-una Kaniya sa iyang kinabuhi?
-
Unsay imong mga kasinatian nga nakatabang nimo sa pag-una sa Langitnong Amahan ug kang Jesukristo diha sa imong kinabuhi?
Pagplano nga unahon ang Langitnong Amahan ug si Jesukristo
Aron tabangan ang mga estudyante nga planohon pag-ayo nga unahon sa ilang kinabuhi ang Langitnong Amahan ug si Jesukristo, pwede nimong gamiton ang handout nga nag-ulohang “Paghimo og plano.” Dasiga sila nga paminawon ang impresyon gikan sa Espiritu Santo samtang tinoon nila kon unsay ilang himoon aron makab-ot ang ilang tumong.