Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĪsaia 5: “ʻE Malaʻia ʻa Kinautolu ʻOku Ui ʻa e Koví Ko e Lelei, mo e Leleí Ko e Kovi”

“ʻĪsaia 5: ‘ʻE Malaʻia ʻa Kinautolu ʻOku Ui ʻa e Koví ko e Lelei, mo e Leleí ko e Kovi,’” Fuakava Motuʻá – Tohi Lēsoni ʻa e Faiako Seminelí (2026)

“ʻĪsaia 5: ‘ʻE Malaʻia ʻa Kinautolu ʻOku Ui ʻa e Koví ko e Lelei, mo e Leleí ko e Kovi,’” Fuakava Motuʻá – Tohi Lēsoni ʻa e Faiako Seminelí

ʻĪsaia 1–12: Lēsoni 115

ʻĪsaia 5

“ʻE Malaʻia ʻa Kinautolu ʻOku Ui ʻa e Koví ko e Lelei, mo e Leleí ko e Kovi”

Naʻe fakatokanga ʻa e ʻEikí ki ʻIsileli ʻo fakafou ʻi he palōfita ko ʻĪsaiá fekauʻaki mo ʻenau ngaahi fili angahalá, kau ai hono ui ʻa e “koví ko e lelei, mo e leleí ko e kovi” (ʻĪsaia 5:20). ʻI he ʻahó ni, ʻoku lahi ha ngaahi fakakaukau mo ha ngaahi tōʻonga fakaʻauha ʻoku ngali lelei. ʻE lava ke fakatupulaki ʻe he lēsoni ko ʻení ʻa e malava ʻa e kau akó ke fakafaikehekeheʻi ʻa e leleí mei he koví.

Teuteu ʻa e tokotaha akó: Fakaafeʻi e kau akó ke nau omi mateuteu ki he kalasí ke vahevahe ha sīpinga ʻo ha meʻa naʻe pehē ʻoku ʻikai fakatuʻutāmaki, pe naʻa mo lelei, ʻa ia naʻe faifai pea mahino ʻoku fakatuʻutāmaki.

Ngaahi ʻEkitivitī Ako ʻOku Ala Fakahokó

Ngaahi fakakaukau mo ha ngaahi ngāue fakatuʻutāmaki fakalaumālie

Fakakaukau ke kamata e kalasí ʻaki hano fakaʻaliʻali ha fakatātā ʻo ha sita (cheetah) kuo fakapuli, ʻo hangē ko ia ʻi he kamataʻanga ʻo e lēsoni ko ʻení. Hili iá, te ke lava ʻo fai ʻa e fehuʻi ko ʻení pea fakaʻaliʻali ʻa e lea ʻa ʻEletā Tēvita A. Petinaá.

Ko e hā ʻokú ne ʻai ke fakatuʻutāmaki ʻa e sitá ki he monumanu ʻokú ne tulí?

Naʻe fakafehoanaki ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fanga sitá ki he ngaahi fakakaukau mo e ngāue ʻoku fakatuʻutāmakí.

15:59

Kiate au, ko e fanga sitá ko ha fanga monumanu hamolemole, matamatalelei mo fakaholomamata. ʻOku hoko e lanu pulepule ʻuliʻuli kelokelo meimei kulei ʻo e sitá ko ha fakapuli fakaʻofoʻofa ʻokú ne meimei fakapuliki kinautolu ʻi heʻenau lamasi ha fanga manu ke keina ʻi he potu musie tokalelei ʻo ʻAfiliká.

ʻI ha founga tatau, ʻe lava ʻa e ngaahi fakakaukau mo e angafai fakatuʻutāmaki fakalaumālié ʻo hā ngali matamatalelei, fakalata, pe fakafiefia. Ko ia ai, ʻi hotau māmani fakaonopōní, ʻoku fiemaʻu ke tau takitaha tokanga telia ʻa e fakatauele ʻa e koví ke hā ngali matamataleleí. (“Tokanga ke Lotu Maʻu Ai Pē,” Liahona, Nōvema 2019, 33)

Ko e hā ha ngaahi sīpinga ʻo e “ngaahi fakakaukau mo e angafai fakatuʻutāmaki fakalaumālie” ʻe lava ke “hā ngali matamatalelei, fakalata, pe fakafiefiá”?

ʻE ala ʻaonga ke hiki e ngaahi tali ʻa e kau akó ʻi he palakipoé. Mahalo ʻe lea ʻaki ʻe he kau akó ha ngaahi meʻa hangē ko e, “Ko e sino pē ia ʻoʻoku. Te u faʻiteliha pē au ki ai” pe “ʻOku sai pē ia koloa pē ke ʻoua naʻa maʻu kita.” Te mou vakai ki he ngaahi fakakaukau ko ʻeni ʻi he palakipoé ʻamui ange ʻi he lēsoní.
Ko e hā ʻoku mahuʻinga ai ke ke fakatokangaʻi hono fakangalingali ʻo e koví ko ha lelei?

ʻE lava ke tokoni ʻa e fakamatala mo e fakaafe ko ʻení ke kamata vakai ʻa e kau akó ki he founga ʻoku mahuʻinga ai ʻa e meʻa te nau ako ʻi he lēsoni ko ʻení ʻi heʻenau moʻuí.

ʻE lava pē ke faingataʻa ke ʻiloʻi ʻa e ngaahi fakakaukau mo e tōʻonga kākā ko ʻení, tautautefito ki he taimi ʻe tākiekina ai kitautolu ʻe he ngaahi meʻá ni. ʻOku tau takitaha fakakaukau pe ngāue ʻi ha ngaahi founga ʻoku ʻikai fenāpasi kakato mo e ngaahi akonaki ʻa Sīsū Kalaisí (vakai, Loma 3:23). ʻE tokoniʻi kitautolu ʻe he Tamai Hēvaní mo Sīsū Kalaisi ke tau ʻiloʻi ʻeni ʻiate kitautolu pē ʻi heʻetau fekumi ki Heʻena tokoní ʻo fakafou ʻi he Laumālie Māʻoniʻoní. ʻI hoʻo ako he ʻaho ní, tokanga ʻaupito ki he founga ʻe ala tokoniʻi ai koe ʻe he Laumālie Māʻoniʻoní ke ke ʻiloʻi ʻa e moʻoní mei he meʻa ʻoku halá.

Ngaahi kākā fakapulí

Fakanounouʻi e palakalafi ko ʻení ke fakafeʻiloaki e kau akó ki he pōpoaki fakalūkufua ʻo e ʻĪsaia 5.

ʻI he ʻĪsaia 5, naʻe akoʻi ai ʻe he ʻEikí ki he kakai ʻIsilelí fekauʻaki mo ʻEne ʻofa kiate kinautolú pea mo e nunuʻa ʻo ʻenau ngaahi fili faiangahalá ʻi he talanoa fakatātā ʻo ha ngoue vainé. Neongo naʻe feinga ʻa e ʻEikí ke tokoniʻi kinautolu ke nau tupulaki, ka naʻe tataki e kakai ʻIsilelí ʻe heʻenau ngaahi fili angahalaʻiá ke nau hoko ko ha “kālepi vao” (vakai, ʻĪsaia 5:2), ko ha fakataipe ʻo ʻenau faihalá mo e ʻulungaanga koví. Koeʻuhí naʻa nau fili ke “liʻaki” pea fehiʻa ki he ʻEikí mo ʻEne ngaahi akonakí (vakai, ʻĪsaia 5:24), ʻe tuku kinautolu taʻe kau ai e tokoni ʻa e ʻEikí.

Te ke lava ʻo fakaafeʻi e kau akó ke nau vakai ki he ʻĪsaia 5:8–23 pea lau e tuʻo lahi hono fakaʻaongaʻi ʻe he ʻEikí ʻa e foʻi lea “malaʻiá” (tuʻo ono). Fakamatalaʻi ange ʻoku ʻuhinga ʻa e “malaʻiá” ki he mamahi pe faingataʻaʻia lahi. Naʻe feinga ʻa e ʻEikí ke akoʻi ki he kakai ʻIsilelí naʻe hanga ʻe heʻenau ngaahi fili faiangahalá ʻo fakatafoki kinautolu meiate Ia pea iku ai ki he mamahí mo e faingataʻaʻiá.

Neongo ʻoku lahi ha ngaahi moʻoni ʻe lava ke nofotaha ki ai ʻa e lēsoni ko ʻení, ka ʻe nofotaha ʻa e toenga ʻo e lēsoni ko ʻení ʻi he potufolofola fakataukei fakatokāteliné ko e ʻĪsaia 5:20.

Ko e ʻĪsaia 5:20 ko ha potufolofola fakataukei fakatokāteline ia. Fakakaukau ke fakaafeʻi e kau akó ke fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e ʻĪsaia 5:20, ʻo kumi e meʻa ʻokú ne ʻomi e malaʻiá, pe mamahí mo e faingataʻaʻiá.

Ko e hā e meʻa naʻá ke maʻú?

Tokoni ke ʻiloʻi ʻe he kau akó ha foʻi moʻoni, hangē ko e Kapau te tau ui ʻa e koví ko e lelei mo e leleí ko e kovi, ʻe faifai pē pea tau aʻusia ʻa e mamahí mo e faingataʻaʻiá. Te ke lava ʻo fakaafeʻi e kau akó ke nau fakakaukau ke fakaʻilongaʻi e ngaahi lea tauhoa ʻe tolu ʻi he vēsí, kovi mo e lelei, poʻuli mo e maama, kona mo e melie. Fakamatalaʻi ange naʻe faʻa ʻomi ʻe ʻĪsaia ha ngaahi sīpinga lahi ke tokoni ke ʻomi ha mahino lahi ange ki heʻene ngaahi akonakí.

ʻOku iku fēfē ʻa hono ui ʻo e koví ko e leleí mo e leleí ko e koví ki he mamahí mo e faingataʻaʻiá?

ʻE lava ke tokoni ki he kau akó hono ʻiloʻi e faingataʻa ʻi hono ʻilo e ngaahi kākā ko ʻení ke nau ongoʻi ʻoku mahino, ʻiloʻi e ngaahi fakafeʻātungiá, mo ʻiloʻi ʻenau fiemaʻu ʻa e ʻOtuá.

Vakai ki he lisi “ngaahi fakakaukau mo e ngaahi ngāue fakatuʻutāmaki fakalaumālié” pea ʻeke ʻa e fehuʻi ko ʻení.

Ko e hā te ne lava ʻo ʻai ke faingataʻa hono ʻiloʻi e ngaahi fakakaukau mo e ngaahi ngāue fakatuʻutāmaki fakalaumālie ko ʻení?

Fakakaukau angé pe ʻoku ʻi ai ha ngaahi fakakaukau pe tōʻonga fakatuʻutāmaki fakalaumālie te ke ala pehē ʻoku matamatalelei, fiemaʻua, pe fakafiemālie.

Ko Sīsū Kalaisi ʻa e moʻoní

Hili hono ʻiloʻi e ngaahi faingataʻá, tokoni ke ʻilo ʻe he kau akó ko Sīsū Kalaisi ʻa e solovaʻangá.

Lau ʻa e Sione 14:6, ʻo kumi e meʻa naʻe folofola ʻaki ʻe Sīsū fekauʻaki mo Iá.

ʻOkú ke pehē ko e ʻuhinga ki he hā ʻa Sīsū ʻi Heʻene folofola ko Ia ʻa e moʻoní?
Ko e hā kuo foaki mai ʻe he Tamai Hēvaní mo Sīsū Kalaisi ke tokoniʻi kitautolu ke tau ʻiloʻi ʻa e ngaahi fakakaukau mo e ngaahi ngāue kākā naʻa tau hiki kimuʻá?

Neongo ʻoku ʻikai ko ha lisi kakato ʻeni, ka ʻe lava ke vahevahe ʻe he kau akó ha ngaahi meʻa hangē ko ʻení:

Ko e Laumālié (vakai, Tokāteline mo e Ngaahi Fuakava 11:12–13)
Ko e Maama ʻo Kalaisí (vakai, Molonai 7:16–19)
Kau Palōfitá (vakai, Tokāteline mo e Ngaahi Fuakava 21:1, 4–6)
Ngaahi Folofolá (vakai, 2 Tīmote 3:15–17)

Kapau ʻokú ke ʻiloʻi ha fiemaʻu ʻi hoʻo kau akó, te ke lava ʻo lau mo aleaʻi ha niʻihi ʻo e ngaahi potufolofola ʻoku ʻomaí.

ʻOku ʻomi ʻe he ʻekitivitī hokó ki he kau akó ha faingamālie ke ako e ngaahi akonaki ʻa e Fakamoʻuí ke tokoni ke nau ʻiloʻi ʻEne moʻoní. ʻAi ke vakai e kau akó ki he lisi ʻo e ngaahi fakakaukau mo e ngaahi ngāue fakatuʻutāmaki fakalaumālie ʻi he palakipoé. Fakaʻaliʻali e ngaahi fakahinohino ko ʻení.

Ke tokoni ke tau ʻiloʻi ʻa e moʻoní mei he meʻa ʻoku halá, te tau lava ʻo tafoki ki he ngaahi akonaki ʻa Sīsū Kalaisi mo ʻEne kau palōfitá. Ko e feituʻu ʻe taha te tau lava ʻo “maʻu … ʻa e ngaahi akonaki ʻa Sīsū Kalaisi mo ʻEne kau palōfitá” ʻoku maʻu ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (“Fakahoko ha ngaahi fili ʻoku ueʻi fakalangí,” Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022]).

Fili ha foʻi fakakaukau pe ngāue ʻe taha ʻoku kovi kae fakangalingali ʻoku lelei pe lelei kae fakangalingali ʻoku kovi. Ako ʻa e tohi fakahinohino Ki Hono Fakamālohia ʻo e Toʻu Tupú, ʻo kumi e ngaahi akonaki ʻa Sīsū Kalaisi mo ʻEne kau palōfitá ʻa ia ʻe lava ʻo tokoni atu ke ke fili ke muimui kia Sīsū Kalaisi kae ʻikai ko e ngaahi pōpoaki kākā ʻa e tēvoló. Hiki ʻa e founga ʻoku fakatonutonu ai ʻe he ngaahi akonaki ʻa e Fakamoʻuí ʻa e ngaahi fakakaukau halá.

Fakaafeʻi e kau akó ke vahevahe mai e meʻa naʻa nau maʻú. Ke fai iá, ʻe lava ke fili ʻe ha tokotaha ako ha fakakaukau pe ngāue mei he palakipoé. Kole ki he kalasí ke nau fakamatalaʻi e founga ʻoku fakahaaʻi ai ʻe ha meʻa ne nau ako ʻa e fakakaukau pe ngāue ko iá ʻoku fakatupu ʻauha fakalaumālie. Hangē ko ʻení, kapau ʻe fili ʻe ha tokotaha ako ʻa e “ʻOku sai pē ia, koloa pē ke ʻoua naʻa maʻu kita,” ʻe lava ke fili ʻe he kau akó ha meʻa ne nau ako ʻi he konga “ʻE fakatauʻatāinaʻi koe ʻe he moʻoní” ʻi he tohi fakahinohino Ki Hono Fakamālohia ʻo e Toʻu Tupú, hangē ko e palakalafi ʻoku kamata ʻaki ʻa e “ʻOku ʻuhinga ʻa e moʻui angatonú ke ke ʻofa ʻi he moʻoní ʻaki ho lotó kotoa” pe “ʻOfa lahi ʻi he moʻoní.”

Fakakaukau ki he akó

ʻOange ha faingamālie ki he kau akó ke fakakaukau ki he meʻa kuo nau akó ʻaki hano fakaʻaliʻali ha fehuʻi hangē ko ʻení.

Hiki ha tali ki he fehuʻi ko ʻení ʻi hoʻo tohinoa akó:

Ko e hā kuó ke ako he ʻahó ni ʻe lava ʻo tokoni atu ke ke ʻiloʻi ʻa e moʻoní pea muimui lelei ange kia Sīsū Kalaisí?

Te ke lava ʻo fakaafeʻi e kau akó ke vahevahe ʻenau ngaahi ongó mo e fakamoʻoní ʻaki hono vahevahe e meʻa ne nau tohí. Fakakaukau ke fakamoʻoni kia Sīsū Kalaisi mo Hono huafa ko e Moʻoní.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea fakafolofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻinga ki he ʻĪsaia 5:20 ko e “Malaʻia ʻa kinautolu ʻoku ui ʻa e koví ko e leleí, mo e leleí ko e kovi.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Ko e hā ʻe lava ʻo tokoni ke u ʻiloʻi ʻa e leleí mei he koví?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

ʻI he taimi ʻoku tau kamata ʻaki hono fakafuofuaʻi ʻo e ngaahi ngāue ʻo onopōní mo e ngaahi fokotuʻu ʻoku fehangahangai mo e meʻa ʻoku tau ʻilo kau ki he palani ʻa e ʻOtuá mo e ngaahi akonaki ʻa ʻEne kau palōfita moʻuí, … ʻoku tau ʻilo ʻokú ne fokotuʻu kitautolu ʻi ha tuʻunga malu taʻengata. (“As He Thinketh in His Heart,” [efiafi mo ʻEletā Dallin H. Oaks, Feb. 8, 2013], 5)

Vakai ki he palakalafi 11 mo e 12 ʻo e “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023).

Vakai, “Fakatefito Hoʻo Moʻuí ʻia Sīsū Kalaisi” pe “Fekumi ki he Ngaahi Maʻuʻanga Tokoni Falalaʻangá,” ʻoku maʻu ʻi he ngaahi fakamatala Ko Hono Kumi ha Ngaahi Tali ki Hoʻo Ngaahi Fehuʻí ʻi he konga Ngaahi Tefitó mo e Ngaahi Fehuʻi ʻo e Gospel Library.

ʻOku kehekehe fēfē ʻa e ngaahi pōpoaki ʻa e Tamai Hēvaní mo e filí?

Naʻe akonaki ʻa Palesiteni Lāsolo M. Nalesoni ʻo pehē:

24:24

ʻOku poto ʻa e filí. Kuo afeʻi taʻu ʻene ʻai e leleí ke ʻasi kovi mo e koví ke ʻasi lelei. Ko ʻene ngaahi pōpoakí ʻoku leʻolahi, taʻe-ufi, mo pōlepole.

Ka neongo ia, ko e ngaahi pōpoaki mei heʻetau Tamai Hēvaní ʻoku kehe ʻaupito. ʻOkú Ne folofola [lelei mai], leʻosiʻi, mo mātuʻaki mahino he ʻikai toe lava ke taʻe-mahino Ia kiate kitautolu. (“Fanongo kiate Ia,” Liahona, Mē 2020, 89)

Ngaahi ʻEkitivitī Fakalahi ki he Akó

Ngaahi vitiō lahi ange ke fili mei ai

Mahalo ʻe ʻaonga ki he kau akó ʻenau fanongo ki hono fakamatalaʻi ʻe ʻEletā Petinā ʻa e meʻa naʻá ne fakatokangaʻi mo hono uaifí lolotonga haʻana ʻaʻahi ki ʻAfilika fekauʻaki mo e sīpinga tuli manu ʻa e fanga sitá. Te ke lava ʻo sio ʻi ha konga lōloa ange ʻo ʻene lea, “Tokanga ke Lotu Maʻu Ai Pē,” mei he taimi 2:13 ki he 6:07, ʻa ia ʻoku kau ai ʻene aʻusiá.

15:59

“Poʻulí ko e maama … kona ko e melie” (ʻĪsaia 5:20)

Koeʻuhí ʻoku ʻi ai ha kau ako ʻe niʻihi mahalo he ʻikai ke nau lava ʻo tala ha ngāue pe fakakaukau ʻoku lelei pe kovi, mahalo te ke fie fakaʻaongaʻi ha taimi ke talanoa ai hili hono ʻiloʻi e moʻoni mataʻāʻā fekauʻaki mo e ngaahi sīpinga kehe naʻe ʻomi ʻe ʻĪsaiá: ʻa e poʻulí mo e māmá, koná mo e melié.

Ko e hā mo ha toe ngaahi sīpinga kehe ʻo e ngaahi ngāue mo e ngaahi fakakaukau fakatuʻutāmaki fakalaumālié ʻe lava ke nau ui “ʻa e poʻulí ko e maama, mo e māmá ko e poʻuli, ʻoku ui ʻa e koná ko e melie, mo e melié ko e kona” (ʻĪsaia 5:20)?

Neongo he ʻikai ui ʻe he kau akó ha ngaahi fili fakamūsika pau pe fakakata ʻaki ha taha kehé ʻoku kovi, ka te nau lava ʻo vahevahe ʻa e founga ʻe lava ke hanga ai ʻe ha ngaahi fili fakamūsika pau ʻo fakalahi ʻa e fakapoʻulí pe māmá pe founga ʻe lava ke tau aʻusia ai ha ngaahi aʻusia kovi pe lelei ʻi he founga ʻetau feohi mo e niʻihi kehé.

Founga ke fakafaikehekeheʻi ai ʻa e ngaahi maʻuʻanga tokoni falalaʻanga mo taʻe-falalaʻangá

Ko e founga ʻe taha te tau lava ai ʻo ʻiloʻi ʻa e ngaahi kākā ʻa Sētané ko hono fakafaikehekeheʻi ʻa e ngaahi maʻuʻanga tokoni falalaʻanga mo taʻefalalaʻangá. Te ke lava ʻo tokoni ke ako ʻeni ʻe he kau akó ʻaki hono fakaʻaongaʻi ʻo e naunau ʻoku maʻu ʻi he “Ako Konga Iiki 3: Founga ke Fakafuofuaʻi ʻa e Falalaʻanga ʻo e Ngaahi Maʻuʻanga Tokoní,” ʻi he kalasi ʻInisititiuti Ko Hono Tali ʻEku Ngaahi Fehuʻi ʻi he Ongoongoleleí - Naunau ʻa e Faiakó. Pe ko hoʻo fakaʻaongaʻi ʻa e naunau fekauʻaki mo e ngaahi maʻuʻanga tokoni falalaʻanga ʻoku maʻu ʻi he maʻuʻanga tokoni “Ko Hono Kumi ha Ngaahi Tali ki Hoʻo Ngaahi Fehuʻí” ʻi he Ngaahi Tefitó mo e Ngaahi Fehuʻí ʻi he Gospel Library.

ʻĪsaia 6: Liliu ʻo fakafou ʻia Sīsū Kalaisi mo ʻEne Fakaleleí

Te ke lava ʻo fakakaukau ke akoʻi fekauʻaki mo Sīsū Kalaisi ʻo fakafou ʻi he fakataipe naʻe fakaʻaongaʻi ʻi he ʻĪsaia 6. Te ke lava ʻo fakaʻaliʻali ha ongo fakatātā ʻoku ʻasi ʻa e tuʻunga kimuʻá mo e kimuí, hangē ko ha ʻīmisi ʻo ha kā kimuʻa mo e hili hano fufulu.

Fakakaukau ke fakamatalaʻi fakanounou ʻa e ʻĪsaia 6:1–4 ʻaki hano fakamatalaʻi ange naʻe maʻu ʻe ʻĪsaia ha meʻa-hā-mai ʻa ia naʻá ne tuʻu ai ʻi he ʻao ʻo e ʻEikí. Naʻe feinga ʻa ʻĪsaia ke fakamatalaʻi ʻa e mālohi mo e nāunau naʻá ne ongoʻi ʻi he ʻao ʻo e ʻOtuá.

Fakaafeʻi e kau akó ke nau lau ʻa e ʻĪsaia 6:5 pea kumi e ongo naʻe maʻu ʻe ʻĪsaia ʻi he ʻao ʻo e ʻEikí.

Ko e hā ha ngaahi founga naʻá ke mei ongoʻi tatau ai mo ʻĪsaia?

Hili iá pea ʻe lava ke ako ʻe he kau akó ʻa e ʻĪsaia 6:6–10, ʻo kumi ʻa e ngaahi ʻīmisi mo e ngaahi kupuʻi lea ʻokú ne akoʻi kinautolu fekauʻaki mo e founga ʻoku tau liliu ai ʻia Sīsū Kalaisi mo ʻEne Fakaleleí. Mahalo te nau fakamatala ki he founga ʻoku fakamanatu mai ai ʻe he ʻōlitá ʻa e feilaulau ʻa Sīsū Kalaisí (vakai, veesi 6), founga ʻoku fakamanatu mai ai kiate kitautolu ʻe hono fakamaʻa ʻo e loungutú ʻa e mālohi fakamaʻa ʻo Sīsū Kalaisí (vakai, veesi 7), pe founga ʻoku fakamanatu mai ai ʻe he tali ʻa ʻĪsaia ʻi he veesi 8 ʻa e tali ʻa Sīsū Kalaisi ki he Tamai Hēvaní ʻi he maama fakalaumālié (vakai, ʻĒpalahame 3:27).

ʻI hono vahevahe ʻe he kau akó e meʻa ne nau maʻú, tokoni ke nau ʻiloʻi ha foʻi moʻoni, hangē ko e Koeʻuhí ko Sīsū Kalaisi mo ʻEne Fakaleleí, te u lava ʻo liliu pea hoko ʻo maʻa.

ʻE lava fēfē ʻe he aʻusia ʻa ʻĪsaia mo Sīsū Kalaisi mo ʻEne Fakaleleí ʻo ʻomi ha ʻamanaki lelei ki ha taha te ne ongoʻi taʻetaau pe taʻefeʻunga?
Kuo liliu fēfē koe ʻo fakafou ʻia Sīsū Kalaisi mo ʻEne Fakaleleí, kae ʻikai ke vahevahe ha meʻa ʻoku fuʻu fakataautaha?

Mahalo te ke fakakaukau ke tokoniʻi e kau akó ke nau vakai ki he founga ʻe lava ai ʻe heʻetau aʻusia fakatāutaha mo e mālohi fakalelei ʻo Sīsū Kalaisí ʻo fakalahi ʻetau loto-holi ke fai Hono finangaló. ʻE lava ke fakafehoanaki ʻe he kau akó e ongo naʻe fuofua maʻu ʻe ʻĪsaia ʻi he veesi 5 (“Kuó u malaʻia au! he kuó u ʻauha”) mo ʻene tali ki he fakaafe ʻa e ʻEikí ʻi he veesi 8 (“Ko au ʻeni, ke ke fekau au”). ʻE lava ke vahevahe ʻe he kau akó ʻa e ʻuhinga ʻoku fakatupulaki ai ʻetau holi ke fai e finangalo ʻo Sīsū Kalaisí ʻi heʻetau aʻusia Hono mālohi fakaleleí, pe te nau lava ʻo vahevahe ha ngaahi sīpinga mei he folofolá pe ko ha kakai ʻoku nau ʻilo ʻoku nau fakahaaʻi ʻa e liliu ko ʻení ʻi he loto-holí.