Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Talateu ki he Lea Fakatātaá: “ʻOku Foaki [ʻe he ʻEikí] ʻa e Potó”

“Talateu ki he Lea Fakatātaá: ‘ʻOku Foaki [ʻe he ʻEikí] ʻa e Potó,’” Fuakava Motuʻá – Tohi Lēsoni ʻa e Faiako Seminelí (2026)

“Talateu ki he Lea Fakatātaá: ‘ʻOku Foaki [ʻe he ʻEikí] ʻa e Potó,’” Fuakava Motuʻá – Tohi Lēsoni ʻa e Faiako Seminelí

Lea Fakatātā 1–4; 15–16; 22; 31; Tangata Malanga 1–3; 11–12: Lēsoni 109

Talateu ki he Lea Fakatātaá

“ʻOku Foaki [ʻe he ʻEikí] ʻa e Potó”

Jesus Christ depicted as a young boy in the carpenter shop of Joseph. Joseph is standing behind the young Christ. Christ is reading the scriptures from a scroll resting on a table. There are wood shavings on the table.

Kuo tāpuekina fēfē hoʻo moʻuí ʻe he faleʻi fakapotopoto mei he ngaahi ʻofaʻanga falalaʻangá? ʻE lava ke hangē hono ako e tohi Lea Fakatātaá ko e fekumi ki he potó mei ha kaungāmeʻa tokanga, mēmipa ʻo e fāmilí, pea mo e ʻEikí. ʻE lava ke hanga ʻe heʻetau fakaʻaongaʻi Hono potó ʻi heʻetau moʻuí ʻo pukepuke kitautolu ʻi he hala fāsiʻi mo lausiʻi ʻo e fuakavá. ʻE lava ke tokoni ʻa e lēsoni ko ʻení ke ʻiloʻi ʻe he kau akó ʻa e ngaahi moʻoni ʻe lava ʻo tokoni ke nau muimui ʻi he hala ʻo e ʻEikí.

Teuteu ʻa e tokotaha akó: Fakaafeʻi e kau akó ke nau fili ha faleʻi mahuʻinga pe ngaahi lea ʻaonga ʻo e faleʻi kuo nau maʻu mei he mātuʻá, kau takí, mo e ngaahi kaungāmeʻa falalaʻangá. Fakaafeʻi e kau akó ke teuteu ke vahevahe ʻa e faleʻí mo e founga kuó ne tāpuekina ai ʻenau moʻuí.

Ngaahi ʻEkitivitī Ako ʻOku Ala Fakahokó

Faleʻi falalaʻanga

Fakakaukau ke kamata e kalasí ʻaki hano ʻoange ha fanga kiʻi laʻipepa maʻá e kau akó. Kole ange ke nau hiki ha faleʻi pe akonaki mahuʻinga kuo ʻoange kiate kinautolu. Hili hono tānaki e ʻū laʻipepá, te ke lava ʻo lau ha niʻihi ʻo e ngaahi talí. Fakaafeʻi ʻa e tokotaha ako naʻá ne hiki ʻa e talí ke vahevahe ʻa e founga kuo tokoniʻi ai ia ʻe he faleʻi ko iá. ʻE lava ke paasi takai ʻe he kau akó ʻa e toenga ʻo e ngaahi laʻipepá ʻi he lokí, ʻo lau e faleʻi ʻa e kaungāako kehé. Fakaafeʻi leva ʻa e kau akó ke aleaʻi ʻa e ngaahi fehuʻi ko ʻení.

Ko e hā ʻokú ne ʻai ha faleʻi ʻa ha taha ke mahuʻingamālie kiate koe?
Te ke ʻiloʻi fēfē pe ko e faleʻi ʻa hai te ke lava ʻo falala ki aí?

Hili hono vahevahe ʻe he kau akó ʻenau ngaahi talí, te ke lava ʻo fakaafeʻi kinautolu ke nau fakalaulauloto ʻi he faʻa lotu ki he ngaahi fehuʻi hokó.
Ko e hā hono tuʻo lahi hoʻo muimui ki he faleʻi fakapotopoto ʻa e niʻihi kehé?
Ko e hā hono tuʻo lahi hoʻo fekumi mo muimui ki he faleʻi ʻa e ʻEikí?

Ko e poto ʻo e Lea Fakatātaá

Ko e tohi Lea Fakatātaá ko hano fakatahatahaʻi ia ʻo ha poto fakapunake naʻe tohi ki he kakai ʻIsilelí. ʻOku ʻi ai ha ngaahi potufolofola ʻe niʻihi ʻi he Lea Fakatātaá ʻoku pehē ko e lea ʻa e Tuʻi ko Solomoné (vakai, Lea Fakatātā 1:1; 10:1; 25:1; vakai foki, 1 Ngaahi Tuʻi 4:32), kae ʻikai ʻiloʻi ʻa e kau faʻu tohi kehé. ʻI hoʻo ako ʻa e Lea Fakatātaá, tokanga ki he founga ʻoku fakamoʻoniʻi ai ʻe he Laumālie Māʻoniʻoní ʻa e moʻoní ʻi hoʻo ʻiloʻi ʻa e fakahinohino ʻoku finangalo ʻa e ʻEikí ke ke fakaʻaongaʻi ʻi hoʻo moʻuí.

Te ke lava ʻo fakamanatu ki he kau akó ʻoku fakaʻaongaʻi ʻe he Lea Fakatātaá (hangē ko Siope mo e Tangata Malangá) ha ngaahi ʻelemēniti ʻo e maau faka-Hepeluú ʻa ia ʻe lava ke faingataʻa ki he kau laukongá. Kapau ʻe fiemaʻu, vahevahe ange neongo ʻoku fakalaumālie lahi ʻa e ngaahi Lea Fakatātaá, ka ko e niʻihi ko ha faleʻi fakamāmani pē.

Lau ʻa e Lea Fakatātā 1:1–7, ʻo kumi ha niʻihi ʻo e ngaahi taumuʻa ʻo e lea fakatātaá.

Fakaafeʻi ʻa e kau akó ke vahevahe ʻa e meʻa naʻa nau maʻú. Kapau ʻe ʻaonga, te ke lava ʻo fehuʻi ange pe ko e hā ʻoku mahuʻinga ai ʻa e potó ke ako he ʻaho ní.

Fakakaukau ke fakamatalaʻi ange ʻoku ʻuhinga ʻa e “manavahē [ki he ʻEikí]” (veesi 7) ki he ongoʻi mo e fakahaaʻi ʻo e ʻapasia mo e fakaʻapaʻapa kiate Iá. Mahalo ʻe fie tohi ʻe he kau akó ʻa e fakamatala ko ʻení ʻi heʻenau folofolá.

ʻOkú ke pehē ko e hā ʻoku hoko ai e ʻaʻapa pe fakaʻapaʻapa ki he ʻEikí “ko e kamataʻanga ia ʻo e ʻiló”? (veesi 7).

Lau ʻa e Lea Fakatātā 2:6–9, ʻo kumi e tupuʻanga ʻo e poto moʻoní. (Fakatokangaʻi ange: ko e fakauú ko ha pā ia ʻoku toʻotoʻo holo.) Fakakaukau ke fakafehokotaki pe fakafekauʻaki ʻa e ngaahi veesi ko ʻení mo e Mōsaia 4:9.

Te ke fakamatalaʻi fakanounou fēfē ʻa e meʻa naʻá ke akó ko ha fakamatala ʻo e moʻoní?

Tokoni ke ʻiloʻi ʻe he kau akó ha foʻi moʻoni hangē ko e ʻoku ʻomi ʻe he ʻEikí ha poto ke tokoni ke tau muimui ʻi Hono halá. Te ke lava ʻo fakaafeʻi ʻa e kau akó ke hiki ʻa e foʻi moʻoni ko ʻení ʻi heʻenau kiʻi tohí, folofolá, pe tohinoa akó lolotonga hoʻo hiki ia ʻi he palakipoé. ʻE lava ke vahevahe ʻe he kau akó ha ngaahi sīpinga ʻo ha ngaahi taimi naʻe tokoniʻi ai kinautolu ʻe he poto ʻo e ʻEikí. Te nau lava ʻo aleaʻi ʻa e founga ʻe ala kehe ai Hono potó mei he poto ʻo e māmaní. Mahalo ʻe tala atu ʻe he kau akó ʻoku fakaiku e ngaahi meʻa hangē ko e totongi vahehongofulú ki he ngaahi tāpuaki ʻa e ʻEikí (Malakai 3:10) pe ʻoku ʻomi ʻe he muimui ki he fono ʻa e Fakamoʻuí ki he moʻui leleí ha ngaahi tāpuaki fakatuʻasino mo fakalaumālie (Tokāteline mo e Ngaahi Fuakava 89:18–21).
Kuo tokoniʻi fēfē koe ʻe he muimui ki he faleʻi fakapotopoto ʻa e ʻEikí ke ke nofo maʻu ʻi Hono halá?
Ko e hā ha ngaahi sīpinga ʻo e taimi naʻe fekumi ai ʻa e Fakamoʻuí ki he potó mei Heʻene Tamaí kae ʻikai mei he ngaahi maʻuʻanga tokoni kehé?

ʻE lava ke tokoniʻi kitautolu ʻe he poto ʻo e ʻEikí ke tau muimui ʻi Heʻene sīpingá

Tokoni ke ʻiloʻi ʻe he kau akó ʻa e ngaahi moʻoni ʻokú ne fakaafeʻi kinautolu ke muimui ki he Fakamoʻuí pea hoko ʻo hangē ange ko Iá. Ke fai iá, te ke lava ʻo ʻomi ha niʻihi pe kotoa ʻo e ngaahi fakamoʻoni fakafolofola ko ʻení mei he Lea Fakatātaá. Te ke lava ʻo hiki ʻa e ngaahi fakamoʻoni fakafolofola ʻokú ke filí ʻi ha fanga kiʻi laʻipepa. Te ke lava ʻo ʻoange ha laʻipepa ʻe taha ki he tokotaha ako takitaha. Fakaafeʻi kinautolu ke nau lau ʻa e fakamoʻoni fakafolofolá pea fakahoko ʻa e ongo sitepu ʻe ua ʻi laló. Hili iá pea ʻe lava ke ʻoange ʻe he kau akó ʻenau laʻipepá ki ha tokotaha ako ʻe taha pea toe fakahoko ʻa e sitepu ʻe uá. Toutou vilo takai pē kae ʻoua kuo ako ʻe he kau akó ha ngaahi potufolofola lahi.

Fakatokangaʻi ange: ʻE nofotaha ʻa e Lēsoni 110: “Lea Fakatātā 3” ʻi he ngaahi moʻoni ʻoku maʻu ʻi he vahe ko iá.

Ako ha potufolofola ʻe taha pe lahi ange mei he Lea Fakatātaá, pea fai ʻeni:

Hiki ʻa e meʻa ʻokú ke akó ko ha fakamatala ʻo e moʻoní.
Hiki ha fakamatala nounou ki he founga ʻe lava ke tokoniʻi ai ʻe he poto ko ʻení ha taha ke muimui ʻi he sīpinga ʻa Sīsū Kalaisí pe hoko ʻo hangē ange ko Iá.

Lea Fakatātā 16:18–19

ʻE lava ke tokoni ʻa e ʻekitivitī ko ʻení ki he kau akó ke fakamatalaʻi ʻa e meʻa naʻa nau ako mei heʻenau ako ʻa e Lea Fakatātaá. ʻE lava ke fakahoko fakafoʻituitui ʻe he kau akó ʻa e ʻekitivitī ko ʻení, pe ko hoʻo vahe kinautolu ki ha ngaahi kulupu. Te ke lava ʻo ʻoange ha pepa mo ha naunau ʻaati ke faʻu ʻaki ha pousitā, pe ko hono faʻu ʻe he kau akó ha meʻa ʻi heʻenau telefoní. Ke tokoni ki he kau akó, fakaʻaliʻali ʻa e ngaahi fakahinohino ko ʻení.

2026 Old Testament Seminary Teacher Materials

Fakakaukauloto naʻe kole atu ke ke faʻu ha fakatātā ʻokú ne fakaʻaongaʻi ha taha ʻo e ngaahi potufolofola ʻi he Lea Fakatātaá ke tokoni ki he toʻu tupú ke nau hoko ʻo hangē ange ko e Fakamoʻuí. Fili ha Lea Fakatātā pea faʻu ha pousitā hangē ko ha pousitā te ke ala maʻu ʻi he makasini Ki Hono Fakamālohia ʻo e Toʻu Tupú. ʻE lava ke kau ʻi hoʻo fakatātaá ʻa e ngaahi meʻá ni:

Ko ha fakatātā faingofua—ko ha meʻa mohu founga te ne lava ʻo maʻu e tokanga ʻa ha toʻu tupu
Ko e vahe mo e veesi ʻo e Lea Fakatātaá mo e moʻoni ʻokú ne akoʻí
Ko ha fakamatala ki he founga ʻe lava ke tokoniʻi ai ʻe he veesi mei he Lea Fakatātaá ha taha taʻu hongofulu tupu ke muimui ʻi he sīpinga ʻa e Fakamoʻuí pe hoko ʻo hangē ange ko Iá

Vahevahe ʻa e poto ʻo e Lea Fakatātaá

ʻOange ha faingamālie ki he kau akó ke vahevahe pe fakaʻaliʻali ʻenau fakatātaá. Kapau naʻe fakahoko fakakulupu ʻe he kau akó ʻa e ʻekitivitī ko ʻení, te nau lava ʻo fili ha taha ke ne fakamatalaʻi ʻenau fakatātaá ki he kalasí. Te ke lava ʻo fakaʻaliʻali takatakai ʻa e ngaahi pousitaá ʻi he lokí, pea ʻe lava ke toe vakaiʻi ʻe he kau akó ʻa e ngāue ʻa honau kaungāakó. Ke fakaʻosi e kalasí, te ke lava ʻo fakaafeʻi e kau akó ke aleaʻi e ngaahi fehuʻi ko ʻení pe tali ʻi heʻenau tohinoa akó.

Kiʻi tuʻu hifo ʻo fakakaukau ki he ngaahi ongo naʻá ke mei maʻu lolotonga e lēsoni ʻo e ʻaho ní. Hili ia pea tali ʻa e ngaahi fehuʻi ko ʻení ʻi hoʻo tohinoa akó:

Kuo tokoniʻi fēfē ʻe he ngaahi moʻoni naʻá ke ako he ʻaho ní hoʻo holi ke muimui ki he ʻEikí?
Ko e hā kuó ke ongoʻi ke fai ke hoko ʻo hangē ange ko e Fakamoʻuí?

Ngaahi Maʻuʻanga Tokoni Kehé

Ko e fē te u maʻu mei ai ʻa e potó?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI hoʻomou fekumi ki ha tataki fakalaumālie ke maʻu ʻa e poto ʻoku mou fiemaʻu ʻi hoʻomou moʻuí, ʻoku ou fakaafeʻi kimoutolu ke mou vakai ki he Fakamoʻuí. Ko e founga lelei ʻe taha ke haʻu ai kia Kalaisí ko hono lau ʻa e Tohi ʻa Molomoná—mei he kamataʻangá ki he ngataʻangá—pea ʻiloʻi ʻa e ngaahi ʻulungaanga mo e ngaahi tōʻonga moʻui ʻo Sīsū Kalaisi ʻoku maʻu aí. ʻI hoʻo fai ʻeni ʻi he loto-moʻoni mo e loto fakamātoató, te ke lava ʻo fanongo ki Hono leʻó. Te ke lava ʻo ʻiloʻi Ia ʻi ha founga fakaofo moʻoni. (“Ko Hono Maʻu ʻo e Fakahaá—Ngaahi Pōpoaki Fakamuimuitaha mei he Kau Palōfitá, Kau ʻAposetoló, mo e Kau Taki Kehe ʻo e Siasí” [fakamatala fakakomipiuta pē], Liahona, Sune 2023, Gospel Library)

Ko e hā ʻoku fakatuʻutāmaki ai ke falala ki he poto ʻo e tangatá?

Naʻe fakamatalaʻi ʻe Palesiteni Lāsolo M. Nalesoni ʻo pehē:

5:49

ʻOku vivili mo taʻefaʻalaua e ngaahi leʻo mo e mālohi ʻo e māmaní. Ka ʻoku lahi fau ha ngaahi leʻo ʻoku kākā, olopoto, mo lava ke fusi kitautolu mei he hala ʻo e fuakavá. Ke hao mei he loto-mamahi mahino ʻoku muiaki maí, ʻoku ou kōlenga atu ʻi he ʻahó ni ke mou fakafepakiʻi e fakatauele ʻa e māmaní ʻaki hano fokotuʻu ha taimi moʻó e ʻEikí ʻi homou moʻuí—ʻi he ʻaho kotoa pē.

Kapau ko e lahi taha e fakamatala ʻokú ke maʻú mei he mītia fakasōsialé pe ha toe mītia kehe, ʻe hōloa hoʻo malava ke ongoʻi e fanafana ʻa e Laumālié. Kapau ʻoku ʻikai ke ke fekumi fakaʻaho ki he ʻEikí ʻi he lotu mo e ako ʻo e ongoongoleleí, ʻokú ke tuʻu ai ʻi ha tuʻunga ʻe uesiangofua ʻe he ngaahi fakakaukau fakapoto ʻo e tangatá, ʻa ia ʻe ngali lelei ka ʻoku ʻikai moʻoní. (“Fokotuʻu ha Taimi moʻó e ʻEikí,” Liahona, Nōvema 2021, 120)

Ko e hā e kehekehe ʻo e ʻiló mo e potó?

Naʻe fakamatala ʻa Palesiteni Tēvita O. Makei (1873–1970) ʻo pehē:

Ko e meʻa ʻe taha ʻa hono maʻu ʻo e ʻiló, pea ko hono fakaʻaongaʻí [ko ha] meʻa kehe ia. Ko e potó ko hono fakaʻaongaʻi totonu ia ʻo e ʻiló. (ʻi he Conference Report, Apr. 1968, 93)

Ngaahi ʻEkitivitī Fakalahi ki he Akó

Lea Fakatātā 4:14–15. Fakaʻehiʻehi mei he “ʻalunga ʻo e kakai angakoví”

Naʻe akoʻi ʻe he ʻEikí ʻo fakafou ʻi he ʻAposetolo ko Paulá, kuó Ne ʻomi ha founga ke tau hao ai mei he ʻahiʻahi kotoa pē (vakai, 1 Kolinitō 10:13). ʻOku tau ako ʻi he Lea Fakatātaá, ko e founga ʻa e ʻEikí ke hao ai mei he ʻahiʻahí ko e tomuʻa fakaʻehiʻehi mei ai. Fakaafeʻi e kau akó ke lau ʻa e Lea Fakatātā 4:14–15. Kole ange ke nau faʻu ha tūkunga ʻe lava ke fakamatalaʻi ʻe he potufolofola ko ʻení. ʻE lava ke faʻu fakakulupu ʻe he kau akó ʻa e tūkungá. Hili iá, te nau lava ʻo fakafetongi ʻenau ngaahi tūkungá mo ha kulupu ʻe taha pea aleaʻi e founga ʻe lelei ange ai e fakaʻehiʻehi mei he ʻahiʻahí ʻi he feinga ke tekeʻi iá. ʻE lava foki ke fokotuʻu mai ʻe he kau akó ha ngaahi founga ʻe niʻihi ke fakaʻehiʻehi ai mei he ngaahi tūkunga ʻe ala ʻahiʻahiʻi ai kitautolu ke tau faiangahalá.

Ke fakaloloto e mahino ʻa e kau akó, te ke lava foki ʻo huluʻi e vitiō “Avoid It” mei he taimi 0:00 ki he 2:59. ʻOku fakaʻaongaʻi ʻe ʻEletā Lini G. Lōpini ʻo e Kau Fitungofulú ha fakatātā ʻo e fakaʻehiʻehi mei he kūkisi sokoletí ke fakahaaʻi ʻaki ʻa e poto ʻo e Lea Fakatātā 4:14–15.

Lea Fakatātā ke tāpuekina e moʻui ʻa ha taʻu hongofulu tupu

Mahalo te ke fie tokoni ki he kau akó ke nau vakai ki he founga ʻe lava ke tokoniʻi ai ʻe he poto ʻo e Lea Fakatātaá ha taha taʻu hongofulu tupu. Ko e founga ʻe taha ko hono fokotuʻu ha haʻi. Fili ha fakamoʻoni folofola ʻe 16 mei he Lea Fakatātaá pea hiki ia ʻi he laine ʻi tuʻá. Vahevahe ʻa e kau akó ki ha kulupu ʻe 8. ʻE lau ʻe he kulupu takitaha ha seti fakamoʻoni folofola ʻe ua mei he Lea Fakatātaá pea tali ʻa e ngaahi fehuʻi ko ʻení:

ʻOkú ke pehē ko e lea fakatātā fē ʻe mahuʻingamālie taha ʻi hoʻo moʻuí he taimi ní?
ʻE tokoniʻi fēfē koe ʻe he lea fakatātā ko ʻení ke ke muimui ki he sīpinga ʻa e Fakamoʻuí pe hoko ʻo hangē ange ko Iá?

Hili ʻa e fealēleaʻakí, ʻe lava ke fili ʻe he ngaahi hoá ha veesi ʻe taha ʻokú ne tali lelei taha ʻa e ongo fehuʻi ko ʻení. ʻOku ʻave leva ʻa e veesi naʻa nau filí ki he takai hono hokó. Fakatahaʻi ʻa e kau akó ki ha kulupu foʻou ʻe fā, pea ʻai ke nau toe fai ʻa e ʻekitivitií, lau ʻa e ngaahi vēsí pea aleaʻi pe ko e fē ʻa e lea fakatātā te nau hiki ki he takai hono hokó. Hokohoko atu kae ʻoua kuo toe ha potufolofola pē ʻe taha mei he Lea Fakatātaá. Hili hono fili ʻo e lea fakatātā fakaʻosí, ʻe lava ke vahevahe ʻe he kau akó ʻa e founga kuo nau mamata ai ki hono tokoniʻi kinautolu ʻe he moʻoni ko ʻení pe ko ha taha ʻoku nau ʻiloʻi ke muimui ki he Fakamoʻuí.

Ngaahi akonaki fekauʻaki mo e potó

ʻE ala ʻaonga ki he kau akó hono toe vakaiʻi ʻo e ngaahi potufolofola ʻoku tokoni ke mahino kiate kitautolu ʻa e potó. Kapau ko ia, te ke lava ʻo fakaafeʻi e kau akó ke nau faʻu ha mape fakakaukau. Te ke lava ʻo fakatātaaʻi ʻa e ʻekitivitī ko ʻení ʻaki haʻo hiki ʻa e foʻi lea Potó ʻi loto-mālie ʻi he palakipoé. Fakaafeʻi e kau akó ke fakaʻaongaʻi ʻenau ngaahi meʻangāue ako folofolá ke maʻu ha ngaahi potufolofola ʻe lava ʻo tokoni ke mahino lelei ange ki ha taha ʻa e ngaahi akonaki ʻa e ʻEikí fekauʻaki mo e potó. Ka fiemaʻu ʻe he kau akó ha fakahinohino lahi ange, ʻe lava ke ke lisi ha ngaahi veesi hangē ko e Luke 2:52; Sēmisi 1:5; Mōsaia 4:9; ʻAlamā 37:35; Tokāteline mo e Ngaahi Fuakava 10:43. Te ke lava ʻo fakaafeʻi e kau akó ke omi ki he palakipoé pea tānaki atu ki he mape fakakaukaú ha ngaahi meʻa ʻoku nau ako mei he folofolá fekauʻaki mo e potó.