Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Tangata Malanga: “ʻE ʻOmi ʻe he ʻOtuá ʻa e Ngāue Kotoa Pē ki he Fakamāú”

“Tangata Malanga: ‘ʻE ʻOmi ʻe he ʻOtuá ʻa e Ngāue Kotoa Pē ki he Fakamāú,’” Fuakava Motuʻá – Tohi Lēsoni ʻa e Faiako Seminelí (2026)

“Tangata Malanga: ‘ʻE ʻOmi ʻe he ʻOtuá ʻa e Ngāue Kotoa Pē ki he Fakamāú,’” Fuakava Motuʻá – Tohi Lēsoni ʻa e Faiako Seminelí

Lea Fakatātā 1–4; 15–16; 22; 31; Tangata Malanga 1–3; 11–12: Lēsoni 111

Tangata Malanga

“ʻE ʻOmi ʻe he ʻOtuá ʻa e Ngāue Kotoa Pē ki he Fakamāú”

A thoughtful young woman sitting at a kitchen table.

ʻE faingofua he taimi ʻe niʻihi ke tukutaha ʻetau tokangá ʻi he meʻa ʻoku hoko ʻi he moʻui ko ʻení kae ngalo ke tau vakai ki heʻetau moʻuí mei ha fakakaukau ʻoku taʻengatá. ʻOku fakamanatu mai ʻe he Tangata Malangá, ʻi he tohi ʻa Tangata Malangá ʻoku fakataimi pē ʻa e ngaahi meʻa ʻo e māmani ko ʻení. ʻOkú Ne faleʻi kitautolu ke tau teuteu ki he taimi ʻe fakamāuʻi ai ʻe he ʻOtuá ʻa ʻEne fānaú kotoa. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻe lava ke tokoniʻi ai kinautolu ʻe he tokanga taha ki he feʻiloaki mo e ʻOtuá ʻi he Fakamaau Fakaʻosí ke nau fai ha ngaahi fili ʻoku fakapotopotó.

Teuteu ʻa e tokotaha akó: Fakaafeʻi e kau akó ke nau talanoa mo ha mātuʻa pe taki falalaʻanga fekauʻaki mo e founga kuo nau mamata ai ki he ola taimi lōloa ʻo e ngaahi fili ne nau fai ʻi heʻenau kei taʻu hongofulu tupú.

Ngaahi ʻEkitivitī Ako ʻOku Ala Fakahokó

Ko hono fai ha ngaahi filí

Fakakaukau ke kamata e kalasí ʻaki hono tokoniʻi e kau akó ke nau ʻiloʻi ʻa e founga ʻe lava ke tākiekina ai ʻe ha fakakaukau ʻoku taʻengatá ʻa e ngaahi fili ʻoku nau faí. Ke fai ʻení, te ke lava ʻo hiki e ngaahi meʻá ni ʻi he palakipoé. Fakaafeʻi e kau akó ke aleaʻi e founga ʻe lava ke tokoniʻi ai ʻe he ngaahi fili takitaha ko ʻeni ʻi heʻenau kei siʻí ki honau kahaʻú.

Founga ʻeku tokangaʻi hoku sinó
Founga ʻoku ou fakaʻaongaʻi ai hoku taimi ʻataá
Founga ʻeku fakafeangai ki he kakaí

Hili iá pea vahevahe ʻa e fakamatala ko ʻení pea fakaafeʻi e kau akó ke nau fakafehokotaki ʻa e ngaahi fili ʻi ʻolungá mo e meʻa naʻe akoʻi ʻe Palesiteni Nalesoní.

Naʻe akoʻi ʻe Palesiteni Lāsolo M. Nalesoni e ngaahi meʻá ni fekauʻaki mo ʻetau ngaahi filí.

ʻE hanga ʻe he fili māʻoniʻoni kotoa pē ʻokú ke fai hení ʻo ʻoatu ha ngaahi lelei lahi ʻi he moʻuí ni. Ka ʻe hanga ʻe he ngaahi fili māʻoniʻoni ʻi he moʻui fakamatelié ʻo ʻoatu ha ngaahi lelei taʻemafakatataua ʻi he taʻengatá. …

Ko e moʻoni, ʻoku ʻikai loto ʻa e filí ke ke fakakaukau ki ʻapongipongi, pe ko e moʻui taʻengatá. (“Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], Gospel Library)

ʻE uesia fēfē nai kitautolu ʻi he ʻikai ke tau vakai ki heʻetau ngaahi filí ʻaki ha fakakaukau ʻoku taʻengatá?

Hiki ha fili ʻokú ke lolotonga fehangahangai mo ia ʻa ia te ne lava ʻo “ʻoatu ha ngaahi lelei taʻemafakatataua ʻi he taʻengatá.”

ʻE ala tokoni ke ʻoange ki he kau akó ha ngaahi fakakaukau fekauʻaki mo e faʻahinga fili te nau ala hiki, hangē ko e:

Pe ʻe kei hokohoko atu pē ʻa e feohi mo ha ngaahi kaungāmeʻa pau.
Pe ko e fakatomala mei ha angahala kuo fuoloa ʻene fakakaukau ki ai.
Ko e meʻa ʻoku nau fili ke fai ʻi he Sāpaté.

Fakalaulauloto ki he ʻuhinga ʻe fiemaʻu ai ʻe he Tamai Hēvaní ke ke fakakaukau ki he kahaʻú ʻi hoʻo fai ʻa e fili ko ʻení. Ko e hā ka ala hoko kapau he ʻikai te ke fakakaukau ki ai?

ʻI hoʻo ako ʻa e Tangata Malangá he ʻaho ní, feinga ke mahino ʻa e ngaahi moʻoní mo maʻu ha fakahā fakataautaha mei he ʻEikí ʻe lava ʻo tokoni atu ʻi he fili ko ʻení.

Tokanga taha ki he ngaahi meʻa fakatuʻasinó

ʻI he tohi Tangata Malangá, naʻe ui ʻe he tokotaha faʻu tohí ia ko e “Tangata malangá” (Tangata Malanga 1:1). Naʻe fakafehoanaki ʻe he Tangata Malangá ʻa e meʻa ʻoku mole ʻi hono fakatefito ʻetau moʻuí ʻi he ngaahi meʻa fakatuʻasinó ki he mahuʻinga ʻo e teuteu ke feʻiloaki mo e ʻOtuá.

Fakakaukau ke faʻu ha fanga kiʻi kulupu iiki pea fakaafeʻi e kulupu takitaha ke nau lau ha taha ʻo e ngaahi potufolofola ʻi laló. Ke tokoni ke mahino lelei ange ki he kau akó e potufolofolá, te ke lava ʻo fakaʻaliʻali e ngaahi fakaʻuhinga ko ʻení. Fakaafeʻi e kau akó ke fetongi e ngaahi foʻi lea mo e kupuʻi lea ko ʻení ʻaki ʻenau fakaʻuhingá ʻi heʻenau lau:

ʻOku ʻuhinga ʻa e “vaʻingá” ki he taʻeʻaonga pe taimi siʻi.
ʻOku ʻuhinga ʻa e “ʻi he lalo langí” pe “ʻi he lalo laʻaá” ki he moʻui fakamatelié ni.
ʻOku ʻuhinga ʻa e “fakamamahi ki he laumālié” ki he loto-foʻi.

Lau ʻa e ngaahi potufolofola ko ʻení, ʻo kumi ʻa e meʻa naʻe ʻilo ʻe he Tangata Malangá hili ʻene tulifua ki ha ngaahi meʻa pau ʻoku pehē ʻe ha kakai ʻe niʻihi te nau fiefia mo lelei ai ʻenau moʻuí:

Poto ʻo e māmaní. Tangata Malanga 1:13–18
Ngaahi fiefia fakatuʻasinó mo e koloa fakaemāmaní. Tangata Malanga 2:1, 4–11

Mahalo te ke fie fakamahinoʻi ange ʻoku ʻikai kovi pe hala ʻa e poto fakamāmaní mo e koloa fakamāmaní. Ka ʻi he taimi ʻoku tukutaha ai ʻetau tokangá ʻi he ngaahi meʻá ni, tautautefito ki hono fakamuʻomuʻa ia ʻi he fakahōifua ki he ʻOtuá, ʻoku fakatuʻutāmaki fakalaumālie leva ia. Fakaafeʻi e ngaahi kulupú ke aleaʻi e fehuʻi ko ʻení. Hili iá ʻe lava ke vahevahe ʻe ha mēmipa ʻo e kulupú ʻa e ngaahi fakakaukau ʻa e kulupú mo e kalasí.

Ko e hā ha ngaahi founga ʻe lava ai ʻe he tulifua ki he ngaahi meʻa ko ʻení ʻo ʻai ke tau ongoʻi liʻekina pe loto-foʻí?

Ko e faifai pea tau feʻiloaki mo e ʻOtuá

Hili e fekumi ʻa e Tangata Malangá ki ha ʻilo mo ha koloa fakatuʻasinó, ʻokú ne fakaʻosi ʻene tohí ʻaki e ngaahi lēsoni naʻá ne akó. Lau ʻa e Tangata Malanga 12:7, 13–14, ʻo kumi e meʻa naʻá ne akoʻi ʻe lava ʻo tokoni ke tau tauhi ha fakakaukau ʻoku taʻengatá.

ʻOku fuʻu mahuʻinga ʻaupito ʻa e fakakaukau ko ʻení pea kuo ueʻi ai ʻe he ʻOtuá ha tokolahi ʻo ʻEne kau tamaioʻeikí ke nau akoʻi ia. Fakafekauʻaki pe fakafehokotaki ʻa e Tangata Malanga 12:7, 13–14 mo e ʻAlamā 34:32 mo e Molomona 3:20, 22. Lau e ngaahi potufolofola ko ʻení, ʻo kumi e founga naʻe akoʻi ai ʻe ʻAmuleki mo Molomona ha pōpoaki tatau.

Te ke fakamatala fakanounouʻi fēfē ʻa e ngaahi meʻa ʻoku akoʻi ʻe he ngaahi veesi ko ʻení ʻi ha fakamatala ʻo e moʻoní?

Tokoni ke ʻiloʻi ʻe he kau akó ha moʻoni hangē ko ʻení: ʻE fakapapauʻi ʻe heʻetau ngaahi fili ʻi he moʻui ko ʻení ʻetau tuʻunga mateuteu ke tuʻu ʻi he ʻao ʻo e ʻOtuá ʻi he Fakamaau Fakaʻosí. Kimuʻa pea tali ʻe he kau akó ʻa e fehuʻi hokó, te ke lava ʻo fakaafeʻi kinautolu ke kuikui honau matá pea fakakaukauloto ʻoku nau feʻiloaki mo e ʻOtuá hili ʻa e moʻui ko ʻení. Poupouʻi kinautolu ke fakakaukau ki he meʻa ʻoku nau ʻilo fekauʻaki mo Ia mo Hono ngaahi ʻulungāngá.
Ko e hā ha ngaahi ʻulungaanga ʻo e ʻOtuá ʻokú ne fakafeʻungaʻi makehe Ia ke hoko ko hotau Fakamāú?

Te ke lava ʻo fakamanatu ki he kau akó ʻa e fatongia ʻo Sīsū Kalaisi ʻi hono tokoniʻi kitautolu ke tau teuteu ki he Fakamaau Fakaʻosí ʻaki hono vahevahe e potufolofola mo e fehuʻi ko ʻení.

Lau ʻa e 3 Nīfai 27:16, 19, ʻo kumi e founga te tau lava ai ʻo teuteu ke feʻiloaki mo Sīsū Kalaisi ʻi he Fakamaau Fakaʻosí.

Ko e hā ʻoku mahuʻinga ai ke mahino he ʻikai ke tau lava ʻo teuteu ki he Fakamaau Fakaʻosí taʻe kau ai ʻa Sīsū Kalaisí?

Ko ʻetau taumuʻa fakasilesitialé

Tokoni ke ʻilo ʻe he kau akó ʻa e founga ʻoku hanga ai ʻe heʻetau ʻilo ʻokuʻi teuteu kitautolu ʻe heʻetau ngaahi filí ki he taʻengatá ʻo tokoniʻi e ngaahi fili fakaʻaho ʻoku tau fakahokó. Ko e founga ʻe taha ke fai ai ʻení ko hono tuku ke akoako fakahoko ʻe he kau akó ʻa e meʻa naʻe akoʻi ʻe Palesiteni Nalesoni ʻi he fakamatala ko ʻení.

Naʻe fakamoʻoni ʻa Palesiteni Lāsolo M. Nalesoni ki he mahuʻinga ʻo e kamata “mei hono fakakaukauʻi e ikuʻangá”:

19:15

ʻI heʻeku fuofua pōpoaki ko e Palesiteni ʻo e Siasí, naʻá ku poupouʻi ai kimoutolu ke mou kamata mei hono fakakaukauʻi ʻo e ikuʻangá. ʻOku ʻuhinga ʻeni ke ʻai ʻa e nāunau fakasilesitialé ko hoʻo taumuʻa taʻengatá pea fakakaukauʻi lelei pe ʻe ʻave koe ki fē ʻi he maama kahaʻú, ʻe hoʻo ngaahi fili ʻi māmaní. (“Fakakaukau Fakasilesitiale!,” Liahona, Nōvema 2023, 118)

Ko e hā ha ngaahi founga ʻoku fakahaaʻi ai ʻe he ngaahi akonaki mo e sīpinga ʻa Sīsū Kalaisí naʻá Ne fai ha ngaahi fili ʻo “fakakaukauʻi e ikuʻangá”?

Fakamatalaʻi ange ʻe akoako fakaʻaongaʻi ʻe he kau akó ʻa e meʻa ʻoku akoʻi ʻe Palesiteni Nalesoní. Kimuʻa pea nau kamatá, te ke lava ʻo kole ange ke nau fakakaukau ki ha ngaahi fili te ne tākiekina kinautolu ʻi he moʻui ka hokó. Tānaki atu ʻa e ngaahi fili ko ʻení ki he lisi ʻo e ngaahi fili ʻi he palakipoé mei he kamata e kalasí.

Hili iá, ʻe lava ke aleaʻi ʻeni ʻe he kau akó ʻi ha fanga kiʻi kulupu iiki.

Fili ha taha ʻo e ngaahi fili ʻi he palakipoé pea tali e ngaahi fehuʻi ko ʻení:

Ko e hā ha ngaahi fili ʻe fai ʻe ha taha taʻu hongofulu tupu fekauʻaki mo e meʻá ni te ne uesia ʻenau teuteu ke feʻiloaki mo e ʻOtuá?
Ko e hā kuó ke ako mei he ongoongolelei ʻo Sīsū Kalaisí ʻe lava ʻo tokoni ki ha taha taʻu hongofulu tupu ke ne fai ha ngaahi fili fekauʻaki mo e meʻá ni?

Fakaafeʻi e ngaahi kulupú ke vahevahe ʻenau ngaaahi fakakaukaú mo e kalasí. Te ke lava ʻo poupouʻi e kau akó ke kumi mo vahevahe ha ngaahi potufolofola pe fakamatala mei he kau taki ʻo e Siasí ʻokú ne poupouʻi e meʻa ʻoku nau vahevahé.

Ko e aofangatukú

Kimuʻa pea fakakakato ʻe he kau akó ʻa e ʻekitivitī ko ʻení, te ke lava ʻo fakamanatu kiate kinautolu ʻa e fili ne nau hiki ʻi he kamata ʻa e kalasí.

Fakakaukauloto ʻokú ke tuʻu ʻi he ʻao ʻo e ʻOtuá ʻi he Fakamaau Fakaʻosí peá ke fanongo ki Heʻene folofola atu kiate koe, “Mālo, ko e tamaioʻeiki lelei mo angatonu” (Mātiu 25:23).

Fakakaukauloto leva, lolotonga hoʻo tuʻu ʻi he ʻao ʻo e ʻOtuá, ʻokú ke maʻu ʻa e faingamālie ke fakahoko ha pōpoaki kiate koe ʻi he lolotongá. Hiki ha pōpoaki ʻo fai ha faleʻi kiate koe ʻi he lolotongá ʻe tokoni ke ke teuteu ai ki he Fakamaau Fakaʻosí. Te ke lava ʻo fakakau ai ʻa e meʻa naʻá ke ako mo ongoʻi he ʻahó ni fekauʻaki mo e:

Founga ʻoku uesia ai ʻe he ngaahi fili ʻi hoʻo kei talavoú ʻa hoʻo teuteu ke feʻiloaki mo e ʻOtuá.
Ko e hā ha ngaahi liliu te ke poupouʻi koe ke ke fakahoko fekauʻaki mo e ngaahi fili ʻokú ke lolotonga fehangahangai mo iá.

Fakakaukau ke fakamoʻoni ki he mahuʻinga ʻo hono fakahoko ha ngaahi filí kae tokanga taha ki he ʻaho te tau tuʻu ai ʻi he ʻao ʻo e ʻOtuá ke fakamāuʻí.

Ngaahi Maʻuʻanga Tokoni Kehé

Tangata Malanga 1:2–3. Kapau ʻoku fakataimi ha meʻa lahi ʻi he moʻuí ni, ko e hā leva e meʻa ʻoku mahuʻingá?

Naʻe akoʻi ʻe Palesiteni M. Lāsolo Pālati (1928–2023):

13:30

Kuó u ako ʻi heʻeku ngāué, ko e meʻa ʻoku mahuʻinga tahá ko hotau vā fetuʻutaki mo e Tamai Hēvaní mo Hono ʻAlo ʻOfaʻangá, ko hotau ngaahi fāmilí, mo e ngaahi kaungāʻapí, pea mo hono fakaʻatā ʻa e Laumālie ʻo e ʻEikí ke tataki kitautolu ʻi he ngaahi vā fetuʻutaki ko iá ke tau lava ʻo fakamoʻoni ki he ngaahi meʻa ko ia ʻoku mahuʻinga taha mo tuʻuloá. (“Manatuʻi ʻa e Meʻa ʻOku Mahuʻinga Tahá,” Liahona, Mē 2023, 107)

Tangata Malanga 2:17. Kapau te tau mate kotoa, ta ʻoku tonu nai ʻa e Tangata Malangá ʻi he taimi ʻokú ne pehē ai “ko e vaʻinga ʻa e meʻa kotoa pē mo e fakamamahi ki he laumālié”?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

23:27

Naʻe lea ʻa ʻEletā Niila A. Mekisuele ʻo kau ki he meʻa ʻoku “faingataʻaʻia ai ʻa e faʻahinga ʻo e tangatá,” ʻa e pehē ko ia ʻoku ngata ʻa e meʻa kotoa pē ʻi he maté. Ko ʻetau ngaahi lavameʻá, ngaahi koloá, mo e ngaahi feohi kotoa pē ʻoku ʻi ai hono ngataʻanga, pea ka ʻikai ha meʻa ʻe toe, tā ʻoku hangē ko e lea ʻa e “Tangata Malangá” ʻi he Tohi ʻa e Tangata Malangá, ko e “vaʻinga ʻa e meʻa kotoa pē mo e fakamamahi ki he laumālié” [Tangata Malanga 2:17]. Ko ha moʻoniʻi meʻa ʻa e maté, pea ʻoku fakamālohiʻi kitautolu ke tau fakahaaʻi ka ʻikai ha mālohi ʻokú ne ikunaʻi ʻa e maté, ʻe siʻisiʻi ha taumuʻa tuʻuloa ʻo ʻetau moʻuí. Meʻamālié, ʻoku tau ʻilo kuo ikunaʻi ʻa e maté, ʻoku ʻi ai ha taumuʻa mo e ʻuhinga ʻo e moʻuí, pea ʻoku ʻikai ko ha muna ʻa e meʻa kotoa pē. ‘I he Fakalelei ‘a Sīsū Kalaisí, kuó Ne ikunaʻi ai ʻa e faingataʻaʻia ʻa e tangatá ʻi he maté, pea hangē ko e fakamatala ʻa ʻEletā Mekisuelé, ko e taimi ní “ko e ngaahi faingataʻa fakatāutahá pē [ʻa ʻetau ngaahi angahala, fehalaaki, mo e tōnounou fakafoʻituituí], pea ʻe ala fakahaofi kitautolu mei he meʻá ni foki ʻi heʻetau muimui ki he ngaahi akonaki ʻo ia naʻá ne fakahaofi kitautolu mei he ʻauha fakaʻaufulí.” (“Falala ki he ʻOtuá” [fakamafola ako fakataʻu ʻa e Potungāue Ako ʻa e Siasí, 26 Sānuali 2024], Gospel Library)

Tangata Malanga 3:17; 12:14. ʻE fakamāuʻi fēfē nai au?

Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí:

17:7

Ko e Fakamaau Fakaʻosí ʻoku ʻikai ko hano fakafuofuaʻi pē ʻo hono fakakātoa ʻo ʻetau ngaahi ngāue leleí mo e ngāue koví—ʻi he meʻa kuo tau fakahokó. Ka ko hano fakahā ia ʻo e ola aofangatuku ʻo ʻetau ngāué mo e fakakaukaú—ʻa e meʻa kuo tau aʻusiá. ʻOku ʻikai feʻunga ke tau muimui pē ki he ngaahi meʻa ʻoku faí. Ko e ngaahi fekau, ngaahi ouau mo e ngaahi fuakava ʻo e ongoongoleleí, ʻoku ʻikai ko ha lisi ia ʻo e ngaahi meʻa ʻoku fiemaʻu ke fakahū ki ha ʻakauni fakalangi. Ko e ongoongolelei ʻo Sīsū Kalaisí ko ha palani ia ʻokú ne fakahā mai kiate kitautolu ʻa e founga ke tau aʻusia ai ʻa e tuʻunga ʻoku finangalo ʻa ʻetau Tamai Hēvaní ke tau aʻusiá. (“The Challenge to Become,” Ensign, Nōvema 2000, 32)

Tangata Malanga 12:13. ʻE tāpuekina fēfē nai au ʻe he ʻOtuá ʻi heʻeku tauhi ʻEne ngaahi fekaú?

Naʻe akoʻi ʻe Palesiteni Tōmasi S. Monisoni (1927–2018):

14:25

ʻOku feʻunga e ʻofa ʻa ʻetau Tamai Hēvaní ʻiate kitautolú ke Ne pehē: ʻOua naʻá ke loi; ʻoua naʻá ke kaihaʻa; ʻoua naʻá ke tono; ke ke ʻofa ʻi ho kaungāʻapí ʻo hangē pē ko koé; pea hoko atu ai. ʻOku tau ʻiloʻi ʻa e ngaahi fekaú. ʻOku mahino kiate Ia ko e taimi ʻoku tau tauhi ai ʻa e ngaahi fekaú, ʻe fiefia ange ʻetau moʻuí, lavameʻa lahi ange, pea siʻi ange palopalemá. ʻE faingofua ange hotau ngaahi ʻahiʻahí pea faingofua ange ʻa e palopalemá ke fuesia, pea te tau maʻu [ʻEne] ngaahi tāpuaki kuo talaʻofa maí. Neongo ʻokú ne foaki mai ʻa e ngaahi fonó mo e ngaahi fekaú, ka ʻokú Ne toe fakaʻatā foki ke tau fili pe te tau tali pe fakasītuʻaʻi kinautolu. ʻE makatuʻunga hotau ikuʻangá mei heʻetau filí ʻi he meʻá ni. (“Tauhi ʻa e Ngaahi Fekaú,” Liahona, Nōvema 2015, 83)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Te ke lava ʻo kamata ʻaki hano fakaʻaliʻali ʻa e fakamatala meia Palesiteni Nalesoni mei he kamataʻanga ʻo e lēsoní. Fehuʻi ki he kau akó pe ko e hā ʻoku nau ʻilo fekauʻaki mo e moʻui hili ʻa e maté ʻoku nau fakaʻamu naʻe ʻilo ʻe he tokotaha kotoa pē. Fakaafeʻi leva e kau akó ke nau aleaʻi e founga ʻe lava ke tākiekina ai ʻetau ngaahi filí ʻe heʻetau tui fekauʻaki mo e moʻui hili ʻa e maté.

2 Nīfai 9:51. “Meʻa ʻa ia ʻoku ʻikai fakafiemālié”

Hili ha ako fekauʻaki mo e ngaahi meʻa fakamāmani naʻe fakamatalaʻi ʻe he Tangata Malangá ʻi he Tangata Malanga 1 mo e 2, fakakaukau ke lau ʻa e 2 Nīfai 9:50–51. Kole ki he kau akó ke fakakaukau ki he founga ʻoku tau fakaʻaongaʻi ai hotau taimí mo e paʻangá ʻi he ngaahi meʻa ʻoku ʻikai hano mahuʻinga pe fakafiemālie tuʻuloá. Hili iá, te mou lava ʻo aleaʻi ʻa e founga ʻe lava ke ʻomi ai ʻe Sīsū Kalaisi mo ʻEne ongoongoleleí ha fakafiemālie ʻoku tuʻuloá.

Ko hono vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

Mahalo te ke fie tuku ke akoako feinga e kau akó ke ʻiloʻi ʻa e ngaahi makatuʻunga pe ngaahi mahalo ʻa e māmaní. ʻE lava ke lau ʻe he kau akó ʻa e palakalafi 8 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023), ʻo kumi e meʻa ʻe lava ʻo tokoni ke nau vakai ai ki he ngaahi meʻá ʻaki ha fakakaukau ʻoku taʻengatá.

Hili iá, ʻe lava ke ako ʻe he kau akó ʻa e ngaahi veesi ʻi he lēsoni mei he Tangata Malanga 1 mo e 2 fekauʻaki mo e tulifua ki he poto ʻo e māmaní, ngaahi koloa fakamāmaní, mo e fiefia fakatuʻasinó. Fakaafeʻi e kau akó ke feinga ke ʻiloʻi ʻa e ngaahi mahalo fakamāmani ʻe ala maʻu ʻe kinautolu ʻoku nau fakamuʻomuʻa ʻa e ngaahi meʻa ko ʻení. Mahalo ʻe vahevahe ʻe he kau akó ha ngaahi meʻa hangē ko ʻení:

Te ke fiefia tahá, kapau te ke fai ha meʻa pē te ke ongoʻi lelei ai ʻi he momeniti ko iá (vakai, Tangata Malanga 2:1, 10).
Ko e ngaahi koloa fakaemāmaní ko ha ngaahi fakaʻilonga ia ʻo e lavameʻa pea ʻoku tau maʻu ai ʻa e fiefiá (vakai, Tangata Malanga 2:4–8).

Hili iá, ʻe lava ke vakai ʻa e kau akó ki he ngaahi mahalo tatau “ʻo makatuʻunga ʻi he tuʻunga moʻui ʻa e ʻEikí ki he moʻoní kae ʻikai tali e ngaahi fakaʻutoʻuta pe ngaahi fakakaukau ʻa e māmaní” (Fakamatala ki he ʻElito ʻo e Fakataukei Fakatokāteliné [2023], “Ko Hono Maʻu ʻo e ʻIlo Fakalaumālié,” palakalafi 8).