Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Lea Fakatātā 3: “Falala [ki he ʻEikí]”

“Lea Fakatātā 3: ‘Falala [ki he ʻEikí],’” Fuakava Motuʻá – Tohi Lēsoni ʻa e Faiako Seminelí (2026)

“Lea Fakatātā 3: ‘Falala [ki he ʻEikí],’” Fuakava Motuʻá – Tohi Lēsoni ʻa e Faiako Seminelí

Lea Fakatātā 1–4; 15–16; 22; 31; Tangata Malanga 1–3; 11–12: Lēsoni 110

Lea Fakatātā 3

“Falala [ki he ʻEikí]”

Trust in the Lord - Youth Video - Screen Capture

ʻE lava ke faingataʻa he taimi ʻe niʻihi ke falala ki he ʻEikí. Ka ʻi he fakaʻau ke tau ʻiloʻi Iá, ʻoku tau fakatokangaʻi “ʻOku ʻikai te ne fai ha meʻa ʻo kapau ʻe ʻikai ʻaonga ia ki he kakai ʻo e māmaní” (2 Nīfai 26:24). Te tau lava leva ʻo sio ki he poto ʻi he falala kiate Iá kae ʻikai faʻaki “ki [hotau] potó” (Lea Fakatātā 3:5). ʻE lava ke tokoni ʻa e lēsoni ko ʻení ki he kau akó ke nau fili ke falala ki he ʻEikí.

Teuteu ʻa e tokotaha akó: Fakaafeʻi e kau akó ke nau fakakaukau ke fakaʻilongaʻi ʻi heʻenau folofolá ʻa e kupuʻi lea fakafolofola mahuʻinga ki he potufolofola fakataukei fakatokāteline Lea Fakatātā 3:5–6: “Falala ki he ʻEikí ʻaki ho lotó kotoa … pea ʻe fakahinohinoʻi ʻe ia ho ngaahi ʻalungá.” Ke teuteu ki he kalasí, ʻe lava ke akoako lau maʻuloto tuʻo lahi ʻe he kau akó ʻa e kupuʻi leá pea fakalaulauloto ki ha ngaahi tūkunga ʻi heʻenau moʻuí ʻa ia ʻe fiemaʻu ai ke nau falala ki he ʻEikí.

Ngaahi ʻEkitivitī Ako ʻOku Ala Fakahokó

Falalá

Fakakaukau ke kamata ʻa e kalasí ʻaki hono hiki e foʻi lea Falalá ʻi he palakipoé. Fai leva ʻa e fehuʻi ko ʻení lolotonga hono fakaʻaliʻali taha taha ʻa e ngaahi tūkunga ʻoku ʻoatu fakataha mo iá. Fakakaukau ke liliu e ngaahi tūkungá ki he ngaahi fiemaʻu hoʻo kau akó.

Ko hai te ke fie falala ki ai …
- ke ne ʻave koe ki ʻapi kuo fuoloa e poʻulí?
- ʻi hoʻomou paʻanga fakafāmilí?
- ke ʻoatu ha faleʻi pe ko hai ʻoku totonu ke ke teiti pe mali mo iá?
- ke ne akoʻi koe fekauʻaki mo Sīsū Kalaisi mo e founga ke muimui ai kiate Iá?
  
  Fakakaukau ke hiki e ngaahi tali ʻa e kau akó ki he fehuʻi ko ʻení ʻi he palakipoé ʻi lalo ʻi he foʻi lea Falala.
Ko e hā ha ngaahi ʻulungaanga lelei ʻe fiemaʻu ke maʻu ʻe ha taha ke ke falala ki aí?

Lau ʻa e Lea Fakatātā 3:5, ʻo fakalaulauloto ki hono ʻuhinga kiate koé. Hili ia pea tali ʻa e ngaahi fehuʻi ko ʻení ʻi hoʻo tohinoa akó:

Ko hai ʻokú ke falala lahi ange ki aí: ko e ʻEikí pe ko koe? Ko e hā hono ʻuhingá?
Ko e hā ha tūkunga ʻi hoʻo moʻuí he taimí ni ʻokú ke ongoʻi ai ʻoku fiemaʻu ke ke falala lahi ange ki he ʻEikí kae ʻikai ko koe pē?

ʻI hoʻo ako e folofolá he ʻaho ní, kumi ʻa e meʻa ʻokú ke ako mei he Laumālie Māʻoniʻoní ʻokú ne tokoniʻi koe ke ke falala ki he ʻEikí.

“Falala ki he ʻEikí … pea ʻoua naʻá ke faʻaki”

Ko e Lea Fakatātā 3:5–6 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e Lea Fakatātā 3:5–6, ʻo kumi e founga te ke fakakakato ʻaki ʻa e konga lea ko ʻení: “Kapau te tau …, ʻe hanga ʻe he ʻEikí ʻo …”

Fakaafeʻi e kau akó ke vahevahe ʻenau ngaahi fakamatala kuo kakató. Feinga ke fakapapauʻi ʻa e meʻa ʻoku nau vahevahé. Ko e taha ʻo e ngaahi moʻoni te nau ala vahevahé kapau te tau falala ki he ʻEikí ʻaki hotau lotó kotoa, te Ne fakahinohinoʻi hotau ngaahi halá.

ʻOkú ke pehē ko e ʻuhinga ki he hā ʻa e falala ki he ʻEikí ʻaki “[hotau] lotó kotoa” (veesi 5)?
ʻOkú ke pehē ko e ʻuhinga ki he hā ʻa e falala ki he ʻEikí kae ʻikai ko “[hotau] potó” (veesi 5)?

Ke tokoni ke mahino lelei ange ki he kau akó ʻa e potufolofola ko ʻení, fakaafeʻi ha ongo tamaiki ako ke na tuʻu ʻi ha fute nai ʻe tolu mei ha meʻa ʻoku mālohi, hangē ko ha holisi. Fakaafeʻi ha tokotaha ako ʻe taha ke falala ki he holisí pea fakaʻaongaʻi ia ke tokoni ki ai. Fakaafeʻi ʻa e tokotaha ako ʻe tahá ke fakamamafa ki he fahaʻi ʻe taha ʻo e holisí ʻi he mamaʻo taha te ne lava kimuʻa pea toó.
ʻE tokoni fēfē ʻa e ngaahi sīpinga ko ʻení ke mahino lelei ange kiate kitautolu ʻa e Lea Fakatātā 3:5–6?

Fakakaukau ke vahevahe ʻa e kau akó ki ha ngaahi kulupu iiki. Fakaafeʻi e kau akó ke hiki ʻi ha laʻipepa ha ngaahi tūkunga ʻe ala ongoʻi ai ʻe he toʻu tupu ʻo e Siasí ʻoku ʻahiʻahiʻi kinautolu ke nau fakaʻaongaʻi ʻenau fakakaukau pē ʻanautolú kae ʻikai falala ki he faleʻi ʻa e ʻEikí. ʻE lava ke kau ʻi he ngaahi sīpingá ʻa hono fili ʻo e fakafiefiá, fakakaukauʻi pe ko hai ʻa e tokotaha pe taimi ke teiti aí, fakaʻaongaʻi ha tōʻonga lea pau, pe ko hono fokotuʻu ha ngaahi taumuʻa fakaako pe taumuʻa ki he kahaʻú.

Hili ha taimi feʻunga, te ke lava ʻo fakaʻaliʻali e ongo fehuʻi ko ʻení. ʻE lava ke fakaʻaongaʻi ʻe he kau akó ʻenau lisí ke aleaʻi ʻa e ngaahi fehuʻí ʻi heʻenau kulupú.
Ko e hā te ne ala ʻai ke faingataʻa ki ha taha ke falala ki he ʻEikí kae ʻoua ʻe fakafalala ki he mahino ʻoku nau maʻú?
Ko e hā ha faleʻi te ke ʻoange ki ha taha ke tokoniʻi kinautolu ke nau ikunaʻi ʻa e ngaahi fakafeʻātungia ko ʻení?

“ʻE fakatonutonu ʻe ia ho ngaahi ʻalungá”

Ke tokoni ki he kau akó ke fakatupulaki ʻenau holi ke falala ki he ʻEikí, te nau lava ʻo ako ha niʻihi pe kotoa ʻo e ngaahi potufolofola ʻi laló. ʻE lava ke nofo ʻa e kau akó ʻi heʻenau ngaahi kulupú, pea ʻe lava ke lau ʻe he tokotaha ako takitaha ha potufolofola kehe.

Lau ʻa e ngaahi potufolofola ko ʻení, ʻo kumi ʻa e ʻuhinga te tau fie falala ai ki he ʻEikí kae ʻikai ko hotau potó:

ʻĪsaia 55:8–9
2 Nīfai 4:34–35
2 Nīfai 26:24
Sēkope 4:10
Mōsaia 4:9

ʻI he ʻosi hono lau ʻe he kau akó ʻenau ngaahi potufolofolá, fakaafeʻi kinautolu ke vahevahe e meʻa ne nau maʻú mo ʻenau kulupú. Hili iá, ʻe lava ke vahevahe ha kau ako ʻe niʻihi mo e kalasí.

Kapau naʻá ke hiki ha ngaahi ʻulungaanga falalaʻanga ʻi he palakipoé ʻi he kamataʻanga ʻo e lēsoní, fakakaukau ke fehuʻi ki he kau akó e founga ʻoku fakahaaʻi ai ʻe he ʻEikí ha taha ʻo e ngaahi ʻulungaanga ko ʻení. ʻE lava ke tānaki ʻe he kau akó ki he palakipoé ha toe ngaahi ʻulungaanga ʻo e ʻEikí ʻoku nau fakakaukau ki ai pe naʻa nau maʻu ʻi he ngaahi potufolofola ʻi ʻolungá.
Ko e fē ʻi he ngaahi ʻulungaanga ʻo e ʻEikí ʻokú ne tokoniʻi koe ke ke falala kiate Iá—naʻa mo e taimi ʻe fepaki ai ʻEne faleʻí mo hoʻo potó?

Ke teuteu e kau akó ke tali e fehuʻi ʻi laló, fakakaukau ke huluʻi e foʻi vitiō “Trust in the Lord” (3:30), ʻoku maʻu ʻi he ChurchofJesusChrist.org. ʻI he foʻi vitiō ko ʻení, ʻoku vahevahe ʻe he toʻu tupú ʻa e ʻuhinga ʻoku nau fili ai ke falala ki he ʻEikí.

Fakakaukau ke vahevahe hoʻo tali ki he fehuʻi ʻi laló ʻo tānaki atu ki he meʻa ʻoku vahevahe ʻe he kau akó.

3:30
Ko e fē ha taimi kuó ke falala ai pe ko ha taha ʻokú ke ʻilo ki he ʻEikí kae ʻikai ko hoʻo potó? Naʻá Ne tokoniʻi pe fakahinohinoʻi fēfē koe?

Ko hono tuku ʻeku falalá ki he ʻEikí

Ke tokoni ke fakaʻaongaʻi ʻe he kau akó ʻa e meʻa ne nau akó, fakakaukau ke fakaafeʻi kinautolu ke nau fakahoko fakafoʻituitui ʻa e ngaahi meʻa ko ʻení.

Fakakaukau ki he meʻa naʻá ke tohi ʻi hoʻo tohinoa akó ʻi he kamataʻanga ʻo e lēsoní. Fekumi ki ha fakahinohino mei he ʻEikí ke tali e ngaahi fehuʻi ko ʻení ʻi hoʻo tohinoá:

Ko e hā naʻá ke ako he ʻahó ni fekauʻaki mo e ʻEikí ʻokú ne poupouʻi koe ke ke falala kiate Iá?
Ko e hā ha founga ʻe taha te ke lava ai ʻo falala ki he ʻEikí ʻi he tūkunga naʻá ke tohi fekauʻaki mo iá?
Te ke lava fēfē ʻo fai ʻeni ʻaki “ho lotó kotoa” (Lea Fakatātā 3:5)?

ʻE ala tokoni ke vahevahe hoʻo ngaahi ongo fekauʻaki mo e ʻEikí mo e ngaahi founga kuó Ne tataki ai koe ʻi hoʻo falala kiate Iá. Fakakaukau ke fakamoʻoni ki Heʻene malava mo e loto-fiemālie ke tāpuakiʻi hoʻo kau akó ʻi heʻenau falala kiate Iá.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea fakafolofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea fakafolofola mahuʻinga ki he Lea Fakatātā 3:5–6 ko e “Falala [ki he ʻEikí] ʻaki ho lotó kotoa; … pea ʻe fakatonutonu ʻe Ia ho ngaahi ʻalungá.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

Lea Fakatātā 3:5. Ko e ʻuhinga ki he hā ʻa e “falala ki he ʻEikí”?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

15:12

ʻOku ʻuhinga ʻa e falalá ke talangofua loto-fiemālie ʻo ʻikai ʻilo ʻa e ikuʻangá mei he kamataʻangá (vakai, Lea Fakatātā 3:5–7). Koeʻuhí ke maʻu ha fua, kuo pau ke mālohi ange hoʻo falala ki he ʻEikí mo tuʻuloa ʻi hoʻo falala ki hoʻo ngaahi ongó mo hoʻo taukei pē ʻaʻaú.

Ko e ngāue ʻaki ʻa e tuí ko e falala ia ʻoku ʻafioʻi ʻe he ʻEikí ʻa e meʻa ʻokú Ne fai ʻi hoʻo moʻuí pea ʻe lava ke Ne aʻusia ia ke lelei taʻengata maʻau, neongo ʻoku ʻikai lava ke mahino kiate koe ʻa e founga ʻe lava ke Ne fakahoko ai iá. (“Trust in the Lord,” Ensign, Nov 1995, 17)

Ko e hā te ne tokoniʻi au ke falala ki he ʻEikí?

Naʻe vahevahe ʻe Sisitā Poni H. Kōtoni ko e Palesiteni Lahi mālōlō ʻo e Kau Finemuí:

11:47

Kuo ikunaʻi ʻe Sīsū Kalaisi e māmaní. Pea ʻoku tuʻunga ʻiate Ia mo ʻEne Fakalelei taʻefakangatangatá, ʻetau maʻu ha ʻuhinga lahi ke falala pea ʻiloʻi ʻe lelei e meʻa kotoa pē.

… ʻE lava ke tau falala kotoa pē ki he ʻEikí kae ʻikai faʻaki ki hotau potó. ʻE lava ke fakatefito ʻetau moʻuí ʻi he Fakamoʻuí, ʻaki ʻetau feinga ke ʻiloʻi Ia pea te Ne tataki hotau halá. (“Falala ki he ʻEikí pea ʻOua Naʻá ke Faʻaki ki ho Potó,” Liahona, Mē 2017, 9)

Fēfē kapau te u falala ki he ʻEikí kae ʻikai pē ke u sio ki he ngaahi tāpuakí?

Naʻe fakamatala ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e ngaahi tāpuaki ʻe niʻihi ʻe vavé ni mai, ha niʻihi ʻe fuoloa pea toki maʻu, mo ha niʻihi he ʻikai maʻu kae ʻoua ke tau aʻu ki hēvani; ka ko kinautolu ʻoku nau tali ʻa e ongoongolelei ʻo Sīsū Kalaisí, ʻoku hoko mai ia. ʻOku ou fakamoʻoni tonu ki ai. (“An High Priest of Good Things to Come,” Ensign, Nov. 1999, 38)

Naʻe vahevahe ‘e Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Naʻá ku … ongoʻi ʻa e loto-falala [ko iá] ʻi he ngaahi lea ʻa ha tamai ʻa ha kiʻi finemui taʻu hongofulu tupu ne toki mālōlō ko e tupu mei he kanisaá. Naʻá ne pehē: “Ko e tui homau fāmilí ʻoku ʻi he ʻEiki ko Sīsū Kalaisí, ʻo ʻikai ʻi he ngaahi meʻa ʻe hokó.” ʻOku kei ongo moʻoni ʻa e ngaahi leá ni kiate au. (“Fakamoʻui ʻo e Mahakí,” Liahona, Mē 2010, 50)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Ko e founga ʻe taha ke kamata ʻaki e lēsoní, ko hono haʻi ha mata ʻo ha tokotaha ʻe loto-lelei ke fakahoko ia. ʻE lava ke ke vilohi tuʻo taha pe tuʻo ua ʻa e tokotaha akó ke toe faingataʻa ange e ngāue te ne faí. Te ke lava foki ʻo ʻunuakiʻi ha niʻihi ʻo e ngaahi tesí pe seá ke fakafeʻātungiaʻi ʻenau malava ke lue ki he tafaʻaki ʻe taha ʻo e lokí. Kole leva ki he tokotaha akó ke lue ki he tafaʻaki ʻe taha ʻo e loki akó. Fakapapauʻi ʻoku malu ʻa e tokotaha akó. Hili ha toutou feinga, te ke lava ʻo kole ki he tokotaha akó ke fili ha taha ʻi he loki akó ʻoku falala te ne tokoniʻi ia ke aʻu ki he tafaʻaki ʻe tahá.

Hili iá, te ke lava ʻo fehuʻi ki he tokotaha akó pe ko e hā naʻá ne fili ai ʻa e tokotaha ako naʻá ne filí. Hili iá, te mou lava ʻo aleaʻi e ngaahi ʻulungaanga ʻo e niʻihi fakafoʻituitui ʻe falala ki ai ʻa e kau akó, ʻo hangē ko hono fakamatalaʻi ʻi he lēsoní.

Ko hono fakaʻaongaʻi ʻo e fakatātaá

Mahalo te ke fie tokoni ke mahino lelei ange ki hoʻo kau akó ʻa e ngaahi kupuʻi lea ʻi he Lea Fakatātā 3:5–6. Fakakaukau ke fakaafeʻi kinautolu ke fakalaulauloto pe kuo nau ʻi ha fakapoʻuli lōlō, pea kapau ʻoku ʻio, ko e hā e ongo ne nau maʻú. Vahevahe leva e lea ko ʻení meia Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá. Fakaafeʻi e kau akó ke fakakaukauloto ki he fakatātā ʻoku fakaʻaongaʻi ʻe Palesiteni Pēká:

ʻI hoʻo fekumi ke maʻu ha ʻilo fakalaumālié, ʻoku ʻi ai ʻa e “fili ʻoku makatuʻunga ʻi he tuí,” ʻo hangē ko hono ui ʻe he kau tangata potó. Ko e momeniti ia kuó ke aʻu ai ki he ngataʻanga ʻo e māmá peá ke manga atu ki he fakapoʻulí ke ʻiloʻi ai kuo fakamaamaʻi ʻa e hala ʻi muʻa ʻiate koé ʻi ha foʻi manga pē ʻe taha pe ua. (“The Candle of the Lord,” Ensign, Jan 1983, 54)

Hili iá, te ke lava ʻo fehuʻi ki he kau akó ʻa e ngaahi meʻá ni:

ʻOku tokoni fēfē ʻa e fakatātā ko ʻení ke mahino kiate koe ʻa e Lea Fakatātā 3:5–6?
Ko e fē ha taimi kuó ke falala ai ki he ʻEikí ʻi he founga ʻoku fakamatalaʻi ʻe Palesiteni Pēká?

Lea Fakatātā 3:6. “Ke ke fakaongoongo kiate ia ʻi ho hala kotoa pē, pea ʻe fakatonutonu ʻe ia ho ngaahi ʻaluʻangá”

ʻE ala ʻaonga ki hoʻo kau akó hano ako lahi ange ʻo e Lea Fakatātā 3:6. Kapau ko ia, fakakaukau ke ʻoange ki he kau akó ha laʻipepa. Kole ange ke nau pelu ua ia. Te nau lava ʻo tohiʻi ʻa e Fakamālōʻiaʻi Ia ʻi ʻolunga ʻi ha kōlomu ʻe taha, pea ʻi ʻolunga ʻi he kōlomu ʻe tahá ʻa e ʻE tataki ʻe Ia ho ngaahi ʻalungá. Fakaafeʻi e kau akó ke tauhi ha lekooti ʻi he ngaahi ʻaho siʻi ka hokó. Kole ange ke nau lekooti ha ngaahi founga ʻoku nau fakamālōʻia ʻa e ʻEikí ʻi heʻenau moʻuí mo e ngaahi founga ʻokú Ne tataki honau halá. ʻE lava ke vahevahe ʻe he kau akó ʻenau ngaahi aʻusiá ʻi ha kalasi ʻamui ange.

Vitiō hivá

Ke tokoni ke ongoʻi ʻe hoʻo kau akó ʻa e mahuʻinga ʻo e falala ki he ʻEikí, fakakaukau ke huluʻi ha foʻi vitiō hangē ko e “Trust in the Lord: Music Video” (4:11). Kapau ʻe lava, fakakaukau ke ʻoange ki he kau akó e lea ki he hivá. Fakaafeʻi ke nau kumi ha ngaahi kupuʻi lea ʻoku tokoni ke nau fie falala ki he ʻEikí.

4:11